1. Йәһва бизниң қайси тәрәплиримизгә нәзәр салиду?

 ЙӘҺВА ХУДА Өз хәлқидин сөйиниду (Зәб. 149:4). Буни билиш кишини бәкму хошал қилиду. Йәһва бизниң яхши пәзиләтлиримизгә нәзәр салиду. У бизниң қандақ адәм болалайдиғанлиғимизни көрәләйду вә Униң дости болушимизға ярдәм берәләйду. Әгәр униңға садиқлиқни сақлисақ, У мәңгү биз билән болиду (Йоһ. 6:44).

2. Йәһваниң уларни сөйидиғанлиғиға ишиниш бәзиләргә немә үчүн қийин?

² Бәзиләр мундақ дәйду: «Мән Йәһваниң Өз хәлқигә бир топ сүпитидә меһир-муһәббәт көрситидиғанлиғини билимән, бирақ мән шәхсән Йәһваниң мени яхши көридиғанлиғиға қандақ ишәнч қилалаймән?» Немә үчүн улар шундақ соал соришиду? Балилиқ чағларда көп қийинчилиқларни баштин өткүзгән Оксана b мундақ дәйду: «Мән чөмдүрүлүштин өтүп, пионер хизмитини башлиғанда, бәкму хошал болған едим. Бирақ 15 жилдин кейин балилиқ чағлиримда баштин өткүзгән қийинчилиқлирим есимгә келип, қайта мени қийнашқа башлиди. Мән һазир Йәһваниң муһәббитидин мәһрум болдум вә У мени сөйүшкә лайиқ әмәсмән, дегән хуласигә кәлдим». Балилиқ чағлирида хошаллиқ тапалмиған Йуа исимлиқ пионер: «Мән һаятимни Йәһваға беғишлидим. Чүнки Уни хурсән қилишни халиған едим. Бирақ Йәһва мени һечқачан сөймәйду, дәп ишәнгән»,— дәйду.

3. Бу мақалидә немә һәққидә муһакимә қилимиз?

³ Худди жуқурида тилға алған етиқатчи қериндашларға охшаш, сизму Йәһвани бәк яхши көрисиз. Амма Униң сизни яхши көридиғанлиғиға гуман қилишиңиз мүмкин. Йәһваниң һәқиқәтән сизгә көңүл бөлидиғанлиғиға немә үчүн ишәнч қилишиңиз керәк. Йәһва мени сөймәйду, дегән сәлбий ой-пикиргә кәлгиниңиздә, сизгә немә ярдәм берәләйду? Мошу соаллар үстидә муһакимә қилайли.

4. Йәһваниң бизгә болған муһәббитидин гуманлиниш немә үчүн хәтәрлик?

⁴ Меһир-муһәббәт — күчлүк бир һәрикәтләндүргүчи күч. Әгәр биз Йәһваниң меһир-муһәббити вә қоллап-қувәтлишигә ишәнсәк, һаятимизда қийинчилиқларниң болушиға қаримай, пүтүн қәлбимиз билән Униңға хизмәт қилишқа һәрикәт қилимиз. Башқичә ейтқанда, әгәр Худаниң сизгә көңүл бөлидиғанлиғиға гуман қилсиңиз, җасаритиңизни йоқутуп аҗиз болисиз (Пәнд н. 24:10). Биз үмүтсизләнгәндә вә Худаниң меһир-муһәббитигә болған ишәнчимизни йоқатқанда, Шәйтанниң һуҗумлириға қарши туралмаймиз (Әфәс. 6:16).

5. Худаниң муһәббитидин гуманланған бәзи қериндашларға немә болған?

⁵ Бүгүнки күндә Худаниң бәзи хизмәтчилири Йәһваниң муһәббити вә ғәмхорлуғидин гуманлинишқа башлап, роһий җәһәттин аҗизлиған. Җеймс исимлик бир ақсақал мундақ дәйду: «Һәтта мән Бәйтәлдә вә чәт әл тили җамаитидә хизмәт қилип, шунчә хошаллиқ тапқан болсамму, Йәһваниң мән бәргән қурбанлиқларни һәқиқәтән қобул қилғанлиғиға гуман қилдим. Ахирида мән һәтта Йәһваниң дуалиримға қулақ салидиғанлиғиға шүбһиләндим». Йәнә бир толуқ вақит хизмәт қиливатқан Ева: «Йәһваниң муһәббитидин гуманлинишниң хәтәрлик екәнлигини тонуп йәттим. Чүнки шундақ қилиш кишини астиға тартип кетидиған қайнамға охшаш. Бу сизниң роһий озуқлуқларға болған иштиһайиңизға тәсир қилип, Йәһваға хизмәт қилиштин тапидиған хошаллиқтин мәһрум қилиду». Пионер болуп хизмәт қилидиған Майкл исимлик ақсақал: «Әгәр Худаниң сизгә ғәмхорлуқ қилидиғанлиғиға ишәнч қилмисиңиз, Униңдин жирақлишип кетисиз»,— дәйду.

6. Көңлүмиздә Худаниң муһәббитигә қарита гуман пәйда болса, чоқум немә иш қилишимиз керәк?

⁶ Жуқуридики бир қанчә мисал сәлбий ой-пикирләрниң роһий җәһәттин қанчилик зиян кәлтүрәләйдиғанлиғини көрситиду. Худаниң муһәббитигә қарита көңлүмиздә гуман пәйда болушқа башлиса, немә иш қилсақ болиду? Дәрһал шундақ ой-пикирни рәт қилишимиз керәк. Шундақ ғәм-тәшвишкә салидиған ой-пикирләрниң орниға, Тәңриниң тинчлиғи жүригиңизни вә әқлиңизни қоғдиши үчүн Йәһвадин ярдәм сораң (Зәб. 139:23; Флп. 4:6, 7). Есиңиздә болсун, ялғуз сизла әмәс башқа етиқатчиларму сәлбий ой-хиялларға қарши күрәш қиливатиду.  Һәтта Йәһваниң қедимқи замандики хизмәтчилириму шуниңға охшаш қийинчилиқларға дуч кәлгән еди. Һазир әлчи Паулниң мисалидин немиләрни үгинәләйдиғанлиғимизни көрүп чиқимиз.

7. Паул қандақ қийинчилиқларға дуч кәлгән?

⁷ Бәзидә үстиңизгә алған вәзипиләр көп болғачқа, һәммисини орунлалмаймән, дәп әнсирәватамсиз? Әгәр шундақ болса, сиз әлчи Паулни яхши чүшинәләйсиз. У пәқәт бирла җамаәт әмәс, бәлки барлиқ җамаәтниң ғемини йегән (Кор. 2-х. 11:23—28). Кона кесилиңиз һәрдайим сизни хошаллиқтин мәһрум қиламду? Паулниң тенигә санчилған тикән давамлиқ уни беарам қилип, униң саламәтлигигә тәсир қилған. У шу тикәнниң тенидин чиқип кетишини бәкму арзу қилған (Кор. 2-х. 12:7—10). Намукәммәл болғанлиқтин бәзидә үмитсизлинәмсиз? Паулму бәзидә шундақ үмүтсизләнгән. У өзиниң намукәммәллиги билән тохтимай күрәш қилғач, өзини «бәхитсиз адәммән», дәгән (Рим. 7:21—24).

8. Паулниң қийинчилиқларға бәрдашлиқ беришигә немә ярдәм бәргән?

⁸ Гәрчә Паул шунчә көп қийинчилиқларға дуч кәлсиму, у Худаға хизмәт қилишни давамлаштурған. Униң шундақ қилишиға немә ярдәм бәргән? Гәрчә у өзиниң намукәммәлигини ениқ билсиму, униң төләмгә болған ишәнчиси тәврәнмигән. Паул Әйсаниң төләм қурбанлиғиға ишәнч бағлиған һәрбир кишиниң мәңгүлүк һаятқа еришидиғанлиғи һәққидә бәргән вәдисини яхши билгән (Йоһ. 3:16; Рим. 6:23). Паул җәзмән әшу төләмгә ишәнч қилғанларниң арисида болған. У һәтта еғир гуна қилип, товва қилғанларни Йәһваниң кәчүрүшигә тәйяр екәнлигигә ишәнгән (Зәб. 86:5).

9. Галатилиқларға 2:20-айәттики Паулниң сөзлиридин немиләрни үгинәләймиз?

⁹ Паул өзини Худаниң яхши көридиғанлиғиға күчлүк ишәнгән. Сәвәви, Худа Әйсани униң үчүн өлүшкә әвәткәнлигини билгән (Галатилиқларға 2:20ни оқуң). Шу айәттики кишигә тәсәлли беридиған сөзләргә диққәт қилиң. Паул Худаниң Оғли «маңа меһир-муһәббәт көрсәткән һәм өзини мениң үчүн бәргән», дегән. У: «Йәһваниң немә үчүн қериндашлиримға меһир-муһәббәт көрсәткәнлигини чүшинимән. Бирақ, Униң мени сөйүши мүмкин әмәс»,— дәйдиған ой-хиял билән Худаниң меһир-муһәббитигә чәк қоймиған. У Римдики етиқатчиларниң есигә селип: «Техи гунакар чеғимизда, Мәсиһ биз үчүн өлди»,— дегән еди (Рим. 5:8). Худаниң муһәббити чәксиздур!

10. Римлиқларға 8:38, 39-айәтләрдин биз немини үгинәләймиз?

 ¹⁰ Римлиқларға 8:38, 39ни оқуң. Паул бизни Худаниң меһир-муһәббитидин һечнәрсә айриветәлмәйду, дәп язған. У Йәһваниң Исраил хәлқигә сәвирчанлиқ билән муамилә қилғанлиғини вә өзигә қандақ меһир-шәпқәт көрсәткәнлигиниму билгән. Паулниң сөзлиридин шундақ хуласә қилалаймиз, Йәһва Өз Оғлини мән үчүн өлүшкә әвәткән болса, Униң муһәббитидин гуман қилишимға йәнә сәвәвим барму? (Рим. 8:32)

11. Гәрчә Тимотийға 1-хәт 1:12—15 айәтләрдә Паулниң өткүзгән гуналири тилға елинған болсиму, немә үчүн у Худаниң өзини сөйидиғанлиғиға ишәнгән?

¹¹ Тимотийға 1-хәт 1:12—15ни оқуң. Паул Әйсаниң әгәшкүчиси болуштин илгири шагиртларға зиянкәшлик қилғанлири һәққидә ойлиғинида, бәлким бәкму азапланған. Демәк униң өзини учиға чиққан гунакар, дәп атиғини һәҗәплинәрлик әмәс. У бир шәһәрдин йәнә бир шәһәргә берип, етиқатчиларға вәһшийләрчә зиянкәшлик қилған. Бәзиләрни түрмигә ташлиған, йәнә бәзилириниң өлтүрүлүшини қоллап-қувәтлигән (Әлч. 26:10, 11). Паул өзи сәвәплик ата-аниси өлтүрүлгән яш етиқатчини көргинидә, көңлиниң қанчилик азапланғанлиғини тәсәввур қилаламсиз. У өзиниң хаталиғи үчүн пушайман қилған болсиму, өтмүшини өзгәртәлмәйдиғанлиғини билгән. У Мәсиһниң өзи үчүн бәргән төлимигә ишәнгәч, мундақ язған: «Амма Рәббимниң мол меһирлиги бойичә мән һазир силәр көрүватқан дәриҗигә йәттим» (Кор. 1-х. 15:3, 10). Биз үчүн қандақ савақ? Сиз чоқум шуниңға ишинишиңиз керәкки, Әйса сиз үчүн өлгән вә сизниң Худа билән йеқин мунасивәт орнитишиңизға йол ачқан (Әлч. 3:19). Йәһва үчүн өтмүштә Йәһва гувачиси болған яки болмиған чағда өткүзгән гуналиримиз әмәс, һазир вә келәчәктә қилидиған ишлиримиз муһим (Йәшая 1:18).

12. Әгәр биз өзүмизни қәдирсиз вә меһир-муһәббәткә лайиқ әмәстәк һис қилсақ, Йоһанниң 1-хети 3:19, 20-айәтләрдики сөзләр бизгә қандақ ярдәм берәләйду?

 ¹² Әйса сизниң гуналириңиз үчүн җенини пида қилғанлиғи һәққидә ойланғиниңизда, өз-өзүңизгә: «Мән өзүмни буниңға лайиқ әмәстәк һис қиливатимән»,— дейишиңиз мүмкин. Немә үчүн сиз шундақ һис-туйғуда болисиз? Намукәммәл жүригимиз бизни қәдирсиз яки меһир-муһәббәткә лайиқ әмәстәк һис қилдуриду (Йоһанниң 1-хети 3:19, 20ни оқуң). Биздә шундақ ой-хиял пәйда болғанда, шуни әстә сақлишимиз керәк: Худа бизниң жүригимиздин улуқтур. Демәк Йәһваниң меһир-муһәббити вә Униң кәчүрүмчанлиғи жүригимизгә мөкүнгән һәрқандақ сәлбий һис-туйғулардин күчлүгирәк. Униң бизни сөйидиғанлиғиға ишинишни үгинишимиз керәк. Буни қилиш үчүн биз чоқум һәрдайим Худа Сөзини тәтқиқ қилишимиз, Униңға дуа қилишимиз, Униң садиқ хизмәтчилири билән йеқин мунасивәттә болушимиз керәк. Шундақ қилиш немә үчүн муһим?

13. Худа Сөзини тәтқиқ қилиш бизгә қандақ ярдәм бериду? (« Худа Сөзи уларға қандақ ярдәм бәргән» намлиқ рамкиға қараң.)

¹³ Һәр күни Худа Сөзини оқуп тәтқиқ қилиш арқилиқ, сиз Йәһваниң есил пәзиләтлирини техиму ениғирақ көрәләйсиз вә Униң сизгә болған чоңқур меһир-муһәббитини һис қилалайсиз. Һәр күни Худа Сөзини мулаһизә қилиш сизгә чоңқур ойлинишиңизға вә ой-пикриңизни түзитишкә ярдәм берәләйду. (Тим. 2-х. 3:16). Өзини қәдирсиз һис қилған Кевин исимлик ақсақал мундақ дәйду: «Зәбур 103-бапни оқуп мулаһизә қилдим. Бу Йәһваниң мән тоғрилиқ зади немә ойлайдиғанлиғини чүшинишимгә вә ой-пикримни түзитишимгә ярдәм бәрди». Жуқурида тилға алған Ева мундақ дәйду: «Мән вақит чиқирип, Йәһваниң көзқарашлири һәққидә мулаһизә қилиш билән бир күнүмни ахирлаштуримән. Бу арқилиқ қәлбим тинч-хатирҗәмликкә еришип, иман-етиқадим күчийиду».

14. Дуа бизгә қандақ ярдәм берәләйду?

¹⁴ Үзлүксиз дуа қилиш (Сал. 1-х. 5:17). Бир киши билән йеқин дост болуш үчүн пат-пат униң билән муңдишип, өз һис-туйғулириңизни ейтип беришиңиз керәк. Йәһва билән дост болушму шуниңға охшаш. Өзүмизниң һис-туйғулири, ой-пикирлири, ғәм-әндишилирини дуа арқилиқ Униңға ейтип бәргәндә, Йәһваға ишинидиғанлиғимизни вә Униң бизни сөйидиғанлиғини билидиғанлиғимизни көрситәләймиз (Зәб. 94:17—19; Йоһ. 1-х. 5:14, 15). Жуқурида тилға елинған Ева мундақ дәйду: «Дуа қилғинимда мән пәқәт өзүмниң шу күни немә ишқа йолуққанлиғимни ейтипла қалмай, һис-туйғулиримни чүшиниш үчүн ич бағримни Йәһваға төкүп беримән. Мән аста-аста Йәһвани худди бир ширкәтниң баш хоҗайинидәк  әмәс, бәлки өз пәрзәнтлирини сөйидиған һәқиқий бир Атидәк тонуп йәттим» («Сиз оқуп баққанму?» дегән рамкиға қараң.).

15. Йәһва шәхсән һәрбиримизгә көңүл бөлгәнлигини қандақ көрситиду?

¹⁵ Садиқ достлар билән алақә қилиң. Достлар Йәһвадин кәлгән һәдийә (Яқуп 1:17). Асмандики Атимиз бизгә һәрдайим меһир-муһәббәт көрситидиған җамаәттики етиқатчи қериндашлиримизни соға қилған (Пәнд н. 17:17). Колосилиқларға язған хетидә Паул бәзи етиқатчиларниң униңға ярдәм бәргәнлигини тилға елип, уларни тәсәллиниң мәнбәси, дәп атиған (Кол. 4:10, 11). Һәтта Әйса Мәсиһ достлириниң яр-йөләк болушиға муһтаҗ болған вә пәриштиләр вә инсанлар арисидики достлириниң қоллишиға еришкәндә, миннәтдарлиғини билдүргән (Луқа 22:28, 43).

16. Садиқ достлиримиз Йәһваға йеқинлишишимизға қандақ ярдәм берәләйду?

¹⁶ Йәһва соға қилған садиқ достларниң ярдимини қобул қилишни халамсиз? Ғәм-тәшвишлиримизни етиқатта йетилгән достумизға ейтиш, бу бизниң аҗиз екәнлигимизни билдүрмәйду. Әксинчә бизни һимайә қилиду. Жуқурида тилға елинған Джеймс мундақ дәйду: «Иман-етиқатта йетилгән етиқатчилар билән достлуқ орнутуш маңа көп ярдәм қилди. Сәлбий ой-пикирләр мени қийниғанда, әшу қәдирлик достлирим сәвирчанлиқ билән сөзлиримгә қулақ салди вә өзлириниң мени яхши көридиғанлиғини ейтти. Шулар арқилиқ мән Йәһваниң шәхсән маңа болған сөйгү-муһәббити вә ғәмхорлуғини һис қилдим». Етиқатчи қериндашлиримиз билән йеқин достлуқни йетилдүрүш вә уни сақлаш һәқиқәтән бәк муһим!

17, 18. Биз чоқум кимгә ишинишимиз керәк вә немә үчүн?

¹⁷ Биз давамлиқ тоғра иш қилиш үчүн тиришимиз. Бирақ Шәйтан бизниң тоғра иш қилиштин ваз кечишимизни вә Йәһва бизни сөймәйду, Униң қутқузишиға биз лайиқ әмәс, дегәнләргә ишинишимизни халайду. Жуқурида көрүп өткәндәк, бу қип-қизил бир ялғанчилиқ.

¹⁸ Худа сизни сөйиду. Униң көз алдида сиз бебаһа бир ғәзнигә охшаш. Әгәр Униңға бойсунсиңиз, худди Әйса Мәсиһкә охшаш өзүңизни Худаниң меһир-муһәббитидә сақлайсиз (Йоһ. 15:10). Шәйтанға вә өзүңизниң алдамчи жүригиңизгә ишәнмәң. Әксинчә бизниң яхши тәриплиримизни көридиған Йәһва Худаға ишиниң. У сизниму өз ичигә алған барлиқ хәлқини сөйидиғанлиғиға қәтъий ишиниң!