1. Бу дунияда кәң тарқалған шәхсийәтчилик бизгә қандақ яман тәсир қилиши мүмкин?

 ХУДА СӨЗИДИН алған билимлиримизгә мас һәрикәт қилиш немә үчүн шунчә тәс? Чүнки тоғра һәрикәт қилиш үчүн кәмтәр болушимиз керәк. «Ахирқи күнләрдә» һаят кәчүрүватқанлиқтин, бизгә кәмтәр болуп қелиш қийин, сәвәви көп адәмләр «өзинила яхши көридиған, пулхумар, өзигә ишинидиған, тәкәббур» вә «өзини туталмайдиған» болуп кәткән (Тимотийға 2-хәт 3:1—3). Биз Худаниң хизмәтчилири болғанлиқтин, мундақ хисләтләрниң яман екәнлигини билимиз. Лекин бу хисләтләрни көрситидиған адәмләр утуққа йетиватқандәк вә һаятниң қизиғини көрүватқандәк туюлиши мүмкин (Зәбур 37:1; 73:3). Бизгә һәтта мундақ ойлар келидиғанду: «Өзүмниң әмәс, башқиларниң ғемини ойлашниң әмәлийәттә пайдиси барму? Кәмтәр болсам, башқиларниң алдида аброюм чүшүп қалмамду?» (Луқа 9:48). Биз шәхсийәтчи болсақ, қериндашлар билән болған мунасивитимизни бузуп, башқилардин мәсиһийләр сүпитидә пәриқләнмәслигимиз мүмкин. Бирақ Худа хизмәтчилириниң кәмтәрлиги һәққидә үгинип, улардин үлгә алсақ, утуққа еришимиз.

2. Худаниң қедимий садиқ хизмәтчилиридин немини үгинәләймиз?

² Худаниң қедимий садиқ хизмәтчилиригә Униң билән  дост болушқа немә ярдәм бәргән? Улар Худаниң қәлбини қандақ хурсән қилған? Тоғра һәрикәт қилиш үчүн күчни қәйәрдин алған? Муқәддәс китаптин улар һәққидә оқуп, мулаһизә қилсақ, бизниң етиқадимиз мустәһкәмлиниду.

3, 4. а) Йәһва Худа бизгә немиләр арқилиқ тәлим бериду? ә) Етиқадимизни мәһкәм сақлаш үчүн билим елиш немә үчүн йетәрлик әмәс?

³ Йәһва бизгә етиқадимизни мәһкәм сақлаш үчүн керәклик һәммини бериду. Биз Муқәддәс китап, әдәбиятлиримиз, jw.org торбети, интернет телевизияси, җамаәт учришишлири вә конгресслар арқилиқ нәсиһәт һәм тәлим елип туримиз. Бирақ Әйса билим елиштин муһимирақ нәрсә тоғрисида ейтқан. У: «Мениң тамиғим — мени Әвәткүчиниң ирадисини әмәлгә ашуруш вә Униң маңа тапшурған ишини тамамлаш»,— дегән (Йоһан 4:34).

⁴ Әйса Худаниң ирадисини орунлашни тамақ йейиш билән селиштурған. Пайдилиқ таам тенимизгә күч-қувәт бәргәндәк, Худаниң ирадисини орунлаш етиқадимизни мустәһкәмләйду. Мәсилән, һерип қалсиңизму, вәз учришишиға қатнишип, вәз қилип қайтқанда, өзүңизни хошал һис қилған күниңиз болғанму?

5. Дана болушниң қандақ пайдиси бар?

⁵ Йәһва Худаниң сөзигә қулақ селиш даналиқтур (Зәбур 107:43). Даналиққа егә болсақ, буниң көп пайдисини көримиз. Муқәддәс китапта: «Есил нәрсиләрниң һечқайси [даналиқ] билән тәң болалмайду. ... У уни тутқанларға һаятлиқ дәриғи, уни қоймиғанлар бәхитлик атилиду»— дәп ейтилған (Пәнд-нәсиһәтләр 3:13—18). Әйса: «Буни билип, шуниңға әмәл қилсаңлар, бәхитликсиләр»,— дегән (Йоһан 13:17). Әйсаниң шагиртлири бәхитлик болуш үчүн униң сөзигә давамлиқ қулақ селиши керәк еди. Әйсаниң тәлимлирини әмәлийәттә қоллиниш вә униңдин үлгә елиш шагиртлириниң һаят тәрзи болған.

6. Немә үчүн алған билимлиримизни давамлиқ қоллинишимиз муһим?

⁶ Бүгүнки күндә бизму Муқәддәс китаптин алған билимлиримизни давамлиқ әмәлийәттә қоллинишимиз керәк. Машина җөндәйдиған устини мисалға алайли. Униң қурал-җабдуқлири, керәклик запчаслири вә билими бар. Бирақ у шуларни қолланған һаләттила яхши уста болалайду. У ишида жиллар бойи тәҗрибә жиғсиму, яхши уста болуп қелиш үчүн билимини давамлиқ қоллиниши керәк. Шуниңға охшаш, биз һәқиқәтни тонуп билгәндә, бәк хошал болған едуқ. Бирақ мәңгү бәхиткә еришиш үчүн биз Йәһвадин алған билимлиримизни һәр күни қоллинишимиз муһим.

7. Худаниң садиқ хизмәтчилиридин үлгә елиш үчүн немә қилишимиз керәк?

⁷ Бу мақалидә биз кәмтәр болуп қелиш қийин болидиған вәзийәтләрни муһакимә қилимиз. Қедимда Худаниң садиқ хизмәтчилири кәмтәрликни қандақ сақлиғанлиғини көрүп чиқимиз. Шундақла биз кәмтәрлик көрситишниң төрт йолини биливалимиз. Амма буни билипла қоюш йетәрлик әмәс, бәлки алған билимлиримизни һаятимизда қандақ қоллиниш һәққидә ойлинишимиз керәк.

8, 9. Әлчиләр 14:8—15 айәтләрдин Паулниң кәмтәрлиги һәққидә немини билимиз? (Мақалиниң бешидики рәсимгә қараң.)

⁸ Йәһва Худа «һәрқандақ адәмләрниң қутқузулушини вә һәқиқәтниң тоғра билимигә келишини халайду» (Тимотийға  1-хәт 2:4). Сиз һәқиқәтни тонумайдиған адәмләргә қандақ қарайсиз? Әлчи Паул вәз қилған йәһудийларниң Йәһва һәққидә билими болған. Лекин у сахта илаһларға сәҗдә қилған кишиләргиму хуш хәвәрни йәткүзгән. Уларға вәз қилғанда Паулниң кәмтәрлиги синалған еди. Қандақларчә?

⁹ Биринчи миссионерлиқ сәпиридә Паул билән Барнаба Листра шәһиригә барған. Шу йәрдики ликаончә сөзләйдиған кишиләр Паул билән Барнабани адәм қияпитидики Зевс билән Гермес дегән ялған илаһлар дәп һесаплиған. Паул билән Барнаба шан-шөһрәткә егә болуш аздурулушиға берилгәнму? Буниңдин бурун барған икки шәһәрдә тәқипкә дуч кәлгәндин кейин, бу тәсәлли елишниң пурсити дәп ойлиғанму? Хәлиқниң уларға көрсәткән диққити көпирәк адәмләрниң хуш хәвәрни аңлишиға йол бериду дәп һесаплиғанму? Яқ. Улар наразилиқ билдүрүп: «Немишкә силәр буни қиливатисиләр? Биз силәрдәкла аҗиз адәмләр»,— дәп вақириған (Әлчиләр 14:8—15).

10. Паул билән Барнаба немә үчүн өзлирини ликаончә сөзләйдиған адәмләрдин үстүн дәп һесаплимиған?

¹⁰ Паул билән Барнаба «Биз силәрдәкла аҗиз адәмләр»,— дегәндә, өзлириниң намукәммәл екәнлигини ейтқуси кәлгән. Әлвәттә, улар ликаончә сөзләйдиған адәмләрдәк сахта илаһларға сәҗдә қилмиған. Худа Паул билән Барнабани миссионерлар сүпитидә әвәткән (Әлчиләр 13:2). Улар муқәддәс роһ билән майланған вә әҗайип үмүткә еришкән болсиму, өзлирини башқилардин үстүн тутмиған. Паул билән Барнаба адәмләр хуш хәвәрни қобул қилса, уларму асмандики һаятқа егә болуш үмүтигә еришәләйдиғанлиғини чүшәнгән.

11. Вәз қилғанда қандақларчә Паулға охшаш кәмтәр болалаймиз?

¹¹ Бу вақиәдин Паулға охшаш кәмтәр болушниң бир йолини үгинәләймиз. Йәһваниң бизгә тапшурған вәз иши яки Униң ярдими билән атқуруватқан башқа ишлар түпәйли өзүмизни өзгиләрдин үстүн санимаслиғимиз керәк. Биз өзүмиздин: «Участкамдики адәмләргә қандақ қараймән? Бәзи адәмләрни өзүмдин төвән көримәнму?»— дәп соришимиз керәк. Дунияниң җай-җайлиридики Йәһва гувачилири хуш хәвәрни қобул қилидиған адәмләрни тепишқа күч салиду. Бәзи Гувачилар һәтта көпчилик төвән көридиған хәлиқләрниң тилини үгинишкә тиришиду. Амма улар өзини шу кишиләрдин үстүн һесаплимайду. Әксичә, улар мүмкинқәдәр көпирәк адәмләр хуш хәвәрни қобул қилиши үчүн һәрбир адәмни чүшинишкә һәрикәт қилиду.

12. Епафрас чин жүрәктин қериндашларниң ғемини йегәнлигини қандақ көрсәткән?

¹² Кәмтәрликни көрситишниң йәнә бир йоли — «биз қатарида етиқатқа муйәссәр болған» қериндашлиримиз үчүн дуа қилиш (Петрусниң 2-хети 1:1). Епафрас исимлиқ қериндаш бу җәһәттин бизгә яхши үлгә қалдурған. Муқәддәс китапта у үч қетим тилға елиниду. Паул Римда өй қамиғида болғанда, Колоси шәһиридики қериндашларға Епафрас һәққидә мундақ язған: У «һәрдайим җан-дили билән дуаларни қиливатиду» (Колосилиқларға 4:12). Епафрас қериндашларниң шараитини яхши билгән вә чин жүрәктин уларниң ғемини ойлиған. Паул Епафрасму «зинданға соланған» дәп ейтқан. Демәк, Епафрасму қийин әһвалда болған (Филимунға 23). Бирақ шуниңға қаримастин, у башқиларниң  ғемини йәп, қолидин кәлгиничә ярдәм қилишқа тиришқан. Епафрас қериндашлар тоғрисида дуа қилған. Бизму униңдин үлгә елип, қериндашларниң исимлирини атап дуа қилсақ болиду. Мундақ дуаларниң күчи зор (Коринтлиқларға 2-хәт 1:11; Яқуп 5:16).

13. Дуа қилғанда Епафрастин қандақ үлгә алалайсиз?

¹³ Сиз кимләрниң исмини атап дуа қилалайсиз? Мәсилән, җамаәттики достлириңиз яки қийинчилиққа дуч кәлгән аилиләр үчүн дуа қилалайсиз. Улар бирәр қийин қарар чиқириш алдида туруши мүмкин. Йә болмиса, аздурушларға қарши туриватқанду. Сиз jw.org торбетидики «Йәһва гувачилири етиқади үчүн қамаққа елинған дөләтләр» (русчә «Страны, где Свидетели Иеговы находятся в заключении за веру») дегән мақалидә исми йезилған қериндашлар үчүн дуа қилсиңиз болиду (Торбетимиздики НОВОСТИ > ЮРИДИЧЕСКАЯ СИТУАЦИЯ дегән йәргә қараң). Шундақла йеқинлиридин айрилған, тәбиий апәттә зәрдап чәккән, урушни баштин кәчүргән вә пул тәрәптин қисиливатқан етиқатдашлар үчүн дуа қилсиңиз болиду. Һә, бизниң дуалиримизға муһтаҗ қериндашлар интайин көп! Улар һәққидә дуа қилғанда, биз пәқәт өзүмизниңла әмәс, башқиларниңму еһтияҗлирини нәзәрдә тутидиғанлиғимизни көрситимиз (Филипиликләргә 2:4). Йәһва шундақ дуаларни аңлайдиғанлиғи шүбһисиз.

14. Немә үчүн Йәһва әң яхши тиңшиғучи дәп ейталаймиз?

¹⁴ Кәмтәрликни көрситишниң келәрки йоли — башқиларни зеһин қоюп тиңшаш. Яқуп 1:19да биз «аңлашқа тез» болушимиз керәклиги йезилған. Йәһва — әң яхши тиңшиғучи (Яритилиш 18:32; Йәшуа 10:14). Мәсилән, Чиқиш 32:11—14тики (оқуң) сөһбәтни оқуп көрәйли. Йәһваға Мусаниң ой-пикрини билиш керәк болмисиму, У Мусаға өз ойини ейтишқа пурсәт бәргән. Сиз бурун хаталиқ өткүзгән бирсини сәвир-тақәт билән тиңшап, униң мәслиһитигә қулақ салаттиңизму? Йәһва Худа Өзигә ишәнч билдүрүп дуа қилған һәрбир адәмни сәвирчанлиқ билән тиңшайду.

15. Йәһвадин үлгә елип, башқиларға қандақ һөрмәт көрситәләймиз?

 ¹⁵ Өзүңиздин мундақ сорап көрүң: «Йәһва Худа Ибраһим, Раһилә, Муса, Йәшуа, Мануһ, Илияс вә Хизқиядәк аддий адәмләрни кәмтәрлик билән тиңшиған болса, мәнму шундақ қилишим керәк әмәсму? Қериндашларни тиңшап, мүмкин болғанда уларниң ой-пикирлиригә қулақ селиш арқилиқ уларға көпирәк һөрмәт көрситәләймәнму? Җамаәттә яки аиләмдә кимгә көпирәк көңүл бөләләймән? Буни қандақ қилсам болиду?» (Яритилиш 30:6; Һакимлар 13:9; Падишалар 1-язма 17:22; Тарихнамә 2-язма 30:20).

16. Шимий Давутни һақарәтлигәндә у қандақ һәрикәт қилған?

¹⁶ Әгәр биз кәмтәр болсақ, башқилар бизгә яман муамилә қилғанда, өзүмизни туталаймиз (Әфәсликләргә 4:2). Самуилниң 2-язмиси 16:5—13 (оқуң) айәтләрдә буниң әҗайип үлгисини көрәләймиз. Шаул падишаниң Шимий дегән туққини Давут билән униң хизмәткарлирини һақарәтләп, уларға таш атқан. Давут Шимийни тохтиталатти, бирақ буниң орниға у сәвирчанлиқ билән униң һақарәтлиригә чидиған. Давутқа өзини тутушқа немә ярдәм бәргән? Бу соалниң җававини Зәбурниң үчинчи бабидин тапалаймиз.

17. Давутқа өзини тутушқа немә ярдәм бәрди вә биз униңдин қандақ үлгә алалаймиз?

¹⁷ Давут падиша Зәбур китавиниң үчинчи бабини оғли Абшалом уни өлтүрмәкчи болған чағда язған еди. Шимийму дәл шу вақитта Давутқа қарши чиққан, бирақ Давут сәвирликни сақлиған. Қандақларчә? Давут Зәбур 3:4тә мундақ дәп язған: «Йәһваға қаттиқ үндәймән вә У муқәддәс теғидин җавап бериду». Башқилар бизгә қарши чиқип, яманлиқ қилғанда, бизму Давутқа охшаш дуа қилишимиз керәк. Шу вақитта Йәһва бизгә қийинчилиқларға бәрдашлиқ беришимиз үчүн муқәддәс роһини бериду. Бирлири сизгә яман муамилә қилғанда, өзүңизни туталамсиз яки чин қәлбиңиздин кәчүрәләмсиз? Йәһва һәммә қийинчилиқлириңизни көридиғанлиғиға вә чоқум ярдәм беридиғанлиғиға ишинәмсиз?

18. Йәһваниң сөзигә мас һәрикәт қилишниң қандақ пайдиси бар?

¹⁸ Йәһваниң көз алдида неминиң тоғра екәнлигини билип, шуниңға мас һәрикәт қилсақ, дана болимиз һәм Униң бәрикитигә еришимиз. Пәнд-нәсиһәтләр 4:7дә: «Даналиқ дегән һәммә ишниң әң бешидур»,— дәп йезилған. Даналиқ билимгә асасланған болсиму, билгәнлиримизни чүшиниш биләнла чәкләнмәйду. Даналиқ иш-һәрикәтлиримиздин вә чиқарған қарарлиримиздин көрүниду. Һәтта чүмүлиләр қишқа озуқ жиғип, даналиғини көрситиду (Пәнд-нәсиһәтләр 30:24, 25). Худадин кәлгән даналиққа егә болған Мәсиһ, Атисини дайим хурсән қилған (Коринтлиқларға 1-хәт 1:24; Йоһан 8:29). Бизму Худаниң көз алдида тоғра қарар чиқирип вә униңға мас һәрикәт қилиш арқилиқ кәмтәрликни һәм даналиқни көрсәтсәк, Йәһва бизни бәрикәтләйду (Мәтта 7:21—23ни оқуң). Шуңа кәмтәрликни көрситиш үчүн күч салсиңиз, җамаәттики қериндашларни Йәһваға кәмтәрлик билән хизмәт қилишқа дәвәт қилисиз. Әлвәттә, билгәнлиримизни әмәлийәттә қоллиниш үчүн вақит билән сәвирчанлиқ керәк. Шундақ қилсақ, кәмтәр болуп, мәңгү бәхиткә еришәләймиз.