35-ТӘТҚИҚ МАҚАЛИСИ
Йәһва Худа кәмтәр хизмәтчилирини қәдирләйду
«Йәһва... мулайимни көриду» (ЗӘБ. 138:6).
48-НАХША Һәр күни Йәһва билән жүр
БУ МАҚАЛИДӘ a
1. Йәһва Худа кәмтәр адәмләргә қандақ қарайду? Чүшәндүрүп бериң.
ЙӘҺВА ХУДА кәмтәр адәмләрни яхши көриду вә пәқәт һәқиқий кәмтәр адәмләр Униң билән йеқин мунасивәттә болалайду. «Тәкәббурни болса, жирақтинла билиду» (Зәб. 138:6). Һәммимиз Йәһваниң жүригини хошал қилип, Униң меһир-муһәббитигә еришишни халаймиз, шуңа биз кәмтәр болушни үгинишимиз муһим.
2. Бу мақалидә немини көрүп чиқимиз?
2 Мошу мақалидә биз бу үч соалниң җававини тапимиз: 1) Кәмтәрлик дегән немә? 2) Биз немә үчүн кәмтәр болушимиз керәк? 3) Кәмтәрлигимиз қандақ вәзийәтләрдә синилиши мүмкин? Кәмтәрликни йетилдүрүшимиз Йәһваниң жүригини хошал қилиду һәм өзүмизгиму пайда-мәнпәәт әкелиду (Пәнд н. 27:11; Йәшая 48:17).
КӘМТӘРЛИК ДЕГӘН НЕМӘ?
3. Кәмтәрлик дегән немә?
3 Тәкәббурлуқ вә мәғрурлуқ кәмтәр кишиниң вуҗудиға ят нәрсиләр. Муқәддәс китапта кәмтәр кишиниң Йәһва Худа вә башқилар билән болған мунасивитигә тоғра көзқариши болидиғанлиғи йезилған. Кәмтәр киши башқиларниң мәлум дәриҗидә униңдин артуғирақ екәнлигини чүшиниду (Флп. 2:3, 4).
4, 5. Кәмтәр болуп көрүнгән адәмләр немә үчүн әсли кәмтәр болмаслиғи мүмкин?
4 Бәзи кишиләр пәқәт көрүнүшкила кәмтәр болуп көрүниду. Лекин уларниң миҗәз-хулқи жугач яки уялчақ болуши мүмкин. Болмиса, мәдәнийити вә алған тәрбийиси түпәйли башқиларға һөрмәт көрситиши яки силиқ-сипайә муамилә қилидиғанду. Бирақ әсли улар жүригидә тәкәббур болуши мүмкин. Күнләрниң биридә, уларниң жүригидә немә барлиғи ашкарә болиду (Луқа 6:45).
5 Башқа бир тәрәптин, өзигә ишәнчлик яки удул сөзләйдиған кишиләрни тәкәббур дәп кесип ейтишқа болмайду (Йоһ. 1:46, 47). Шундақ болсиму, башқилар билән тез тил тепишидиған адәмләр, тәкәббур болуп кәтмәслик үчүн, өз қабилийитигә тайиништин пәхәс болуши керәк. Миҗәз-хулқимиз мәйли қандақ болсун, һәммимиз кәмтәр болуш үчүн күч чиқиришимиз лазим.
Әлчи Паул кәмтәр болған вә өзини башқилардин муһимирақ дәп һесаплимиған (6-абзацқа қараң) d
6. Коринтлиқларға 1-хәт 15:10ни оқуп, Паулниң үлгисидин немини үгинәләймиз?
6 Мәсилән, әлчи Паул Йәһваниң хизмитидә әҗир сиңдүргән еди. У һәр түрлүк шәһәрләрдә йеңи җамаәтләрни тәшкил қилишқа ярдәм бәргән. Бәлким, Паул Әйсаниң башқа әлчилиригә қариғанда, көпирәк утуқларға йәткән. Буниңға қаримастин, у өзини башқа қериндашлардин муһимирақ дәп һесаплимиған. Әлчи Паул кәмтәрлик билән мундақ дегән: «Мән әлчиләрниң арисида әң төвини һәм әлчи дәп атилишқиму лайиқсиз, чүнки мән Худаниң җамаитини тәқиплигән [зиянкәшлик қилған] едим» (Кор. 1-х. 15:9). Андин Паул башқилардин артуқ яки қабилийәтлик болғанлиқтин әмәс, Йәһва униңға мол меһир-шәпқәт көрсәткәнликтин, Униң билән йеқин мунасивәттә болғанлиғини етирап қилған (Коринтлиқларға 1-хәт 15:10ни оқуң). Әлчи Паул кәмтәрликниң әҗайип үлгисини көрсәтти. Коринттики җамаәткә хәт язғанда бәзиләр уни тәнқит қилсиму, у махтанмиған (Кор. 2-х. 10:10).
Рәһбәрлик кеңәшниң әзаси болған Карл Клейн бурадәр бәк кәмтәр еди (7-абзацқа қараң)
7. Бир мәшһур бурадәр кәмтәр екәнлигини қандақ көрсәткән? Мисал кәлтүрүң.
7 Нурғун қериндашлар Рәһбәрлик кеңәшниң әзаси болған Карл Клейнниң тәрҗимиһалини оқуп, илһам алған. Карл бурадәр өзиниң аҗизлиқлири вә һаятидики бәзи қийинчилиқлири тоғрилиқ очуқ ейтип бәргән. Мәсилән, у 1922-жили биринчи қетим өйму өй вәз қилған. Лекин униң үчүн бу бәк қийин болғанлиқтин, у икки жилчә вәз ишиға қатнашмиған. Кейинирәк Бәйтәлдә хизмәт қилған вақтида бир бурадәр униңға нәсиһәт бәргәндә, у бираз вақит адавәт сақлап жүргән. Шундақла ғәм-әндишиләр түпәйлидин нерва кесилигә гириптар болған еди, лекин кейин сақийип кәткән. Буларға қаримастин, Карл Клейн җамаәттә көплигән муһим вәзипиләрни атқурған. Шундақ һәммигә тонушлуқ бурадәрниң өз камчилиқлирини очуқ ейтқанлиғи униң кәмтәрлигини көрсәткән. Нурғун қериндашлар Карл Клейн бурадәрниң һечнәрсини йошурмай язған қизиқарлиқ тәрҗимиһалини әсләйду. b
БИЗ НЕМӘ ҮЧҮН КӘМТӘР БОЛУШИМИЗ КЕРӘК?
8. Петрусниң 1-хети 5:6дики сөзләр кәмтәрлигимиз Йәһвани хошал қилидиғанлиғини қандақ көрситиду?
8 Кәмтәр болушимизниң әң муһим сәвәви — биз Йәһва Худани хошал қилишни халаймиз. Әлчи Петрус буни ениқ көрсәткән (Петрусниң 1-хети 5:6ни оқуң). Петрусниң бу сөзлири «Келип, мениң шагиртим болғин» (рус) дегән китапта муһакимә қилинған. У йәрдә: «Тәкәббурлуқ зәһәргә охшаш. Ақивети интайин ечинишлиқ болуши мүмкин. Адәм бәк қабилийәтлик болсиму, лекин тәкәббур болса, Худаниң алдида пайдисиз болиду. Амма адәм кәмтәр болса, һәтта қабилийити болмисиму, Йәһва үчүн пайдилиқ болалайду. Йәһва Худа кәмтәрлигиңизни чоқум мукапатлайду c»,— дәп йезилған. Һәқиқәтән, Йәһва Худаниң жүригини хошал қилиштин әвзәлирәк иш барму?! (Пәнд н. 23:15).
9. Немә үчүн кәмтәрлик башқиларни бизгә җәлип қилиду?
9 Кәмтәрликни йетилдүргәндә, биз Йәһвани хошал қилиштин башқа йәнә нурғун бәрикәтләргә еришимиз. Кәмтәр болсақ, башқилар бизгә йеқин болушни халайду. Немә үчүн? Чүнки һәммимизгә кәмтәр адәмләр билән биллә болуш яқиду (Мәт. 7:12). Өз дегинидә турувалидиған вә башқиларниң ой-пикрини рәт қилидиған тәрса киши билән мунасивәттә болушни һечким халимайду. Әксичә, қериндашларчә сөйидиған, меһрибан вә кәмтәр етиқатдашлар билән биллә болуш бизгә хошаллиқ бериду (Пет. 1-х. 3:8). Биз кәмтәр кишиләрни яқтуримиз, дәл шундақ кәмтәрликни көрсәтсәк, башқиларму бизгә йеқинлишидиған болиду.
10. Кәмтәр кишигә һаяттики қийинчилиқларға бәрдашлиқ бериш немә үчүн асанирақ?
10 Шундақла кәмтәрлик һаятимизни асанирақ қилиду. Бәзидә биз адаләтсизликкә дуч келимиз. Дана падиша Сулайман: «Мән қулларни атларда жүргинини көрдүм, бәгләр болса қуллардәк пиядә жүриду»,— дәп язған (Вәз 10:7). Адәм қабилийәтлик болсиму, һәрқачан мукапатқа еришмәйду вә бәзидә адәмниң һечқандақ қабилийити болмисиму, у абройға егә болиду. Лекин Сулайман падиша һаятимиздики яманлиқларниң бизни чирмавелишиға йол беришкә қариғанда, бар нәрсиләргә рази болушниң дана екәнлигини ейтқан (Вәз 6:9). Кәмтәр болсақ, һаятимизда һәтта биз яқтурмайдиған бир ишқа дуч кәлсәк, уни қобул қилиш оңайирақ болиду.
КӘМТӘРЛИГИМИЗ ҚАНДАҚ ВӘЗИЙӘТЛӘРДӘ СИНИЛИШИ МҮМКИН?
Шундақ вәзийәттә кәмтәр болуп қелиш немә үчүн қийин? (11, 12-абзацларға қараң) e
11. Бизгә мәслиһәт берилгәндә, қандақ инкас қайтурушимиз керәк?
11 Биз һәр күни кәмтәр екәнлигимизни көрситәләймиз. Бирнәччә вәзийәтләрни көрүп чиқайли. Бизгә мәслиһәт берилгәндә. Бирси бизгә нәсиһәт бәрсә, өткүзгән хаталиғимиз бәлким биз ойлиғандин еғирирақ болуши мүмкинлигини әстин чиқармаслиғимиз керәк. Бирси бизни түзәткәндә, биз нәсиһәтни дәрһалла рәт қилишимиз мүмкин. Биз һәтта мәслиһәт бәргән кишиниң өзини яки нәсиһәт бәргән усулини яқтурмай, тәңқит қилишимиз мүмкин. Амма кәмтәр болсақ, биз нәсиһәткә тоғра көзқарашта болушқа тиришимиз.
12. Пәнд-нәсиһәтләр 27:5, 6гә асасән, мәслиһәт бәргән кишигә немә үчүн миннәтдар болушимиз керәк? Мисал кәлтүрүң.
12 Кәмтәр киши мәслиһәт үчүн миннәтдар. Мәсилән, җамаәт учришишиға кәлдиңиз дәйли. Сиз бирнәччә қериндаш билән сөзлишип болғандин кейин, уларниң бири сизни чәткә тартип: «Чишиңизға бирнәрсә чаплишип қапту»,— дәп аста ейтип қойди. Сиз хиҗаләт болушиңиз мүмкин, бирақ шу қериндашқа миннәтдар болмамсиз? Әмәлийәттә, «буни маңа бирси балдурирақ ейтип қойған болса, хойму яхши болатти» дәп ойлайсиз. Шуниңға охшаш, бирси бизгә келип, нәсиһәт бәрсә, кәмтәрликни көрситишимиз вә шу кишигә миннәтдар болушимиз керәк. Биз мәслиһәт бәргән кишини дүшминимиз әмәс, достумиз дәп билишимиз лазим (Пәнд-нәсиһәтләр 27:5, 6ни оқуң; Гал. 4:16).
Башқилар вәзипиләргә еришкәндә, биз немә үчүн кәмтәр болушимиз керәк? (13, 14-абзацларға қараң) f
13. Башқилар шәрәплик вәзипиләргә еришкәндә, кәмтәрликни қандақ көрситәләймиз?
13 Башқилар шәрәплик вәзипиләргә еришкәндә. Джейсон дегән ақсақал: «Башқа бирсигә шәрәплик вәзипә тапшурулғанлиғини көргәндә, “немә үчүн маңа тапшурмиди” дәп ойлаймән»,— дегән. Сизму шундақ һис-туйғуда болғанму? Әлвәттә, Йәһва үчүн көпирәк хизмәт қилишқа интилишниң һеч ямини йоқ (Тим. 1-х. 3:1). Лекин биз немә тоғрилиқ ойлайдиғанлиғимизға бәк диққәтлик болушимиз муһим. Пәхәс болмисақ, жүригимиздә тәкәббурлуқ йилтиз тартиши мүмкин. Мәсилән, бурадәр җамаәттики бирәр вәзипини униңдин яхширақ қилалайдиған адәм йоқ дәп ойлайдиғанду. Аял қериндаш болса, «йолдишим бу ишни паланчи-покунчидин яхширақ қилалатти» дәп ойлиши мүмкин. Бирақ биз һәқиқәтән кәмтәр болсақ, шундақ ойлардин нери туримиз.
14. Башқилар вәзипиләргә еришкәндә Муса немә қилған вә униңдин қандақ үлгә алалаймиз?
14 Бу җәһәттин Муса пәйғәмбәр яхши үлгә қалдурған. У Исраил хәлқини йетәкләш вәзиписини бәк қәдирлигән. Амма Йәһва Худа Муса қиливатқан хизмәтниң бир қисмини башқиларға тапшурғанда, у қандақ инкас қайтурған? У ич тарлиқ қилмиған (Сан. 11:24—29). Муса кәмтәрликни көрситип, башқиларниң униң билән биллә «жүкни көтиришигә» қарши болмиған (Чиқ. 18:13—24). Чүнки хәлиққә ярдәм беридиған кишиләрниң сани көпийип, исраиллиқлар мәсилисини һәл қилиш үчүн бурунқидәк узақ вақит күтүшкә мәҗбур болмиған. Муса үчүн жут ичидә нам-абройға егә болуштин хәлиқниң әһвали муһимирақ болған. Биз үчүн немә дегән әҗайип үлгә! Йәһва Худа үчүн пайдилиқ болушни халисақ, қабилийәтлик болушимиздин көрә кәмтәр болушимиз муһимирақ екәнлигини унтумайли. Йәһва «егиз болсиму, мулайимни көриду» (Зәб. 137:6).
15. Нурғун қериндашларниң вәзийити қандақ өзгәргән?
15 Вәзийитимиз өзгәргәндә. Йеқинқи жилларда Йәһваға узун вақит хизмәт қилип кәлгән нурғун қериндашларниң хизмити өзгәргән. Мәсилән, 2014-жили тәшкилатта өзгиришләр йүз берип, вилайәтлик назарәтчиләр вә уларниң аяллири толуқ вақитлиқ хизмәтниң башқа бир түрини қилишқа башлиған. Шу жилдин тартип наһийилик назарәтчиләр 70 яшқа киргәндә вәзиписини тохтитидиған болди. 80 яшқа киргән ақсақаллар болса, әнди җамаәттә ақсақаллар кеңишиниң рәиси сүпитидә хизмәт қилмайду. Ахирқи бирнәччә жиллар ичидә нурғун бәйтәлликләр пионер болуп хизмәт қилишқа әвәтилгән. Толуқ вақитлиқ хизмәт қилған бәзи қериндашлар саламәтлиги начарлашқанлиқтин, аилисигә ярдәм бериш үчүн яки башқа сәвәпләргә бола хизмитини тохтатти.
16. Вәзийити өзгәргән қериндашлар кәмтәрлигини қандақ көрсәткән?
16 Шу өзгиришләргә көнүш қериндашлар үчүн оңай болмиған. Нурғун жиллар қилған хизмитини бәк яхши көрүп қалғанлиғи сөзсиз. Қериндашларниң вәзиписи өзгирип кәткәндә, бәзилири худди йеқинидин айрилғандәк қайғурған. Лекин вақит өтүп, улар йеңи вәзийитигә үгинип кәтти. Уларға немә ярдәм бәргән? Әң авал, Йәһваға болған меһир-муһәббити. Улар өзлирини қандақту бир иш яки вәзипигә әмәс, Йәһва Худаға беғишлиғанлиғини әстин чиқармайду (Кол. 3:23). Шу қериндашлар Йәһва Худа үчүн һәрқандақ хизмәтни хошаллиқ билән қилиду. Улар «ғәм-тәшвишлириңларни Униңға тапшуруңлар, чүнки У силәргә ғәмхорлуқ қилмақта» дегән сөзләргә риайә қилиду (Пет. 1-х. 5:6, 7).
17. Худа Сөзи бизни кәмтәр болушқа үндәйдиғанлиғиға биз немә үчүн миннәтдар?
17 Муқәддәс китапниң бизни кәмтәр болушқа үндәйдиғанлиғиға биз бәк миннәтдар, шундақ әмәсму? Биз бу есил пәзиләтни йетилдүргәндә, өзүмизгиму, башқиларғиму пайда әкелимиз. Һаятимиздики қийинчилиқларға бәрдашлиқ бериш асанирақ болиду. Әң муһими, биз әрштики Атимизға йеқинлишимиз. У «Жуқури һәм Алий Болғучи» болсиму, кәмтәр хизмәтчилирини яхши көриду вә уларни қәдирләйду (Йәшая 57:15, КТ).
22-НАХША Йәһва — мениң Падичимдур
a Кәмтәр болушимиз бәк муһим. Кәмтәрлик дегән немә? Биз немә үчүн кәмтәр болушимиз керәк? Вәзийитимиз өзгәргәндә кәмтәрлигимиз қандақ синилиши мүмкин? Бу мақалидә мошу соалларға җавап тапимиз.
b «Күзитиш мунариниң» (ингл.) 1984-жил, 1-октябрь санидики «Йәһва Худа мени мукапатлиди» намлиқ мақалигә қараң.
c 3-бапниң 23-абзациға қараң.