1, 2. а) Қийинчилиқларға бәрдашлиқ беришкә немә ярдәм бериду? Чүшәндүрүп бериң. ә) Бу мақалидин немини биливалимиз?

 СИЗ: «Бу қийинчилиқларға өз күчүм билән бәрдашлиқ берәлмәттим»,— дәп ейтқан вақитлириңиз болғанму? Көпинчилиримиз шундақ дәп ейтқан. Бәлким, сиз еғир кесәл азавини тартқан яки йеқин адимиңиздин айрилған болсиңиз, шу азаплиқ еғир күнләр тоғрилиқ ойлиғанда, пәқәт Йәһва Худаниң муқәддәс роһ арқилиқ бәргән «адәттики күчтин ешип чүшидиған күчиниң» ярдими биләнла қийинчилиқларға бәрдашлиқ бәргәнлигиңизни чүшинип йетисиз (Кор. 2-х. 4:7—9).

² Бу дунияниң тәсиригә қарши туруш үчүнму биз муқәддәс роһқа муһтаҗ (Йоһ. 1-х. 5:19). Униңдин ташқири, «вәһши роһий күчләргә» қарши күрәш қилиш үчүн бизгә күч-қувәт керәк (Әфәс. 6:12). Келиңлар, муқәддәс роһ қийинчилиқлар билән күришиш үчүн қандақ икки усулда ярдәм беридиғанлиғини көрүп чиқайли. Кейинирәк муқәддәс роһтин пайда елиш үчүн немә қилишимиз керәклигини биливалимиз.

3. Йәһва Худа бизгә қийинчилиқларға қарши турушқа қандақ ярдәм бериду?

³ Йәһваниң муқәддәс роһи бизгә қийинчилиқлиримизға қаримай, вәзипилиримизни орунлашқа күч бериду. Әлчи Паул синақларға дуч кәлсиму, «Мәсиһниң күчигә» таянғачқа, Йәһва Худаға хизмәт қилишни давамлаштуралиған (Кор. 2-х. 12:9). Иккинчи миссионерлиқ сәпиридә Паул көп вақтини вәз қилишқа сәрип қилғандин башқа, у йәнә җан беқиш үчүнму тәр төкүп көп әмгәк қилған. У Коринт шәһиридә болғанда Акила вә Прискиланиң өйидә яшиған. Улар чедир ясаш билән шуғулланған. Паулниңму қол һүнири охшаш болғачқа, у бирнәччә күн улар билән биллә иш қилишқан (Әлч. 18:1—4). Муқәддәс роһниң ярдими билән Паул һәм ишләлигән, һәм вәз қилалиған.

4. Коринтлиқларға 2-хәт 12:7ә — 9гә асасән, Паул қандақ қийинчилиқ билән күрәш қилған?

 ⁴ Коринтлиқларға 2-хәт 12:7ә — 9ни оқуң. Бу айәтләрдики Паулниң тенимгә тикән санчилди дегән сөзлири немини билдүриду? Әгәр тенимизгә тикән санчилса, әлвәттә шу җай қаттиқ ағрип қийнилимиз. Шуниңға охшаш, Паулму бир шәхсий қийинчилиғи түпәйли, худди уни «Шәйтанниң пәриштиси» «қамчилиғандәк» азапланған. Шәйтан вә униң җинлири Паулниң тикәнгә охшаш қийинчилиғиға удул мәнада сәвәпчи болмиғанду. Шундақ болсиму, қийинчилиқ Паулға тикәндәк санчилғанлиғини көргәндә, бу рәзил җинлар уни техиму чоңқурирақ санчишқа урунған. Шу чағда Паул немә қилған?

5. Йәһва Худа Паулниң дуасиға қандақ җавап бәргән?

⁵ Дәсләптә, Паул Йәһвадин уни шу тикәндәк санчилған қийинчилиқтин азат қилишини сориған. У мундақ дегән: «Азаптин қутулуш үчүн, Рәббимизгә [Йәһваға] үч қетим йелинип [ялвуруп] дуа қилдим». Бирақ Паул қанчә қетим ялвурсиму, тенидики тикәндин азат болмиған. Бу Йәһва Худа униң дуасиға җавап бәрмигән дегәнни билдүрәмду? Яқ. Йәһва Худа Паулниң дуалириға җавап бәргән. Йәһва Паулни қийинчилиғидин азат қилмисиму, униңға бәрдашлиқ беришкә күч бәргән. Худа униңға: «Мениң күч-қудритим аҗизлиқта мукәммәллишиду»,— дегән (Кор. 2-х. 12:8, 9). Йәһваниң ярдими билән Паул қәлбидә течлиқни сақлап, хошаллиғини йоқатмиған (Флп. 4:4—7).

6. а) Йәһва Худа дуалиримизға қандақ җавап бериши мүмкин? ә) Кәлтүрүлгән айәтләрдики қайси вәдиләр сизгә илһам бериду?

⁶ Сизму Паулға охшаш Йәһва Худадин сизни синақтин азат қилишини сорап ялвурғанму? Қанчә ялвурсиңизму, қийинчилиқ шу пети билән қалған яки һәтта техиму яманлишип кәткән болса, Йәһваниң көңлини хурсән қилмиған охшаймән дәп әнсиригәнмусиз? Шундақ болса, Паулниң мисалини есиңизгә елиң. Йәһва Худа Паулниң дуалириға җавап бәргәндәк, сизниңму дуалириңизға чоқум җавап бериду! Йәһва сизни қийинчилиқтин азат қилмисиму, муқәддәс роһи арқилиқ шу синаққа қарши туруш үчүн сизгә керәклик күч-қудрәт бериду (Зәб. 61:3, 4). Жиқилсиңизму, Йәһва Худа сизни һәргиз ташлап қоймайду (Кор. 2-х. 4:8, 9; Флп. 4:13).

7, 8. а) Муқәддәс роһ қайси мәнада шамалға охшайду? ә) Петрус муқәддәс роһниң тәсирини қандақ тәсвирлигән?

⁷ Муқәддәс роһ бизгә йәнә қандақ усулда ярдәм берәләйду? Уни шамал билән селиштурушқа болиду. Деңизда шиддәтлик боран-чапқун чиқсиму, шамал йөнилиши оң кәлсә, кемә өз нишаниға йетәләйду. Дәл шуниңға охшаш, муқәддәс роһ һаятниң боран-чапқунлириға қаримастин, Худа вәдә бәргән йеңи дунияға йетишимизгә ярдәм бериду.

⁸ Әлчи Петрус белиқчи болғачқа, кемидә сәпәр қилиш тоғрилиқ көп билгән. Бәлким, шу сәвәптинму, у муқәддәс роһниң тәсири тоғрилиқ язғанда, кемидә сәпәр қилиш билән мунасивәтлик сөзни ишләткән. У: «Чүнки бәшарәт һечқачан инсанниң ирадиси бойичә пәйда болмиған, әксичә, адәмләр муқәддәс роһниң башчилиғида Худаниң намидин сөзлигән»,— дәп язған. Бу айәттә «башчилиғида» дегән грек сөзниң удул мәнаси «елип меңиш», «бир җайдин башқа җайға елип бериш» дегәнни билдүриду (Пет. 2-х. 1:21).

9. Әлчи Петрус ишләткән «елип меңиш» дегән ибарини адәмләр аңлиғанда немини тәсәввур қилалатти?

⁹ Әлчи Петрус язған «елип меңиш» дегән ибарини аңлиғанда адәм немини тәсәввур қилалатти? Әлчиләр китавини язған Луқаму шамал «һайдап маңған» кемини тәсвирләш үчүн охшаш грек сөзини ишләткән  (Әлч. 27:15). Бир тәтқиқатчиниң ейтишичә, Петрус Муқәддәс китап язғучилирини муқәддәс роһ елип маңған дәп язғанда, «деңиз сәпиригә мунасивәтлик әҗайип қизиқ селиштурушни» қолланған. Петрусниң ейтмақчи болғини, шамал кемини нишаниға йәткүзгәндәк, муқәддәс роһму пәйғәмбәрләр вә Муқәддәс китап язғучилириға тапшуруғини орунлашқа ярдәм бәргән. Жуқурида тилға елинған тәтқиқатчи мундақ дегән: «Башқичә ейтқанда, пәйғәмбәрләр өз “йәлкәнлирини” ачқан». Йәһва Худа уларға өз тәрипидин «шамал» яки муқәддәс роһини бәргән. Муқәддәс китап язғучилири болса, муқәддәс роһниң йетәкчилигигә әгишип, өзигә тапшурулған вәзипини орунлиған.

10, 11. Муқәддәс роһ бизгә тәсир қилиши үчүн қайси икки қәдәм басқучни бесишимиз керәк? Мисал кәлтүрүң.

¹⁰ Әлвәттә, бүгүн Йәһва Худа муқәддәс роһни берип, адәмләргә Муқәддәс китапни яздурмайду. Амма Худа муқәддәс роһни Өз хизмәтчилирини йетәкләш үчүн қоллиниду. Йәһва Худа һазирму Өз тәрипидин һәрикәт қилишни тохтатмиған. Муқәддәс роһ бизниму йетәклиши үчүн немә қилсақ болиду? Буниң үчүн өз тәрипимиздин қандақ һәрикәт қилишимиз керәк?

¹¹ Бир мисални көрүп чиқайли. Шамалдин пайдилиниш үчүн деңизчи икки нәрсини қилиши керәк. Биринчиси, у кемини шамал уруп турған йөнилиштики бир җайға апириши керәк. Чүнки әгәр у кемини шамал урмайдиған портта қалдурса, кемә орнидин қозғалмайду. Иккинчиси, у кеминиң йәлкәнлирини чиқирип, кәңри ечиши лазим. Сәвәви, һәтта шамал чиқип турсиму, кемә шамалниң йөнилишигә тоғрилланмиса, кемә алға маңмайду. Шуниңға охшаш, биз пәқәт муқәддәс роһқа егә болсақла, Йәһваға давамлиқ хизмәт қилалаймиз. Муқәддәс роһ бизни йетәклиши үчүн икки қәдәм басқучни бесишимиз керәк. Биринчиси, муқәддәс роһ Худа хизмәтчилирини орунлашқа дәвәт қилған ишларни қилишқа тәйяр болушимиз керәк. Иккинчиси, «йәлкәнлиримизни кәң ечип», шу ишларни қолумиздин кәлгиничә бар күчимиз билән қилишимиз лазим (Зәб. 119:32).  Мошу қәдәм басқучларни бассақ, муқәддәс роһ бизниң қаршилиқ вә синақлар долқунлирида алға илгириләп, Худа вәдә қилған йеңи дунияға йетиш йолида садиқлиқ билән меңишимизға ярдәм бериду.

12. Һазир биз немини көрүп чиқимиз?

¹² Муқәддәс роһ бизгә қайси икки усулда ярдәм беридиғанлиғини биливалдуқ. Муқәддәс роһ синақларға дуч кәлгинимиздә бизгә күч берип, садиқ болуп қелишимизға ярдәм бериду. Шундақла бизни мәңгү һаятқа апиридиған йолда йетәкләп, шу йолдин чиқмай, Йәһва орунлишимизни халиған ишларни давамлиқ қилишимизға ярдәмлишиду. Әнди биз муқәддәс роһтин толуқ пайда елиш үчүн қайси төрт ишни қилишимиз керәклигини көрүп чиқимиз.

13. Тимотийға 2-хәт 3:16, 17гә асасән, Худа Сөзи бизгә қандақ тәсир қилиши мүмкин? Буниң үчүн немә қилишимиз керәк?

¹³ Биринчидин, Худа Сөзини тәтқиқ қилиң (Тимотийға 2-хәт 3:16, 17ни оқуң). «Худа тәрипидин роһландурулған» дәп тәрҗимә қилинған грек сөзи удул мәнада «Худа нәпәс пүвлигән» дегәнни билдүриду. Худа муқәддәс роһиниң ярдими билән Өз ой-пикирлирини Муқәддәс китап язғучилириға йәткүзгән. Биз Муқәддәс китапни оқуп, чоңқур ойланғанда, Худаниң көрсәтмилири әқлимизгә һәм жүригимизгә сиңиду. Худа тәрипидин илһамландурулған шу сөзләр Йәһваниң жүригини хошал қилиш үчүн, һаятимизни өзгәртишкә ярдәм бериду (Ибр. 4:12). Амма муқәддәс роһтин толуқ пайда елиш үчүн биз Худа Сөзини дайим үгиниш үчүн вақит чиқиришимиз вә оқуғанлиримиз үстидин мулаһизә қилишимиз керәк. Шу чағда муқәддәс роһ һәммә сөзлиримиз вә ишлиримизға тәсир қилиду.

14. а) Немә үчүн учришишлиримизда муқәддәс роһ бар дәп ейталаймиз? ә) Учришишларда муқәддәс роһтин толуқ пайда елиш үчүн немә қилалалаймиз?

¹⁴ Иккинчидин, Худаға башқилар билән бирликтә ибадәт қилиң (Зәб. 22:22). Җамаәт учришишлиримизда Худаниң муқәддәс роһи бар (Вәһ. 2:29). Немә үчүн шундақ ейталаймиз? Чүнки етиқатдашлар билән ибадәт қилиш үчүн җәм болғанда, биз муқәддәс роһни сорап дуа қилимиз, Худани мәдһийиләйдиған нахшиларни ейтимиз вә муқәддәс роһ арқилиқ тәйинләнгән бурадәрләр ейтидиған һәм Муқәддәс китапқа асасланған көрсәтмиләрни тиңшаймиз. Дәл шу Муқәддәс роһ аял қериндашларғиму тапшуруқлирини тәйярлашқа вә орунлашқа ярдәм бериду. Бирақ муқәддәс роһ бизгә тәсир қилиши үчүн, учришишларда җавап беришкә тәйярлиқ қилип келишимиз керәк. Шу чағда биз җамаәт учришишлириға «йәлкәнлиримизни ечип» келимиз.

15. Вәз қилғинимизда муқәддәс роһ бизгә қандақ ярдәм бериду?

¹⁵ Үчинчидин, вәз ишиға қатнишиң. Вәз қилғанда вә тәлим бәргәндә Худа Сөзини ишләтсәк, муқәддәс роһниң бизгә ярдәм беришигә йол қойимиз (Рим. 15:18, 19). Муқәддәс роһтин толуқ пайда елиш үчүн, биз дайим вәз қилип, имканийәт болсила һәрқачан Муқәддәс китапни ечип оқуп беришкә адәтлинишимиз лазим. Адәмләр билән техиму нәтиҗилик сөһбәтлишишниң бир усули — «Һаятимиз вә хизмитимиз» иш дәптиридики тәвсийә үлгилирини ишлитиш.

16. Қандақ қилип Муқәддәс роһқа беваситә еришәләймиз?

¹⁶ Төртинчидин, Йәһва Худаға дуа қилиң (Мәт. 7:7—11; Луқа 11:13). Йәһвадин муқәддәс роһ сорап дуа қилсақ, униңға беваситә егә болимиз. Йәһва Худаниң дуалиримизға қулақ селишиға һечнәрсә тосалғу болалмайду. Биз мәйли қәйәрдә болмайли, һәтта түрмидә болсақму, муқәддәс роһқа еришәләймиз. Шәйтанму муқәддәс роһқа егә болушимизға тосалғулуқ қилалмайду (Яқуп 1:17). Муқәддәс роһтин толуқ пайда  елиш үчүн қандақ дуа қилишимиз керәк? Бу соалға җавап елиш үчүн, пәқәт Луқа b китавида йезилған дуа тоғрилиқ бир мисални көрүп чиқайли.

17. Луқа 11:5—9, 13тә йезилған дуа тоғрилиқ мисалдин қандақ савақ алимиз?

¹⁷ Луқа 11:5—9, 13ни оқуң. Әйсаниң мисалидин муқәддәс роһни сорап, қандақ дуа қилиш керәклигини биливалимиз. Бу мисалда бир киши «қайта-қайта ялвуруши сәвәвидин» сориған нәрсисигә еришкән. Йерим кечә болсиму, шу адәм өз достидин ярдәм сораштин тартинмиған (Луқа 11:8) c. Әйса бу мисал билән дуа һәққидә немини үгәтмәкчи болған? У мундақ дегән: «Өтүнүшни давамлаштуруңлар — һәм силәргә берилиду, издәшни давамлаштуруңлар — һәм таписиләр, тақилдитишни давамлаштуруңлар — һәм силәргә ечип бериду». Биз буниңдин қандақ савақ алимиз? Муқәддәс роһқа еришиш үчүн, биз қайта-қайта дуа қилишимиз керәк.

18. Әйсаниң мисали Йәһваниң бизгә муқәддәс роһни чоқум беридиғанлиғини қандақ көрситиду?

¹⁸ Бу мисал Йәһва муқәддәс роһни немә сәвәптин беридиғанлиғиниму чүшинишимизгә ярдәм бериду. Мисалдики киши достиға меһмандостлуқни көрситишни халиған. У йерим кечидә кәлгән меһманни яхширақ күтүвелишни халиған, лекин өйидә йәйдиған һечнәрсә қалмапту. Әйса ейтқандәк, хошниси шу киши нанни қайта-қайта сориғачқа, униңға нан бәргән. Әйса бу мисал арқилиқ немини үгәтмәкчи болған? Намукәммәл инсан қайта-қайта сориған хошнисиға ярдәм бәргән болса, асмандики меһрибан Атимиз Униңдин қайта-қайта муқәддәс роһ сориғанларға уни беридиғанлиғи шәк-шүбһисиз. Шуңа биз Йәһвадин дуада муқәддәс роһни сорисақ, У дуалиримизға чоқум җавап беридиғанлиғиға һеч гуман қилмаймиз (Зәб. 10:17; 66:19).

19. Немә үчүн ғәлибә қазинидиғанлиғимизға ишәнчимиз камил?

¹⁹ Шәйтан бизгә тохтимай һуҗум қилсиму, бизниң ғәлибә қазинидиғанлиғимизға ишәнчимиз камил. Немә сәвәптин? Сәвәви муқәддәс роһ бизгә икки усулда ярдәм бериду. Биринчиси, бизгә синақларға бәрдашлиқ бериш үчүн күч-қувәт бериду. Иккинчиси, йеңи дуниядики һаятлиққа еришкичә Йәһваға давамлиқ хизмәт қилишимизға ярдәм бериду. Ундақта, келиңлар, муқәддәс роһтин толуқ пайда елишқа бәл бағлайли!