МӘН 1923-жили Йоркширдики (Англия) Хэмсворт шәһиридә туғулдум. Аилимиздә икки бала болди, мән вә акам. Акамниң исми  — Боб. Мән 9 яшта болғанда дадимиз бир китапларни оқушни башлиди, у йәрдә ялған дин адәмләрни қандақларчә алдайдиғанлиғи чүшәндүрүлгән. Оқуғанлири униңға қаттиқ тәсир қилған. Дадам диний рәһбәрләрниң өзлири үгәткәнлирини орунлимиғанлиғини яқтурматти. Бирнәччә жил өтүп, өйүмизгә Боб Аткинсон исимлиқ киши келип, Рутерфорд бурадәрниң бир нутуғини аңлатти. Шу чағда биз бу нутуқ вә дадамниң бурун оқуған китапларниң бир йәрдин екәнлигини чүшәндуқ. Ата-анам Аткинсон бурадәрни һәр күни ахшими биллә тамақ йейишкә чақирип, Муқәддәс китапқа тегишлик көп соал қойған. У бизни өйүмиздин бирнәччә километр жирақлитики бир бурадәрниң өйидә өткүзүлидиған учришишқа тәклип қилди. Биз шу учришишларға дайим қатнишидиған болдуқ. Шундақ қилип, Хэмсвортта бир кичик җамаәт пәйда болди. Көп өтмәй бизниң өйдә зонал хизмәтчиләр (һазир наһийилик назарәтчиләр дәп атилиду) тохтап туратти, шундақла йеқин аридики җамаәтләрдики пешқәдәмләрни меһманға чақираттуқ. Шу қериндашлар маңа бәк яхши тәсир қилған.

Шу вақитлири аилимиз шәхсий тиҗарәтни башлиди. Амма дадимиз акамға: «Әгәр сән пешқәдәм болушни халисаң, бу тиҗарәтни япимиз»,— деди. Боб келишти вә 21 йешида өйдин кетип, пешқәдәм болуп хизмәт қилишни башлиди. Икки жилдин кейин, 16гә толғинимда, мәнму пешқәдәм болдум. Дәм елиш күнлири башқилар билән вәз қилаттим, амма иш күнлири ялғуз хизмәт қилаттим. Мән патефон билән гувалиқ карточкилирини, йәни Муқәддәс китап һәққидә қисқа вә ениқ хәвәр йезилған карточкиларни, қоллинаттим. Йәһва Худа маңа бәрикитини төкүп, мән бир аял билән тәтқиқ қилишни башлидим вә кейинирәк у чөмдүрүлүш мәрасимидин өтти. Кейинирәк шу аялниң көп туққанлириму һәқиқәткә кәлди. Келәрки жили Мэри Хеншель исимлиқ қериндаш билән мәхсус пешқәдәм болуп тайинландим. Бизни Чешир өлкисидики таянланмиған территориягә әвәтти.

Иккинчи дуниявий уруш вақтида аяллар уруш билән бағлиқ ишларни қилиши керәк еди. Бәзи дин хизмәтчилири урушқа бериштин бошутулғанлиқтин, бизму мәхсус пешқәдәмләр сүпитидә  бошутилимиз дәп үмүт қилған едуқ. Лекин сот буниңға рази болмиди, шуңа мени 31 күнгә түрмигә қамиди. Келәрки жили, 19 яшқа толуп, вижданим урушни қоллашқа йол бәрмигәнликтин, сотқа йәнә 2 қетим беришқа тоғра кәлди. Амма икки қетимму улар мени қоювәтти. Бу вәзийәтләргә дуч кәлгәндә, маңа муқәддәс роһниң ярдәм бәргәнлигини вә Йәһва бу арқилиқ мени мустәһкәмлигәнлигини билдим (Йәшая 41:10, 13).

Артур Мэтьюз билән 1946-жили тонуштум. У урушқа қатнишишни рәт қилғанлиқтин, 3 ай түрмидә олтирип, әнди чиққан еди. Түрмидин чиқипла, у Хэмсвортта мәхсус пешқәдәм болуп хизмәт қилған иниси Деннисқа бариду. Дадиси уларға кичигидин тартип Йәһва һәққидә тәлим бәргән. Шуңа улар өсмүр чеғида чөмдүрүлүш мәрасимидин өтүп, кейин иккиси биллә пешқәдәм болуп хизмәт қилишни башлиди. Көп өтмәй Деннис Ирландиягә тайнлиниду. Шундақ қилип, Артур һәмкарсиз қалди. Ата-анам бу тиришчан пешқәдәмниң жүрүш-турушини көрүп, уни яқтуруп қалди. Шу сәвәптин, уни өйүмиздә турушқа чақирған екән. Мән өйгә барғанда, тамақлинип болғандин кейин, Артур иккимиз қача-қомуч жуяттуқ. Ахирида, бир-биримизгә хәт йезишқа башлидуқ. 1948-жили Артур йәнә үч айға түрмигә ташланди. 1949-жилниң январь ейида болса, биз баш қоштуқ. Бизниң мәхситимиз мүмкинқәдәр толуқ вақитлиқ хизмәтни тохтатмаслиқ еди. Биз аддий турмуш кәчүрүшкшә тириштуқ вә бираз пул тепиш үчүн, дәм елиш күнлиримиздә йәл-йемиш жиғаттуқ. Йәһваниң ярдими билән пешқәдәм болуп хизмәт қилишни давам қилалдуқ.

Бир жилдин сәл ашқанда, биз Шималий Ирландиягә тайинландуқ. Авал Арма дегән шәһәрдә, кейин Ньюри шәһиригә бардуқ. Турғунларниң көпчилиги католиклар болған вә улар башқа дин адәмлирини яхши көрмигәнликтин, вәз қилғанда авайлап, зерәк болушимиз керәк еди. Учришишлиримиз биз турған йәрдин 16 километр жирақ йәрдә җайлашқан бир бурадәрниң өйидә өтти. Бәзидә униң өйидә қонаттуқ. Биз йәрдә ухлап, келәрки күни әтигәндә һәммимиз жиғилип, хошал-хорам биллә тамақ йәттуқ. Һазир шу йәрдә Гувачиларниң сани көп екәнлиги зор хошаллиқ әкелиду.

Акам билән аяли Лотти Шималий Ирландиядә мәхсус пешқәдәм болуп хизмәт қилатти. 1952-жили төртимиз Белфастта өтидиған вилайәтлик конгрессқа қатнаштуқ. Бир бурадәр меһмандостлуқ көрситип, төртимизни вә Британиядики филиал хизмәтчиси Прайс Хьюзни өз өйидә қобул қилди. Бир кәчтә «Худаниң йоли — меһир-муһәббәт» намлиқ йеңи китапчини муһакимә қилдуқ. Бу китапчә алайтән ирландиялиқлар үчүн чиқирилған еди. Хьюз бурадәр Ирландия Җумһурийитидики католикларға вәз қилиш қийин болғанлиғини чүшәндүрди. Шу йәрдики қериндашларни туруватқан җайлиридин кетишкә мәҗбурлап, диний хизмәтчиләр адәмләрни қериндашлиримизға қаршилаштурған. Хьюз бурадәр мундақ деди: «Бизгә машиниси бар әр-аяллар керәк, улар мошу дөләттә китапчини тарқитиш мәхсус паалийитигә қатнашса дәймиз» * (Изаһәткә қараң). «Биз тәйярмиз!— дәп җавап бәргинимиз дәп шу вақит болған еди.

 Дублинда пешқәдәмләр жиллар давамида садиқ хизмәт қилған Рутланд «апимизниң» өйидә тохтиған. Бизму бираз вақит шу йәрдә турдуқ. Бәзи мүлкүмизни сетип, кейин төртимиз Бобниң мотоциклиға олтиривелип, машина издәшкә чиқтуқ. Биз яхши һаләттә болған бир машина тепивалдуқ, лекин һечқайсимиз һайдашни билмигәнликтин, сатқучини уни өйүмизгичә йәткүзүп беришни соридуқ. Артур шу кәчтә каравәттә олтирип, машина жүргүзгәндәк болди. Келәрки күни әтигән шу машинини гараждин чиқиримән дәп қийниливатқанда, Милдред Уиллет (кейинирәк Джон Барр бурадәргә турмушқа чиққан) исимлиқ миссионер келип қалди. У машина һайдашни билгәнликтин бизни анчә-мунчә үгитип, андин йолға чиқишқа тәйяр болдуқ.

Әнди бизгә яшайдиған йәр издәш керәк еди. Қериндашлар бизгә сәяһәт машинисида турмаслиқни мәслиһәт бәрди, чүнки дүшмәнләр униңға от қоюветиши мүмкин еди. Шуңа биз өй издәшни башлидуқ, бирақ һәммиси бекар болди. Шу күни төртимиз машинида ухлидуқ. Келәрки күни тапқинимиз пәқәт қолдин ясалған кичик сәяһәт машиниси болди. У бизниң өйүмизгә айланди. Бир қизиқарлиғи, уни қойидиған йәрни тепиш бәк оңай болди, сәвәви йәрлик деханлар бизгә меһрибанлиқ билән өз йеригә қоюшқа рухсәт бәрди. Биз сәяһәт машинисини бир орунға қоюп, униңдин 16—24 километрдәк йәрдә вәз қилаттуқ. Башқа йәргә көчкәндә, буниңдин авал турған йәргә берип хуш хәвәр ейтаттуқ.

Биз анчә көп қаршилиққа дуч кәлмәй, Ирландия Җумһурийитиниң шәрқий җәнуптики барлиқ өйләрни арилидуқ. 20000дин ошуқ китапчә тарқаттуқ вә қизиқиш көрсәткән адәмләрниң исимлирини Британиядики филиалға әвәттуқ. Һазир Ирландиядә йүзлигән Гувачиниң болғанлиғи немә дегән зор бәрикәт!

Бирнәччә жил өткәндин кейин, биз җәнубий Лондонға тайинландуқ. Бирқанчә һәптидин кейин, Британия филиалидики бурадәрләр Артур билән алақилишип, әтиси наһийилик назарәтчи сүпитидә хизмәт қилишни сориди! Бир һәптиниң ичидә алаһидә тәйярлиқтин өтүп, Шотландиядики наһийимизгә йолға чиқтуқ. Шу сәвәптин, Артурниң нутуқ тәйярлайдиған вақти бәк аз болди! Бирақ у Худаға болған хизмәттики һәрқандақ тапшуруқни, қанчилик қийин болмисун, хошаллиқ билән қилишқа тәйяр болған. Униң үлгиси мени қаттиқ илһамландурди. Наһийилик хизмитимиз иккимизгиму хошаллиқ әкәлгән. Жиллар давамида тайинланмиған территориядә хизмәт қилғандин кейин, шунчилик көп қериндашларниң арисида болғанлиғимиз биз үчүн чоң бәрикәт болди.

Артур 1962-жили Гилиад мәктивигә тәклип қилинғанда, бизгә бәк муһим қарар қилишқа тоғра кәлди. Мәктәп программиси он айға созулмақчи еди вә мени тәклип қилмиғанлиқтин, униң билән биллә баралматтим. Шундақ болсиму, биз Артурниң мәктәпкә бериши яхширақ болиду дәп қарар қилдуқ. Пешқәдәм һәмкарсиз қалғанлиқтин, филиал мени қайта Хэмсвортға мәхсус пешқәдәм сүпитидә тайинлиди. Бир жилдин кейин Артур қайтип кәлгәндә, биз вилайәтлик хизмәткә тайинландуқ. Бизниң вилайитимизгә Шотландия, Англияниң шимали вә Шималий Ирландия киргән.

1964-жили Артур Ирландия Җумһурийитидики Бәйтәлгә филиал хизмәтчиси болуп тайинланди. Бешида Бәйтәлгә беришқа бәк әнсиридим, чүнки сәйярлик хизмәтни қаттиқ яхши көрәттим. Өткән жилларға қарап, Бәйтәлдә хизмәт қилиш мәртивиси үчүн наһайити миннәтдармән. Берилгән вәзипини қилишни анчә халимисаңму, уни қобул қилсаң, Йәһва һәрқачан бәрикитини мол төкиду. Бәйтәлдә ишханида ишлидим, әдәбиятларни қачилидим, тамақ әттим вә тазалиқ иши билән шуғулландим. Шу вақит арилиғида биз йәнә вилайәтлик хизмәтниму атқурғанлиқтин, дөләтниң булуң-пушқақлиридики қериндашлар билән тонушушқа пурсәт болди. Бу вә биз билән тәтқиқ қилип, роһий өскән адәмләр билән көрүшкәнлигимиз Ирландиядики қериндашлар билән болған инақлиғимизни мустәһкәмлиди. Бу — әҗайип бәрикәт!

Ирландиядики биринчи хәлиқарилиқ конгресс 1965-жили Дублинда өткүзүлди * (Изаһәткә қараң). Қаршилиқ интайин қаттиқ болсиму, конгресс бәк яхши өтти вә 3948 адәм келип, уларниң 65 чөмдүрүлүш мәрасимидин өтти. Чәт әлдин кәлгән 3500 қериндаш Дублиндики өйләрдә тохтиди. Һәр өйниң егисигә миннәтдарлиқ хәтлири әвәтилди. Уларму өйлиридә турған қериндашларниң әдәплик жүрүш-турушини махтиди. Бу Ирландияниң тарихида алаһидә бир вақиә болди.

1966-жили җәнубий вә шималий Ирландиядики теократиялик иш бирлишип, Дублиндики филиалниң қол астиға өтти. Бундақ инақлиқ пүтүн аралдики диний вә сәясий бөлгүнчиликтин қаттиқ пәриқләнгән. Католикларниң һәқиқәткә келип, бурун протестант болған қериндашлар билән бирликтә хизмәт қилғанлиғини көрүп, хошаллиғимиз қин-қиниға патмиди.

2011-жили Британия вә Ирландия филиаллири бирикип, биз Лондондики Бәйтәлгә тайинланғанда, һаятимиз түп йилтизи билән өзгәрди. Шу вақитта мән Артурниң саламәтлиги һәққидә әнсирәшкә башлидим. Униңда Паркинсон кесили (титрәк кесили) тепилди. Әпсуски, 2015-жилниң 20-май күни 66 жил давамида һәмрайим болуп кәлгән яримдин айрилдим.

Ахирқи жиллири мән қаттиқ қайғуруп, җеним азапланди. Бурун Артур һәрқачан йенимда еди. Уни шунчә қаттиқ сеғиндим! Амма мундақ вәзийәткә дуч кәлгәндә, Йәһваға техиму йеқинлишисиз. Адәмләрниң Артурни қанчилик яхши көргәнлигини билгәндә, хошал болуп кәттим. Маңа Ирландия, Британия, һәтта Қошма Штатлардики қериндашлардин хәтләр кәлди. Бу хәтләр вә Артурниң иниси Деннис билән униң аяли Мэвис, уларниң қизлири Рут билән Джуди маңа зор мәдәт бериду.

Маңа Йәшая 30:18дики сөзләр тәсәлли бериду. У йәрдә: «Силәргә меһир-шәпқәт көрситимән дәп [Йәһва] күтиду вә шуңа У силәргә рәһим қилимән дәп орнидин қозғилиду, чүнки [Йәһва] һөкүм-һәқиқәт чиқарғучи Худадур, Уни күткәнләрниң һәммиси бәхитликтур!»— дәп йезилған. Йәһва һәммә қийинчилиқлиримизни һәл қилидиған вақитни күтиватқанлиғи вә йеңи дунияда бизгә наһайити қизиқарлиқ тапшурмиларни беридиғанлиғи маңа һәқиқий тәсәлли бериду.

Өтмүшкә қарап, Йәһваниң Ирландиядики вәз ишиға рәһбәрлик берип, униңға бәрикәт бәргәнлигигә көзүм йетиду. Бу ишқа өз һәссәмни қошалғиним мән үчүн чоң мәртивә. Һәқиқәтән, Йәһваниң дегинини қилсақ, һәрқачан бәрикитини көримиз!