1. Немә үчүн пәқәт Йәһва Худа ибадәт қилишимизға лайиқ?

 ЙӘҺВА ХУДА Яратқучимиз вә Һаят Мәнбәси болғачқа, пәқәт У ибадәт қилишимизға лайиқ (Вәһ. 4:11). Лекин биз пәхәс болушимиз керәк: Йәһвани һөрмәтләп, Уни яхши көрсәкму, һаятимизда башқа нәрсиләрни биринчи орунға қоюш Йәһваға мутләқ яки пүтүнләй вападар болуп қелишимизға тосалғу қилалайду. Шундақ әһвалға қандақ чүшүп қелишимиз мүмкин? Авал, пәқәт Йәһвағила ибадәт қилиш немини билдүридиғанлиғини биливалайли.

2. Чиқиш 34:14кә асасән, биз Йәһва Худаға пүтүнләй вападар болсақ, немә қилимиз?

² Муқәддәс китапта йезилғандәк, Йәһваға вападар болуш Уни пүтүн вуҗут билән сөйүшни билдүриду. Әгәр Униңға пүтүнләй вападар болсақ, биз пәқәт Йәһва Худаға ибадәт қилимиз. Биз Йәһва Худаниң жүригимиздики орнини һечкимниң яки һечнәрсиниң егилишигә йол қоймаймиз (Чиқиш 34:14ни оқуң).

3. Йәһваға болған вападарлиғимиз немигә асасланған?

³ Биз Йәһваға өзүмизни қарғуларчә беғишлимаймиз. Униңға болған вападарлиғимиз пәқәт һис-туйғуларға әмәс, Худа тоғрилиқ алған билимимизгә асасланған. Мәсилән, бизни Йәһваниң есил пәзиләтлири зоқландуриду вә биз Униң немини яхши көридиғанлиғини вә немидин нәпрәтлинидиғанлиғини билимиз. Биз Униң инсанийәт үчүн қилған ирадисини чүшинимиз вә ирадисини чин жүрәктин қоллаймиз. Шундақла бизгә Униң билән дост болуш пурситини бәргәнлигини бәкму қәдирләймиз (Зәб. 25:14). Һәр қетим Яратқучимиз тоғрилиқ йеңи бир нәрсини үгиниш бизни Униңға йеқинлаштуриду (Яқуп 4:8).

4. а) Шәйтан Йәһваға болған меһир-муһәббитимизни қандақ суслаштурмақчи? ә) Бу мақалидин немини биливалимиз?

⁴ Бу дунияни Шәйтан башқуриватиду, шуңа у бу дунияниң ярдими билән тәбиий инсаний арзу-истәклиримиз  вә җисманий аҗизлиқлиримиздин пайдилиниду (Әфәс. 2:1—3; Йоһ. 1-х. 5:19). Шәйтанниң мәхсити — қәлбимиздә бөлүнүш пәйда қилиш, шундақ болғанда биз пәқәт Йәһва Худанила әмәс, башқа нәрсиләрниму яхши көрүмиз. Шәйтан мәхситигә йетиш үчүн қандақ икки усулни қоллинидиғанлиғини биливалайли. Биринчиси, у бизниң пулпәрәс болушимизни вә иккинчиси, яман оюн-тамашә түрлирини таллишимизни халайду.

5. Биз немә үчүн пулпәрәсликтин нери туришимиз керәк?

⁵ Йетәрлик тамақ, чирайлиқ кийим вә қолайлиқ җай-маканға егә болуш — тәбиий арзу-истәктур. Амма биз пулпәрәс болуп кетиштин пәхәс болушимиз керәк. Бүгүнки күндә нурғунлиған адәмләр «пулхумар», улар пул хәшләшни яхши көриду (Тим. 2-х. 3:2). Әйса Мәсиһ шагиртлирини байлиқни яхши көрүштин агаһландурған. Әйса мундақ дегән: «Һечким икки ғоҗайинниң қули болалмайду, чүнки бирсини өч көрүп, йәнә бирсини яхши көриду, яки биригә садиқ болуп, йәнә бирсини көзигә илмайду. Силәр Худаниң һәм байлиқниң қули болалмайсиләр» (Мәт. 6:24). Адәм Йәһваниң хизмәтчиси болуп туруп, байлиққа еришиш үчүн көп күч билән вақит сәрип қилса, у икки ғоҗайинға хизмәт қилишқа тиришқанға охшаш болиду. Шундақ адәмни Йәһваға пүтүнләй берилгән дәп ейталмаймиз.

6. Әйсаниң Лаодикия шәһиридики җамаәткә язған сөзлиридин қандақ савақ алалаймиз?

⁶ Лаодикия шәһиридики бәзи қериндашлар: «Мән бай, бейидим вә һечнәрсигә муһтаҗим йоқ»,— дәп махтанған. Лекин Йәһва Худа вә Әйса Мәсиһниң көз алдида улар әсли «бәхитсиз, бечарә, кәмбәғәл, қарғу вә ялиңач» болған еди. Әйса уларниң бай болғанлиғи әмәс, байлиқни яхши көргәнлиги Йәһва Худа билән болған мунасивитини вәйран қилғанлиғи сәвәплик уларға нәсиһәт бәргән  (Вәһ. 3:14—17). Әгәр жүригимиздә байлиққа болған меһир-муһәббәт пәйда болғанлиғини байқисақ, униң йилтиз тартишиға йол бәрмәй, көзқаришимизни өзгәртишкә дәрһал һәрикәт қилишимиз керәк (Тим. 1-х. 6:7, 8). Көзқаришимизни өзгәртмисәк, қәлбимиз бөлүнүп кетип, Йәһваға қилған ибадитимизни У қобул қилмайду. У бизниң Уни «пүтүн жүригимиз» билән сөйүшимизни тәләп қилиду (Марк 12:30). Пул қандақ қилип һаятимизда әң муһим орунда болуп қелиши мүмкин?

7—9. Дейвид исимлиқ ақсақалниң мисалидин қандақ савақ алдиңиз?

⁷ Қошма Штатларда яшайдиған Дейвид исимлиқ тиришчан ақсақалниң мисалини көрүп чиқайли. Униң ейтишичә, у ширкитидә тәр төкүп ишлигән. Кейинирәк у шу ширкәттә яхширақ орунға еришип, көпирәк мааш елишқа башлап, һәтта өз дөлитидә мәшһур мутәхәссис намиға егә болған. Дейвид мундақ дәйду: «Шу чағда мән буларниң һәммиси Йәһваниң бәрикити дәп ойлиған». Лекин бу һәқиқәтән шундақ болғанму?

⁸ Бара-бара Дейвид униң иши Йәһва билән болған мунасивитигә зиян кәлтүрүватқанлиғини байқиған. У: «Мән учришишларда вә һәтта вәз хизмитидә, иштики қийинчилиқларни ойлап жүрәттим. Көп пул тапсамму, һәр күни қаттиқ бесимға дуч келәттим вә өйдиму қийинчилиқлар пәйда болушқа башлиди»,— дегән.

⁹ Дейвид һаятида немини биринчи орунға қоюшни қарар қилиши керәклигини чүшәнгән еди. У: «Һаятимда өзгиришләрни қилишқа қәтъий қарар қилдим»,— дегән. У иш вақтини өзгәртмәкчи болуп, буни башлиғиға ейтқан. Нәтиҗидә у иштин бошитилған еди. Шу чағда Дейвид немә қилған? «Әтиси мән үзлүксиз ярдәмчи пионер болуп хизмәт қилиш үчүн илтимас яздим»,— дәйду  у. Дейвид билән униң аяли җан беқиш үчүн беналарни жуюп тазилиған. Бираз вақит өтүп у пионер болуп хизмәт қилишни башлиған вә кейинирәк аялиму униңға қошулған. Бу әр-аял башқилар төвән көргән ишни қилған. Улар үчүн бу иш әң муһим әмәс еди. Тапавити бурунқиға қариғанда он һәссә азлап кәткән болсиму, уларда зөрүр нәрсиләрниң һәммиси болған. Улар Йәһвани һаятида биринчи орунға қоюшни халиған. Дейвид билән аяли Йәһваниң Уни биринчи орунға қойған кишиләргә ғәмхорлуқ қилидиғанлиғини өз бешидин өткүзгән (Мәт. 6:31—33).

10. Қәлбимизни қандақ қоғдалаймиз?

¹⁰ Пулумиз мәйли көп яки аз болсун, өз қәлбимизни қоғдишимиз керәк. Буни қандақ қилалаймиз? Қәлбиңиздә пулға болған сөйгүниң пәйда болушиға йол бәрмәң вә ишиңизни Йәһва Худаға болған хизмәттин үстүн қоймаң. Бу тузаққа чүшүп қалған-қалмиғанлиғиңизни қандақ биләләйсиз? Өзүңиздин мундақ дәп сорап көрүң: «Җамаәт учришишида яки вәз хизмитидә ишим тоғрилиқ көп ойлаймәнму? Келәчәктә пулум болмай қалса немә қилимән дәп пат-пат әнсирәймәнму? Аиләмдә қийинчилиқларниң пәйда болушиға пул вә мал-мүлүк сәвәп болуватамду? Мән Йәһваға көпирәк хизмәт қилиш үчүн башқиларниң көз алдида төвән саналған ишни қилишқа тәйярму?» (Тим. 1-х. 6:9—12). Бу соаллар тоғрилиқ ойлиғанда, Йәһваниң бизни яхши көридиғанлиғини вә Өз садиқ хизмәтчилиригә мундақ вәдә бәргәнлигини унтумайли: «Сени һәргиз қалдурмаймән һәм сени һечқачан ташлимаймән». Буни билгәчкә, әлчи Паул мундақ дәп язған: «Һаятиңларда пулпәрәсликкә орун болмисун» (Ибр. 13:5, 6).

11. Оюн-тамашилар адәмгә қандақ тәсир қилиши мүмкин?

¹¹ Йәһва Худа хошал болушимизни халайду вә биз оюн-тамашилардин хошаллиқ тапалаймиз. Худа Сөзидә: «Инсанниң өз әмгигидин паравәнлик тепиш, йәп-ичиш вә көңлини хуш қилиш һәммидин яхши екән»,— дәп йезилған (Вәз 2:24). Бирақ бу дуниядики оюн-тамашиларниң тәңдин толиси бизгә яман тәсир қилиду. Улар түпәйлидин адәмләрниң әхлақ өлчәмлири яманлишип, кишиләр Муқәддәс китапта мәнъий қилинған нәрсиләргә көз жумушқа вә һәтта шу ишларни яхши көрүшкә башлайду.

12. Коринтлиқларға 1-хәт 10:21, 22гә асасән, немә үчүн оюн-тамашиларни таллиғанда пәхәс болушимиз керәк?

 ¹² Биз пәқәт Йәһвағила пүтүнләй вападар болушни халиғачқа, «Йәһваниң дәстихинидинму» һәм «җинларниң дәстихинидинму» йәләлмәймиз (Коринтлиқларға 1-хәт 10:21, 22ни оқуң). Адәттә тамақни достлиримиз билән биллә йейишни яхши көримиз. Әгәр биз таллиған оюн-тамашиларда зораванлиқ, җинкәшлик, әхлақсизлиқ болса вә бу тән һәвәслиримизни қозғатса, бу худди Йәһва Худаниң дүшмәнлири тәйярлиған тамақни йәп, улар билән һәмдәстихан болғанға баравәр. Нәтиҗидә биз өзүмизгиму, Йәһва билән болған мунасивитимизгиму зиян кәлтүрүмиз.

13, 14. Яқуп 1:14, 15кә асасланғанда, оюн-тамашиларни таллиғанда немә үчүн пәхәс болушимиз керәк? Мисал кәлтүрүң.

¹³ Оюн-тамашиларни тамақ билән селиштурушқа болиду. Мәсилән, тамақ йегәндә ағзимизға немә селишни өзүмиз таллаймиз. Бирақ тамақ ашқазинимизға чүшкәндин кейин, һәзим қилиш җәрияни башлинип, озуқлуқ маддилар ахири тенимизгә сиңиду. Тоғра тамақлиниш — саламәтликниң капалити, бирақ ғизалиниш қаидилирини көзгә илмаслиқ ағриққа сәвәп болуши мүмкин. Буниң нәтиҗиси тезла байқалмисиму, лекин вақит өтүп чоқум ениқ көрүниду.

¹⁴ Шуниңға охшаш, оюн-тамашиларни таллиғанда биз әқлимизгә немиләрни қуюшни өзүмиз қарар қилимиз. Лекин биз таллиған оюн-тамашә ой-пикримиз вә һис-туйғулиримизға тәсир қилиду. Яхши оюн-тамашә бизгә пайда әкелиду, яман оюн-тамашә зиян кәлтүриду (Яқуп 1:14, 15ни оқуң). Биз яман оюн-тамашиниң сәлбий тәсирини дәрһал байқимаслиғимиз мүмкин, амма вақит өтүп у кәлтүргән зиян чоқум ениқ көрүниду. Шу сәвәптин, Муқәддәс китап бизни: «Алданмаңлар: Худа мәсхирә қилинидиған Шәхс әмәс. Инсан немә терисә, шунила жиғиду: тенигә тәргүчи, тенидин чирикликни алиду, роһиға тәргүчи болса, муқәддәс роһтин мәңгү һаятни алиду»,— дәп агаһландурмақта (Гал. 6:7, 8). Дәрһәқиқәт, Йәһва өч көридиған нәрсиләрни яхши дәп көрситидиған оюн-тамашиниң һәммә түрлирини рәт қилиш интайин муһим! (Зәб. 97:10).

15. Йәһва Худа бизгә қандақ соға бәрди?

¹⁵ Нурғун қериндашлар JW интернет телевизиясини көрүштин көп пайда алиду. Мерилин исимлиқ қериндишимиз мундақ дегән: «Интернет телевизияси хошаллиқни сақлишимға ярдәм бериду вә мән яман бир нәрсә чиқип қаламду дәп қорқмастин, һәммини хатирҗәм көрәләймән. Өзүмни ялғуз һис қилғанда яки көңлүм йерим болғанда, мән бир нутуқни яки әтигәнлик ибадәтни көримән, роһум көтирилип қалиду. Бу мени Йәһваға вә тәшкилатқа йеқинлаштуриду. Тәшкилатимизниң телевизияси һаятимни пүтүнләй өзгәртти». Сиз Йәһваниң бу соғисидин пайдилиниватамсиз? Айлиқ программилардин башқа JW интернет телевизиясидә йәнә көплигән аудиолар вә видеолар, шундақла илһам беридиған нурғун нахшилар бар.

16, 17. Оюн-тамашиға чиқарған вақтимизға немә үчүн диққәт қилишимиз керәк? Биз буни қандақ қилалаймиз?

¹⁶ Биз пәқәтла қандақ оюн-тамашини таллашқа әмәс, йәнә оюн-тамашиға қанчә вақит чиқиришизға диққәт қилишимиз керәк. Пәхәс болмисақ, биз Йәһва Худаға хизмәт қилишниң орниға, оюн-тамашиға көпирәк вақит сәрип қилишимиз мүмкин. Көп адәмләр үчүн оюн-тамашиға кәткән вақитни башқуруш  бәк қийин. Мәсилән, 18 яшлиқ Абигейл мундақ дәйду: «Кәчтә өйгә һерип-ечип кәлгәндә, телевизорниң алдида һардуғумни чиқиришни яхши көримән. Бирақ еһтият қилмисам, саатлап олтирип қалғинимни билмәй қалимән». Сэмюел исимлиқ яш бурадәр: «Мән тордин қисқа видеоларни көрүшни башлиғанда, өзүмни тохтиталмай қалимән. Биринила көримән дәп, һәш-пәш дегичә үч-төрт саат өтүп кәткәнлигини байқимай қалимән»,— дәйду.

¹⁷ Сиз оюн-тамашиларға чиқарған вақтиңизни қандақ башқуралайсиз? Буниң үчүн авал дәм елишқа қанчә вақит бөлидиғанлиғиңизни ениқлавелиң. Буни бир һәптә ичидә тәкшүрүп көрәләмсиз? Мәсилән, телевизор көрүш, торға чиқиш вә янфониңизда оюн ойнашқа қанчә вақит чиқиридиғанлиғиңизни йезип көрүң. Әгәр өзүңизниң буларға һәддидин ташқири көп вақит сәрип қиливатқанлиғиңизни байқисиңиз, вақит җәдвилини түзүшкә тиришиң. Биринчи новәттә, әң муһим нәрсиләр үчүн вақит бәлгүләп, кейин оюн-тамашиларни планлаң. Йәһва Худадин шу планиңизға риайә қилиш үчүн ярдәм сораң. Шундақ қилсиңиз, шәхсий үгиниш, аиләвий ибадәт, җамаәт учришишлири һәм вәз хизмити үчүн көпирәк вақит вә күч чиқиралайсиз. Сиз Йәһвани биринчи орунға қойғанлиқтин, оюн-тамашиға вақит бөлгәнлигиңиз үчүн вижданиңиз сизни әйиплимәйду.

18, 19. Биз Йәһваға пүтүнләй вападар екәнлигимизни қандақ испатлалаймиз?

¹⁸ Шәйтан дуниясиниң йоқ қилиниши вә йеңи дунияниң келиши тоғрилиқ язғандин кейин, әлчи Паул: «Әзизлирим, буларни күтүветип, нәтиҗидә У силәрни дағланмиған, әйипсиз вә течлиқта яшаватқан инсанлар дәп тепиши үчүн барчә имканийәт билән тиришиңлар»,— дәп язған (Пет. 2-х. 3:14). Бу нәсиһәткә қулақ селип, бар күчимиз билән әхлақий вә роһий җәһәттин пак болуп қелишқа тиришсақ, Йәһваға мутләқ вападар екәнлигимизни көрситимиз.

¹⁹ Шәйтан вә униң рәзил дунияси һаятимизда биринчи орунға Йәһва Худани әмәс, башқа нәрсиләрни қоюшқа дәвәт қилиду (Луқа 4:13). Лекин мәйли қандақ қийинчилиқларға дуч кәлмәйли, һечкимниң яки һечнәрсиниң Йәһваниң қәлбимиздики орнини егилишигә йол қоймаймиз. Биз Йәһва Худағила вападар болуп қелишқа бәл бағлидуқ, сәвәви пәқәт У пүтүн вуҗудимиз билән сөйүшкә вә ибадәткә лайиқтур!