1, 2. а) Йеқин арида дөләт рәһбәрлири немини елан қилиду? ә) Биз қайси соалларниң җававини тепишимиз керәк?

 ДӨЛӘТ рәһбәрлири «течлиқ вә бехәтәрликни» елан қилди дәп тәсәввур қилиң. Улар дуния һечқачан мундақ бехәтәр болуп бақмиған дәп махтанмақта. Һөкүмранлар бизниң улар дуниядики һәммә қийинчилиқларни һәл қилишқа қадир дәп ойлишимизни халайду. Лекин әмәлийәттә улар шуни елан қилғандин кейин йүз беридиған ишларға һечқандақ тәсир қилалмайду. Чүнки Муқәддәс китаптики пәйғәмбәрлик сөзләргә асасән, уларниң бешиға «туюқсиз һалакәт келиду һәм улар һәргиз қутулалмайду» (Сал. 1-х. 5:3).

² Биз бу муһим соалларниң җававини тепишимиз керәк: «Дәһшәтлик балаю-апәт» вақтида немә ишлар йүз бериду? Шу чағда Йәһва Худа бизниң немә қилишимизни күтиду? «Дәһшәтлик балаю-апәт» пәйтидә садақәтмән болуп қелиш үчүн биз һазир қандақ тәйярлиқ қилалаймиз? (Мәт. 24:21).

3. Вәһий 17:5, 15—18 айәтләргә асасән, Худа «Бүйүк Бабилни» қандақ йоқ қилиду?

³ Вәһий 17:5, 15—18ни оқуң. «Бүйүк Бабил» чоқум вәйран қилиниду! Жуқурида ейтилғандәк, дөләт рәһбәрлири шу вақитта һечнәрсә қилалмайду. Немә үчүн? «Худа уларниң қәлблиригә Униң пикирини... әмәлгә ашурушни салиду». Бу пикир — дуниявий ялған динлар империясини, шу җүмлидин христиан дуниясини, йоқ қилиш. Худа «тоқ қизил һайванниң» «он мүңгүзиниң» ойиға Өз пикрини салиду. Он мүңгүз һәммә һөкүмәтләрни, «һайван»  болса Бирләшкән Дөләтләр Тәшкилатини билдүриду (Вәһ. 17:3, 11—13; 18:8). Һөкүмәт рәһбәрлири ялған динларға қарши чиққанда, «дәһшәтлик балаю-апәт» башлиниду. Бу йәрдики һәрбир инсанға тәсир қилидиған вәһший вә тәсадипий вақиә болиду b.

4. а) Диний рәһбәрләр ялған динға һуҗум қилишиниң йоллуқ екәнлигини испатлаш үчүн қандақ сәвәпләрни көрситиду? ә) Диний тәшкилатларниң бурунқи әзалири нәмә қилиши мүмкин?

⁴ Дөләт рәһбәрлириниң қандақ банә тепип, ялған динларға қарши чиқидиғанлиғини билмәймиз. Бәлким, улар динларни дайим сәясәткә арилишип, дунияниң тинч-хатирҗәм болушиға тосалғу қилиду дәп әйипләйду. Яки болмиса, диний тәшкилатлар интайин көп пул вә мал-дуния топлавалди дейиши мүмкин (Вәһ. 18:3, 7). Дөләт рәһбәрлири ялған динға һуҗум қилғанда, еһтимал бу динларни қоллап-қувәтләйдиған һәммә адәмләрни әмәс, диний тәшкилатларни йоқ қилиду. Шу тәшкилатлар вәйран қилинғанда, бурун уларниң әзалири болған адәмләр, диний рәһбәрләргә алдинип қалғанлиғини чүшинип, бу дин билән мениң һеч алақәм йоқ дәп ейтиши мүмкин.

5. Йәһва дәһшәтлик балаю-апәт һәққидә қандақ вәдини бәргән вә немә үчүн?

⁵ Муқәддәс китапта Бүйүк Бабилниң вәйран қилиниши қанчә узун вақитқа созулидиғанлиғи йезилмиған, бирақ у қисқа вақитниң ичидә йоқ қилинидиғанлиғи ениқ (Вәһ. 18:10, 21). Йәһва Худа «Өзи таллиғанларни» қутқузуш вә һәқиқий динни сақлап қелиш үчүн «шу күнләрни қисқартишқа» вәдә қилған (Марк 13:19, 20). Дәһшәтлик балаю-апәт башлинип, техи Армагедон уруши башланмай турған шу мәзгилдә Йәһва бизниң немә қилишимизни күтиду?

6. Ялған дин билән һәрқандақ алақини үзүш йетәрликму?

⁶ Алдинқи мақалидә муһакимә қилинғандәк, Йәһва Худа хизмәтчилиридин  Бүйүк Бабилдин чиқишни күтиду. Амма буниң үчүн ялған дин билән болған һәрқандақ алақини үзүш йетәрлик әмәс, биз Худаға хизмәт қилишқа бәл бағлишимиз керәк. Келиңлар, буниң икки усулини көрүп чиқайли.

7. а) Йәһва Худаниң әхлақ өлчәмлирини қандақ чиң туталаймиз? ә) Ибранийларға 10:24, 25 болупму һазир ибадәт қилиш үчүн җәм болушниң муһимлиғини қандақ тәкитләйду?

⁷ Биринчиси, Йәһва Худаниң һәққаний әхлақ өлчәмлирини чиң тутуш. Биз бу дунияниң әхлақ өлчәмлирини қобул қилмаймиз. Мәсилән, җинсий әхлақсизлиқниң һечқандақ түрини, шуниң ичидә охшаш җинислиқ адәмләрниң муһәббәтлишиши яки той қилишини қоллимаймиз (Мәт. 19:4, 5; Рим. 1:26, 27). Иккинчиси, етиқатдашлиримиз билән биллә ибадәт қилишни давамлаштуримиз. Мәйли Ибадәт өйлиридә, қериндашларниң өйлиридә яки башқа йәрләрдә йошурун болсун, вәзийитимиз қандақ өзгәрмисун, учришишларға давамлиқ беришни һечқачан тохтатмаймиз. «Болупму шу күнниң йеқинлашқанлиғини байқиған екәнмиз, техиму шундақ қилайли» (Ибранийларға 10:24, 25ни оқуң).

8. Келәчәктә ейтидиған хәвиримиз қандақ өзгириши мүмкин?

⁸ Дәһшәтлик балаю-апәт мәзгилидә бәлким, биз ейтидиған хәвәрму өзгириду. Һазир биз Падишалиқ тоғрилиқ хуш хәвәрни җакалап, шагирт тәйярлашқа күч чиқиримиз, лекин шу чағда биз мөлдүрдәк еғир тегидиған хәвәрни ейтишимиз мүмкин (Вәһ. 16:21). Бәлким, биз Шәйтанниң дунияси пат арида йәр билән йәксән болидиғанлиғини җакалаймиз. Вақти-саати кәлгәндә, қандақ хәвәрни вә уни қандақ җакалайдиғанлиғимизни билимиз. Йүз жил җәриянида хизмәттә қоллинип кәлгән усулларни ишлитимизму яки қандақту бир йеңи усуллар билән вәз қилимизму? Биз буни техи билмәймиз. Мәйли қандақ вәз қилмайли, Йәһва Худаниң һөкүм хәвирини йәткүзүш шан-шәрипигә егә болимиз (Әзәк. 2:3—5).

9. Һөкүмәтләр хәвиримизни аңлиғанда немә қилиши мүмкин, бирақ немигә ишәнчимиз камил?

⁹ Хәвиримизни аңлиғанда, һөкүмәтләр еһтимал ағзимизни үзүл-кесил йепип ташлашқа урунуши мүмкин. Һазир вәз хизмитидә Йәһва Худаға таянғандәк, шу чағдиму дәл шундақ тайинишимиз бәкму муһим болиду. Худайимиз бизгә Униң ирадисини орунлаш үчүн күч беридиғанлиғиға ишәнчимиз камил (Мика 3:8).

10. Луқа 21:25—28гә асасән, адәмләрниң көпинчиси дәһшәтлик балаю-апәттә болидиған вақиәләрни көрүп, немә қилиду?

¹⁰ Луқа 21:25—28ни оқуң. Дәһшәтлик балаю-апәт мәзгилидә адәмләр көз алдида йүз бериватқан вақиәләрни көрүп, һодуқуп кетиду. Улар таянған сәясәт, сода-сетиқ вә бу дунияниң башқа түзүлмилириниң йоқ қилинишини өз көзи билән көриду. Улар «дәрт-әләм» чекиду вә адәмзатниң тарихидики әң еғир күнләр башланғанда өлүп кетимиз дәп қорқиду (Зәф. 1:14, 15). Шу чағда һәтта Худа хизмәтчилириниңму һаяти қийинлишип кетиши мүмкин. Бәлким, биз бу дунияниң ишлириға арилашмиғанлиқтин, бәзи қийинчилиқларға дуч келимиз. Биздә һәтта һаят үчүн керәклик нәрсиләр болмай қелиши мүмкин.

11. а) Йәһва гувачилири немә үчүн дөләт рәһбәрлириниң нишаниға айлиниду? ә) Биз немә сәвәптин дәһшәтлик балаю-апәттин қорқмаслиғимиз керәк?

¹¹ Шу чағларда дини вәйран болған адәмләр Йәһва гувачилириниң дини техичә бар екәнлигигә ғәзәплиниду. Улар буниңға наразилиғини тор, телевизия  яки радио арқилиқ билдүриду. Йәһва гувачилири йәрдә қалған бирдин бир дин болиду, шуңа дөләт рәһбәрлири вә уларниң һөкүмрани Шәйтан бизни өч көриду. Улар йәр йүзидики динларниң һәммисини йоқ қилиш мәхситигә қол йәткүзәлмигәч, биз уларниң нишани болимиз. Шу чағда дөләт рәһбәрлири «Йәҗүҗ билән Мәҗүҗниң» c ролини ойнайду. Һөкүмәтләр бирлишип, Йәһваниң хәлқигә бар күчи билән рәһимсизларчә һуҗум қилиду (Әзәк. 38:2, 14—16). Дәһшәтлик балаю-апәт вақтида немә ишлар йүз беридиғанлиғини ушшақ-чүшшәк тәпсилатлириғичә билмигәч, қаттиқ әнсиришимиз мүмкин, лекин әнсирәшниң һаҗити йоқ. Чүнки Йәһва Худа һаятимизни сақлап қелиш үчүн бизгә тәпсилий көрсәтмиләрни бериду (Зәб. 34:19) Шу вақитта биз «қәддиңларни руслап, башлириңларни көтириңлар, чүнки силәрниң қутулушиңлар йеқинлишиватиду» d дегән сөзләргә қулақ салалаймиз.

12. «Садиқ һәм әқил-парасәтлик қул» бизни кәлгүсидики вақиәләргә қандақ тәйярлап кәлмәктә?

¹² «Садиқ һәм әқил-парасәтлик қул» дәһшәтлик балаю-апәттә садақәтмәнлигимизни сақлап қелишимиз үчүн бизни тәйярлап кәлмәктә (Мәт. 24:45). Буни көплигән усулларда қиливатиду, лекин биз пәқәт бирини көрүп чиқимиз. Бу 2016—2018 жиллири өткүзүлгән конгресслар. Бу конгрессларда алған тәлимләр бизни Йәһваниң күни кәлгәндә садиқ болуп қелиш үчүн керәклик хисләтләрни риваҗландурушқа дәвәт қилди. Бу хисләтләрниң бирнәччисини әскә алайли.

13. Садақәтмәнлигимизни қандақ мустәһкәмлисәк болиду вә буни һазирниң өзидә қилиш немә үчүн муһим?

¹³ Садақәтмәнлик. 2016-жилниң регионлуқ конгресси «Йәһва Худаға садақәтмәнликни сақлаң!» дәп аталған. Бу конгресста биливалғинимиздәк, Йәһва билән йеқин мунасивәттә болсақ, Униңға садиқ болуп қалалаймиз. Конгрессниң программиси чин жүрәктин дуа қилиш вә Худа Сөзини пухта тәтқиқ қилиш арқилиқ Йәһва билән йеқин мунасивәттә болалайдиғанлиғимизни есимизгә салған. Шундақ қилсақ, биз һәтта әң еғир қийинчилиқларға бәрдашлиқ берәләймиз. Шәйтанниң дуниясиниң ахири йеқинлашқансири, Худаға вә Униң Падишалиғиға болған вападарлиғимиз техиму көп синақларға дуч келиду. Адәмләр шу чағдиму бизни давамлиқ мәсхирә қилиши мүмкин (Пет. 2-х. 3:3, 4). Буниң бир сәвәви — бизниң бетәрәпликни сақлап, Шәйтанниң дуниясини қоллимиғанлиғимиздур. Дәһшәтлик балаю-апәттә садиқ болуп қелиш үчүн, садақәтмәнлигимизни һазирниң өзидә мустәһкәмләш наһайити муһим.

14. а) Йәрдә йетәкчилик қилишта қандақ бир өзгириш орун алиду? ә) Шу чағда биз немә сәвәптин садиқ болушимиз керәк?

¹⁴ Дәһшәтлик балаю-апәт мәзгилидә йәрдә йетәкчилик қилидиғанларда бир өзгириш орун алиду. Бәлгүләнгән вақит кәлгәндә, йәр йүзидики барлиқ майланған мәсиһийләр Армагедон урушиға  қатнишиш үчүн асманға елиниду (Мәт. 24:31; Вәһ. 2:26, 27). Демәк, шу чағда йәр йүзидә Рәһбәрлик кеңәш болмайду. Амма буниңға қаримастин, зор бир топ халайиқниң арисида тәртип һөкүм сүриду. Башқа қойлардин чиққан лайәқәтлик бурадәрләр йетәкчиликни өз қолиға алиду. Бу бурадәрләрни қоллаш вә Худа улар арқилиқ беридиған йол-йоруққа бойсунуш арқилиқ садақәтмәнлигимизни көрситимиз. Бизниң аман қелишимиз итаәтчан болуп қелишимизға бағлиқ!

15. Синақларға бәрдашлиқ беришни қандақ үгинәләймиз вә бу немә үчүн һазирниң өзидә муһим?

¹⁵ Сәвир-тақәт. 2017-жилниң регионлуқ конгресси «Һәргиз ваз кәчмәйли!» дәп аталған. Бу конгрессниң программиси синақларға бәрдашлиқ беришни үгинишимизгә ярдәм бәргән. Шундақла мәйли қандақ вәзийәттә болайли, Йәһва Худаға тайиниш арқилиқ сәвир-тақәтлик болалайдиғанлиғимизни биливалдуқ (Рим. 12:12). Әйсаниң «ахирғичә бәрдашлиқ бәргәнләр, җәзмән қутқузулиду» дегән вәдисини һечқачан унтумайли (Мәт. 24:13). Демәк, қандақ қийинчилиқларға дуч келишимиздин қәтъийнәзәр, садақәтмән болуп қелишимиз керәк. Бу қийинчилиқларға һазир бәрдашлиқ бәрсәк, дәһшәтлик балаю-апәт башланғичә, етиқадимизни күчәйтәләймиз.

16. Җасарәтлик болушимиз немигә бағлиқ? Җасаритимизни һазир қандақ мустәһкәмләләймиз?

¹⁶ Җасарәт. 2018-жилниң регионлуқ конгресси «Җасарәтлик бол!» дәп аталған. Бу конгресстики нутуқлар җасарәтлик болушимиз қабилийитимизгә әмәс, Йәһва Худаға тайинишимизға бағлиқ екәнлигини әстә тутушқа ярдәм бәргән. Муқәддәс китапни һәр күни оқуш вә Йәһваниң Өз хәлқини өтмүштә қандақ қутқузғанлиғи тоғрилиқ чоңқур ойлиниш арқилиқ биз Униңға көпирәк тайинишни үгинәләймиз (Зәб. 68:20; Пет. 2-х. 2:9). Дәһшәтлик балаю-апәт пәйтидә дөләт рәһбәрлири бизгә һуҗум қилғанда, биз җасарәтлик болуп, Йәһваға һәрқандақ вақиттинму бәкирәк тайинишимиз керәк (Зәб. 112:7, 8; Ибр. 13:6). Әгәр Йәһваға һазирниң өзидә таянсақ, дөләт рәһбәрлири бизгә қарши чиққанда, биз җасарәтлик болалаймиз e.

17. Биз немә сәвәптин Армагедон урушидин қорқмаслиғимиз керәк? (Муқавидики рәсимгә қараң.)

¹⁷ Алдинқи мақалидә ейтилғандәк, нурғунлиримиз ахир заман күнлиридә һаят кәчүрүватимиз. Амма биз дәһшәтлик балаю-апәттин аман қелишни үмүт қилимиз. Биз бу дуния түзүминиң ахири әвҗигә чиққанда болидиған Армагедон урушиниму өз көзүмиз билән көримиз. Лекин бу урушта биз әмәс, Худаниң Өзи җәң қилиду, шуңа қорқушниң һеч һаҗити йоқ (Пәнд н. 1:33; Әзәк. 38:18—20; Зәк. 14:3). Йәһва Худа буйруқ бәргәндә, Әйса Мәсиһ тирилип асманға көтирилгән майланғанлар вә миллионлиған пәриштиләрдин тәшкил тапқан Худаниң қошунлирини җәңгә башлайду. Улар бирликтә Шәйтан, униң җинлири вә йәрдики қошунлириға қарши җәң қилиду (Дан. 12:1; Вәһ. 6:2; 17:14).

18. а) Йәһва Худа немини вәдә қилған? ә) Вәһий 7:9, 13—17дики сөзләр сизни келәчәк һәққидә немигә ишәндүриду?

¹⁸ Йәһва Худа мундақ вәдә бәргән: «Саңа қарши ясалған һеч қандақ қурал карға кәлмәйду» (Йәшая 54:17). Худаға хизмәт қилидиған зор бир топ халайиқ дәһшәтлик балаю-апәттин аман қелип, Униңға хизмәт қилишни давамлаштуриду (Вәһий 7:9, 13—17ни оқуң). Муқәддәс китап бизни Худаниң Өзигә садиқ болғанларни қоғдайдиғанлиғиға ишәндүриду (Зәб. 31:23). Йәһва Худани яхши көридиған вә Униңға шан-шәрәп кәлтүрүшни халайдиғанларниң һәммиси Худаниң Өз исмини улуқлиғанлиғини көрүп, наһайити хошал болиду (Әзәк. 38:23).

19. Биздә қандақ әҗайип үмүт бар?

¹⁹ Қандақ ойлайсиз, Тимотийға 2-хәт 3:2—5 айәтләрдә тәсвирләнгән адәмләр йеңи дунияда йәнә қайта Шәйтанниң тәсиригә учримиса, айәтләр башқичә қандақ йезилатти? (« Йеңи дунияда адәмләр қандақ болиду?» намлиқ рамкиға қараң.) Рәһбәрлик кеңәшниң әзаси болуп хизмәт қилған Джордж Гангас f буни шундақ тәсвирлигән: «Адәмләрниң һәммиси өз ара қериндаш болуп, Йәһва Худаға ибадәт қилғанда, дунияниң әҗайип бир гөзәл җай болидиғанлиғини ойлап көрүңа! Пат арида сиз йеңи дунияда яшаш пурситигә егә болисиз. Һаятиңиз Йәһва Худаниң һаятидәк узақ болиду. Шундақ, биз мәңгү яшалаймиз». Бу һәқиқәтән әҗайип үмүттур!