1, 2. а) Һәзрити Әйса өз шагиртлирини немә һәққидә агаһландурған? ә) Немә үчүн шагиртлар Әйса Мәсиһни ташлап кәткән? (Рәсимләргиму қараң)

 «РОҺ һошияр, тән болса аҗиздур» a (Мәт. 26:41). Һәзрити Әйса бу сөзләрни ейтип, намукәммәл кишиләргә һисдашлиқ қилидиғанлиғини көрсәткән. Бирақ униң сөзлири йәнә бизни өзүмизгә һәддидин зиядә ишинип кәтмәсликкә агаһландуриду. Әйса шу сөзләрни қилиштин бирқанчә саат бурун шагиртларниң һәммиси өзлириниң Әйса Мәсиһкә қәтъий садиқ болуп қалидиғанлиғини ейтишқан (Мәт. 26:35). Уларниң нийити яхши еди. Бирақ улар бесим астида өзлириниң аҗизлишип кетиши мүмкинлигини чүшинип йәтмигән. Шуңа, һәзрити Әйса уларни агаһландуруп, мундақ дегән: «Аздурулушқа кирип кәтмәслик үчүн, сәгәк болуңлар һәм тохтимай дуа қилиңлар» (Мәт. 26:41).

² Бәк әпсуски, шагиртлар сәгәк туралмиған. Әйса Мәсиһ қолға елинғанда, улар униңға әгишип маңғанму яки қорқуп, қечип кәткәнму? Улар һошияр турмиғач, өзлири һәргиз қилмайдиғанлиғини ейтқан ишни қилған, йәни Әйсани ташлап кәткән (Мәт. 26:56).

3. а) Йәһва Худаға садиқ қелишни ойлисақ, немә үчүн һәддидин зиядә өзүмизгә ишәнмәслигимиз керәк? ә) Бу мақалидә биз немиләрни көрүп чиқимиз?

³ Әлвәттә, биз Йәһва Худани рәнҗитидиған ишни қилмаслиққа қәтъий бәл бағлидуқ. Бирақ биз һәммимиз намукәммәл вә асанла езиқтурушқа әгишип кетишимиз мүмкин (Рим. 5:12; 7:21—23). Шуңлашқа, өзүмизгә һәддидин зиядә ишинип кәтмәслигимиз керәк. Ойлимиған чағда, туюқсиз аздурулушқа дуч келишимиз мүмкин. Шундақ пәйттә Йәһва Худа вә Әйса Мәсиһкә садиқ қелиш үчүн һәзрити Әйсаниң езиқтуруштин сақлиниш үчүн сәгәк туруш тоғрилиқ қилған нәсиһәт сөзигә қулақ селишимиз керәк. Бу мақалә шундақ йол тутушимизға ярдәм берәләйду. Авал  биз һаятимизда қайси җәһәтләрдә чоқум еһтиятчан болушимиз керәклигини үгинимиз. Кейин езиқтурулушларға қарши һошиярлиғимизни қандақ ашуралайдиғанлиғимизни үгинимиз. Ахирида давамлиқ сәгәк туруш үчүн немә қилалайдиғанлиғимизни үгинимиз.

ҚАЙСИ ҖӘҺӘТЛӘРДӘ СӘГӘК ТУРУШ КЕРӘК?

4, 5. Немә үчүн қаримаққа еғир гуна дәп қаралмиған гуналарға қарши һошиярлиқни сақлишимиз керәк?

⁴ Еғир гуна дәп қаралмиған бәзи гуналар бизниң Йәһва Худа билән болған достлуқ мунасивитимизгә тәсир қилиши, һәтта бизни техиму еғир гуна өткүзүшкә йетәклиши мүмкин.

⁵ Һәммимиз гуна қилиш езиқтурулушиға дуч келимиз. Бирақ һәрбиримизниң аҗизлиқ тәрәплири пәриқлиқ. Бәзиләрниң яманлиқ қилиш истиги наһайити күчлүк. Мәсилән, бир киши җинсий әхлақсиз қилиш арзу-истигигә қарши күрәш қилиши мүмкин. Башқа бири мастурбация, йәни қолда ләззәтлиниш яки болмиса, шәһваний мәзмундики нәрсиләрни көрүштәк напак қилмишларға қарши күрәш қиливатқан болуши мүмкин. Бәлким, йәнә бири адәмләрдин қорқуш, тәкәббурлуқ, аччиқлиниш яки башқа илләткә күрәш қиливатиду. Яқуп мундақ дегән: «Һәрким өз һәвәси билән аздурулуп һәм униңға берилип, синилиду» (Яқуп 1:14).

6. Биз чоқум немини етирап қилип, өз-өзүмизгә растчил болушимиз керәк?

⁶ Һаятиңизда қайси җәһәттә асанла езиқтурулушқа дуч келидиғанлиғиңизни биләмсиз? Аҗизлиқлиримизни иқрар қилмисақ яки өзүмизни наһайити күчлүк, гуна қилмаймән дәп ойлисақ, бу өз-өзүмизни алдиғанлиқ вә бәк хәтәрлик (Йоһ. 1-х. 1:8). Әлчи Паул һәтта роһий җәһәттин пишип йетилгән киши сәгәк турмиса, аздурулушқа қарши туралмайдиғанлиғини көрсәткән (Гал. 6:1). Биз чоқум өз-өзүмизгә растчил болушимиз вә аҗизлиқ тәрәплиримизни етирап қилишимиз керәк (Кор. 2-х. 13:5).

7. Биз немигә алаһидә көңүл бөлүшимиз керәк? Чүшәндүрүп бериң.

⁷ Өзүмизниң қайси җәһәттин езиқтурулушқа асанла майил болидиғанлиғимизни көрүп йәткәндин кейин чоқум немә қилишимиз керәк? Езиқтурулушқа қарши туруш үчүн көп тиришчанлиқ көрситиң. Мәсилән, қедимий заманда шәһәрләрниң сепил тамлириниң әң аҗиз нуқтиси шәһәр дәрвазлири болған еди. Шуңа, шәһәр дәрвазилириға көп қаравуллар қоюлуп, алаһидә қоғдилатти. Худди шуниңға охшаш, бизму аҗизлиқ тәрәплиримизгә алаһидә көңүл бөлүп, езиқтурулушқа йол қоймаслиғимиз керәк (Кор. 1-х. 9:27).

ЕЗИҚТУРУЛУШ ВӘ ГУНАДИН САҚЛИНИШ

8, 9. Пәнд-нәсиһәтләр 7-бапта тилға елинған яш жигит қандақ қилса, еғир гуна өткүзүштин сақланған болатти? (Пәнд-нәсиһәтләр 7:8, 9, 13, 14, 21)

⁸ Езиқтурулуш вә гуна қилиштин қандақ сақлиналаймиз? Пәнд-нәсиһәтләр 7-бапта тилға  елинған яш жигитниң мисалидин немиләрни үгинәләйдиғанлиғимизни көрүп чиқайли. У бузуқ бир аял билән җинсий әхлақсизлиқ қилған. Муқәддәс китапниң «Йеңи Дуния тәрҗимисидә» 22-айәт бизгә бу жигит «туюқсиз» у аялға әгәшти дәйду. Амма алдинқи айәтләрдә көрситилгәндәк, у буниңдин илгири бара-бара гунаға елип баридиған бирнәччә қәдәмләрни басқан.

⁹ У жигит еғир гуна өткүзүштин авал немә қилған? Авал «у паһишәниң кочиси билән жүрүп, униң өйи тәрипигә меңипту» (Пәнд-нәсиһәтләр 7:8, 9ни оқуң). Кейин жигит шу аялни көргәндә, дәрһал көзини елип қачмиған вә аялниң сөйүшлирини қобул қилған. Аял өзиниң бузуқ аял әмәслигини көрситиш үчүн течлиқ қурбанлиғини тәғдим қилғанлиғини ейтқанда, жигит аялниң сөзлирини диққәт билән тиңшап турған (Пәнд-нәсиһәтләр 7:13, 14, 21ни оқуң). Әгәр яш жигит еғир гунаға башлайдиған хәвп-хәтәрләрдин жирақ турған болса, у езиқтурулуш вә гуна садир қилиштин сақланған болатти.

10. Бүгүнки күндә бир Мәсиһ әгәшкүчиси қандақ қилип яш жигиткә охшаш еғир гуна өткүзүши мүмкин?

¹⁰ Падиша Сулайман ейтип бәргән һекайә шундақ иш Йәһваға ибадәт қилидиған һәрқандақ бир кишиниң бешиға келиши мүмкинлигини көрситип бериду. У еғир гуна өткүзгәндин кейин, бәлким «туюқсиз» шундақ гуна өткүзүп қойғандәк һис қилип: «Бундақ иш қилип қоюшни һечқачан ойлапму бақмиған едим!»— дейиши мүмкин. Лекин у шу ишниң қандақ йүз бәргәнлиги һәққидә чоңқур ойланса, өзи илгири басқан бәзи хата қәдәмләр ахирида уни шундақ еғир гунаға башлап киргәнлигини көрүп йетәлиши мүмкин. Бәлким, у Йәһва Худани сөймәйдиған кишиләр билән дост болған. Яки болмиса, адәттә Йәһва гувачилири бармайдиған җайларға барған яки зиянлиқ оюн-тамашиларни вә торбәттики нәрсиләрни көрүшни таллиған. У дуа қилиш, Муқәддәс китап оқуш, җамаәт жиғилишлириға қатнишиш яки вәз қилишни тохтатқан болуши мүмкин. Худди Пәнд-нәсиһәтләр китавида тилға елинған яш жигиткә охшаш, бәлким у «туюқсиз» гуна қилмиған болуши мүмкин.

11. Гуна қилиштин сақлинишни ойлисақ, чоқум немә қилишимиз керәк?

¹¹ Биз буниңдин қандақ савақ алалаймиз? Биз пәқәт гунадин әмәс, бәлки гунаға башлайдиған қәдәмләрдин қечишимиз зөрүр. Сулайман яш жигит билән бузуқ аял тоғрисидики мисални ейтқандин кейин муһим бир нуқтини көрситип, мундақ нәсиһәт бәргән: «Униң йоллириға кирмәңлар» (Пәнд н. 7:25). Сулайман йәнә: «Униңдин йолуңни жирақ тут вә өйиниң босуғисиға йеқинлашма»,— дегән (Пәнд н. 5:3, 8). Биз давамлиқ гунаға башлайдиған вәзийәтләрдин жирақ турсақ, өзүмизни гунадин сақлаймиз b, йәни мәлум җайларға бериш яки ишларни қилиш Худаниң қануниға зит болмисиму, биз чоқум һошиярлиғимизни ашурушимиз лазим. Әгәр өзүмизниң езиқтурулушқа дуч келишини билсәк, шундақ җайларға бериш яки ишларни қилиштин өзүмизни жирақ тутушимиз керәк (Мәт. 5:29, 30).

12. Аюп пәйғәмбәр немә қилишқа бәл бағлиған вә бу униң езиқтурулуштин сақлинишиға қандақ ярдәм бәргән? (Аюп 31:1)

¹² Гунаға башлайдиған вәзийәтләрдин қечиш үчүн биз сәгәк турушқа қәтъий бәл бағлишимиз керәк. Аюп пәйғәмбәр мундақ қилған еди. У: «Көзлирим билән келишим түздим»,— дәп, башқа аялға шәһваний арзу-һәвәсләр билән қаримаслиқни қарар қилған (Аюп 31:1ни оқуң). Аюп өзиниң чиқарған қарарида чин турғач, өзини зина қилиштин жирақ туталиған. Бизму езиқтурулушқа башлайдиған һәрқандақ нәрсидин жирақ турушқа қәтъий бәл бағлисақ болиду.

13. Немә үчүн чоқум ой-хияллиримизни қоғдишимиз керәк? (Рәсимләргиму қараң)

¹³ Йәнә өз ой-пикрини қоғдишимиз керәк  (Чиқ. 20:17). Бәзиләр шәһваний арзу-һәвәсләр тоғрилиқ хиялларни қилиш хата әмәс, чүнки шу ишни әмәлийәттә қилмаслиқ болиду дәп ойлишиду. Лекин бундақ ой-пикирдә болуш интайин хата. Бир киши һемишәм хата иш қилиш һәққидә ойлашни давамлаштурса, униң натоғра арзу-истиги техиму күчийиду. Әмәлийәттә у өз-өзигә езиқтурулуш тузиғини қуриду, барғансири тоғра иш қилишни қийинға тохтайду. Әлвәттә, бәзи чағларда яман ой-хияллар пәйда болиду. Шундақ пәйттә әң муһими чоқум шу яман ой-хиялларни дәрһал бешимиздин чиқирип ташлап, яхши нәрсиләр тоғрилиқ чоңқур ойлинишимиз керәк. Шундақ қилғинимизда, шу яман ой-хиялларниң қарши туруш қийин күчлүк арзу-һәвәскә айлинип кетишиниң алдини алимиз вә еғир гуна садир қилип қоюштин сақлиналаймиз (Флп. 4:8; Кол. 3:2; Яқуп 1:13—15).

14. Езиқтурулуштин жирақ туруп, өзүмизни қоғдаш үчүн йәнә немә қилалаймиз?

¹⁴ Езиқтурулуштин жирақ туруп, өзүмизни қоғдаш үчүн йәнә немә қилалаймиз? Йәһваниң қанунлириға бойсунуш һемишәм биз үчүн пайдилиқ болидиғанлиғиға ишәнчимиз камил болуши керәк. Бәзидә ой-пикирлиримизни, арзу-һәвәслиримизни Йәһва Худаниң ирадисигә маслаштуруш қийин болуши мүмкин. Бирақ шундақ қилиш үчүн пүтүн күчимиз билән тиришсақ, көңлүмиз тинч-хатирҗәмликкә еришиду.

15. Тоғра арзу-истәкләрни йетилдүрүш аздурулушларға қарши турушимизға қандақ ярдәм бериду?

¹⁵ Биз тоғра арзу-истәклиримизни йетилдүрүшимиз керәк. Әгәр биз яманлиқни өч көрүп, яхшилиқни сөйүшни үгәнсәк, биз тоғра иш қилишқа қәтъий бәл бағлап, гунаға башлайдиған вәзийәтләрдин қачимиз (Амос 5:15). Униңдин башқа, туюқсиз езиқтурулушқа дуч кәлсәк яки күтүлмигән вәзийәткә чүшүп қалған һаләттиму, тоғра арзу-истәкләр бизни күчләндүрүп, давамлиқ бәрдашлиқ берәләймиз.

16. Роһий ишлар сәгәк турушимизға қандақ ярдәм берәләйду? (Рәсимләргиму қараң)

¹⁶ Ундақта тоғра арзу-истәкләрни қандақ йетилдүрәләймиз? Биз Йәһва Худаға болған сөйгү-муһәббитимизни күчәйтидиған роһий ишлар билән бәнт болсақ, тоғра арзу-истәклиримизни йетилдүрәләймиз. Җамаәт жиғилишлири вә хуш хәвәрни вәз қилиш хизмитигә қатнашсақ, Йәһва Худаниң көңлини хурсән қилиш  истигимиз күчийиду вә асанла езиқтурулушқа әгишип хата ишни қилмаймиз (Мәт. 28:19, 20; Ибр. 10:24, 25). Муқәддәс китапни оқуш, тәтқиқ қилиш вә чоңқур ойлиниш арқилиқ яманлиқни өч көрүп, яхшилиқни техиму сөйүш ирадимизни күчәйтимиз (Йәшуа 1:8; Зәб. 1:2, 3; 119:97, 101). Һәзрити Әйсаниң шагиртлириға: «Аздурулушқа кирип кәтмәслик үчүн, сәгәк болуңлар һәм тохтимай дуа қилиңлар»,— дегән сөзлирини әстә тутуң (Мәт. 26:41). Әгәр биз асмандики Атимизға дуа қилиш үчүн вақит чиқарсақ, Униң көңлини хурсән қилиш арзу-истигимиз техиму күчийиду вә Униңға бизгә ярдәм бериши үчүн пурсәт беримиз (Яқуп 4:8).

СӘГӘК ТУРУҢ

17. Әлчи Петрус қайси аҗизлиғи билән давамлиқ күрәш қилған?

¹⁷ Бәлким биз бәзи аҗизлиқлиримизни тамамән йеңәләймиз. Бирақ башқа аҗизлиқлиримизға қарши узақ вақит күрәш қилишимиз мүмкин. Әлчи Петрусниң мисалини көрүп чиқайли. У инсандин қорққач, һәзрити Әйсадин үч қетим танған (Мәт. 26:69—75). Кейинирәк Петрус Алий кеңәшниң алдида жүрәклик һалда гувалиқ бәргән, бу вақитта у қаримаққа инсандин қорқунучини йәңгән (Әлч. 5:27—29). Кейин жиллар өтүп, у хәтнә қилинғанлардин қорққач, йәһудий әмәс хәлиқләрдин болған Мәсиһ әгәшкүчилири билән бирликтә бир дәстиханда тамақлинишни тохтатқан (Гал. 2:11, 12). Әлчи Петрусниң инсандин қорқуш һис-туйғуси қайта пәйда болған. Бәлким у мошу һис-туйғуни ахирғичә йеңәлмигән.

18. Аҗизлиғимизни йәңдуқ дәп қарисақму, йәнила немә болуши мүмкин?

¹⁸ Әлчи Петрусқа охшаш, бәлким аллиқачан йәңдим дәп ойлиған аҗизлиғимиз кейинчә қайта баш көтирип чиқиши мүмкин. Бир бурадәр мундақ дәйду: «Мән он жилчә шәһваний мәзмундики нәрсиләрни көрмидим. Шуңа өз аҗизлиғимни аллиқачан йәңдим дәп ишәндим. Бирақ аҗизлиғим худди һуҗум қилишниң әң яхши пәйтини күтүп, йошурунуп явайи һайванға охшаш еди, ахири у мени чишләп яриландурди». Бирақ махташқа әрзийдиған йери, бу бурадиримиз һәргизму бәл қоювәтмәй, аҗизлиғи билән давамлиқ күрәш қилған. У бу рәзил дунияда өмүр бойи әшу аҗизлиғиға қарши туруш үчүн һәр күни пүтүн күчи билән тиришишқа тоғра келидиғанлиғини чүшинип йәткән. Өз аяли билән җамаәттики ақсақалларниң ярдими билән  у шәһваний мәзмундики нәрсиләрни көрүштин жирақ туруш үчүн техиму көп күч чиқарған.

19. Чоңқур йилтиз тартқан аҗизлиғимизға қандақ қарши күрәш қилалаймиз?

¹⁹ Биз чоңқур йилтиз тартқан мәлум бир аҗизлиғимизға қарши туруп, униң қайта баш көтирип чиқишидин сақлиниш үчүн немә қилалаймиз? Әйса Мәсиһниң сәгәк туруш тоғрилиқ қилған нәсиһәт сөзигә қулақ селишимиз керәк. Һәтта сиз өзүңизни күчлүк һис қилған чағдиму, давамлиқ езиқтурулушқа башлайдиған һәрқандақ вәзийәтләрдин жирақ туруң (Кор. 1-х. 10:12). Аҗизлиғиңиз билән күрәш қилғанда, һазирғичә езиқтурулушқа қарши турушиңизға ярдәм бәргән амал-чариләрни давамлиқ қолиниң. Һәрдайим өзүңизни езиқтурулуштин сақлаш үчүн барчә имканийәт билән тиришиң (Пет. 2-х. 3:14).

СӘГӘК ТУРУШ БӘРИКӘТЛӘРГӘ ЕРИШТҮРИДУ

20, 21. а) Сәгәк туруп езиқтурулушлардин сақлиниш үчүн тиришсақ, қандақ бәрикәтләргә еришимиз? ә) Әгәр қолумиздин келишичә тиришчанлиқ көрсәтсәк, Йәһва Худа биз үчүн немә қилиду? (Коринтлиқларға 2-хәт 4:7)

²⁰ Сәгәк туруп, езиқтурулушлардин сақлиниш үчүн тиришчанлиқни көрситишкә әрзийду. Мәйли гуна қанчилик һузур-һалавәткә ериштурсун, йәнила вақитлиқ. Лекин Йәһва Худаниң тәләп-өлчәмлиригә мас яшисақ, биз әбәдий бәхит-саадәткә еришимиз (Ибр. 11:25; Зәб. 19:8). Сәвәви биз әслидә Худаниң өлчәмлиригә мас яшаш үчүн яритилған (Ярит. 1:27). Әгәр Йәһвани хурсән қилип яшисақ, һазирниң өзидә пак виждан билән хошал-хорам турмуш кәчүримиз вә келәчәктә болса мәңгүлүк һаятқа еришәләймиз (Тим. 1-х. 6:12; Тим. 2-х. 1:3; Йәһ. 20, 21).

²¹ Шәк-шүбһисизки, «тенимиз аҗиздур». Бирақ бу ярдәмсиз қалдуқ дегәнни билдүрмәйду. Йәһва Худа биз муһтаҗ болған күчни беришкә һәрқачан тәйяр (Коринтлиқларға 2-хәт 4:7ни оқуң). Амма шуни әстин чиқармаңқи, гәрчә Худа адәттики күчтин ешип чүшидиған күчни бәрсиму, бирақ биз өз мәсъулитимизни үстимизгә елип, һәр күни езиқтурулушқа қарши күрәш қилиш үчүн тиришчанлиқ көрситишимиз лазим. Әгәр қолумиздин келишичә тиришчанлиқ көрсәтсәк, Йәһва Худаниң дуалиримизға җавап қайтуруп, муһтаҗ болғинимизда адәттики күчтин ешип чүшидиған күчни бизгә беридиғанлиғиға ишәнч қилалаймиз (Кор. 1-х. 10:13). Әлвәттә, Йәһва Худаниң ярдими билән биз чоқум езиқтурулушларға қарши сәгәк туралаймиз.