38-ТӘТҚИҚ МАҚАЛИСИ
«Мениң йенимға келиңлар, мән силәргә арамлиқ берәй»
«Һәй, әмгәкчиләр һәм җапакәшләр һәммиңлар маңа келиңлар һәм мән силәрниң һадуғуңларни чиқирай» (МӘТ. 11:28).
25-НАХША Һәқиқий шагирт болушниң бәлгүси
БУ МАҚАЛИДӘ a
1. Мәтта 11:28—30да Әйса қандақ вәдә бәргән?
ӘЙСА уни тиңшаватқан хәлиққә мундақ вәдә бәргән: «Маңа келиңлар һәм мән силәрниң һадуғуңларни чиқирай» (Мәтта 11:28—30ни оқуң). Бу сөзләр қуруқ гәпла әмәс еди. Буни Әйсаниң еғир кесәлдин азапланған аялға ярдәм бәргәнлиги испатлайду.
2. Әйса ағриқ аял үчүн немә қилған?
2 Еғир кесәл азавини тартқан аял киши ярдәмгә бәкму муһтаҗ еди. У нурғун дохтурларға көрүнүп, шипа тепишни үмүт қилған. У 12 жил көп азап-оқубәтләрни чәккән, амма униңға һечким ярдәм берәлмигән. Қанун бойичә у напак дәп һесапланған еди (Ләв. 15:25). Андин шу аял Әйсаниң ағриқларни сақайталайдиғанлиғи тоғрилиқ аңлап, уни издәшкә башлиған. У Әйсани тапқанда униң сиртқи кийиминиң етигигә қолини тәккүзүп, дәрру сақийип кәткән. Бирақ Әйса шу аялни сақайтипла қоймай, униң меһир-муһәббәт вә һөрмәткә сазавәр екәнлигиниму көрсәткән. Әйса униңға сөзлигәндә һөрмәт билән «қизим» дегән иллиқ сөзни ишләткән. Шу аялниң тәсәлли вә күч-мәдәткә еришкәнлиги шәк-шүбһисиздур! (Луқа 8:43—48).
3. Биз қандақ соалларға җавап тапимиз?
3 Байиқи аял Әйсани издәшкә башлап, тәшәббускарлиқни көрсәткән еди. Бизму Әйсаниң «йенимға келиңлар» дегән сөзлиригә риайә қилиш үчүн күч чиқиришимиз керәк. Әйса бизниң заманимизда униңға әгәшкәнләрни ағриқлардин сақайтмайду. Шундақ болсиму, у бизни «маңа келиңлар һәм мән силәрниң һадуғуңларни чиқирай» дәп кәйнидин меңишқа тәклип қиливатиду. Бу мақалидә биз төвәндики соалларға җавап тапимиз: Қандақ қилип Әйсаниң мениң йенимға келиңлар дегән сөзлиригә қулақ салалаймиз? Әйсаниң мениң боюнтуруғумға кириңлар дегән сөзлири немини билдүриду? Әйсадин немини үгинәләймиз? Немә үчүн у тапшурған иш бизгә арамлиқ бериду? Әйсаниң боюнтуруғиға кирип, қандақ арамлиққа еришәләймиз?
МЕНИҢ ЙЕНИМҒА КЕЛИҢЛАР
4, 5. Әйсаниң йениға қандақ келәләймиз?
4 Әйсаға келиш үчүн униң гәп-сөзлири вә иш-һәрикәтлири тоғрилиқ көпирәк билишимиз керәк (Луқа 1:1—4). Һечким бизниң орнимизға Әйса тоғрилиқ үгинәлмәйду, бу һәрбиримизниң вәзиписи. Әйсаға «келишниң» йәнә бир йоли — чөмдүрүлүштин өтүш вә Әйсаниң шагирти болуш.
5 Җамаәттики ақсақалларниң ярдимини қобул қилиш арқилиқму биз Әйсаға келәләймиз. Әйса ақсақалларға униң қойлириға ғәмхорлуқ қилишни тапшурған (Әфәс. 4:7, 8, 11; Йоһ. 21:16; Пет. 1-х. 5:1—3). Ақсақаллардин ярдәм сораш үчүн өз тәрипимиздин күч чиқиришимиз лазим. Биз «ичимдикини тап» дәп олтармаймиз вә ақсақаллар бизгә немә керәклигини өзлири билиду дәп күтмәймиз. Джулиан исимлиқ бурадәр мундақ дәйду: «Саламәтлигим начарлашқанлиқтин Бәйтәлдин кетишимгә тоғра кәлди. Шу чағда бир достум ақсақалларниң келип кетишини соримамсән деди, лекин буниң маңа немә һаҗити бар дәп ойлидим. Кейинирәк бәрибир ақсақаллардин ярдәм издидим вә ақсақалларниң кәлгәнлиги мән үчүн бәрикәт болди». Джулианға йолуққан ақсақаллардәк, садақәтмән ақсақаллар «Мәсиһниң әқлигә» егә болушқа, йәни Әйсаниң пикир қилиш усулини чүшинишкә вә уни үлгә қилишқа ярдәм берәләйду (Кор. 1-х. 2:16; Пет. 1-х. 2:21). Ақсақалларниң ярдими һәқиқәтән биз үчүн әң яхши соғиларниң биридур.
МЕНИҢ БОЮНТУРУҒУМҒА КИРИҢЛАР
6. Әйсаниң «мениң боюнтуруғумға кириңлар» дегән сөзлири немини билдүриду?
6 Әйса «мениң боюнтуруғумға кириңлар» дегәндә, бәлким «маңа бойсунуңлар» демәкчи болған. Йә болмиса, «мениң билән бир боюнтуруқта болуңлар вә биз биллә Йәһва Худаға хизмәт қилайли» дәп ейтмақчи болғанду. Бу сөзләрниң мәнаси қандақ болмисун, боюнтуруқ астиға кириш дегинимиз көп күч чиқиришимиз керәк дегәнни билдүриду.
7. Мәтта 28:18—20гә асасән, бизгә қандақ иш тапшурулған вә биз немидин гуман қилмисақ болиду?
7 Һаятимизни Йәһваға беғишлап, чөмдүрүлүштин өткәндә, Әйсаниң тәкливини қобул қилғанлиғимизни көрситимиз. Әйса мениң йенимға келиңлар дәп һәммә адәмләрни чақирған. Худаға чин жүрәктин хизмәт қилишни халайдиған адәмләрни у рәт қилмайду (Йоһ. 6:37, 38). Йәһва Әйсаға тапшурған ишқа қатнишиш шан-шәрипигә Мәсиһниң һәммә әгәшкүчилири егә. Әйса бу ишта дайим ярдәм беридиғанлиғиға гуман қилмисақ болиду (Мәтта 28:18—20ни оқуң).
«МЕНИҢДИН ҮГИНИҢЛАР»
Башқиларға әйсадәк тәскин бериң (8—11 абзацларға қараң) b
8, 9. Кәмтәр адәмләр немә үчүн Әйсаниң йенида болушни халиған вә өзүмизгә қандақ соалларни қоюшимиз керәк?
8 Кәмтәр адәмләр Әйсаниң йенида болушни халиған (Мәт. 19:13, 14; Луқа 7:37, 38). Немә үчүн? Әйса билән пәрисийләрниң арисидики пәриқ асман билән йәрдәк болған. Пәрисийләр тәкәббур болған вә башқиларға соғ муамилә қилған (Мәт. 12:9—14). Әйса болса көйүмчан вә кәмтәр болған. Улар жутниң алдида нам-атаққа егә болғанлиғиға махтинатти, амма Әйса һакавурлуқни әйиплигән вә әгәшкүчилиригә кәмтәр болушни вә башқиларға хизмәт қилишни үгәткән (Мәт. 23:2, 6—11). Пәрисийләр хәлиқни қорқутуп, өзлиригә бойсундурушқа тиришқан (Йоһ. 9:13, 22). Адәмләр Әйсаниң иллиқ сөзлири вә меһрибанлиғидин илһам-мәдәткә еришәләтти.
9 Әйсадин қандақ үлгә алалаймиз? Өзүңиздин сорап көрүң: Башқилар мени кәмтәр вә течлиқпәрвәр адәм дәп биләмду? Мән башқиларға хизмәт қилиш үчүн көзгә анчә көрүнмәйдиған ишларни қилишқа тәйярму? Башқиларға меһрибанлиқ билән муамилә қилимәнму?
10. Әйса хизмәтдашлири үчүн қандақ шараит яратқан?
10 Әйса хизмәтдашлириға достанә муамилә қилип, уларниң өзлирини әркин-азадә һис қилишиға шараит яратқан вә тәлим беришни яхши көргән (Луқа 10:1, 19—21). У шагиртлирини соал қоюшқа дәвәт қилған вә уларниң ой-хияллирини билишни халиған (Мәт. 16:13—16). Улар худди парникта өсидиған өсүмлүкләргә охшаш, гүлләп-яшниған. Шундақла шагиртлар Әйсаниң тәлимлирини өзлиригә сиңдүрүп, мевиләрни бәрди. Мевә дегинимиз — уларниң яхши ишлиридур.
Достанә болуң
Қизғин болуң
Кәмтәр вә тиришчан болуң c
11. Биз өзүмизгә қандақ соалларни қоюшимиз керәк?
11 Сизниң башқилар үстидин һоқуқиңиз барму? Шундақ болса, өзүңиздин: «Мән хизмәтдашлиримға вә өйдикилиримгә қандақ муамилә қилимән? Мән башқиларни соал сорашқа дәвәт қилимәнму? Мән уларниң ой-пикирлирини тиңшашқа тәйярму?»— дәп сораң. Пәрисийләр уларниң сөзлиридин гуманланған адәмләргә аччиқланған вә көзқариши уларниңкигә охшимиғанларға рәһимсизләрчә муамилә қилған. Биз һәргизму пәрисийләргә охшап қелишни халимаймиз (Марк 3:1—6; Йоһ. 9:29—34).
КӨҢЛҮҢЛАР АРАМ ТАПИДУ
12—14. Әйса бизгә тапшурған иш немә үчүн көңлүмизни арам тапқузиду?
12 Әйса бизгә тапшурған иш немә үчүн көңлүмизни арам тапқузиду? Буниң бирнәччә сәвәплирини көрүп чиқайли.
13 Әң яхши йетәкчиләр. Бизниң әң Алий Йетәкчимиз Йәһва Худа һәргизму қопал вә миннәтдарсиз әмәс. У бизниң әмгигимизни қәдирләйду (Ибр. 6:10). Йәһва Худа вәзипилиримизни орунлашқа керәклик күч бериду (Кор. 2-х. 4:7; Гал. 6:5). Падишайимиз Әйса башқиларға қандақ муамилә қилишниң мукәммәл үлгисини көрсәткән (Йоһ. 13:15). Бизгә ғәмхорлуқ қилидиған ақсақаллар «улуқ падичи» Әйсани үлгә қилишқа тиришиду (Ибр. 13:20; Пет. 1-х. 5:2). Улар бизни йетәклигәндә вә һимайә қилғанда, Әйсаға охшаш меһрибан, жүрәклик болушқа вә роһумизни көтиришкә интилиду.
14 Әң яхши достлар. Бу дуниядики кишиләргә охшимайдиған йеримиз, биз охшаш нийәт-мәхсәт вә меһир-муһәббәт риштиси билән бирләшкән. Ойлап көрүң, жуқури әхлақий өлчәмләргә риайә қилидиған вә өзлирини башқилардин артуқ дәп ойлимайдиған адәмләр билән хизмәтдаш болуш немә дегән алаһидә шан-шәрәп! Улар қабилийәтлик болсиму, махтанчақ әмәс вә башқиларни өзидин үстүн һесаплайду. Биз улар үчүн пәқәт хизмәтдашлар әмәс, чин достлар. Достлуқ риштимиз шунчилик мәһкәмки, улар биз үчүн һәтта җенини беришкә тәйяр!
15. Қиливатқан ишимиз түпәйли қандақ һис-туйғуда болимиз?
15 Әң яхши иш. Биз адәмләргә Йәһва тоғрилиқ һәқиқәтни үгитимиз вә Шәйтанниң ялған ишлирини паш қилимиз (Йоһ. 8:44). Шәйтан адәмләргә көтирәлмәйдиған еғир жүкни артип қойған. Мәсилән, Шәйтан бизниң Йәһва Худа гуналиримизни һечқачан кәчүрмәйду вә У бизни яхши көрмәйду дегәнгә ишинишимизни халайду. Немә дегән җанға патидиған ялған гәп! Әмәлийәттә, Әйсаниң йениға кәлсәк, гуналиримиз кәчүрүлиду. Йәһва Худа һәммимизни бәк яхши көриду! (Рим. 8:32, 38, 39). Адәмләргә Йәһва Худаға тайинишни үгитиш вә уларниң һаятидики өзгиришләрни көрүштин артуқ хошаллиқ йоқ!
ӘЙСАНИҢ БОЮНТУРУҒИ АСТИДА ДАВАМЛИҚ АРАМЛИҚ ТЕПИҢ
16. Әйса тапшурған вәзипә башқа вәзипилиримиздин қандақ пәриқлиниду?
16 Әйса тапшурған вәзипә бизгә жүкләнгән башқа вәзипиләрдин пәриқлиниду. Мәсилән, көплири ишта әтидин кәчкиргичә ишләп, өйгә һерип-чарчап келип, өзүлирини хошал һис қилмайду. Бирақ биз һерип-чарчашқа қаримай, Әйса Мәсиһ билән Йәһва Худаға хизмәт қилишқа вақит чиқарсақ, өзүмизни бәхитлик һис қилимиз. Бәзидә иштин шунчилик һерип келимизки, һәтта җамаәт учришишиға өзүмизни бойнимиздин сөригидәк елип баримиз. Лекин учришиштин өйгә кәлгәндә, арам тапқандәк болуп, күч-қувәткә толимиз. Вәз қилиш вә шәхсий үгинишкә күч чиқарғандиму, өзүмизгә қайта күч киргәндәк һис қилимиз. Чиқарған күчимизгә қариғанда, алған бәрикәтлиримиз нәқәдәр көп!
17. Немини чүшинишимиз керәк? Немини даналиқ билән таллишимиз лазим?
17 Һәрбиримиз күчимизниң чәклик екәнлигини чүшинишимиз керәк. Шуңа немигә вақит чиқиришни даналиқ билән таллишимиз лазим. Мәсилән, биз тәр төкүп мал-мүлүк топлашқа интилишимиз мүмкин. Әйса Мәсиһ «Мәңгү һаятқа еришиш үчүн, мән немә қилишим керәк?» дәп сориған бай жигиткә қандақ җавап бәргәнлигигә диққәт ағдуруң. Бай жигит қанунларниң һәммисигә риайә қилған. У яхши адәм болған болуши мүмкин, чүнки Марк китавида Әйсаниң шу яш жигитни яхши көргәнлиги йезилған. Әйса униңға: «Барғин вә бар нәрсәңни сетип,... маңа әгәшкин»,— дәп ейтқан. Лекин бай жигит немә қиларини билмәй икки оттурида есилип қалған, сәвәви у «нурғун байлиққа егә еди» (Марк 10:17—22). Ахирида у Әйсаниң боюнтуруғиға киришни рәт қилип, «байлиқниң қули» болушни давамлаштурған еди. Униң орнида сиз болсиңиз, немә қилаттиңиз? (Мәт. 6:24).
18. Пат-пат немә қилип турушимиз керәк вә немә үчүн?
18 Һаятимизда немини биринчи орунға қойидиғанлиғимизни пат-пат тәкшүрүшимиз муһим. Немә үчүн? Күчимизни бекардин бекар чиқармиғинимизға көз йәткүзүш үчүндур. Марк исимлиқ яш жигит мундақ дәйду: «Көп жиллар мән аддий һаят кәчүриватимән дәп ойлиған едим. Мән пионер болсамму, көп пул тепиш вә турмушимни яхшилаш тоғрилиқла ойлап жүрәттим. Һаятим немишкә шунчә қийин болуп кәткәнлигини чүшәнмәттим. Кейин өзүмниңла ғемимни қилғанлиғимни вә Йәһва Худаға пәқәт қалған вақтим билән күчимни бәргәнлигимни чүшәндим». Марк Йәһва Худаға көпирәк хизмәт қилиш үчүн көзқаришини вә һаят тәрзини өзгәртти. Марк йәнә: «Бәзидә пул тоғрилиқ ойлап әндишә қилидиған вақитлирим болиду. Лекин Йәһва Худаниң вә Әйсаниң ярдими билән мән вәз ишини биринчи орунға қоялаймән»,— дәйду.
19. Тоғра көзқарашни сақлаш немә үчүн муһим?
19 Әйсаниң боюнтуруғи астида давамлиқ арамлиқ тепиш үчүн үч нәрсини қилишимиз керәк. Биринчиси, тоғра көзқарашни сақлаш. Биз Йәһва Худаниң ишини қиливатимиз, шуңа Униң ишини У халиғандәк қилишимиз муһим. Чүнки Йәһва Худа бизниң Ғоҗайинимиз вә биз Униң хизмәтчилири (Луқа 17:10). Әгәр өзүмиз билгәндәк қилмақчи болсақ, биз боюнтуруққа қарши һәрикәт қилған болимиз. Һәтта әң күчлүк буқиму боюнтуруқни башқуруп келиватқан ғоҗайиниға бойсунмай, өзи халиғандәк маңмақчи болса, өз-өзини яриландуриду яки бәк һерип кетиду. Лекин биз Йәһваға бойсунуп, Униң йол-йоруғиға қулақ салсақ, қилалмаймән дегән ишни қилалаймиз. Униң ирадисиниң орунлинишиға һечким кашила болалмайдиғанлиғини унтумаң (Рим. 8:31; Йоһ. 1-х. 4:4).
20. Әйсаниң боюнтуруғи астиға қандақ нийәт билән киришимиз керәк?
20 Иккинчиси, тоғра нийәт билән һәрикәт қилиштур. Бизниң мәхситимиз — көйүмчан Атимиз Йәһваға шан-шәрәп кәлтүрүш. Биринчи әсирдики өз пайдисини көзләп хизмәт қилған ачкөз адәмләр көп өтмәй өзлирини бәхитсиз һис қилип, Әйсаниң боюнтуруғини рәт қилған (Йоһ. 6:25—27, 51, 60, 66; Флп. 3:18, 19). Лекин Худани вә башқиларни чин жүрәктин яхши көрүп хизмәт қилған адәмләр Әйсаниң боюнтуруғи астиға кирип, һаятиниң ахириғичә маңған вә Әйса билән асманда һөкүмранлиқ қилиш үмүтигә егә болған. Бизму уларға охшаш Әйсаниң боюнтуруғини тоғра нийәт билән көтирип маңсақ, бәхиткә еришимиз.
21. Мәтта 6:31—33кә асасән, биз немигә ишинишимиз керәк?
21 Үчинчиси, Йәһваниң ярдәм беридиғанлиғиға ишиништур. Биз өзүмиздин ваз кечип, тәр төкүп хизмәт қилишни өзүмиз таллидуқ. Әйса бизни зиянкәшликкә учрайдиғанлиғимиз тоғрилиқ агаһландурған. Лекин Йәһва Худа һәрқандақ қийинчилиққа бәрдашлиқ беришимизгә ярдәм бериду. Давамлиқ қийинчилиқларға бәрдашлиқ бәрсәк, етиқадимиз техиму мустәһкәм болиду (Яқуп 1:2—4). Биз Йәһва Худаниң керәк нәрсиләрниң һәммини беридиғанлиғиға, Әйсаниң бизгә ғәмхорлуқ қилидиғанлиғиға вә етиқатдашлиримиз бизни илһамландуруп туридиғиниға ишинимиз (Мәтта 6:31—33ни оқуң; Йоһ. 10:14; Сал. 1-х. 5:11). Қийинчилиқларға қарши туруш үчүн буниңдин артуқ йәнә немә керәк?
22. Биз немә үчүн миннәтдар?
22 Әйса еғир кесәлдин сақайтқан аял шу күнила тәсәллигә еришкән. Лекин давамлиқ тәсәллигә еришиш үчүн у Әйсаниң шагирти болуши керәк еди. Қандақ ойлайсиз, шу аял шагирт болдиму? Ойлап көрүң, Әйсаниң тәкливини қобул қилип, униң шагирти болса, у Әйса билән асманда һөкүмранлиқ қилиш мукапатиға еришәләтти! Шу аял Әйсаниң шагирти болуш үчүн мәйли немидин ваз кәчсун, еришкән бәрикәтлири униңдин ешип чүшиду. Бизниң үмүтимиз мәйли асманда яки йәрдә мәңгү һаят кәчүрүш болсун, биз Әйсаниң мениң йенимға келиңлар дегән чақириғиға қулақ салғинимиз үчүн бәк миннәтдар!
5-НАХША Мәсиһ — бизниң үлгимиз
a Әйса бизни униңға келишкә чақириду. Бу тәклипни қобул қилиш үчүн немә қилиш керәк? Бу мақалә мошу соалға җавап бериду вә Әйса билән хизмәтдаш болуш бизгә илһам беридиғанлиғини есимизгә салиду.