1. Йәһва Өз ирадисини орунлаш үчүн немә қилалайду?

 ӨЗ ИРАДИСИНИ әмәлгә ашуруш үчүн Йәһва Худа ким болушқа тоғра кәлсә, шу болалайду. Мәсилән, У Устаз, Тәсәлли Бәргүчи вә Хуш Хәвәрни Йәткүзгүчигә айлиналайду (Йәшая 48:17; Кор. 2-х. 7:6; Гал. 3:8). Лекин адәттә У Өз мәхситини әмәлгә ашуруш үчүн адәмләрдин пайдилиниду (Мәт. 24:14; 28:19, 20; Кор. 2-х. 1:3, 4). Шундақла Йәһва бизгә Униң ирадисини орунлаш үчүн зөрүр болидиған даналиқ билән күч-қудрәтни берәләйду. Бәзи Муқәддәс китап тәтқиқатчилириниң чүшәндүрүшичә, бу Йәһваниң исминиң мәнасиниң толуқ ипадилиниши екән.

2. а) Бәзидә Йәһва Худа биздин пайдилиниватқанлиғиға немә сәвәптин гуман қилишимиз мүмкин? ә) Бу мақалидә немини көрүп чиқимиз?

² Йәһва Худаниң Өз ирадисиниң әмәлгә ашурушида биздин пайдилинишини һәммимиз халаймиз. Амма бәзиләр Йәһва үчүн һеч пайдам йоқ дәп ойлиши мүмкин. Немә сәвәптин? Чүнки улар йеши, һал-әһвали яки қабилийити түпәйли Йәһваға толуқ мөлчәрдә яки өзлири халиғандәк көп хизмәт қилалмаслиғи мүмкин. Йәнә башқилар қилған хизмитигә мәмнун болуп, буниңдин артуқ хизмәт қилишниң кериги йоқ дәп ойлайду. Бу мақалидә Йәһваниң һәрбиримизгә Униң ирадисини орунлаш үчүн ким болушқа тоғра кәлсә, шу болушқа ярдәм беридиған усуллирини муһакимә қилимиз. Андин Худа қедимдики әр һәм аял хизмәтчилиригә Униң ирадисини әмәлгә ашуруш үчүн арзу-истәк вә күч-қудрәт бериш үчүн немә қилғанлиғини көрүп чиқимиз. Ахирида Йәһва Худаниң бизни қоллинишиға йол қоюш үчүн немә қилалайдиғанлиғимизни биливалимиз.

3. Филипиликләргә 2:13кә асасән, Йәһва һәрикәт қилишимиз үчүн арзу-истәкни бизгә қандақ берәләйду?

³ Филипиликләргә 2:13ни оқуң b. Йәһва Худа бизниң һәрикәт қилишимиз үчүн арзу-истәк берәләйду. У буни  қандақ қилалайду? Мәсилән, сиз җамаәттики бирси ярдәмгә муһтаҗ екәнлигини яки қандақту бир ишни қилиши зөрүр екәнлигини билип қелишиңиз мүмкин. Яки болмиса җамаәт учришишида башқа бир йәргә ярдәм қилиш керәклиги тоғрилиқ филиалдин кәлгән хәт оқулуши мүмкин. Шу чағда биз өзүмиздин: «Мән бу ишта қандақ ярдәм берәләймән?»— дәп сорисақ болиду. Бәлким, сизгә қийин бир вәзипә тапшурулса, бу тапшуруқни орунлаш қолумдин кәлмәйду дәп әнсирәйдиғансиз. Яки Муқәддәс китапни оқуп, «Мән башқиларға ярдәм бериш үчүн бу айәтләрдин қандақ пайдилиналаймән?» дәп ойлайдиғансиз. Йәһва Худа бизни бирнәрсини қилишқа мәҗбурлимайду, лекин У бизниң «Немә қилсам болар?» дәп ойлап жүргинимизни байқап, ой-хияллиримизға мас һәрикәт қилишимизға арзу берәләйду.

4. Йәһва Худа бизгә һәрикәт қилиш үчүн күч-қудрәтни қандақ берәләйду?

⁴ Буниңдин башқа, Йәһва бизгә һәрикәт қилиш үчүн күч-қудрәт берәләйду (Йәшая 40:29). У муқәддәс роһи арқилиқ бизниң қабилийәтлиримизни ашуралайду (Чиқ. 35:30—35). Тәшкилати арқилиқ Йәһва Худа бизни вәзипилиримизни орунлашқа үгитәләйду. Бирәр тапшуруқни қандақ орунлашни билмисиңиз, ярдәм сораң. Шундақла асмандики Атиңиздин «адәттики күчтин ешип чүшидиған күч» сораштин тартинмаң (Кор. 2-х. 4:7; Луқа 11:13). Муқәддәс китапта Йәһва Худаниң әр вә аял хизмәтчилириниң һәрикәткә атлиниши үчүн арзу-истәк һәм күч-қудрәт бәргәнлигиниң көп мисаллири бар. Шуларниң бирнәччисини көрүп чиққач: «Йәһва уларни қандақ ишләткән болса, мени шулардәк қандақ ишлитиләйду?»— дәп ойлап көрүң.

5. Йәһваниң Өз хәлқини қутқузуш үчүн Мусадин қачан вә қандақ пайдиланғанлиғидин қандақ савақ алимиз?

⁵ Йәһва Худа Муса пәйғәмбәргә Исраил хәлқини қутқузушқа ярдәм бәргән. Бирақ Йәһва уни қачан ишлитишкә башлиған? Муса мисирлиқларниң барлиқ даналиғини үгәнгәндин кейинму? (Әлч. 7:22—25). Яқ, Худа униң кәмтәр вә еғир-бесиқ адәм болушиға ярдәм бәргәндин кейинла (Әлч. 7:30, 34—36). Йәһва Худа Муса пәйғәмбәргә Мисирниң әң күчлүк һөкүмрани алдида сөзләш үчүн җасарәт бәргән (Чиқ. 9:13—19). Биз Йәһва Худаниң Мусадин қачан вә қандақ пайдиланғанлиғидин қандақ савақ алимиз? Йәһва Өзини үлгә қилип, Униңға охшаш пәзиләтләрни йетилдүрүшкә вә Униңға тайинишқа күч чиқиридиған кишиләрни ишлитиду (Флп. 4:13).

6. Йәһваниң Давутқа ярдәм бериш үчүн Барзиллайдин пайдиланғанлиғидин немини үгинимиз?

⁶ Әсирләр өтүп Йәһва Худа Давут падишаға ярдәм бериш үчүн Барзиллайни ишләткән. Давут вә униң хизмәтчилири Абшаломдин қечиватқанда «ач қелип уссап кәткән» еди. Шу чағда яшинип қалған Барзиллайму Давут билән униң адәмлиригә ярдәм бериш үчүн башқиларға охшаш һаятини хәтәргә тәвәккәл қилған. Барзиллай: «Мән яшинип қалдимғу, әнди Йәһваға немә пайдам бар»,— дәп ойлимиған еди. Әксинчә, у Йәһва Худаниң хизмәтчилиригә ярдәм бериш үчүн қолида барини муһтаҗлиқта қалғанлар билән бөлүшүшкә тәйяр болған (Сам. 2-яз. 17:27—29). Биз буниңдин немини үгинимиз? Йешимизға қаримастин, Йәһва биз арқилиқ муһтаҗлиқта қалған жирақ-йеқиндики етиқатдашларға ярдәм  берәләйду (Пәнд н. 3:27, 28; 19:17). Биз уларға удул ярдәм берәлмисәкму, дуниявий иш-паалийитимизни қоллаш үчүн ианә қилсақ, бу пул ихтисадий ярдәмгә муһтаҗ қериндашларға ярдәм бериш үчүн ишлитилиду (Кор. 2-х. 8:14, 15; 9:11).

7. Йәһва Худа Шимондин қандақ пайдиланған вә бу немә үчүн бизгә тәсәлли бериду?

⁷ Йәһва Худа Йерусалимдики яшинип қалған садиқ хизмәтчиси Шимонға Мәсиһни өз көзи билән көрмигичә өлмәйдиғанлиғини вәдә қилған. Мәсиһниң келишини көп жиллар күткәнликтин, бу вәдә Шимонға зор тәсәлли бәргәнлиги сөзсиз. Йәһва Шимонни етиқади вә сәвир-тақити үчүн мукапатлиған еди. Бир күни муқәддәс роһ уни мәркизий ибадәтханиға башлап барған, Шимон бовақ Әйсани көргән вә Мәсиһ болидиған шу кичик бала тоғрилиқ пәйғәмбәрлик сөзләрни ейтқан еди (Луқа 2:25—35). Шимон Әйсаниң йәрдики хизмитини көргидәк узақ яшимиған болсиму, у Мәсиһни көрүш шан-шәрипи үчүн чәксиз миннәтдар болған еди. Кәлгүсидә уни техиму көп бәрикәтләр күтмәктә! Йеңи дунияда Худаниң бу садиқ хизмәтчиси Әйсаниң һөкүмранлиқ қилип, йәр йүзидики һәммә адәмләрниң үстигә бәрикәт төккәнлигигә гувачи болиду (Ярит. 22:18). Бизму Шимонға охшаш, Йәһва бизгә тапшурған һәрбир вәзипини қәдирләймиз.

8. Йәһва Худа Барнабани ишләткәндәк, бизниму қандақ ишлитиши мүмкин?

⁸ Миладий биринчи әсирдә Йүсүп исимлиқ бир мәрт киши Йәһва Худаниң өзини ишлитишигә йол бәргән (Әлч. 4:36, 37). Бәлким, Йүсүп башқиларға тәсәлли бериштә бәк утуқлуқ болғанлиқтин, әлчиләр униңға «тәсәлли оғли» дегән мәнани билдүридиған Барнаба дәп исим қойған. Мәсилән, Саул мәсиһий болғанда, нурғун қериндашлар униң бурун Әйсаниң әгәшкүчилиригә зиянкәшлик қилғанлиғини аңлап, униңдин қорқатти. Амма Барнаба Саулға тәсәлли вә ярдәм бәргән. Саул униң ярдими үчүн бәк миннәтдар болғанлиғи сөзсиз (Әлч. 9:21, 26—28). Кейинирәк Йерусалимдики ақсақаллар Сүрийәдики Антакядә яшиған етиқатдашларға тәсәлли бериш керәклигини чүшәнгән. Улар шу йәргә кимни әвәткән? Барнабани! Бу яхши қарар болған, чүнки Барнаба уларни җан-дили билән Әйсаға садиқ болушқа илһамландурған (Әлч. 11:22—24). Бүгүнки күндә бизму етиқатдашлар үчүн тәсәллиниң мәнбәси болалаймиз. Мәсилән, Йәһва бизни йеқинлиридин айрилғанларға тәсәлли бериш үчүн ишлитәләйду. Болмиса, У бизни ағрип қалған яки роһи чүшкән қериндашқа тәсәлли бериш үчүн униңға телефон қилишқа яки уни йоқлашқа дәвәт қилиши мүмкин. Худа өз вақтида Барнабани ишләткәндәк, сизниму ишлитишигә йол қоямсиз? (Сал. 1-х. 5:14).

9. Йәһва Худаниң Василий бурадәргә яхши ақсақал болушқа ярдәм бәргәнлигидин қандақ савақ алимиз?

⁹ Йәһва Худа Василий исимлиқ бурадәргә яхши ақсақал болушқа ярдәм бәргән. Василий 26 яшта ақсақал болуп хизмәт қилишни башлиғанда, болупму қийинчилиқларға дуч келиватқан етиқатдашларға ярдәм бериш үчүн тәҗрибәм йәтмәйду дәп қорққан. Шундақ болсиму, униңға башқа тәҗрибилик ақсақалларниң мәслиһәтлири вә Падишалиқ хизмәт мәктивидә алған билими көп ярдәм бәргән. Василий яхшилиниш үчүн бар күчини салған еди. Мәсилән, у алдиға кичик мәхсәтләрни қоюп, уларни йезип қойған. Шу мәхсәтлиригә йәткәнсири, у аста-аста қорқунучлиридин азат болған. Һазир у мундақ дәйду: «Бурун мән қорққан нәрсиләр, бүгүн маңа хошаллиқ  елип келиду. Йәһва маңа қериндашларға тәсәлли бериш үчүн Муқәддәс китаптин керәклик сөзләрни тепишқа ярдәм бәргәндә, хошаллиғим ич-ичимгә патмайду». Әзиз бурадәрләр, Василийдин үлгә елип, силәрму Йәһваниң қурали болушқа тәйяр болсаңлар, У силәргә җамаәттә көпирәк хизмәт қилиш үчүн керәклик қабилийәтни берәләйду.

10. Абигайил қандақ йол тутқан вә биз униңдин немини үгинәләймиз?

¹⁰ Давут вә униң хизмәтчилири Саул падишадин қечип кетиватқанда ярдәмгә муһтаҗ болған. Давутниң хизмәтчилири Набал исимлиқ кишидин уларға тамақ беришни сориған. Улар Набалниң падилирини қоғдап кәлгән, шуңа униңдин әркин-азадә ярдәм соралаймиз дәп ойлиған. Лекин шәхсийәтчи Набал уларға ярдәм қолини сунуштин баш тартқан. Шу чағда Давут наһайити аччиқлинип, Набал вә униң өйидики һәммә әркәкләрни өлтүрмәкчи болған (Сам. 1-яз. 25:3—13, 22). Амма Набалниң чирайлиқ аяли Абигайил бәк пәм-парасәтлик болған. У җасарәт билән Давутниң алдида тизлинип, бегуна қан төкмәй, бәлки өч елишни Йәһваға қалдурушқа үндигән. Абигайилниң кәмтәрлик билән ейтилған сөзлири вә тутқан йоллири Давутниң жүригигә тәсир қилип, у Абигайилни өзиниң алдиға Йәһва Худаниң әвәткәнлигини ейтқан (Сам. 1-яз. 25:23—28, 32—34). Йәһва униңдин пайдилиниши үчүн, Абигайил керәклик пәзиләтләрни йетилдүргән. Дәл шуниңға охшаш, силиқ-сипайилик билән мәслиһәт беришни вә пәм-парасәт билән иш тутушни үгинидиған аял қериндашлар аилисини вә җамаәтни мустәһкәмләләйду (Пәнд н. 24:3; Тит. 2:3—5).

11. Шаллумниң қизлири немә қилған вә бүгүнки күндә улардин кимләр үлгә алмақта?

¹¹ Көп әсирләрдин кейин, Шаллумниң қизлири Йерусалимниң тамлирини әслигә кәлтүрүш ишиға қатнишиш шан-шәрипигә егә болған (Нәһ. 2:20; 3:12). Уларниң дадиси шаһзадә болсиму, Шаллумниң қизлири бу қийин вә бәк хәтәрлик ишни қилишқа тәйяр болған (Нәһ. 4:15—18). Уларниң вә бойсунушни халимиған Тиқовалиқ жут башлириниң арисидики пәриқ йәр билән асмандәк еди (Нәһ. 3:5). Қурулуш 52 күн ичидила пүткәндә, Шаллумниң қизлири қанчилик хошал болғанлиғини тәсәввур қилип көрүңа! (Нәһ. 6:15). Бизниң күнлиримиздә көплигән аял қериндашлар Йәһва Худаға беғишланған имарәтләрни қуруш вә яхши һаләттә сақлаш ишлириға ярдәмлишип, муқәддәс хизмәтниң бу алаһидә түригә хошаллиқ билән қатнишиду. Шу қериндашлар қабилийәтлирини ишлитип, қизғинлиқ вә садақәтмәнлик билән хизмәт қилип, Падишалиқ ишиниң алға бесишиға һәссисини қошмақта.

12. Йәһва Худа Табитани ишләткәндәк, бизни қандақ ишлитиләйду?

¹² Йәһва Худа Табита исимлиқ қериндашни болупму тул аялларға көплигән яхши вә хәйрихаһлиқ ишларни қилишқа үндигән (Әлч. 9:36). Табита бәк мәрт вә меһрибан болған, шуңа у өлүп кәткәндә нурғун етиқатдашлар қайғурған. Бирақ әлчи Петрус уни тирилдүргәндә, улар интайин хурсән болған еди (Әлч. 9:39—41). Табитаниң үлгисидин немини үгинимиз? Яш яки яшинип қалған, әр яки аял болуштин қәтъийнәзәр, һәммимиз қериндашларға әмәлий ярдәм берәләймиз (Ибр. 13:16).

13. Йәһва Худа Рут исимлиқ тартинчақ қериндашни қандақ ишләткән вә у немә дегән?

¹³ Рут исимлиқ тартинчақ қериндашниң миссионер болуп хизмәт қилиш  армини болған. Яш чеғида у қизғинлиқ билән өйму өй вәз қилип, адәмләргә варақчиларни тарқатқан. Рут вәз қилишни бәк яхши көрсиму, адәмләр билән Худа Падишалиғи тоғрилиқ үзму үз сөзлишиш униң үчүн қийин болған еди. Тартинчақ болғиниға қаримастин, Рут 18 яшқа киргәндә пионер болуп хизмәт қилишни башлиған. 1946-жили у Гилиад мәктивидә оқуп, кейин Гаваий вә Япониядә хизмәт қилған. Йәһва шу йәрләрдә хуш хәвәрни тарқитиш үчүн Рут қериндашни ишләткән. Тәхминән 80 жил хизмәт қилған Рут мундақ дегән: «Йәһва Худа маңа дайим күч берәтти. Униң ярдими билән мән тартинчақлиқни йәңдим. Йәһваға таянсиңиз, У сизни чоқум ишлитиду».

14. Колосилиқларға 1:29ға асасән, Йәһваниң бизни ишлитишини халисақ, немә қилишимиз керәк?

¹⁴ Қедимдин таки бүгүнгә қәдәр Йәһва Худа Өз хизмәтчилирини һәрхил усулларда қоллинип кәлгән. Йәһва Худа сизни ким болғузалайду? Бу соалниң җавави сизниң тиришчанлиқ билән күч чиқиришқа тәйяр болған-болмиғанлиғиңизға бағлиқ (Колосилиқларға 1:29ни оқуң). Йәһваниң өзүңизни қоллинишиға йол қойсиңиз, У сизни қизғин вәз ейтқучи, маһир устаз, меһрибан тәсәлли бәргүчи, қабилийәтлик хизмәтчи, яхши дост яки Униң ирадисини орунлаш үчүн йәнә ким болуш зөрүр болса, шу болғузалайду.

15. Тимотийға 1-хәт 4:12, 15кә асасән, яш бурадәрләр Йәһвадин немини соралайду?

¹⁵ Яш бурадәрләр, җамаәтләр хизмәт ярдәмчиси болуп хизмәт қилалайдиған күч-қувәткә толған яш жигитләргә муһтаҗ. Чүнки нурғун җамаәтләрдә хизмәт ярдәмчилиригә қариғанда ақсақаллар көп. Сиз җамаәттә көпирәк вәзипиләрни бойниңизға елиш арзусини йетилдүрүватамсиз? Бәзи бурадәрләр: «Адәттикидәк вәз ейтқучи болсам, шуниңдин хурсәнмән»,— дәйду. Сизму шундақ ойлисиңиз, Йәһва Худадин хизмәт ярдәмчиси болуш арзу-истигини йетилдүрүшкә ярдәм вә Униңға хизмәт қилиш үчүн қолуңиздин кәлгининиң һәммисини қилишиңизға күч-қудрәтни сораң (Вәз 12:1). Биз сизниң ярдимиңизгә интайин муһтаҗ! (Тимотийға 1-хәт 4:12, 15ни оқуң).

16. Биз Йәһвадин немини соришимиз керәк вә немә үчүн?

¹⁶ Йәһва Худа сизни Униң ирадисини орунлаш үчүн ким болушқа тоғра кәлсә, шу болғузалайду. Шуниң үчүн, Йәһвадин Униң хизмитини қилиш арзу-истәкни һәм сизгә керәклик күч-қудрәтни сораң. Мәйли яш яки яшанған болайли, вақтимиз, күчимиз, қабилийәтлиримиз вә қолумизда бар нәрсилиримизни Йәһва Худаға шан-шәрәп кәлтүрүш үчүн ишлитәйли (Вәз 9:10). Йәһваға көпирәк хизмәт қилиш пурситигә егә болсиңиз, қолумдин кәлмәйду дәп қорқуп, бу шан-шәрәптин дәрһал баш тартмаң. Көйүмчан Атимиз Йәһваға шан-шәрәп кәлтүрүшкә өз һәссимизни қошуш пурситини қәдирләйли!