1. Нурғунлиған яшлар аллиқачан немә иш қилған?

 ҺӘР ЖИЛИ миңлиған яшлар чөмдүрүлүштин өтүватиду. Сизму шуларниң арисидиму? Әгәр шундақ болса, етиқатчи қериндашлириңиз вә Йәһва Худа сиз үчүн интайин хошал (Пәнд н. 27:11). Өзүңизниң қандақ яхши ишларни қилғанлиғиңиз һәққидә бираз ойлинип көрүң. Бәлким, бирқанчә жил тиришип, Муқәддәс китапни тәтқиқ қилип үгиниш җәриянида Муқәддәс китапниң Худа Сөзи екәнлигигә қайил болдиңиз. Униңдин башқа, бу китапниң Муәллипини тонуп, Униңға болған сөйгү-муһәббитиңиз ашти. Йәһва Худаға болған сөйгү-муһәббитиңиз барғансири чоңқурлишип, һазир болса өзүңизни Униңға атап, чөмдүрүлгән Йәһва гувачиси болдиңиз. Көрсәткән тиришчанлиғиңизни һәқиқәтән махташқа болиду!

2. Бу мақалидә немә һәққидә муһакимә қилимиз?

 ² Шәк-шүбһисизки, чөмдүрүлгәнгә қәдәр етиқатта түрлүк синақларға дуч кәлдиңиз. Бирақ йешиңизниң чоңийишиға әгишип, йәнә йеңи синақларға дуч келисиз. Шәйтан һәртүрлүк йоллар билән сизни Йәһвани сөйүшни вә Униңға хизмәт қилишни тохтитишқа уруниду (Әфәс. 4:14). Буниңға һәргиз йол қоймаң. Йәһваға садиқ қелип, өзүңизни Униңға беғишлиғанда бәргән вәдиңизни орунлаш үчүн немә қилалайсиз? Сиз чоқум давамлиқ иман-етиқатта «пишип-йетилиш» үчүн тиришишиңиз керәк (Ибр. 6:1). Иман-етиқатта пишип йетилиш үчүн немә қилалайсиз?

3. Чөмдүрүлгәндин кейин барлиқ Мәсиһ әгәшкүчилири чоқум немә қилиши керәк?

³ Суға чөмдүрүлгәндин кейин һәммимиз әлчи Паулниң Әфәстики етиқатчиларға бәргән нәсиһәт сөзлиригә қулақ селишимиз зөрүр. У уларни пишип-йетилгән етиқатчи болушқа дәвәт қилған (Әфәс. 4:13). Башқичә ейтқанда, давамлиқ  алға илгириләшкә үндигән. Паул роһий җәһәттин өсүшни кичик балиниң җисманий җәһәттин өсүши билән селиштурғанда немә демәкчи болғанлиғини чүшинәләймиз. Йеңи бовақ туғулғанда ата-аниси уни интайин яхши көриду вә униңдин пәхирлиниду. Бирақ у мәңгү бовақ һалитидә қалмайду, вақти кәлгәндә у балилиғини ташлиши керәк (Кор. 1-х. 13:11). Мәсиһ әгәшкүчилириму дәл мошуниңға охшаш, чөмдүрүлгәндин кейин чоқум давамлиқ алға илгирилиши керәк. Шундақ қилишимизға ярдәм берәләйдиған бәзи тәклип-пикирләрни бирликтә муһакимә қилип бақайли.

4. Роһий җәһәттин алға илгирилишиңизгә немә ярдәм берәләйду? (Филипиликләргә 1:9)

⁴ Йәһва Худаға болған сөйгү-муһәббитиңизни күчәйтиң. Сиз аллиқачан Йәһвани интайин яхши көрисиз. Бирақ Униңға болған сөйгү-муһәббитиңизни техиму күчәйтәләйсиз. Қандақ? Әлчи Паул шундақ қилишниң бир йолини Филипиликләргә 1:9-айәттә көрситип өткән (Оқуң). Паул филипиликләрниң меһир-муһәббитиниң техиму өсүши үчүн дуа қилған еди. Демәк, биз Йәһваға болған сөйгү-муһәббитимизни күчәйтәләймиз. Тоғра билим вә даналиғимизни ашуруш арқилиқ сөйгү муһәббитимизни күчәйтәләймиз. Биз Йәһва Худа һәққидә көпирәк билгәнсири, Уни техиму сөйүмиз вә Униң пәзилити вә иш қилиш усуллирини техиму яхширақ чүшинимиз. Уни хурсән қилиш арзу-истигимиз ашқансири, Униң көңлини ағритидиған һәрқандақ ишларни қилиштин жирақ туримиз. Биз Униң ирадисини чүшинишкә вә униңға мас иш-һәрикәт қилишқа тиришимиз.

5, 6. Йәһва Худаға болған сөйгү-муһәббитимизни қандақ күчәйтәләймиз? Чүшәндүрүп бериң.

⁵ Әйса Мәсиһ Яратқучи Йәһваниң сүпәтлирини мукәммәл үлгә қилған. Шуңа биз Әйса һәққидә яхширақ билим алсақ, Йәһва Худаға болған сөйгү-муһәббитимиз техиму күчийиду (Ибр. 1:3). Әйса билән тонушушниң әң яхши усули — төрт хуш хәвәр китавини тәтқиқ қилиш. Әгәр һәр күни Муқәддәс китапни оқушни техи күндилик адәткә айландурмиған болсиңиз, Әйса Мәсиһ тоғрисидики баянларни оқуштин башлисиңиз болиду. Әйса һәққидә оқуғиниңизда, униң пәзиләтлиригә алаһидә диққәт ағдуруң. Униңға йеқинлишиш интайин асан еди. У меһрибанлиқ билән кичик балиларни қучиғиға алатти (Марк 10:13—16). У меһрибан вә достанә болғачқа, униң әгәшкүчилири бемалал өз һис-туйғулири вә ой-пикирлирини униңға ейталиған (Мәт. 16:22). Әйса мошу тәрәптә асмандики Атисини үлгә қилған. Йәһва Худағиму йеқинлишиш интайин асан. Биз дуа арқилиқ Униңға йеқинлишип өз ой-пикир вә һис-туйғулиримизни Йәһваға йетип берәләймиз. Биз шуниңға ишинимизки, У бизни әйиплимәйду. Әксичә, У бизни сөйиду вә ғәмхорлуқ қилиду (Пет. 1-х. 5:7).

⁶ Әйса кишиләргә һисдашлиқ қилған. Әлчи Мәтта мундақ дәйду: «Көплигән адәмләрни көрүп, уларға ичи ағриди, чүнки улар падичисиз қалған қойлардәк қийнилип һәм тарилип кәткән еди» (Мәт. 9:36). Йәһва Худаниң қандақ һис-туйғуда болғанлиғини Әйса мону сөзләр билән ипадилигән: «Шундақла асмандики Атамму мошу әрзимәсләрниң бирәрсиниң һалак болушини халимайду» (Мәт. 18:14). Мошу сөзләр бизни интайин хошал қилиду! Чүнки Йәһваниң бизни бәкму сөйидиғанлиғини көрситиду. Әйсани техиму яхширақ тонуғансири, Йәһваға болған сөйгү-муһәббитимиз күчийиду.

7. Пишип йетилгән етиқатчилар билән вақит өткүзүш сизгә қандақ ярдәм берәләйду?

⁷ Йәнә җамаәттики пишип йетилгән етиқатчилар билән тонушуш арқилиқ техиму көйүмчан вә роһий җәһәттин өсүп йетилгән Худа хизмәтчиси болушни үгинәләйсиз. Уларниң қанчилик хошал екәнлигигә диққәт қилиң. Улар һечқачан Йәһва Худаға хизмәт қилиш қараридин пушайман қилмайду. Улардин Йәһваға қилған хизмитидә баштин кәчүргән  бәзи кәчүрмишләрни сөзләп беришни сораң. Муһим қарарни чиқарғиниңизда, улардин мәслиһәт сораң. Муқәддәс китап: «Көп мәслиһәтчиләр болған йәрдә ават-муваппәқийәт йүз бериду»,— дәйду (Пәнд н. 11:14).

8. Муқәддәс китапниң тәлимлиридин гуманлансиңиз немә қилсиңиз болиду?

⁸ Гуманлириңизни йеңиң.  Иккинчи абзацта тилға елип өткәндәк, Шәйтан роһий җәһәттин алға илгирилишиңизгә тосқунлуқ қилишқа уруниду. Униң бундақ қилиш йоллиридин бири — Муқәддәс китаптин үгәнгән бәзи тәлимләр һәққидә ой-пикриңиздә гуман пәйдә қилиш. Мәсилән, һазир яки кейинирәк болсун, Яратқучиға һөрмәтсизлик қилидиған тәдриҗий тәрәққият нәзәрийиси билән учришисиз. Кичик чағлириңизда бу мавзу һәққидә ойлинип бақмиған яки интайин аз ойланған болушиңиз мүмкин. Амма һазир сәл чоң болғанда, бәлким, мәктәптики мошу мавзу һәққидики дәристә оқутқучилириңизниң тәдриҗий тәрәққият нәзәрийисини қоллайдиған сөзлири мәнтиқийгә уйғун вә интайин қайил қиларлиқ көрүнүши мүмкин. Бирақ улар бәлким, Яратқучиниң мәвҗутлиғи һәққидики дәлил-испат үстидә әстаидил ойлинип көрмигән болуши мүмкин. Пәнд-нәсиһәтләр 18:17-айәттики «Ким сотта биринчи сөзлисә, у һәқтәк көрүниду, лекин униң риқабәтчиси кәлгәндә, шу чағда һәқлиги пайлиниду» дегән принципни әстин чиқармаң. Мәктәптә аңлиған көзқарашларни қарғуларчә қобул қилишниң орниға, Худа сөзи болған Муқәддәс китаптики һәқиқәтләр үстидә чоңқур ойлинип, нәшир материаллиримизни оқуп издинип көрүң. Илгири тәдриҗий тәрәққиятқа ишәнгән қериндашлар билән сөһбәтлишиң. Улардин, немә уларни Яратқучиниң барлиғиға қайил қилғанлиғини сораң. Бундақ әһмийәтлик сөһбәтләрни өткүзүш Яратқучиниң мәвҗудлиғи һәққидики дәлил-испатларни тепишиңизға ярдәм берәләйду.

9. Мелиссаниң мисалидин немиләрни үгәндиңиз?

⁹ Мелисса исимлиқ бир қериндаш, өзиниң яритилиш һәққидә елип барған издинишиниң көп пайдисини көргәнлигини ейтқан b. Мәктәптә муәллимләр тәдриҗий тәрәққият нәзәрийисини чүшәндүргәндә, қайил қиларлиқ һалда чүшәндүрәтти. «Мән дәсләптә тәдриҗий тәрәққият нәзәрийиси һәққидә издиништин қорқтум. Чүнки униң раст болушидин әнсирәттим. Бирақ шундақ чоңқур ойландимки, Йәһва Худа бизниң Униңға қарғуларчә ибадәт қилишимизни халимайду. Шуңа чоңқур издинип көрүшкә башлидим. Мән “Яратқучи барму?” (рус) дегән китапни вә “Мәвҗудат  өз-өзидин пәйда болдиму?” (рус) “Мәвҗудатниң мәнбәси. Бәш муһим соал” (рус) дегән китапчиларни оқуп чиқтим. Мән дәл буниңға еһтияҗлиқ едим. Бәк әпсус, немишкә мән балдурирақ башлимиғандимән».

10, 11. Әхлақий җәһәттин пак болушиңизға немә ярдәм берәләйду? (Салоникилиқларға 1-хәт 4:3, 4)

¹⁰ Хата иш-һәрикәтләрни рәт қилиң. Яшлиқ дәвриңиздә җинсий алақә қилиш арзу-истигиңиз күчийип, бәзидә башқилар сизни җинсий алақидә болушқа қайил қилишқа урунуши мүмкин. Шәйтан сизниң дәл шундақ арзу-истәк бойичә иш қилишиңизни халайду. Әхлақий җәһәттин пак болушиңизға немә ярдәм берәләйду? (Салоникилиқларға 1-хәт 4:3, 4 оқуң). Шәхсий дуалириңизда Йәһваға өз һис-туйғулириңизни ейтип, Униңдин күч сораң (Мәт. 6:13). Шуни әстә сақлаңки, Йәһва Худа сизни әйипләшни әмәс, бәлким сизгә ярдәм беришни халайду (Зәб. 103:13, 14). Униңдин башқа, Муқәддәс китап сизгә ярдәм берәләйду. Илгири тилға алған Мелисса, өзиниң напак ой-хиялларға қандақ қарши турғанлиғи һәққидә мундақ дәйду: «Һәр күни Муқәддәс китапни оқуш маңа напак ойлар билән күрәш қилишқа ярдәм бәрди. Өзүмниң Йәһваға тәвә болуп, Униң хизмәтчиси екәнлигимни әскәртип турди» (Зәб. 119:9).

¹¹ Өз қийинчилиқлириңизни ялғуз бетәрәп қилишқа урунмаң. Ата-аниңиз билән қийинчилиғиңиз тоғрисида сөһбәтлишиң. Әлвәттә, улар билән бундақ шәхсий ишлар тоғрисида параңлишиш асан әмәс. Амма бундақ қилиш наһайити муһим. Мелисса мундақ дәйду: «Мән җасарәт сорап, дуа қилдим, андин дадам билән өз қийинчилиғим тоғрисида параңлаштим. Шуниңдин кейин өзүмни интайин йәңгилләп қалғандәк һис қилдим. Йәһваниң мәндин пәхирләнгәнлигини билимән».

12. Тоғра қарарларни чиқиришиңизға немә ярдәм бериду?

¹² Муқәддәс китап принциплири бойичә яшаң. Йешиңизниң чоңийишиға әгишип, нурғун ишларда өзүңизниң шәхсән қарар чиқиришиға тоғра келиду. Амма сизниң турмуштики тәҗрибиңиз йәнила чәклик. Йәһва Худа билән болған достлуғиңизға тәсир йәткүзидиған хаталиқни өткүзүп қоюштин қандақ сақлиналайсиз? (Пәнд н. 22:3) Кари исимлиқ бир қериндаш, өзиниң техиму яхширақ қарар чиқиришиға немә ярдәм бәргәнлигини чүшәндүргән. У пишип йетилгән етиқатчиларниң һәрбир вәзийәт үчүн қанун-қаидиләргә муһтаҗ болмайдиғанлиғини тонуп йәткән еди. У шундақ дәйду: «Мән пәқәт қанун-қаидиләргә әгишиш әмәс, бәлки Худаниң шу вәзийәткә қандақ көзқарашта болидиғанлиғини чүшинишим керәк еди». Муқәддәс китапни оқуғанда өз-өзүңиздин мундақ сорап көрүң: «Бу үзүндә маңа Йәһваниң көзқариши һәққидә немиләрни ейтип бериду? Оқуғанлиримдин тоғра иш қилишимға ярдәм беридиған қандақ принципларни тапалаймән? Шу принципларни әмәлий қоллансам қандақ пайдисини көрүмән?» (Зәб. 19:7; Йәшая 48:17, 18) Муқәддәс китапни оқуш вә униңдики принциплар һәққидә чоңқур ойлиниш арқилиқ Йәһва Худани хурсән қилидиған қарарларни чиқириш сиз үчүн асан болиду. Давамлиқ алға илгириливатқанда, һәрбир вәзийәт үчүн қанун-қаидигә муһтаҗ әмәслигиңизни көрүп йетисиз, чүнки Йәһваниң шу вәзийәткә болған көзқаришини чүшинисиз.

13. Яхши достлар сизгә қандақ ярдәм берәләйду? (Пәнд-нәсиһәтләр 13:20)

¹³ Йәһва Худани сөйидиғанларни дост тутуң. Жуқурида тилға елип кәткәндәк, достлириңиз иман-етиқатта пишип йетилишиңизгә ярдәм берәләйду (Пәнд-нәсиһәтләр 13:20, оқуң). Хошаллиғини йоқитип қойған Сара исимлиқ бир қериндашниң қайта хошаллиққа еришишигә достлири ярдәм бәргән. У мундақ дәйду: «Дәл муһтаҗ болған вақтимда, яхши достларни таптим. Бир яш қериндаш билән һәр һәптә җәм болуп, “Күзитиш мунарини”  үгәндуқ. Йәнә бир достум, җамаәт жиғилишлирида қол көтирип ой-пикирләрни баян қилишимға ярдәм бәрди. Достлиримниң тәсиридә мән әстаидил, шәхсий үгиниш вә дуа қилишқа башлидим. Нәтиҗидә, Йәһва Худа билән болған достлуқ мунасивитим техиму күчийип, қайта хошаллиқни һис қилишқа башлидим».

14. Джулиен яхши достларни тепиш үчүн немә қилған?

¹⁴ Сизгә яхши тәсир көрситидиған кишиләр билән дост болуш үчүн немә қилалайсиз? Һазир ақсақал болуп хизмәт қиливатқан Джулиен мундақ дәйду: «Яширақ вақтимда, вәз хизмәткә биллә чиққанлар билән йеқин достлуқ орнаттим. Бу достлар интайин қизғин еди. Улар маңа вәз хизмәтниң нәқәдәр хошаллиқ елип келәләйдиғанлиғини көрүшүмгә ярдәм бәрди. Мән толуқ вақит хизмәт қилиш үчүн мәхсәтләрни қоюшқа башлидим. Мениң көпирәк яхши достлиримниң болмиғанлиғиниң бир сәвәви — пәқәт тәң яштикиләр билән арилашқан едим. Кейин Бәйтәлдикиләр арисидинму яхши достларни таптим. Уларниң үлгилири қандақ оюн-тамашиларни таллишимға вә Йәһва Худаға техиму йеқинлишишимға ярдәм бәрди».

15. Әлчи Паул Тимотийни қандақ агаһландурған? (Тимотийға 2-хәт 2:20—22)

¹⁵ Әгәр җамаәттики бири билән арилишиш сизниң Йәһва Худа билән болған достлуғиңизға яман тәсир йәткүзидиғанлиғини һис қилсиңиз, немә қилсиңиз болиду? Әлчи Паул биринчи әсирдики җамаәттә бәзи кишиләрниң Мәсиһ әгәшкүчилиригә хас көзқараш вә иш-һәрикәттә болмайватқанлиғини билгәчкә, Тимотийни агаһландуруп, улардин жирақ турушни ейтқан (Тимотийға 2-хәт 2:20—22, оқуң). Биз Йәһва Худа билән болған достлуқ мунасивитимизни қәдирләймиз. Шуңа һечкимниң асмандики Атимиз билән орнатқан достлуқ риштимизни аҗизлаштурушиға йол қоймаймиз (Зәб. 26:4).

16. Қандақ мәхсәтләрни қойсиңиз болиду?

¹⁶ Пайдилиқ мәхсәтләрни қоюң. Етиқадиңизни күчәйтип, техиму пишип йетилгән етиқатчи болушиңизға ярдәм беридиған мәхсәтләрни таллаң (Әфәс. 3:16). Мәсилән, шәхсий тәтқиқ үгиниши вә Муқәддәс китап оқуш адитиңизни яхшилашни қарар қилсиңиз болиду (Зәб. 1:2, 3). Дуалириңизниң сүпитини  яхшилап, пат-пат чиң қәлбиңиздин Йәһва Худаға дуа қилсиңиз болиду. Яки болмиса, көңүл ечишни таллаш вә вақтиңиздин үнүмлүк пайдилиниш үчүн техиму еһтиятчан болушиңизға тоғра келиши мүмкин (Әфәс. 5:15, 16). Йәһва алға илгириләш үчүн көп тиришиватқанлиғиңизни көрсә, интайин хошал болиду.

17. Башқиларға ярдәм беришниң өзүңиз үчүн қандақ пайдиси бар?

¹⁷ Башқиларға ярдәм бериш, иман-етиқатта пишип йетилишиңизгә ярдәм берәләйду. Әйса Мәсиһ мундақ дегән: «Елиштин көрә бериш бәхитлигирәк» (Әлч. 20:35). Яшлиғиңизда, өз күчиңизни вә вақтиңизни ишлитип, башқиларға ярдәм бәрсиңиз, хошал-хорамлиққа еришисиз. Мәсилән, яшанғанларға вә җамаәттики тени аҗизларға ярдәм қилиштәк мәхсәтләрни қойсиңиз болиду. Бәлким, уларниң өй ишлириға янфон яки компьютерни ишлитишни үгинишигә ярдәм берәләйсиз. Әгәр бурадәр болсиңиз, хизмәт ярдәмчиси болуш үчүн мәхсәтләрни қоюң. Шу арқилиқ техиму көпирәк қериндашларға ярдәм берәләйсиз (Флп. 2:4). Сиз йәнә адәмләргә Падишалиқ хуш хәвәрни вәз қилиш арқилиқ уларға болған меһир-муһәббитиңизни көрситәләйсиз (Мәт. 9:36, 37). Әгәр мүмкинчилигиңиз болса, толуқ вақит хизмәт қилиш үчүн мәхсәтләрни қоюшқа тиришиң.

18. Пионерлиқ хизмәт Йәһваға йеқинлишишиңизға қандақ ярдәм бериду?

¹⁸ Толуқ вақитлиқ хизмәт қилиш роһий җәһәттин пишип йетилишиңизгә йол ачиду. Пионерлиқ хизмәт Падишалиқ вәз ейтқучилири үчүн мәктәптә оқушиңизға мүмкинчилик бериду. Униңдин башқа, Бәйтәлдә хизмәт қилалайсиз яки Ибадәт өйлириниң қурулушиға қатнишалайсиз. Пионер болуп хизмәт қилидиған Кейтлин исимлиқ яш қериндаш мундақ дәйду: «Роһий җәһәттин пишип йетилгән қериндашлар билән вәз қилиш, чөмдүрүлгәндин кейин Йәһваға техиму йеқинлишишимға ярдәм бәрди. Уларниң үлгилири мени Муқәддәс китапни чоңқурирақ тәтқиқ қилип тәлим бериш маһаритимни ашурушқа дәвәт қилди».

19. Роһий җәһәттин йетилгәнсири, қандақ бәрикәтләргә еришисиз?

¹⁹ Роһий җәһәттин йетилгәнсири, нурғун бәрикәтләргә еришисиз. Яш чеғиңиздики күчиңизни пайдисиз мәхсәтләргә исрап қилмайсиз (Йоһ. 1-х. 2:17). Шундақла, яман қарарларни чиқирип, аччиқ азап-оқубәтни көрмәйсиз. Әксичә, һәқиқий хошаллиқ вә мувәппәқийәткә еришисиз (Пәнд н. 16:3). Сизниң яхши үлгиңиз һәм яш, һәм яшанған қериндашларни илһамландуриду (Тим. 1-х. 4:12). Әң муһими, Йәһва Худаниң көңлини хошал қилиш вә Униң билән йеқин достлуқ мунасивәттә болуштин келидиған тинч-хатирҗәмлик вә қанаәтни һис қилисиз (Пәнд н. 23:15, 16).