1, 2. Зәбур 34:8-айәткә асасланғанда, Йәһваниң яхшилиғини тетиш үчүн немә қилалаймиз?

 СИЗНИҢ алдиңизға һечқачан йәп бақмиған тамақни елип кәлди дәйли. Шу тамақниң тәмини билиш үчүн униңға қарайсиз, пурайсиз яки башқиларниң шу тамақни яқтурған-яқтурмиғанлиғини сорайсиз. Амма сизниң шу тамақни яқтуридиған-яқтурмайдиғанлиғиңизни билишниң бирдин-бир йоли — өзүңиз тәмини тетип көрүш.

² Муқәддәс китап вә нәшир материаллиримизни оқуш, Худаниң бәрикәтлиригә еришкәнләрниң ейтип бәргәнлирини аңлаш арқилиқ, Йәһваниң яхшилиғи һәққидә үгинәләймиз. Бирақ Йәһва Худаниң яхшилиғини һәқиқәтән чүшиниш үчүн, өзүмиз Униң яхшилиғини тетип көрүшимиз керәк (Зәбур 34:8ни оқуң). Мундақ бир вәзийәтни көз алдимизға кәлтүрәйли: биз Йәһваға толуқ вақит хизмәт қилишни халаймиз. Амма шу көзлигән мәхситимизгә йетиш үчүн, аддий-саддә турмуш кәчүрүшимизгә тоғра келиду. Бәлким, биз Худа Падишалиғини биринчи орунға қойсақ, Худа бизгә зөрүр болған еһтияҗлиримизни тәминләп беридиғанлиғи һәққидә Әйсаниң қилған вәдисини көп қетим оқудуқ. Амма әшу вәдиниң өз һаятимизда әмәлгә ашқанлиғини шәхсән өзүмиз һис қилмидуқ (Мәт. 6:33). Шундақтиму, Әйсаниң вәдисигә ишәнч қилип, турмуш хираҗәтлиримизни азайтимиз, иш вақтимизни қисқартимиз вә пүтүн диққитимизни вәз хизмәткә қаритимиз. Шундақ қилсақ, Йәһваниң бизниң еһтияҗлиримизға көңүл бөлидиғанлиғини һәқиқәтән һис қилип, Униң яхшилиғини шәхсән тетип көримиз.

3. Зәбур 16:1, 2-айәтләргә асасланғанда, кимләр Худаниң бәрикәтлишигә еришиду?

³ Йәһва Худа һәммә кишиләргә, һәтта Уни тонумайдиғанларғиму яхшилиқ қилиду (Зәб. 145:9; Мәт. 5:45). Бирақ болупму,  Уни чин жүрәктин сөйгән вә Униңға пүтүн қәлби билән хизмәт қилғанларға мол бәрикәтләрни төкиду (Зәбур 16:1, 2ни оқуң). Йәһваниң бизгә қандақ яхшилиқ қилғанлиғини көрүп бақайли.

4. Йәһва Өзигә йеқинлишишқа башлиғанларға яхшилиғини қандақ көрситиду?

⁴ Һәр қетим Йәһва тоғрилиқ үгәнгәнлиримизни һаятимизда әмәлий қолланғанда, Униң бизгә қандақ ярдәм бәргәнлигини көримиз. У һәққидә билим елип, Уни сөйүшкә башлиғанда, У яқтурмайдиған иш-һәрикәтләр вә ой-пикирләрни тохтитимиз (Кол. 1:21). Йәһваға өзүмизни беғишлап чөмдүрүлүштин өткәндә, Униң яхшилиғини техиму тетип көрдуқ. Мәсилән, пак вижданға егә болуп, Униң билән йеқин достлуқ орнаттуқ (Пет. 1-х. 3:21).

5. Вәз хизмәттә Йәһваниң яхшилиғини қандақ тетип көрәләймиз?

⁵ Биз вәз хизмити билән мәшғул болсақ, Йәһваниң яхшилиғини давамлиқ тетип көримиз. Сиз тартинчақ адәмму? Көпинчә Йәһва гувачилири шундақ. Бәлким, сиз Йәһва гувачиси болуштин илгири тонумайдиған бирсиниң ишигини қеқиш вә уларға яқтурмайдиған хәвәрни йәткүзүшни хиялиңизғиму кәлтүрүп бақмиған. Бирақ шуниңға қаримай, вәз ейтишни давамлаштуриватисиз. Униңдин башқа, Йәһваниң ярдими билән сиз вәз хизмәттә хошаллиқ тепишни үгәндиңиз. Униң түрлүк йоллар билән сизни қоллап-қувәтләйдиғанлиғини һис қилдиңиз. Мәсилән, вәз хизмәттә бирси сизгә қопал муамилә қилғанда, өзүңизни тутувелип, тинчлиқни сақлишиңизға ярдәм бәргән. Шундақла, қизиқиш көрсәткән өй егисигә оқуп бәрмәкчи болған айәтни есиңизгә салған. Сиз вәз қилған районларда кишиләр хуш хәвәргә қизиқиш көрсәтмигәндә, сизниң давамлиқ вәз қилишиңизға күч бәргән (Йәр. 20:7—9).

6. Йәһва бизгә немә қилишни үгитиш арқилиқ Өз яхшилиғини көрситиду?

⁶ Йәһва бизгә қандақ вәз қилишни үгитиш арқилиқ, Өзиниң яхшилиғини көрситип келиватиду (Йоһ. 6:45). Һәптә арилиғидики жиғилишларда, биз яхши тәйярланған сөһбәт үлгилирини аңлаймиз вә уларни әмәлий қоллинишқа дәвәт қилинимиз. Биз дәсләптә йеңи усулларни синап көрүштин әнсиришимиз мүмкин. Бирақ биз шундақ қилғанда йеңи усулниң вәз қиливатқан районимизға наһайити мас келидиғанлиғини байқишимиз мүмкин. Биз йәнә җамаәт жиғилиши вә конгрессларда һечқачан синап бақмиған усулда вәз қилишқа дәвәт қилинимиз. Демәк, бу адәтләнгән усулни өзгәртиш керәклигини билдүриду. Бирақ шундақ қилсақ, Йәһва бизни бәрикәтләйду. Мәйли қандақ вәзийәттә болушимизға қаримай, Йәһваға әң яхшисини бериш үчүн йеңи усулларни ишләткәндә, қандақ бәзи бәрикәтләргә еришәләйдиғанлиғимизни көрүп бақайли. Һазир Йәһваға хизмәт қилиш үчүн қойған мәхсәтлиримизгә қандақ йетәләйдиғанлиғимизни муһакимә қилимиз.

7. Вәз хизмитимизни кәңәйтишкә тиришсақ, қандақ бәрикәтләргә еришәләймиз?

⁷ Биз Йәһваға техиму йеқинлишалаймиз. Аяли билән Колумбияда хизмәт қилидиған Самуил b исимлиқ ақсақалниң мисалини көрүп бақайли. Улар өз җамаитидә хизмәт қилип хошаллиқ тапқан. Амма улар вәз ейтқучиларға еһтияҗлиқ җамаәтләргә ярдәм бериш арқилиқ көпирәк вәз қилишни халиған еди. Улар шу көзлигән мәхситигә йетиш үчүн, бәзи қурбанлиқларни беришкә тоғра кәлгән. Самуил мундақ дәйду: «Биз Мәтта 6:33дики нәсиһәт сөзигә қулақ селип, зөрүр болмиған нәрсиләрни сетивелишни тохтаттуқ. Амма әң қийини, өйүмизни ташлап башқа җайға көчүш болған еди. Чүнки өйүмиз бәк қолайлиқ вә банкқа қәризимиз йоқ еди». Улар йеңи җайға көчүп барғанда, турмуш хираҗити үчүн илгирикидәк  көп пул сәрип қилмисиму болидиғанлиғини байқиған. Самуил йәнә: «Йәһваниң бизни қандақ йетәкләйдиғанлиғи вә дуалиримизға җавап бәргәнлигини көрдуқ. Униң биздин рази болғанлиғини вә бизни сөйидиғанлиғини һис қилдуқ. Илгири шундақ һис-туйғуда болуп бақмиған едуқ»,— дәйду. Сизниң йеңи бир районда вәз қилиш үчүн имканийитиңиз барму? Әгәр шундақ қилсиңиз, Йәһваниң сизгә йеқинлишиватқанлиғиға вә ғәмхорлуқ қиливатқанлиғиға ишинәләйсиз (Зәбур 18:25).

8. Иван вә Викторияниң сөзлиридин немини үгәндиңиз?

⁸ Йәһваға хизмәт қилиштин хошаллиқ тапимиз. Қирғизстанда пионер болуп хизмәт қиливатқан Иван вә Викторияниң сөзлирини аңлап бақайли. Улар аддий-саддә турмуш кәчүргән, қурулуш ишлирини өз ичигә алған һәрқандақ вәзипиләрни қилишқа тәйяр болған. Иван мундақ дәйду: «Һәрқандақ тапшурулған вәзипини пүтүн күчимиз билән қилаттуқ. Һәтта һәр күни кәчтә һерип чарчисақму, күчимизни Йәһваниң иши үчүн чиқириватқанлиғимизни билгәч, қәлбимиз хәтирҗәмликкә толуп, қанаәт һис қилаттуқ. Биз йәнә йеңи достларни тепип, улар билән унтулмас әслимиләрни қалдуруп, хошаллиқ үстигә хошаллиқ қошулди» (Марк 10:29, 30).

9. Қийин вәзийәткә дуч кәлгән қериндишимизни Йәһваға көпирәк хизмәт қилишқа немә дәвәт қилған вә нәтиҗиси қандақ болған?

⁹ Биз қийин вәзийәтләргә дуч кәлсәкму, Йәһваға хизмәт қилиштин хошаллиқ тапимиз. Мәсилән, Ғәрбий Африкида яшайдиған яшинип қалған тул қериндишимиз Мира, илгири дохтур болуп ишлигән. Пенсиягә чиққанда, пионерлиқ хизмитини башлиған. Униң еғир ревматизм кесили болғачқа, һәр қетим өйдин-өйгә вәз қилғанда, пәқәт бирла саат маңалатти. Бирақ аммивий орунларда көпирәк вәз қилалатти. Униң нурғун қайта йолуқушлири вә Муқәддәс китап үгәнгүчилири болған. У бәзилири билән телефон арқилиқ алақә қилатти. Уни Йәһваға көпирәк хизмәт қилишқа немә дәвәт қилған? У мундақ дәйду: «Мениң Йәһва Худаға вә Әйса Мәсиһкә болған сөйгү-муһәббитим толуп-ташқан. Униңдин башқа, мән Йәһваға һәр дайим дуа қилип, күчимниң йетишичә Униңға көпирәк хизмәт қилалишимға күч беришини сораймән» (Мәтта 22:36, 37).

10. Петрусниң 1-хети 5:10-айәттә көрситилгәндәк, Йәһваға садиқ хизмәт қилғанлар қандақ бәрикәтләргә еришиду?

¹⁰ Йәһвадин қошумчә тәлим-тәрбийигә еришәләймиз. Маврикийда пионер болуп хизмәт қилидиған Кенни шундақ тәлим-тәрбийигә еришкән. У һәқиқәтни билгәндә, алий мәктәпни ташлап, чөмдүрүлүштин өткән вә толуқ вақитлиқ хизмәтни башлиған. У шундақ дәйду: «Мән Йәшая пәйғәмбәрниң: “Мана мән! Мени әвәткәйсән”, дегән сөзләр бойичә һаят кәчүрүшкә тириштим» (Йәшая 6:8). Кенни көплигән қурулуш ишлириға қатнашқан вә өз ана тилидики Муқәддәс китапқа асасланған нәшри материалларниң тәрҗимә қилинишиға ярдәм бәргән. «Маңа тапшурулған вәзипиләрни орунлишимға ярдәм беридиған зөрүр маһарәтләрни үгиниш үчүн тәрбийиләшкә қатнаштим»,— дәйду Кенни. У пәқәт маһарәтла әмәс, униңдинму көпирәк нәрсигә үгәнгән. У мундақ дәйду: «Өзүмниң камчилиқлиримни вә Йәһваға садиқ қелиш үчүн қандақ пәзиләтләрни йетилдүрүшүм керәклигини тонуп йәттим» (Петрус 1-хети 5:10ни оқуң). Сизму Йәһвадин қошумчә тәлим-тәрбийигә еришиш үчүн, һаятиңизда зөрүр өзгиришләрни қилаламсиз?

11. Җәнубий Кореядики қериндашлар йеңи усулда вәз хизмәткә қатнишишқа қандақ күч чиқарған вә нәтиҗиси қандақ болған? (Муқавидики рәсимгә қараң.)

¹¹ Һәтта тәҗрибилик гувачилар болсиму, йеңи усулда вәз қилиш орунлаштурушиға қатнашқанда көп пайдисини көрәләйду. Җәнубий Кореядики бир җамаәттики ақсақаллар таҗсиман вирус (COVID-19) кесили мәзгили һәққидә мундақ дегән: «Илгири саламәтлиги сәвәплик өйму-өй көпирәк вәз қилалмиған қериндашлар,  һазир видеолуқ улиниш арқилиқ вәз қиливатиду. 80 яштин ашқан үч аял қериндишимиз компьютерни қандақ ишлитишни үгинип, һәр күни йеңи усулда вәз қилишқа қатнашқан» (Зәб. 92:14, 15). Сизму вәз хизмитигә көпирәк қатнишип, Йәһваниң яхшилиғини техиму көпирәк тетип көрүшни халамсиз? Һазир әшу мәхсәткә йетишиңизгә ярдәм беридиған бирқанчә усулни көрүп чиқимиз.

12. Йәһва Униңға таянғанларға қандақ вәдә бериду?

¹² Йәһваға тайинишни үгиниң. Биз Йәһваға тайинип, Униңға қолумиздин келишичә хизмәт қилсақ, У бизгә бәрикәтләрни яғдуридиғанлиғини вәдә қилған (Мал. 3:10). Колумбиядики Фабиола исимлиқ қериндаш Йәһваниң өз вәзийитидә бу вәдини әмәлгә ашурғанлиғини көргән. У чөмдүрүлүштин өткәндин кейин пионер болушни халиған. Бирақ униң йолдиши вә үч пәрзәнди униң маашиға қарашлиқ еди. Шуңа у пенсиягә чиқидиған вақти кәлгәндә, Йәһваға давамлиқ дуа қилип ярдәм сориған. У мундақ дәйду: «Адәттә пенсиягә илтимас қилғандин кейин узун вақит күтүш керәк еди. Бирақ мән бир айдин кейинла пенсия пулини қолумға алдим. Бу һәқиқәтән бир мөҗүзә болған!». У икки айдин кейин пионерлиқ хизмитини башлиған. Һазир у 70 яштин ашқан вә 20 жилдин көпирәк пионерлиқ хизмитини қилип келиватиду. Шу мәзгилдә у 8 кишиниң чөмдүрүлүштин өтүшигә ярдәм бәргән. У мундақ дәйду: «Гәрчә мән өзүмни аҗиз һис қилсамму, Йәһва мениң пионерлиқ қилиш үчүн түзгән планимни орунлашқа һәр күни ярдәм бериду».

13, 14. Йәһваға тайинип, Униң бәрикәтлиригә еришишимизгә қайси мисаллар ярдәм берәләйду?

 ¹³ Илгири Йәһваға таянғанларниң үлгисидин үгиниң. Муқәддәс китапта Йәһваға җан көйдүрүп хизмәт қилғанларниң мисаллири нурғун. Көп вәзийәтләрдә Йәһваға хизмәт қилғанлар Униң алаһидә бәрикәтлиригә еришиштин бурун, бир қәдәмни бесиши керәк болған. Мәсилән, Ибраһим қәйәргә беришини билмәй туруп, өз жутини ташлап кәткәндила, Йәһваниң бәрикитигә еришкән (Ибр. 11:8). Яқуп болса, пәриштә билән челишқандин кейинла, алаһидә бәрикәтләнгән (Ярит. 32:24—30). Исраил хәлқи вәдә қилинған зиминға кириш алдида, роһанийлар шиддәт билән долқунлап еқиватқан Иордан дәриясигә қәдәм қойғандин кейинла, хәлиқ дәрияни кесип өтәлигән (Йәшуа 3:14—16).

¹⁴ Йәһваға тайинип, Униң бәрикәтлиригә еришкән бүгүнки күндики гувачиларниң үлгилиридинму үгинәләймиз. Мәсилән, қериндашлиримиз Пейтон вә аяли Диана, «Улар тәйярлиқ роһини көрсәткән» c намлиқ бир қатар мақалиләрни оқушни яхши көргән. Пейтон мундақ дәйду: «Шу мақалиләрни оқуғанда, биз бирсиниң мәзилик тамақни йәватқанлиғини көргәндәк болдуқ. Көпирәк оқуғансири, өзүмизму Йәһваниң яхшилиғини тетиш вә көрүшкә интизар болдуқ». Нәтиҗидә, Пейтон вә Диана вәз ейтқучиларға көпирәк еһтияҗлиқ районға көчүп барған. Сизму шу бир қатар мақалиләрни оқуп баққанму? «Жирақ районда вәз қилиш. Австралия» вә «Жирақ районда вәз қилиш. Ирландия» намлиқ видеоларни jw.org торбетидә көрдиңизму? Булар сизниң Йәһваға көпирәк хизмәт қилишниң йоллирини тепишиңизға ярдәм берәләйду.

15. Йәһваға көпирәк хизмәт қилишқа тиришиватқанлар билән арилишиш бизгә қандақ ярдәм берәләйду?

¹⁵ Йәһваға хизмәт қилишқа тиришиватқанлар билән арилишиң. Һечқачан тетип бақмиған тамақни башқилар билән йесәк, иштиһайимиз ечилиду. Шуниңға охшаш, Йәһваға хизмәт қилишни һаятида биринчи орунға қойғанлар билән арилашсақ, Униңға көпирәк хизмәт қилишниң йоллирини издәшкә тиришимиз. Кент билән Вероника дәл шундақ ишни бешидин өткүзгән. Кент мундақ дәйду: «Бизниң достлиримиз вә аилимиз бизни йеңи вәз қилиш усулини синап көрүшкә дәвәт қилған. Биз Падишалиқ хизмитини биринчи орунға қойғанлар билән йеқин арилашқанда, йеңи усулда хизмәт қилишқа тиришип беқишқа болған ишәнчимиз ашти». Кент вә Вероника һазир Сербияда мәхсус пионер болуп хизмәт қиливатиду.

16. Луқа 12:16—21 айәтләрдики Әйсаниң тәмсилидә көрситилгәндәк, немә үчүн қурбанлиқларни беришкә тәйяр болушимиз лазим?

¹⁶ Йәһва үчүн қурбанлиқларни бериң. Йәһвани хурсән қилиш үчүн бизни хошал қилидиған һәммә нәрсиләрдин ваз кечиш шәрт әмәс (Вәз 5:19, 20). Әгәр биз қурбанлиқларни бериштин өзүмизни қачуруп, Йәһваға көпирәк хизмәт қилишини арқиға сүрсәк, Әйсаниң тәмсилидики бир кишигә охшаш хаталиқни өткүзүшимиз мүмкин. Шу киши раһәт-парағәт турмуш кәчүрүп, Худаға сәл қариған (Луқа 12:16—21ни оқуң). Францияда яшайдиған Кристиан исимлиқ бурадәр шундақ дәйду: «Мән көпирәк вақтимни вә күчимни Йәһваға вә аиләмгә сәрип қилмиған едим». У аяли билән пионер хизмитини башлашни қарар қилған. Шу мәхситигә етиш үчүн улар өз иш орнини ташлиған. Җенини беқиш үчүн өйләрни вә ишханиларни тазилиған вә бариға қанаәт қилишни үгәнгән. Улар һаятида бәзи қолай шараиттин ваз кечип, пионерлиқ хизмәтни башлиғанлиқтин хошаллиқ тапалиғанму? Кристиан шундақ дәйду: «Һазир биз вәз хизмитимиздин қанаәт тапимиз. Муқәддәс китапни үгиниватқанларниң вә қайта йолуқушларниң Йәһва һәққидә билим алғанлирини көрүп, қәлбимиз хошаллиқа толди».

17. Немә үчүн йеңи усулда вәз қилишни синап беқиш қийин болуши мүмкин?

 ¹⁷ Вәз хизмәтниң йеңи усуллирини синап көрүшкә тәйяр туруң (Әлч. 17:16, 17; 20:20, 21). Америкидики Ширли исимлиқ пионерға таҗсиман вирус (COVID-19) мәзгилидә вәз қилиш усулини өзгәртишкә тоғра кәлгән. Дәсләптә у телефон арқилиқ гувалиқ беришни синап беқиштин иккилинип қалған. Амма наһийилик назарәтчиниң зиярәт мәзгилидә телефон арқилиқ қандақ вәз қилишни үгәнгән. Кейин у давамлиқ шу усулни қоллинип гувалиқ беришкә башлиған. «Дәсләптә бәк қорққан едим. Һазир шу усулда вәз қилишни яхши көримән. Илгирикидәк өйиму-өй вәз қилғанға қариғанда, һазир биз көпирәк адәмләр билән сөһбәтлишәләймиз»,— дәйду Ширли.

18. Вәз хизмитимизни кәңәйтишкә тиришқанда қийинчилиқларға дуч кәлсәк, бизгә немә ярдәм берәләйду?

¹⁸ Бир мәхсәтни қоюп, униңға етишкә тиришиң. Биз қийинчилиқларға дуч кәлгәндә, ярдәм үчүн дуа қилимиз вә шу қийинчилиқларға қандақ тәқабил туруш һәққидә әстаидил ойлинимиз (Пәнд н. 3:21). Европидики сиган тилидики топида пионерлиқ қиливатқан Сония мундақ дәйду: «Мән мәхсәтлиримни қәғәзгә йезишни яхши көримән вә уларни көзүмгә көрүнүп турудиған җайға қоюп қойимән. Үстилимниң үстигә охшимайдиған йөнилиштә башлайдиған йолни сизип қойимән. Һәр қетим қарар чиқарғанда, мән шу йол бәлгүлиригә қарап, қайси йолда меңишни қарар қилсам, мәхситимгә йетишкә ярдәм берәләйдиған яки берәлмәйдиғанлиғи һәққидә ойлинимән». Сония қийинчилиқларға дуч кәлгәндә, иҗабий көзқарашни сақлашқа тиришиду. У мундақ дәйду: «Һәр қетим йеңи вәзийәткә дуч кәлгәндә, бу маңа тамдәк тосақ боламду яки көрүктәк ярдәм берәләмду? Бу болса, вәзийәткә қандақ көзқарашта болушумға бағлиқ».

19. Йәһва ериштүргән бәрикәтләргә миннәтдарлиғимизни билдүрүш үчүн немә қилалаймиз?

¹⁹ Йәһва бизни түрлүк усуллар билән бәрикәтләйду. Уни мәдһийиләш үчүн қолумиздин келишичә һәммини қилиш арқилиқ, Униң бәрикәтлиригә қанчилик миннәтдар екәнлигимизни көрситиләймиз (Ибр. 13:15). Вәз хизмитимизни кеңәйтиш үчүн йеңи усуллар үстидә издәнсәк, Йәһваниң техиму көп бәрикәтлиригә еришимиз. Һәр күни Йәһваниң яхшилиғини тетиш вә көрүшниң йоллирини издәйли. Шундила, биз Әйсаға охшаш мону сөзләрни қилалаймиз: «Мениң тамиғим — мени Әвәткүчиниң ирадисини әмәлгә ашуруш вә Униң маңа тапшурған ишини тамамлаш» (Йоһ. 4:34).