1. Сизниң һәқиқәткә болған һис-туйғулириңиз қандақ?

 ЙӘҺВАНИҢ хизмәтчилири Муқәддәс китаптики һәқиқәтни яхши көриду. Иман-етиқадимиз шу һәқиқәткә асасланған (Рим. 10:17). Шуниңға ишинимизки, Йәһва қурған Мәсиһ әгәшкүчилири җамаити һәқиқәтниң түвриги вә һул-асасидур (Тим. 1-х. 3:15). Униңдин башқа, биз аримиздики «өзлиригә рәһбәрлик алидиғанларға» хошаллиқ билән бойсунимиз, чүнки улар Муқәддәс китапқа асаслинип, бизгә һәқиқәтни чүшәндүриду вә Худаниң ирадисигә мас келидиған йол-йоруқларни бериду (Ибр. 13:17).

2. Яқуп 5:19-айәткә асасланғанда, һәқиқәтни қобул қилғандин кейин, йәнила қандақ хәтәргә дуч келишимиз мүмкин?

² Амма биз һәқиқәтни қобул қилип, Худа тәшкилатиниң ишәнчлик йол-йоруқларни бериштә муһим роль ойнайдиғанлиғиға ишәнсәкму, бәлким йәнила һәқиқәт йолидин чәтнәп кетишимиз мүмкин (Яқуп 5:19ни оқуң). Шәйтан дәл бизниң Муқәддәс китапқа яки Худаниң тәшкилати бериватқан йол-йоруққа ишәнчимизни аҗизлаштурушни халайду (Әфәс. 4:14).

3. Немә үчүн биз һәқиқәттә чиң турушимиз керәк? (Әфәсликләргә 6:13, 14)

³ Әфәсликләргә 6:13, 14ни оқуң. Пат йеқинда Шәйтан күчлүк тәшвиқаттин пайдилинип, барчә милләтләрни Йәһва Худаға қарши чиқишқа аздуриду (Вәһ. 16:13, 14). Биз йәнә Шәйтан давамлиқ Худа хәлқини аздуруш техиму көп һәрикәт қилидиғанлиғини билимиз (Вәһ. 12:9). Шуниң үчүн чоқум һәқиқәт билән ялғанчилиқни пәриқләндүрүшни үгинишимиз вә  давамлиқ һәқиқәткә бойсунушимиз лазим (Рим. 6:17; Пет. 1-х. 1:22). Бундақ қилиш бәк муһим, чүнки дәһшәтлик чоң балаю апәттин аман-есән өтүшимизгә буниңға бағлиқ!

4. Бу мақалидә биз немиләрни көрүп чиқимиз?

⁴ Бу мақалидә биз Муқәддәс китаптики һәқиқәтни ялғандин пәриқләндүрүшкә вә Худа тәшкилати бериватқан йол-йоруқни қобул қилишимизға ярдәм беридиған икки пәзиләтни үгинимиз. Кейин һәқиқәттә чиң туруш үчүн чоқум әмәл қилишқа тегишлик үч мәслиһәтни көрүп чиқимиз.

ҺӘҚИҚӘТ БИЛӘН ЯЛҒАНЧИЛИҚНИ ПӘРИҚЛӘНДҮРҮШКӘ ЯРДӘМ БЕРИДИҒАН ПӘЗИЛӘТЛӘР

5. Йәһва Худадин әйминиш һәқиқәт билән ялғанчилиқ арисидики пәриқни көрүшкә қандақ ярдәм бериду?

⁵ Йәһва Худадин әйминиш. Худадин әйминидиған киши Уни чиң қәлбидин сөйидуки, Униң көңлини рәнҗитидиған бир ишни қилип қоюштин қорқиду. Биз Худани хурсән қилиш үчүн яхши билән яман, һәқиқәт билән ялғанчилиқ оттурисидики пәриқни көрүшни үгинишкә тиришимиз (Пәнд н. 2:3—6; Ибр. 5:14). Инсандин қорқуш һис-туйғуси Йәһва Худаға болған сөйгү-муһәббитимиздин күчлүк болушқа һәргиз йол қоймаслиғимиз керәк. Чүнки инсанларни хуш қилишқа тиришсақ, һемишәм Йәһвани рәнҗитидиған ишларни қилип қоюмиз.

6. Он пайлақчи инсандин қорққанлиғи түпәйли һәқиқәтни қандақ бурмилиди?

⁶ Худаға қариғанда инсандин көпирәк қорқсақ, аста-аста һәқиқәттин чәтнәп кетишимиз мүмкин. Қедимий замандики бир мисални көрүп бақайли. Исраил хәлқиниң 12 йетәкчиси Худа вәдә қилған зиминға пайлақчилиқ қилишқа әвәтилгән еди. 12 пайлақчидин они қананлиқлардин интайин қорққан. Уларниң қорқунучи Йәһва Худаға болған сөйгү-муһәббитидин күчлигирәк болған. Улар исраилларға: «Биз у хәлиқниң алдиға баралмаймиз [хәлиқкә қарши чиқмаймиз, ЙД], чүнки улар биздин күчлигирәк»,— дегән  (Сан. 13:27—31). Инсанларниң нуқтәий нәзәри бойичә қананлиқлар һәқиқәтән исраиллардин күчлигирәк еди. Бирақ исраиллар дүшмәнлирини йеңәлмәйду дегән кишиләр Йәһваниң күч-қудритиниң нәқәдәр чәксиз екәнлигини унтуп қалған еди. Әшу 10 пайлақчи өз диққитини Йәһва Худаниң исраиллардин немә қилишни тәләп қилидиғанлиғи вә илгири Йәһва исраиллар үчүн немиләрни қилғанлиғини чоқум әстә сақлиши керәк еди. Йәнә улар Йәһва Худаниң улар үчүн йеқинда қилған ишлири һәққидә чоңқур ойлиниши керәк еди. Шу чағдила Яратқучи Йәһваниң күч-қудритигә селиштурғанда қананлиқларниң күчи нәқәдәр аҗиз екәнлигини көрүп йетәләтти. Амма әшу ишәнчиси аҗиз пайлақчиларға охшимайдиған Халеб вә Йәшуа Йәһва Худаниң көңлини хурсән қилишни халиған. Улар хәлиққә: «Әгәр Йәһва бизни яхши көрсә, бу сүт билән һәсәл еқиватқан йәргә [елип келиду]»,— дегән (Сан. 14:6—9).

7. Йәһвадин әйминиш һис-туйғусини қандақ күчәйтәләймиз? (Рәсимгиму қараң.)

⁷ Йәһва Худадин әйминиш һис-туйғусини күчләндүрүш үчүн һәр қетим қарар чиқарғинимизда Униң көңлини немә хурсән қилидиғанлиғи һәққидә ойлинишимиз керәк (Зәб. 16:8). Муқәддәс китапни оқуғанда, өз-өзүңиздин мундақ дәп сораң: «Әгәр мән мошу вәзийәткә чүшүп қалған болсам, қандақ қарар чиқарған болаттим?» Мәсилән, он Исраил пайлақчиси йәткүзүватқан сәлбий хәвәрни тиңшаватқанлиғиңизни тәссәвур қилиң. Бу сәлбий хәвәргә ишинип, қорқунуч ичидә қалаттиңизму? Яки болмиса, Йәһва Худаға болған сөйгү-муһәббитиңиз вә Униң көңлини хурсән қилиш истигиңиз инсан қорқунучидин күчлигирәк болаттиму? Шу чағда пүтүн Исраил хәлқи Йәшуа билән Халеб ейтқан сөзләрниң растлиғиға ишәнмигән. Нәтиҗидә, улар Худа вәдә қилған зиминға кириш пурситидин айрилип қалған еди (Сан. 14:10, 22, 23).

8. Биз пүтүн күчимиз билән қайси пәзиләтни йетилдүрүшимиз керәк вә немә үчүн?

⁸ Кәмтәрлик. Йәһва Худа кәмтәр адәмләргә һәқиқәтни ашкарә қилиду (Мәт. 11:25). Биз һәқиқәтни үгиниш үчүн кәмтәрлик билән ярдәмни қобул қилимиз (Әлч. 8:30, 31). Қандақла болмисун, тәкәббурлишип кетиштин пәхәс болушимиз керәк. Әгәр тәкәббурлишип кәтсәк, өз көзқарашлиримизни худди Муқәддәс китап принциплири вә Йәһваниң тәшкилати бериватқан йол-йоруқларға охшашла тоғра дәп қарашқа башлишимиз мүмкин.

9. Кәмтәрлигимизни қандақ сақлап қалалаймиз?

⁹ Кәмтәрликни сақлаш үчүн шуни әстин чиқармаслиғимиз керәкки, Йәһваниң улуқлиғи алдида биз һечнемигә әрзимәс (Зәб. 8:3, 4). Биз техиму кәмтәр болуш вә тәлимләрни хошаллиқ билән қобул қилиш үчүн ярдәм сорап Йәһваға дуа қилсақ болиду. Униң ярдими билән өз көзқарашлиримизни муһим дәп қаримаймиз. Муқәддәс китап вә Худаниң тәшкилати арқилиқ бәргән йол-йоруқларни биринчи орунға қоюмиз. Муқәддәс китапни оқуғанда, диққитиңизни Йәһва Худаниң кәмтәрликни қанчилик сөйидиғанлиғи вә һакавурлуқ, тәкәббурлуқ, мәғрурлуқни қанчилик өч көридиғанлиғиға қаритиң. Әгәр қандақту бир шан-шәрәплик вәзипигә еришсиңиз, кәмтәрликни сақлаш үчүн техиму көп тиришиң.

ҺӘҚИҚӘТТӘ ЧИҢ ТУРУШ ҮЧҮН НЕМӘ ҚИЛАЛАЙМИЗ?

10. Йәһва Худа кимләр арқилиқ Өз хәлқигә көрсәтмилири вә йол-йоруқларни бериватиду?

¹⁰ Йәһваниң тәшкилати бәргән йол-йоруққа давамлиқ ишәнч қилиң. Қедимий заманда Йәһва авал Муса пәйғәмбәрни кейин Йәшуани ишлитип, Өз хәлқи исраилларға көрсәтмиләрни бәргән (Йәшуа 1:16, 17). Исраиллар Йәһва таллиған бу икки вәкилгә ишәнгәндә, улар көп бәрикәтләргә еришкән. Әсирләр өтүп мәсиһийләрниң җамаити қурулғанда, авал 12 әлчи йол-йоруқ бәргән (Әлч. 8:14, 15).  Кейин уларниң топиға Йерусалимдики башқа ақсақалларму қошулған. Җамаәтләр бу садиқ бурадәрләрниң йол-йоруғиға бойсунғанлиқтин, иман-етиқади мустәһкәмлинип, етиқатчиларниң сани күндин-күнгә көпәйгән (Әлч. 16:4, 5). Бүгүнки күндиму биз Йәһва Худаниң тәшкилатиниң йол-йоруғиға бойсунуш арқилиқ бәрикәтләргә еришимиз. Әгәр биз йетәкчиликни өз үстигә алғанларни рәт қилсақ, Йәһва қандақ һис-туйғуда болиду? Бу соалға җавап тепиш үчүн Худа вәдә қилған зиминға қарап маңған исраилларға немә болғанлиғини көрүп чиқайли.

11. Худа исраилларға йетәкчилик қилишқа таллиған Мусаға қарши чиққучиларға немә болған? (Рәсимгиму қараң.)

¹¹ Исраиллар вәдә қилған зиминға сәпәр қилип маңғанда, бәзи абройлуқ кишиләр Мусаға вә Йәһва Худа униңға бәргән һоқуққа қарши чиққан. Улар: «Пүткүл җамаәт барлиғи [пәқәтла Муса әмәс] муқәддәстур вә уларниң арисида Йәһва»— дегән (Сан. 16:1—3). Гәрчә Худаниң көз алдида «пүткүл җамаәт» муқәддәс болсиму, У Өзиниң хәлқи арисида йетәкчилик қилиш үчүн пәқәт Мусани таллиған (Сан. 16:28). Исиянкарлар Мусани тәнқит қилғанда, әслидә Йәһва Худани тәнқит қилған. Улар өз диққитини Йәһва Худаниң улардин немиләрни күтидиғанлиғиға әмәс, өзлириниң арзу истәклиригә, йәни һоқуқ вә мәртивилик болушқа қаратқан. Худа бу исиянни көтәргүчиләр билән уларға әгәшкән миңларчә кишиләрни қиривәткән (Сан. 16:30—35, 41, 49). Бүгүнки күндиму шуниңға ишинәләймизки, Йәһва Өз тәшкилатиниң көрсәтмилирини һөрмәтлимәйдиған кишиләрдин хурсән болмайду.

12. Йәһваниң тәшкилатиға болған ишәнчимизни қандақ сақлап қалалаймиз?

¹² Йәһваниң тәшкилатиға болған ишәнчимизни сақлап қалалаймиз. Тәшкилатта йетәкчиликни өз үстигә алған бурадәрләр Йәһвани хурсән қилишни халайду. Шуңа улар Муқәддәс китаптики мәлум бир һәқиқәткә болған чүшәнчини түзитишниң зөрүрлигини көрүп йәтсә яки Йәһва Худаға хизмәт қилиш  усулини өзгәртишкә тоғра кәлсә, хошаллиқ билән шундақ өзгәртишләрни қилиду (Пәнд н. 4:18). Улар шундақ қилиду, чүнки Йәһва Худани хурсән қилишни һәммидин муһим дәп қарайду. Униңдин башқа, улар пүтүн күчи билән Муқәддәс китапқа асасән қарар чиқиришқа тиришиду. Сәвәви, Худаниң хәлқи Язмиларда йезилған сөзләргә әмәл қилиши керәк.

13. «Сағлам сөзләрдики өрнәк» дегән немә вә биз немә қилишимиз керәк?

¹³ «Сағлам сөзләрдики өрнәкни чиң» тутуң (Тим. 2-х. 1:13, ЙД). «Сағлам сөзләрдики өрнәк» — бу Муқәддәс китаптики тәлимләрдур (Йоһ. 17:17). Бундақ тәлимләр биз ишинидиған һәммә нәрсиниң һул-асасидур. Йәһваниң тәшкилати бизгә бу сағлам сөзләрдики өрнәкни чиң тутушни үгәтти. Биз бундақ қилсақ, Йәһва чоқум бизни бәрикәтләргә ериштүриду.

14. Бәзи Мәсиһ әгәшкүчилири немә сәвәптин «сағлам сөзләрдики өрнәкни» чиң тутмиған?

¹⁴ «Сағлам сөзләрдики өрнәкни» чиң тутмисақ, немә болуши мүмкин? Мәсилән, биринчи әсирдики мәсиһийләр арисида Йәһваниң күни аллиқачан кәлди дегән ялған гәп тарқалған. Бәлким улар қандақту бир хәтни «әлчи Паулдин кәлгән вә әшу хәттә шундақ йезилған» дәп ойлиған болуши мүмкин. Салоника шәһиридики бәзи етиқатчилар дәлил-испатларни тәкшүрүшкә вақит чиқармай, әшу миш-миш гәпләргә ишинип, уларни тарқитишқа башлиған еди. Әгәр бу мәсиһийләр әлчи Паулниң улар билән биллә болғанда үгәнгән тәлимләрни әстә тутқан болса, улар алданмиған болатти (Сал. 2-х. 2:1—5). Әлчи Паул уларға нәсиһәт берип, һәммә гәп-сөзләргә ишинип кәтмәсликкә агаһландурған. Әлчи Паул салоникилиқларға язған иккинчи хетидә өз сөзини мундақ дәп аяқлаштурған: «Мана, мәнки Паулдин өз қолум билән язған салимим, у һәрбир хетимдә бәлгү болуп, хизмәт қилиду — мән шундақ язимән» (Сал. 2-х. 3:17).

15. Растәк көрүнгән ялғанчилиқтин өзүмизни қандақ һимайә қилалаймиз? Мисал кәлтүрүң. (Рәсимләргиму қараң)

¹⁵ Әлчи Паул салоникилиқларға язған сөзләрдин немиләрни үгинәләймиз? Әгәр Муқәддәс китаптин үгәнгәнлиримизгә мас  кәлмәйдиған гәп-сөзләрни яки ғевәт-шикайәтләрни аңлисақ, әқил-парасәтлик болушимиз лазим. Совет Иттипақи мәзгилидә дүшмәнлиримиз мәркизи Дуниявий баш идаридин кәлгәндәк көринидиған бир парчә сахта хәтни тарқатқан. Бу хәт бәзи бурадәрләрни бөлүнүп, өз алдиға башқа мустәқил бир тәшкилатни қурушқа дәвәт қилған. Қаримаққа, бу хәт растәк көрүнгән. Бирақ садиқ етиқатдашлар униңға алданмиған. Улар бу хәттики сөзләрниң үгәнгәнлиригә мас кәлмәйдиғанлиғини чүшинип йәткән. Бүгүнки күндә һәқиқәткә қарши дүшмәнләр бизни аздуруп, аримизға бөлгүнчилик селиш үчүн интернет вә иҗтимаий алақә торлири қатарлиқ заманивий йеңи техникилардин пайдилиниду. Қаймуқуп иккилинип олтиришниң орниға, аңлиған яки оқуғанлиримизниң илгири үгәнгән һәқиқәткә мас келидиғанлиғи һәққидә чоңқур ойлиниң. Шундақ қилип, өзүмизни һимайә қилалаймиз (Сал. 2-х. 2:2; Йоһ. 1-х. 4:1).

16. Римлиқларға 16:17, 18-айәтләргә асасланғанда, кимду бири һәқиқәттин чәтнәп кәтсә биз немә қилишимиз керәк?

¹⁶ Йәһваға садиқ болған кишиләр билән инақ өтүң. Худа бизниң инақ-иттипақ бирликтә Униңға ибадәт қилишимизни халайду. Һәқиқәтни қанчә чиң тутсақ, шунчә инақ-иттипақ өтүмиз. Җамаәтниң арисида кимду-бири бөлгүнчилик пәйда қилса, Худа бизни бундақ кишидин «нери болуңлар» дәп агаһландуриду. Буниңдин башқа, биз һәқиқәттин чәтнәп кетиштин сақлинишимиз керәк (Римлиқларға 16:17, 18ни оқуң).

17. Һәқиқәтни чүшинип, униңда чиң турсақ қандақ бәрикәтләргә еришимиз?

¹⁷ Һәқиқәт билән ялғанчилиқниң оттурисидики пәриқни чүшинип, һәқиқәттә чиң турсақ, Йәһва Худаға техиму йеқин туримиз вә иман-етиқадимизни күчәйтимиз (Әфәс. 4:15, 16). Униңдин башқа, биз Шәйтанниң сахта тәлиматлири вә тәшвиқатлириға алданмаймиз вә Йәһваниң һимайиси астида болуп, дәһшәтлик чоң балаю апәттә аман қалимиз. Һәқиқәтни чиң тутуңлар һәм «хатирҗәмликниң Худаси силәр билән болиду» (Флп. 4:8, 9).