1, 2. а) Йәһва Худа товва қилмиған гунакарларға қандақ көзқарашта? ә) Йәһва Худа гуна өткүзгән кишиниң немә қилишини үмүт қилиду?

 ЙӘҺВА ХУДА яман ишларға көз жуммайду (Зәб. 5:4—6). У Муқәддәс китапта йезилған һәққаний өлчәмлиригә мас яшишимизни халайду. Әлвәттә, Йәһва намукәммәл инсанлардин мукәммәлликни тәләп қилмайду (Зәб. 130:3, 4). Шундақ болсиму, Худа Униң «мол меһирлигини пайдилинип, бузуқчилиғини ақлаватқан рәзил» адәмләрни рәт қилиду (Йәһ. 4). Муқәддәс китапта шундақ «рәзил инсанлар» Армагедон урушида йоқ қилинидиғанлиғи йезилған (Пет. 2-х. 3:7; Вәһ. 16:16).

² Бирақ Йәһва Худа һечкимниң һалак болушини халимайду. Алдинқи мақалиләрдә көргинимиздәк, Худа һәммә инсанларниң «товва қилишини халайду» (Пет. 2-х. 3:9). Йәһвани үлгә қилип, ақсақаллар гуна қилип қойған кишиниң яман йолидин қайтип, Худа билән қайтидин йеқин мунасивәттә болушиға ярдәм бериш үчүн бар күчини чиқириду. Әпсуски, бәзилири өз гунасиға пушайман қилмайду (Йәшая 6:9). Ақсақаллар бирсиниң товва қилишиға қайта-қайта ярдәм беришкә тиришсиму, бәзиләр давамлиқ гуна қиливериду. Бундақ вәзийәттә ақсақаллар немә қилиши керәк?

«ӨЗӘҢЛАРДИН ЯВУЗНИ ЧИҚИРИҢЛАР»

3. а) Муқәддәс китапқа асасән, товва қилмиған киши билән немә қилиш керәк? ә) Немә үчүн гуна қилған адәмниң җамаәттин чиқирилиши өзиниң қарари десәк болиду?

³ Гуна қилған адәм товва қилмиса, ақсақалларниң Коринтлиқларға  1-хәт 5:13-айәттә йезилған көрсәтмигә риайә қилиштин башқа амали қалмайду. Бу айәттә: «Өзәңлардин явузни чиқириңлар»,— дәп йезилған. Башқичә ейтқанда, гуна қилған киши өзи «немә терисә, шуни жиғиду» (Гал. 6:7). Немә үчүн шундақ десәк болиду? Чүнки ақсақаллар униңға нурғун қетим ярдәм беришкә тиришқан болсиму, у уларниң ярдимини рәт қилған (Пад. 2-яз. 17:12—15). У өзиниң иш-һәрикәтлири билән Йәһва Худаға бойсунмайдиғанлиғини вә Униң қанунлири бойичә яшашни халимайдиғанлиғини көрсәткән (Қ. шәр. 30:19, 20).

4. Немә үчүн гунасиға товва қилмиған кишиниң җамаәттин чиқирилиши һәққидә елан қилиниду?

⁴ Товва қилмиған киши җамаәттин чиқирилғанда, униң әнди Йәһва гувачиси әмәслиги елан қилиниду. Еланниң мәхсити бу кишини уятқа қалдуруш әмәс. Әксичә, җамаәттикиләр Муқәддәс китаптики: «Арилашмай, һәтта ундақ адәм билән һәмдәстиханму болмаңлар» дегән буйруққа бойсунуши үчүн ейтилиду (Кор. 1-х. 5:9—11). Йәһва Худа бу буйруқни бекардин-бекар бәрмигән. Әлчи Паул «кичиккинә хемиртуручниң пүткүл хемирни ечитидиғинини» ейтқан (Кор. 1-х. 5:6). Әгәр гунасиға товва қилмиғанлар җамаәттин чиқирилмиса, җамаәттикиләр Йәһваниң һәққаний өлчәмлиригә мас яшимисақму болиду дәп ойлиши мүмкин (Пәнд н. 13:20; Кор. 1-х. 15:33).

5. Биз җамаәттин чиқирилғанларға қандақ көзқарашта болушимиз керәк вә немә үчүн?

⁵ Җамаәттин чиқирилған етиқатдашқа қандақ қаришимиз керәк? У адәм билән арилашмисақму, биз униңдин үмүт үзмәймиз. Әксичә, шу кишини адишип қалған қой дәп қараймиз. Падидин адишип қалған қой қайта келиши мүмкин. Шу қериндашниң Йәһва Худаға беғишланғанлиғини унтумаң. Әпсуски, у Йәһваға бәргән вәдисидә туралмай, хәтәрлик йолға чүшүп қалди (Әзәк. 18:31). Шундақ болсиму, Йәһва Худа техичә рәһим-шәпқәт көрситип, униңға вақит бериватиду. Шуңа, қериндишимиз җамаәткә қайтиду дәп үмүт қилалаймиз. Ақсақалларниң шундақ үмүти болғанлиқтин, улар җамаәттин чиқирилған адәмгә қолидин кәлгиничә ярдәм қилишқа тиришиду. Қандақларчә?

АҚСАҚАЛЛАР ҚАНДАҚ ЯРДӘМ БЕРӘЛӘЙДУ?

6. Ақсақаллар җамаәттин чиқирилғанларға ярдәм бериш үчүн немә қилиду?

⁶ Бирси җамаәттин чиқирилғанда, ақсақаллар униң Йәһва Худаға қайтип келишигә һечқандақ ярдәм бәрмәмду? Һәргиз ундақ әмәс! Ақсақаллар комитети җамаәттин чиқирилған адәмгә қайтип келиш үчүн немә қилиши керәклигини чүшәндүриду. Буниңдин башқа, көпинчә вәзийәтләрдә шу кишиниң көзқариши өзгәргән яки өзгәрмигәнлигини билиш үчүн, ақсақаллар униң билән бирнәччә айдин кейин, қайта учришишни халайдиғанлиғини ейтиду. Әгәр у улар билән қайта көрүшүшни халиса, ақсақаллар меһрибанлиқ билән уни товва қилип, җамаәткә қайтишқа үндәйду. Гәрчә гуна қилған киши өз көзқариши вә иш-һәрикәтлирини техи өзгәртмисиму, ақсақаллар кейинму униң билән учришип, товва қилишқа дәвәт қилиду.

7. Ақсақаллар җамаәттин чиқирилғанларға муамилә қилишта Йәһваниң меһир-шәпқитини қандақ үлгә қилиду? (Йәрәмия 3:12)

⁷ Ақсақаллар Йәһвадин үлгә елип, җамаәттин чиқирилған кишигә меһир-шәпқәт көрситишкә тиришиду. Мәсилән, Йәһва Худа қедимда исраиллар қачан товва қилиду дәп күтүп олтармиған. Улар техи көзқаришини өзгәртмигән болсиму, Худа биринчи болуп һәрикәт қилған вә хәлқигә ярдәм беришкә тиришқан. Бу бир қатар мақалиләрниң  иккинчисидә биз Һошия пәйғәмбәр тоғрилиқ оқуған. Йәһва Худа униңға еғир гунаға петип зина қилип жүргән аялини кәчүрүп, уни өйигә қайтурушни буйриған. Буниң билән Худа Өзиниң интайин меһир-шәпқәтлик екәнлигини көрсәткән (Һош. 3:1; Мал. 3:7). Йәһваға охшаш, ақсақалларму гуна қилған кишиниң җамаәткә қайтип келишини чин жүрәктин халайду. Шундақла улар униң қайтип келишини қийинлаштурмайду (Йәрәмия 3:12ни оқуң).

8. Адишип қалған оғулниң мисали Йәһваниң рәһим-шәпқитини яхширақ чүшинишимизгә қандақ ярдәм бериду? (Луқа 15:7)

⁸ Бу бир қатар мақалиләрниң иккинчисидә Әйсаниң адашқан оғул тоғрилиқ мисали тилға елинған еди. Дадиси өйгә қайтип келиватқан оғлини жирақтин көрүп, «алдиға жүгрәп, уни қаттиқ қучақлап сөйүпту» (Луқа 15:20). Дадиси оғлиниң келип, путиға жиқилип кәчүрүм соришини күтмигән. Әксичә, өзи униң алдиға жүгрәп чиқиду. Оғлини яхши көргән һәрқандақ дада шундақ қилатти. Ақсақалларму йоқап кәткән қойларға дәл шундақ қарап, уларниң падиға қайтип келишини халайду (Луқа 15:22—24, 32). Гуна қилған адәм җамаәткә қайтқанда, әрштиму, йәрдиму зор хошаллиқ болиду! (Луқа 15:7 оқуң)

9. Йәһва Худа гунакарларни немигә ишәндүриду?

⁹ Жуқурида ейтилғандәк, Йәһва Худа товва қилмиған гунакарларниң җамаәттә қелишиға йол қоймайду. Лекин У улардин үз өрмәй, уларниң қайтип келишигә ярдәм беришкә тиришиду. Адәм гунасиға пушайман қилғанда, Йәһваниң немә һис қилидиғанлиғи Һошия 14:4тә мундақ ипадиләнгән: «Мән уларни чәтнәштин сақайтимән, уларни пүткүл жүригим билән сөйүмән, чүнки Мениң ғәзивим улардин қайтти». Бу сөзләр ақсақалларни адәмниң товва қилғанлиғини көрситидиған һәрқандақ өзгиришләрни байқашқа дәвәт қилиду. Шундақла җамаәттин чиқирилған кишиниму Йәһваниң уни яхши көридиғанлиғиға вә қайтип келишини халайдиғанлиғиға ишәндүриду.

10, 11. Ақсақаллар узақ вақит бурун җамаәттин чиқирилғанларға ярдәм беришкә қандақ тиришиду?

¹⁰ Җамаәттин көп жиллар бурун чиқирилғанлар тоғрисида немә десәк болиду? Бәлким, улар аллиқачан яман иш-һәрикәтлирини ташлиғанду. Бәзилири һәтта уларни немә үчүн җамаәттин чиқарғанлиғиниму унтуп қалған болуши мүмкин. Шу кишиләрниң җамаәттин чиқирилғанлиғиға мәйли қанчә вақит өтсун, ақсақаллар уларни издәп тепип, учришишқа тиришиду. Ақсақаллар улар билән учрашқанда, биллә дуа қилип, уларни җамаәткә қайтишқа дәвәт қилиду. Әгәр адәмниң җамаәттин чиқирилғанлиғиға узақ вақит өтсә, у роһий җәһәттин аҗизлишип кәткәнлиги ениқ. Әгәр шу киши җамаәткә қайтип келишни халайдиғанлиғини ейтса, у техи җамаәткә қайта қобул қилинмиған болсиму, униң билән Муқәддәс китап үгиниши өткүзүлүши мүмкин. Шундақ үгинишни пәқәт ақсақаллар орунлаштуралайду.

¹¹ Көйүмчан Худайимиз Йәһвадин үлгә елип, ақсиллар һәқиқәт йолини ташлап кәткәнләрни издәп тепип, уларни қайтип келишкә үндәйду. Гуна қилған адәм ой-пикрини вә иш-һәрикәтлирини өзгәрткәнлигини көрсәткәндә, у дәрһал қайтидин Йәһва гувачиси болалайду (Кор. 2-х. 2:6—8).

12. а) Ақсақаллар қайси вәзийәтләрдә пәхәс болуши керәк? ә) Немә үчүн еғир гуна қилған киши һечқачан Йәһваниң рәһим-шәпқитигә еришмәйду дәп ойлимаслиғимиз керәк? (Изаһәткиму қараң.)

¹² Бирәр кишини җамаәткә қайта қобул қилғанда, бәзи вәзийәтләрдә ақсақаллар пәхәс болуши керәк. Мәсилән, бирси балиларни җинсий хорлиған яки һәқиқәттин үз  өргән, яки болмиса, өз җорисидин аҗришип кетиш планини түзгән дәйли. Ақсақаллар униң һәқиқәтән товва қилғанлиғиға көз йәткүзиши муһим (Мал. 2:14; Тим. 2-х. 3:6). Ақсақаллар Йәһваниң падисини һимайә қилиши керәк. Башқа тәрәптин, шуни чүшинишимиз керәкки, Йәһва Худа чин жүрәктин товва қилип, яман йоллиридин қайтқан һәрбир кишини қайтидин қобул қилиду. Гәрчә ақсақаллар башқиларға хиянәт қилған кишиләргә еһтият билән муамилә қилсиму, улар еғир гуна қилған киши әнди һечқачан Йәһваниң рәһим-шәпқитигә еришмәйду дәп ойлимаслиғи керәк a (Пет. 1-х. 2:10).

 ҖАМАӘТТИКИЛӘР ҚАНДАҚ ЯРДӘМ БЕРӘЛӘЙДУ?

13. Түзитилгән киши билән җамаәттин чиқирилған кишигә муамилә қилишимизда қандақ пәриқ бар?

¹³ Алдинқи мақалидә муһакимә қилғинимиздәк, бәзидә җамаәттә бирсиниң түзитилгәнлиги һәққидә уқтуруш ейтилиши мүмкин. Шундақ вәзийәттә униң товва қилип, яман ишлирини ташлиғанлиғини билгәнликтин, униң билән давамлиқ арилишиверимиз (Тим. 1-х. 5:20). Шундақ етиқатдишимиз тоғра йолда меңиш үчүн бизниң қоллап-қувәтлишимизгә муһтаҗ (Ибр. 10:24, 25). Амма җамаәттин чиқирилған киши тоғрилиқ ундақ ейтишқа болмайду. Биз униң билән арилашмаймиз, һәтта һәмдәстиханму болмаймиз, йәни биллә тамақму йемәймиз (Кор. 1-х. 5:11).

14. Һәрбир қериндаш тәрбийиләнгән вижданиға мас, җамаәттин чиқирилғанларға мунасивәтлик қандақ қарар чиқириду? (Рәсимгиму қараң.)

¹⁴ Коринтлиқларға 1-хәт 5:11дики сөзләр җамаәттин чиқирилған киши билән тамамән сөзлишишкә болмайдиғанлиғини билдүрәмду? Яқ, ундақ әмәс. Әлвәттә, биз униң билән арилашмаймиз. Бирақ биз Муқәддәс китап бойичә тәрбийиләнгән вижданимизға мас, җамаәттин чиқирилған адәмни учришишқа чақиришни қарар қилишимиз мүмкин. Бәлким, бу бизниң уруқ-туққинимиз яки бурун яхши арилашқан достимиз. Җамаәттин чиқирилған адәм учришишқа келип қалса, немә қилимиз? Илгири биз ундақ адәм билән саламлашматтуқ. Лекин әнди һәрбир қериндаш Муқәддәс китап бойичә тәрбийиләнгән вижданиға мас қарар чиқириши керәк. Бәзилири ундақ адәм билән учришишта саламлишишни яки униң кәлгәнлигигә хошал екәнлигини ейтиши мүмкин. Бирақ сөһбитимиз созулуп кәтмәслиги керәк. Шундақла биз шу адәм билән биллә вақит өткүзмәймиз.

15. Йоһанниң 2-хети 9—11дә қандақ гунакарлар тоғрилиқ йезилған? (« Әлчи Йоһан билән әлчи Паул охшаш гуна тоғрилиқ ейтқанму?» намлиқ рамкиға қараң.)

¹⁵ Муқәддәс китапта бизниң гуна қилған бәзи кишиләр билән саламлашмаслиғимиз керәклиги йезилған. «Чүнки униң билән саламлашқан киши униң яман ишлириға шерик болиду» (Йоһанниң 2-хети 9—11ни оқуң). Лекин бу айәтләрниң контекстиға қарисақ, бу йәрдә һәқиқәттин үз өргәнләр  яки башқиларни Муқәддәс китапқа қарши яман ишларни қилишқа дәвәт қилидиғанлар тоғрисида йезилған (Вәһ. 2:20). Шуңа ақсақаллар ялған тәлимләрни тарқитидиған яки яман ишларни қилишқа дәвәт қилидиған кишиләр билән учрашмайду. Әлвәттә, күнләрниң бир күнидә улар товва қилиду дәп үмүт қилимиз. Амма шу кәмгичә, биз шундақ адәмләр билән саламлашмаймиз һәм җамаәткиму чақирмаймиз.

ЙӘҺВАҒА ОХШАШ МЕҺИР-ШӘҚӘТЛИК ВӘ РӘҺИМЛИК БОЛУҢ

16, 17. а) Йәһва Худа гунакарларниң немә қилишини халайду? (Әзәкиял 18:32) ә) Ақсақаллар гуна қилған кишигә ярдәм бериштә Йәһва билән қандақ хизмәтдаш болалайду?

¹⁶ Шуниң билән, мошу журналдики мақалиләрдин немиләрни биливалдуқ? Йәһва Худа һечкимниң өлүп кетишини халимайду (Әзәкиял 18:32ни оқуң). Худа гуна қилған адәмләрниң товва қилишини вә Униң билән яришивелишини халайду (Кор. 2-х. 5:20). Йәһва Худа тарих давамида исиянкар хәлқини товва қилип, Униңға қайтишқа қайта-қайта үндигән. Ақсақалларму Йәһва билән зич хизмәтдаш болуп, гуна қилған адәмләрни товва қилишқа чақириду (Рим. 2:4; Кор. 1-х. 3:9).

¹⁷ Адәм гунасиға товва қилғанда, асманда немә дегән хошаллиқ болидиғанлиғини тәссәвур қилип көрүңа! Атимиз Йәһва җамаәткә қайтип кәлгән һәрбир қериндаш үчүн интайин хошал болиду. Йәһваниң көйүмчанлиғи вә рәһим-шәпқити тоғрилиқ ойланғанда, Униңға болған меһир-муһәббитимиз техиму күчийиду (Луқа 1:78).