1, 2. Тимотийға 1-хәт 6:20-айәтләргә асасән, Тимотийға немә аманәт қилинған?

 БӘЗИДӘ биз өзүмизниң қиммәтлик нәрсиләрни башқиларға ишинип сақлап беришкә тапшуримиз. Мәсилән, пулимизни банкиға аманәткә қойишимиз мүмкин. Шундақ қилсақ, пулимиз бехәтәр сақлиниду, жүтүп кәтмәйду яки оғри алалмайду дәп қараймиз. Демәк, биз үчүн қиммәт нәрсини башқиларға аманәт қилишниң мәнасини чүшинимиз.

² Тимотийға 1-хәт 6:20ни оқуң. Әлчи Паул Тимотийға қиммәтбаһа нәрсини, йәни Худаниң инсанийәт үчүн қилған ирадиси тоғрилиқ билим алғанлиғини есигә салған. Йәһва Тимотийға Падишалиқ хуш хәвирини вәз қилиш шан-шәрипини аманәт қилған (Тим. 2-х. 4:2, 5). Паул Тимотийни униңға ишинип тапшурулған нәрсиләрни қәдирләшкә үндигән. Бизгиму Тимотийға охшаш қиммәтбаһа нәрсиләрни тапшурди. Улар немә? Йәһва бизгә аманәт қилған нәрсиләрни немә үчүн сақлишимиз керәк?

3, 4. Муқәддәс китаптики һәқиқәтләр қиммәтбаһа екәнлигиниң йәнә қандақ сәвәплири бар?

³ Йәһва Худа меһрибанлиқ билән бизгә Өз Сөзи Муқәддәс китаптики қиммәтбаһа һәқиқәтләрниң тоғра билимини бәргән. Бу билимләр бизгә Йәһва Худа билән йеқин мунасивәткә егә болушимизға ярдәм берип, һәқиқий бәхитлик турмуш кәчүрүшкә йол көрсәткән. Шуңа Муқәддәс китаптики һәқиқәт биз үчүн бәк баһалиқ. Биз әшу һәқиқәтләрни қобул қилип, уларға мас яшисақ, сахта тәлимләрниң қуллиғидин азат болимиз вә әхлақий җәһәттин пак һаят кәчүрәләймиз (Кор. 1-х. 6:9—11).

⁴ Һәқиқәтләрниң биз үчүн қиммәтбаһа болушниң йәнә бир сәвәви — Йәһва Худа Муқәддәс китаптики һәқиқәтләрни пәқәт кәмтәр вә мәңгүлүк һаятни қобул қилишқа майил кишиләргила намайән қилиду (Әлч. 13:48). Кәмтәр инсанлар бүгүнки  күндә Йәһва Худаниң бизгә садиқ вә әқил-парасәтлик қул арқилиқ тәлим беридиғанлиғини етирап қилиду (Мәт. 11:25; 24:45). Биз Муқәддәс китаптики һәқиқәтләрни ярдәмсиз өз-өзүмиз чүшинәлмәймиз вә шуларни чүшиништин зор қиммәтбаһа нәрсә йоқ (Пәнд н. 3:13, 15).

5. Йәһва Худа бизгә йәнә немини ишинип тапшурди?

⁵ Шундақла Йәһва Худа бизгә ишинип, Өзи вә Өзиниң мәхсәтлири тоғрилиқ үгәнгән һәқиқәтләрни башқиларға үгитиш шан-шәрипини бәргән (Мәт. 24:14). Биз җакалаватқан хәвәр бәкму қиммәтбаһа, чүнки у адәмләргә Йәһва Худа аилисиниң әзаси болушқа вә мәңгү һаятқа еришишигә ярдәм бериду (Тим. 1-х. 4:16). Мәйли аз яки көп хизмәт қилайли, һәрбиримиз һазир жүргүзиливатқан әң муһим вәз ишиға өз һәссимизни қошуватимиз (Тим. 1-х. 2:3, 4). Худаниң хизмәтдашлири болуш немә дегән чоң шан-шәрәп! (Кор. 1-х. 3:9)

6. Бәзиләр немә сәвәптин аманәт қилинған нәрсилирини қәдирләшни тохтатқан?

⁶ Тимотийниң заманида яшиған бәзи етиқатчилар Йәһва билән хизмәтдаш болуш имканийитини қәдирлимигән еди. Мәсилән, Димас бу дунияни яхши көргәнликтин, Паул билән хизмәт қилиш пурситини қолидин берип қойған (Тим. 2-х. 4:10). Бәлким, Пигел билән Ермоген Паулға охшаш зиянкәшликкә дуч келиштин қорқуп, вәз қилишни тохтатқан (Тим. 2-х. 1:15). Иминей, Искәндәр вә Филит һәқиқәттин йүз өрүп, Йәһва Худаға хизмәт қилишни тохтатқан (Тим. 1-х. 1:19, 20; Тим. 2-х. 2:16—18). Ениқки, бу адәмләрниң һәммиси бурун Йәһва Худани яхши көрсиму, кейин аманәт қилған нәрсиләрниң қиммәтбаһа екәнлигини унтуп қалған.

7. Шәйтан бизни қандақ һейлә-микирлири билән тузаққа чүшәрмәкчи?

⁷ Йәһва Худа бизгә ишинип тапшурған аманәттин ваз кечишимиз үчүн Шәйтан немә қилмақта? Келиңлар, буниң бәзи һейлә-микирлирини көрүп чиқайли. Шәйтан Йәһваға болған меһир-муһәббитимизни совутуп, Униңға итаәт қилмаслиғимиз үчүн көңүл ечиш яки оюн-тамашә түрлири, китап-журналлар арқилиқ ой-пикиримиз вә иш-һәрикәтлиримизни өзгәртишкә һәрикәт қилиду. Биз вәз қилишни тохтитишимиз үчүн у тәңдашлиримизниң бесими яки зиянкәшлиги арқилиқ қорқутушқа уруниду. Шуниң билән, бизни һәқиқәттин үз өргәнләрниң сахта тәлиматлирини тиңшашқа вә шу арқилиқ бизни һәқиқәт йолидин аздурушқа һәрикәт қилиду (Тим. 1-х. 6:20, 21).

8. Даниял исимлиқ бурадәрниң мисалидин қандақ савақ алдиңиз?

⁸ Еһтиятчан болмисақ, биз аста-аста һәқиқәттин чәтнәп кетишимиз мүмкин. Бурун видео оюнларни ойнашни бәкму яхши көргән Даниял b исимлиқ бурадәрниң мисалини көрүп чиқайли. У мундақ дәйду: «Тәхминән  он йешимда, электронлуқ оюнларни ойнашни башлидим. Дәсләп қаримаққа зийини йоқтәк көрүнгән оюнларни ойниған. Лекин аста-аста зораванлиқ вә җинкәшлик билән бағлинишлиқ оюнларни ойнашни башлидим». Нәтиҗидә, у һәр күни дегидәк он бәш саат ойнайдиған болди. У сөзни мундақ давамлаштуриду: «Растини ейтсам мән ойнаватқан оюнлар вә уларға қанчә вақит чиқириватқанлиғим, аста-атса мени Йәһва Худадин жирақлаштуруватқанлиғини чүшинәттим. Лекин мән өз-өзүмни Муқәддәс китаптики принциплар маңа мас кәләмәйду дәп ишәндүрдүм». Демәк, пәхәс болмисақ, оюн-тамашиларниң көзгә көрүнмәйдиған тәсири һәқиқәтни чиң туталмай қелишқа сәвәп болуп келиши мүмкин. Әгәр шундақ болса, Йәһва Худа бизгә аманәт қилған қиммәтбаһа нәрсиләрни, еһтимал қолдин чиқирип қоюмиз.

9. Тимотийға 1-хәт 1:18, 19-айәтләргә асасән, Паул Тимотийни ким билән селиштурған?

⁹ Тимотийға 1-хәт 1:18, 19ни оқуң. Паул Тимотийни әскәр билән селиштуруп, уни давамлиқ җәңгә қатнишишқа дәвәт қилған. Бу адәттики җәң әмәс, бәлки роһий җәң. Худаниң хизмәтчилири қайси мәнада әскәрләргә охшаш җәң қилиду? Мәсиһниң әскәрлири сүпитидә, биз қандақ пәзиләтләрни йетилдүрүшимиз керәк? Паулниң мисалидин қандақ бәш савақ алалаймиз. Шу савақлар бизниң һәқиқәттә чиң турушимизға ярдәм бериду.

10. Худаға болған садақәтмәнлик дегән немә вә биз немә үчүн униңға муһтаҗ?

¹⁰ Худаға болған садақәтмәнликни йетилдүрүң. Яхши әскәр садақәтмән болиду. У өзи яхши көргән кишини яки өзи үчүн қиммәтбаһа саналған нәрсини қоғдаш үчүн бар күчи билән җәң қилиду. Паул Тимотийни Худаға болған садақәтмәнлигини яки вападарлиғини йетилдүрүшкә үндигән (Тим. 1-х. 4:7). Худаға болған меһир-муһәббәт вә садақәтмәнлигимиз қанчә күчлүк болса, һәқиқәтни чиң тутуш арзу-истигимизму шунчә күчлүк болиду (Тим. 1-х. 4:8—10; 6:6).

11. Биз немә үчүн өзүмизни тәртиплик тутушимиз керәк?

¹¹ Өзүңизни тәртиплик тутушни үгиниң. Әскәр һәр вақит җәңгә тәйяр болуши үчүн, өзини тәртипкә селишқа көп күч чиқириши керәк. Тимотий Паулниң мәслиһитигә қулақ селип, яман арзу-һәвәслиридин өзини қачуруп, етиқатдашлар билән арилишип, яхши пәзиләтләрни риваҗландурған. Шуңа у Шәйтанниң яман тәсиригә қарши җәң қилалиған (Тим. 2-х. 2:22). Буниң һәммисини қилиш үчүн Тимотий өзини тәртиплик тутуши керәк еди. Бизму гунакар тенимизниң һәвәслиригә қарши туруш үчүн өзүмизни тәртипкә селишимиз керәк (Рим. 7:21—25). Буниңдин башқа, миҗәз-хулқимизни өзгәртип, пәзиләтләрни йетилдүрүш үчүн өзүмизни тәртиплик тутушимиз интайин муһим (Әфәс. 4:22, 24). Өткүзгән күнимизниң ахирида, бәк һерип қалғандиму, җамаәт учришишқа беришқа өзүмизни мәҗбурлашқа тоғра келиши мүмкин (Ибр. 10:24, 25).

12. Муқәддәс китапниң ярдими билән тәлим бериш маһаритимизни қандақ ашуралаймиз?

¹² Әскәр қурал-ярақлирини ишлитишни үгиниши керәк. Уларни қоллиништа маһир болуш үчүн у дайим мәшиқ қилиши лазим. Шуниңға охшаш, бизму Худа Сөзини ишлитишкә маһир болушни үгинишимиз керәк (Тим. 2-х. 2:15). Буниң бәзи усуллирини биз җамаәт учришишлирида үгинәләймиз. Лекин Муқәддәс китаптики һәқиқәтләргә башқиларниң ишиниши халисақ, өзүмиз дайим тәтқиқ қилиш арқилиқ уларға ярдәм берәләймиз. Биз Муқәддәс китапниң ярдими билән иман-етиқадимизни күчәйтәләймиз. Лекин буниң үчүн биз Муқәддәс китапни пәқәт оқупла қоймай, оқуғанлиримиз үстидин чоңқур ойлинип, әдәбиятлиримиздин көпирәк мәлумат издишимиз керәк. Шу чағдила, биз Муқәддәс китаптики сөзләрни  тоғра чүшинип, айәтләрни әмәлийәттә ишлитәләймиз (Тим. 1-х. 4:13—15). Шундақ қилсақ, биз Худа Сөзиниң ярдими билән тәлим берәләймиз. Бу йәнә пәқәт Муқәддәс китапни оқушнила әмәс, оқуған айәтләрдики сөзләрни тиңшиғучилиримизға тоғра чүшәндүрүп, уни қандақ әмәлийәттә қоллинишқа болидиғанлиғини чүшәндүрүшниму өз ичигә алиду. Биз Муқәддәс китапни өзүмиз дайим тәтқиқ қилишни адәткә айландурсақ, Худаниң Сөзини пайдилинип, тәлим бериш маһаритимизни ашуралаймиз (Тим. 2-х. 3:16, 17).

13. Ибранийларға 5:14-айәткә асасән, биз немә үчүн зерәк болушимиз керәк?

¹³ Зерәк болуң. Әскәр чоқум хәтәрни алдин-ала көрәләйдиған вә униңдин өзини қачуралайдиған болуши керәк. Бизму чоқум хәтәрлик вәзийәтләрни алдин-ала көрүп, хәтәрдин сақлиналайдиған болалишимиз зөрүр (Пәнд н. 22:3; Ибранийларға 5:14ни оқуң). Мәсилән, биз оюн-тамаша вә көңүл ечиш түрлирини таллиғанда, дана болушимиз керәк. Телевизийә программилири вә киноларда пат-пат әхлақсиз жүрүш-турушлар көрситилиду. Шундақ оюн-тамаша, көңүл ечишлар Йәһва Худани рәнҗитиду вә өзүмизгә зиян кәлтүриду. Шуңа Худаға болған меһир-муһәббитимизни суслаштуридиған оюн-тамашилардин өзүмизни қачуруш бәк муһим (Әфәс. 5:5, 6).

14. Зерәклик Даниялға қандақ ярдәм бәргән?

¹⁴ Жуқурида тилға елинған Даниял зораванлиқ вә җинкәшлик билән бағлинишлиқ электронлуқ оюнларни ойнашниң натоғра екәнлигини чүшәнгән еди. У «Күзитиш мунариниң китапханисидин» униңға бу қийинчилиқ билән күрәш қилишқа ярдәм беридиған мәлуматларни издиди. Бу униңға қандақ тәсир қилди? У яман оюнларни ойнашни тохтатти. Башқа торда биллә оюн ойнайдиғанлар билән алақисини үзди. Даниял мундақ дәйду: «Электронлуқ оюнларни ойнашниң орниға мән көпирәк сиртта башқа ишлар билән шуғилинидиған яки җамаәттики достлар билән арилишидиған болдум». Һазир Даниял пионер вә ақсақал болуп хизмәт қиливатиду.

15. Сахта мәлуматлар немә үчүн шунчилик хәтәрлик?

¹⁵ Бизму Тимотийға охшаш һәқиқәттин йүз өрүгүчиләр тарқитидиған сахта учур яки мәлуматлардин өзүмизни қоғдишимиз керәк (Тим. 1-х. 4:1, 7; Тим. 2-х. 2:16). Мәсилән, улар қериндашлар тоғрилиқ ялған мәлуматларни тарқитиши яки қәлбимиздә Йәһваниң тәшкилати һәққидә гуман пайда қилишқа тиришиши мүмкин. Шундақ мәлуматлар ишәнчимизни аҗизлаштуруши еһтимал. Биз шундақ  сахта мәлуматларниң аздуруп кетишидин пәхәс болушимиз керәк. Немә үчүн? Чүнки шундақ гәп-сөзләрни «нийити бузулған һәм һәқиқәттин мәһрум болған кишиләр» тарқитиду. Уларниң мәхсити — аримизда таллаш-тартишларни пәйда қилиштур (Тим. 1-х. 6:4, 5). Улар бизниң бу төһмәткә ишинип, қериндашлардин гуман қилип, һәтта уларға ишинишни тохтишимизни халайду.

16. Биз диққитимизни немигә чачмаслиғимиз керәк?

¹⁶ Диққитиңизни чачмаң. «Әйсаниң шанлиқ әскиридәк», Тимотий диққитини маддий нәрсиләргә яки һаяттики башқа мәхсәтләргә чечишниң орниға, вәз хизмитигә көпирәк диққәт ағдуруши керәк еди (Тим. 2-х. 2:3, 4). Бизму Тимотийға охшаш мал-мүлүк топлаш арзу-һәвәслириниң диққитимизни чечишиға йол бәрмәслигимиз лазим. «Алдамчи байлиқ» бизниң Йәһва Худаға болған меһир-муһәббитимизни, Униң Сөзигә болған миннәтдарлиғимизни вә һәқиқәт сөзлирини башқиларға вәз қилиш арзу-истәклиримизни боғуветиши мүмкин (Мәт. 13:22). Биз аддий һаят кәчүрүп, вақит билән күчимизни «авал Падишалиқни... издәшни давамлаштуруш» үчүн пайдилинишимиз керәк (Мәт. 6:22—25, 33).

17, 18. Йәһва билән болған достлуғимизни қоғдап қелиш үчүн немә қилалаймиз?

¹⁷ Тез һәрикәт қилишқа тәйяр болуң. Әскәр өзини қоғдаш үчүн қандақ һәрикәт қилишни алдин-ала планлиши муһим. Әгәр Йәһва Худа бизгә аманәт қилған нәрсиләрни қоғдашни халисақ, хәтәрни көргәндә дәрһал бирдин һәрикәт қилишимиз зөрүр. Тезликтә һәрикәт қилишимизға немә ярдәм берәләйду? Алдин-ала хәтәрлик вәзийәткә дуч кәлгәндә қандақ һәрикәт қилиш һәққидә ойлинип план түзүп қоюшимиз лазим.

¹⁸ Буни чүшиниш үчүн бир мисални көрүп чиқайли. Аммивий муюмларға кәлгәнләрниң көпинчисини сиртқа тез чиқип кетиши үчүн ишиккә йеқинирақ җайда олтурушни сорайду. Немә үчүн? Чүнки қандақту бир тәсадипий вақиә йүз бәрсә, улар тезла шу җайдин чиқип кетәләйду. Дәл шуниңға охшаш, бизму интернет ториға чиққанда, телевизийә программиси яки кино көргәндә, күтмигәндә бир әхлақсиз көрүнүш, зораванлиқ тәсвирлири яки һәқиқәттин йүз өргәнләр чиқарған мәлуматларни көрүп қалсақ, қандақ һәрикәт қилишни алдин-ала ойлишимиз керәк. Туюқсиз йүз беридиған вәзийәтләрниң алдини елишқа тәйяр болсақ, бизгә роһий җәһәттин зиян йәткүзидиған нәрсиләрдин тезликтә қечип, Йәһва Худа билән болған достлуғимизни қоғдап қалалаймиз (Зәб. 101:3; Тим. 1-х. 4:12).

19. Йәһва Худа бизгә аманәт қилған нәрсиләрни қоғдисақ, қандақ бәрикәтләргә еришимиз?

¹⁹ Йәһва Худа бизгә аманәт қилған Муқәддәс китаптики бебаһа һәқиқәтләрни вә башқиларға тәлим бериш шан-шәрипини қоғдишимиз керәк. Шундақ қилсақ, вижданимиз пак, мәналиқ һаят кәчүрүш вә башқиларға Йәһва тоғрилиқ үгитиштин келидиған хошаллиқтин бәһриман болимиз. Йәһва Худаниң ярдими билән У бизгә ишинип аманәткә тапшурған қиммәтбаһа нәрсиләрни сақлап қалалаймиз (Тим. 1-х. 6:12, 19).