1, 2. Әйсаниң изидин әгишип меңиш үчүн немә қилалаймиз? Қайси мисал буни чүшинишимизгә ярдәм бериду?

 ӨЗҮҢИЗНИ бир группа кишиләр билән хәтәрлик қелин қарлар қаплиған далада кетиватисиз, дәп тәсәввур қилиң. Силәрни тәҗрибилик бир йолбашчи йетәкләп кетиватиду. У алдиңларда кетиватқинида юмшақ қарлар үстидә аяқ излирини қалдурмақта. Бир вақитқа кәлгәндә, силәр йол башлиғучини көрәлмәй қалдиңлар. Бирақ, силәр һодуқуп кәтмидиңлар. Әксинчә сиз вә бирликтә сәпәр қилғучилар илаҗиниң баричә, йолбашчи қалдурған аяқ изидин меңишқа тиришисиләр.

² Бүгүн биз яшаватқан бу рәзил дуния худди жуқурида тилға алған хәтәрлик далаға охшайду. Әйсаниң һәқиқий әгәшкүчилири болса, сәпәр қиливатқан әшу бир группа кишиләргә охшаш. Бәхтимизгә яриша, Йәһва мукәммәл йол башлуғучи, йәни Өз Оғли Әйса Мәсиһни бәргән. Биз униң қалдурған изидин әгишип маңалаймиз (Пет. 1-х. 2:21). Муқәддәс китаптики бир изаһәткә асасланғанда, Петрус бу йәрдә Әйсани бир йолбашчи билән селиштурған. Худди далада излирини қалдурған йол башлуғучиға охшаш, Әйсаму бизниң әгишишимиз үчүн излирини қалдурған. Униң изидин әгишип меңиш үчүн төвәндики үч соални көрүп чиқайли: Немә? Немә үчүн? вә Қандақ?

3. Бирсиниң аяқ изидин әгишип меңиш дегинимиз немини билдүриду?

³ Бирсиниң изидин әгишип меңиш дегән немини билдүриду? Муқәддәс китапта «жүрүш» яки «қәдәм» дегән сөзләр, бәзидә кишиләрниң һаят кәчүрүш тәрзини көрситиду (Ярит. 6:9; Пәнд н. 4:26). Мәсилән, бир кишиниң һаят кәчүрүш тәрзини, киши маңғанда қалдурған аяқ изи яки қәдәмлири билән селиштурушқа болиду. Демәк, бирсиниң аяқ изидин әгишип меңиш дегинимиз, у кишиниң қалдурған үлгилиригә әгишишни көрситиду.

4. Әйсаниң изидин әгишип меңиш дегән немини билдүриду?

 ⁴ Ундақта, Әйсаниң изидин әгишип меңиш дегән немини билдүриду? Қисқичә ейтсақ, бу Әйсани үлгә қилишни билдүриду. Мақалидики асасий айәттә әлчи Петрус Әйсаниң азап-оқубәтләргә бәрдашлиқ бериштә қалдурған үлгилири һәққидә ениқ сөзлигән (Пет. 1-х. 2:18—25). Һәқиқәтән Әйсаниң пүткүл һаят тәрзи, йәни униң ейтқанлири вә қилған ишлири әгишип меңишимиз үчүн бир яхши үлгә.

5. Намукәммәл инсанлар һәқиқәтән Әйсаниң қалдурған мукәммәл үлгисигә әгишәләмду? Чүшәндүрүп бериң.

⁵ Бирақ биз намукәммәл инсанлар һәқиқәтән Әйсаниң изидин маңалаймизму? Әлвәттә маңалаймиз. Петрус бизни Әйсаниң изидин мукәммәл меңишқа әмәс, бәлки тиришчанлиқ билән бизни униң изидин илаҗимизниң баричә әгишип меңишқа дәвәт қилған. Әгәр еһтиятчанлиқ билән униң изидин әгишип маңсақ, биз намукәммәл болсақму мүмкинқәдәр әң яхшисини қилалаймиз. Шундила әлчи Йоһанниң «Әйса қилғандәк иш қилиши лазим», дегән сөзлиригә қулақ салалаймиз (Йоһ. 1-х. 2:6).

6, 7. Немә үчүн Әйсаниң изидин әгишип меңиш бизни Йәһваға йеқинлаштуриду дәймиз?

⁶ Йәһва Худаниң йеқин дости болалаймиз. Немә үчүн шундақ дейишкә болиду? Биринчи, Худани хуш қилидиған усулда һаят кәчүрүп, Әйса бизгә әң яхши үлгә қалдурған (Йоһ. 8:29). Шуңа униң изидин меңип, Йәһва Худани хошал қилалаймиз. Бизму шуниңға ишәнч қилалаймизки, асмандики Атимиз Униң билән дост болуш үчүн тиришчанлиқ көрсәткәнләргә йеқинлишиду (Яқуп 4:8).

⁷ Иккинчи, Әйса өз Атисини мукәммәл үлгә қилған. Шуңа у мундақ дәп ейталиған: «Мени көргән киши Атамниму көргән болиду» (Йоһ. 14:9). Әйсаниң пәзиләтлири вә башқиларға қилған муамилилирини  үлгә қилалаймиз. Мәсилән, у махав кесили болған бир адәмгә ич ағритқан, еғир ағриққа гириптар болған аялға һисдашлиқ қилған вә йеқин кишисидин айрилғанларға көңүл бөлгән. Биз Әйсани үлгә қилсақ, Йәһва Худани үлгә қилған болимиз (Марк 1:40, 41; 5:25—34; Йоһ. 11:33—35). Биз Худаниң пәзиләтлирини йетилдүргәнсири, Униңға охшаш болуп, Униңға техиму йеқинлишимиз.

8. Немә үчүн Әйсаға әгишип меңиш мошу дунияни йеңишимизға ярдәм бериду? Чүшәндүрүң.

⁸ Йәһваға хизмәт қилишимизға бу дунияниң тосқунлуқ қилишиға йол бәрмәймиз. Әйса йәр йүзидики һаятиниң әң ахирқи кечиси: «Мән дунияни йәңдим»,— дегән (Йоһ. 16:33). У немә демәкчи болған? У бу дунияниң адәмлириниң иш-һәрикәтлири, ой-пикирлири вә мәхсәтлириниң өзигә тәсир қилишиға йол бәрмигән. Әйса өзиниң Йәһваниң исмини улуқлаш үчүн йәр йүзигә әвәтилгәнлигини унтуп қалмиған. Шуңа у һаятида мошу хизмәткә пүтүн диққитини ағдуруп, униңға һечнәрсиниң тосалғулуқ қилишиға йол бәрмигән. Ундақта бизчу? Бу дунияда бизниң Йәһваға хизмәт қилишимизға тосқунлуқ қилидиған нурғун нәрсиләр бар. Әгәр бизму Әйса Мәсиһкә охшаш Йәһваниң ирадисини орунлашқа пүтүн диққитимизни мәркәзләштүрсәк, бу дунияни йәңгән болимиз (Йоһ. 1-х. 5:5).

9. Мәңгүлүк һаятлиқ йолида давамлиқ меңиш үчүн немә қилишимиз керәк?

⁹ Мәңгү һаятлиққа йетәкләйду. Бир бай киши мәңгүлүк һаятқа еришиш үчүн немә қилишим керәк дәп сориғанда, Әйса униңға: «Мениң кәйнимдин жүргин»,— дегән (Мәт. 19:16—21). Әйсаниң Мәсиһ екәнлигигә ишәнмәйдиған бәзи йәһудийларға у: «Мениң қойлирим... маңа әгишип маңиду. Мән уларға мәңгүлүк һаят әта қилимән»,— дәгән (Йоһ. 10:24—29). Әйсаниң тәлимлиригә қизиққан Алий кеңәшниң бир әзаси, йәни Никодимусқа Әйса «мәңгүлүк Һаятқа еришиш үчүн» кишиләр униң төләм қурбанлиғиға ишиниши керәк дегән (Йоһ. 3:16). Әйса сөзлири вә иш-һәрикәтлиридә үгәткәнлирини үлгә қилип, яшаш арқилиқ биз униңға ишәнч қилғанлиғимизни көрситәләймиз. Әгәр биз шундақ қилсақ, мәңгүлүк һаятлиқ йолида давамлиқ маңалаймиз (Мәт. 7:14).

10. Әйсани техиму яхширақ тонуш үчүн немә қилишимиз керәк? (Йоһан 17:3).

¹⁰ Әйсаниң изидин чиқмай маңалишимиздин бурун, у һәққидә чоқум билим елишимиз керәк (Йоһан 17:3ни оқуң). «Әйса Мәсиһни тонуп-билиш», йәни билим елиш бу тохтимай давамлишидиған бир җәриян. Әйсаниң пәзиләтлири, униң ой-пикири вә әхлақ-өлчәмлири һәққидә үгиниш арқилиқ биз уни техиму яхширақ тоналаймиз. Һәқиқәт йолида маңғили қанчә узун болушиға қаримай, биз чоқум Худа вә Униң Оғли һәққидә билим елишни давамлаштурушимиз керәк.

11. Хуш хәвәр китаплиридин Әйса һәққидә немиләрни тапалаймиз?

 ¹¹ Меһир-шәпқәтлик Худайимиз Йәһва Өз Оғли һәққидә билим елишимизға ярдәм бериду. Буниң үчүн, У Муқәддәс Язмилардики төрт Хуш хәвәр китавини бизгә бәргән. Әйсаниң һаяти вә униң вәз хизмити һәққидики вақиәләр әшу Хуш хәвәр китаплирида йезилған. Әшу вақиәләр Әйсаниң немә дегәнлигини, немә қилғанлиғини вә қандақ һис-туйғуда болғанлиғини ашкарилайду. Әшу төрт Хуш хәвәр китави Әйсаниң үлгилири һәққидә чоңқур ойлинишимизға ярдәм бериду (Ибр. 12:3). Демәк, Әйсаниң қалдурған излирини мошу төрт китаптин тапалаймиз. Шуңа, шу Хуш хәвәр китаплирини үгиниш арқилиқ Әйсани техиму яхширақ тоналаймиз. Нәтиҗидә, Әйсаниң изидин чиқмай униңға әгишип маңалаймиз.

12. Хуш хәвәр китаплиридин көпирәк пайда елиш үчүн немиләрни қилалаймиз?

¹² Хуш хәвәр китавидин көпирәк пайда елиш үчүн пәқәт уни оқупла қоймай, вақит чиқирип улар үстидә көңүл қоюп тәтқиқ қилишимиз вә чоңқур ойлинишимиз керәк (Йәшуа 1:8ни селиштуруң). Хуш хәвәр китаплиридин оқуғанлиримиз үстидә чоңқур ойлиниш вә уни һаятимизда қоллинишқа немә ярдәм берәләйду? Төвәндә икки усулни мулаһизә қилимиз.

13. Хуш хәвәр китаплиридики вақиәләрни қандақ җанландуралайсиз?

¹³ Биринчи, Хуш хәвәр китаплиридики вақиәләрни җанландуруш. Немә ишларниң йүз бәргәнлигини һис қилиш, аңлаш, көз алдимизға кәлтүрүш үчүн тәсәввур қилиш иқтидарини ишлитиң. Бундақ қилишимизға Йәһва Худаниң тәшкилати нәшир қилған әдәбиятлар үстидә издинип, тәтқиқ қилиш ярдәм бериду. Йүз бәргән вақиәләрниң алди-кәйнидики мәзмунларни тәкшүрүң. Тәсвирләнгән кишиләрниң келип чиқиши вә тилға елинған җайлар тоғрисида мәлуматларни издәң. Сиз тәтқиқ қилған мәзмунни, йәни бир хуш хәвәр китавидики охшаш мәзмунлар билән селиштуруң. Чүнки Хуш хәвәр китаплириниң биридә тәпсилий баян қилинмиған вақиәләр йәнә биридә баян қилинған.

14, 15. Әйса һәққидики иш-вақиәләрдин үгәнгәнлиримизни әмәлий турмушимизда қандақ ишлитәләймиз?

 ¹⁴ Иккинчи, Хуш хәвәр китаплиридики вақиәләрни һаятиңизға тәтбиқлаң (Йоһ. 13:17). Хуш хәвәр китаплиридики бир вақиәни көңүл қоюп тәтқиқ қилғандин кейин өз-өзүңиздин мундақ сораң: Шу үгәнгән вақиәдә әмәлий турмушумда қоллинишқа болидиған қандақ савақ бар? Буни ишлитип, башқиларға қандақ ярдәм берәләймән? Мәлум бир киши һәққидә ойлинип көрүң вә мувапиқ вақитни тепип, меһир-муһәббәт, пәм-парасәт билән үгәнгәнлириңизни униң билән бөлүшүң.

¹⁵ Бу икки усулни қандақ қоллинишқа ярдәм беридиған бир мисални көрүп чиқайли. Әйса ибадәтханида кәмбәғәл тул аялни күзитип турғанлиғи һәққидики иш-вақиәләрни көримиз.

16. Марк 12:41-айәттә йезилған иш-вақиәләрни тәсвирләп бериң?

¹⁶ Вақиәләрни җанландуруш (Марк 12:41ни оқуң). Немә иш йүз бәргәнлигини тәсәввур қилип көрүң. Милади 33-жили, нисанниң 11-күни. Әйсаниң өлүмидин бир қанчә күн бурун Әйса ибадәтханида тәлим бериш билән күнлирини өткүзүвататти. Диний йетәкчиләр униңға қарши чиқиватиду. Илгири уларниң бәзилири Әйсаниң бу ишларниң қилишиға кимниң һоқуқ бәргәнлигини сориған. Йәнә башқилири җавап бериш қийин болған соалларни униңдин сориған (Марк 11:27—33; 12:13—34). Һазир Әйса ибадәтханиниң башқа тәрипигә кетип қалди. У йәрдә, йәни, аяллар жиғилидиған һойла дәп аталған җайда, у һойла темиға йеқин җайдики ғәзнә сандуғини көрәләтти. Әйса у йәрдә олтирип ғәзнә сандуғиға өзиниң ианилирини ташлиған кишиләрни диққәт билән күзитишкә башлиди. Көплигән бай кишиләрниң нурғун тәңгиләрни ташлиғанлиғини көрди. У иәнә сандуғиға тарақлап чүшкән тәңгиләрниң авазини аңланғидәк йеқин җайда олтарған болуши мүмкин.

17. Марк 12:42-айәттә тилға елинған кәмбәғәл тул аял немә қилған?

¹⁷ Марк 12:42ни оқуң. Бираз вақит өткәндә бир аял Әйсаниң диққитини тартти. У бир кәмбәғәл, тул аял еди (Луқа 21:2). У аялниң турмуши бәкму қийин еди. Бәлким, униң турмушиға керәклик нәрсиләрни сетивалғидәк пулиму йоқ. Амма у аял ибадәт сандуқлириниң биригә келип астиғинә икки тәңгисини ташлиди. Бәлким, ғәзнигә чүшкән тәңгиләр авазини чиқармиған. Әйса шу аялниң икки кичик тәңгини ташлиғанлиғини билгән. Шу тәңгиләр әшу замандики әң кичик тәңгиләр еди. Шу пуллар йемәк үчүн сетилған қушларниң арисидики әң әрзән қушқачтин бирини сетивелишқа йәтмәтти.

18. Марк 12:43, 44-айәттә Әйса тул аялниң ианиси тоғрилиқ немә дәгән?

¹⁸ Марк 12:43, 44ни оқуң. Әйса бу тул аялниң қилған ишлиридин бәкму тәсирләнгән. Шуңа Әйса шагиртлирини чақирип, уларниң диққитини у аялға қаритип, мундақ дегән: «Бу кәмбәғәл тул аял ғәзнә қачисиға һәммисидин көп пул ташлиди». Андин у: «Қалғанлар байлиғиниң ашқан-ташқанлиғидин бәрди, у болса муһтаҗлиқта яшисиму, һаят кәчүрүшкә һаҗәтлик болған һәммә нәрсисини беривәтти»,— дәп чүшәндүргән еди. Бу садақәтмән тул аял шу күнидики пулиниң әң ахирқи қисмини бәргинидә, Худаниң ғәмхорлуқ қилиши үчүн өзини Униң қолиға тапшурған (Зәб. 26:3).

19. Әйсаниң кәмбәғәл тул аял һәққидә ейтқанлиридин қандақ муһим савақ алалаймиз?

¹⁹ Үгәнгәнлириңизни һаятиңизда әмәлий қоллиниш. Өз-өзүңиздин сораң: Әйсаниң кәмбәғәл тул аял һәққидә ейтқанлиридин қандақ савақ алалаймән? Әшу тул аял һәққидә  ойлинип көрүң. Шәк-шүбһисизки, у Йәһва Худаға көпирәк беришни халиған. Шуңа қолидин кәлгиничә өзидә бариниң әң яхшисини бәргән. Һәзрити Әйса шу аялниң бәргән ианиси өз Атисиниң көзидә әң қиммәтлик екәнлигини билгән. Шуниңға охшаш бизму әң яхшисини берип, йәни пүтүн қәлбимиз вә җенимиз билән Униңға хизмәт қилсақ, Йәһваниң қәлби хурсән болиду (Мәт. 22:37; Кол. 3:23). Йәһва күчимизниң йетишичә хизмәт қилғанлиғимизни көргинидә хошал болиду. Биз Униңға ибадәт қилиш, йәни вәз хизмәткә вә учришишларға қатнишиш үчүн қанчилик вақит вә күчимизни сәрип қилишқа мошу принципни қоллиналаймиз.

20. Тул аял һәққидә үгәнгәнлиримизни турмушимизда қандақ ишлитәләймиз? Мисал кәлтүрүң.

²⁰ Тул аял һәққидики үгәнгәнлиримизни турмушимизда қандақ ишлитәләймиз? Кимләрни илһамландуралайдиғанлиғиңизни ойлап көрүң вә уларниң көрситиватқан тиришчанлиғи үчүн Йәһваниң хошал екәнлигини, уларниң есигә селиң. Һазир саламәтлиги начар яки тени аҗиз болғач, өзини яримас һис қиливатқан йеши чоңийип қалған бирәр қериндашни биләмсиз? Бәлким у илгирикидәк вәз хизмәткә қатнишалмайду. һәрдайим кона кесили қозғилип, ағриғачқа, учришишларға келәлмәй, көңли чүшкән бирәр қериндашни әскә алаламсиз? Илһам беридиған сөзләр билән шундақ қериндашларға ярдәм бериң (Әфәс. 4:29). Тул аял һәққидә үгәнгәнлиримизни улар билән бөлүшүп, илһам берәләймиз. Илһам беридиған сөзлириңиз, улар қолидин келишичә Йәһваға бәрсә, Униң көңли хурсән болидиғанлиғини уларниң есигә салиду (Пәнд н. 15:23; Сал. 1-х. 5:11). Қаримаққа мәйли қанчилик кичик көрүнсиму, Йәһваға өзидики әң яхшисини бәргини үчүн башқиларни махташ арқилиқ Әйсаниң изидин чиқмай маңалайсиз.

21. Сиз немә қилишни қарар қилдиңиз?

²¹ Төрт Хуш хәвәр китавида Әйсаниң һаяти һәққидә шунчә көп мәлуматларниң болғанлиғи үчүн һәқиқәтән миннәтдармиз. Әшу мәлуматлар уни үлгә қилип, униң изидин чиқмай меңишимизға ярдәм бериду. Шу Хуш хәвәр китаплиридики мәзмунларни шәхсий үгиниш яки аиләвий ибадәттә тәтқиқ қилиң. Шундақ тәтқиқ қилип, үгинишниң толуқ пайдисини көрүш үчүн биз вақиәләрни җанландуруш вә уни өз һаятимизда әмәлий ишлитишимиз керәклигини әстин чиқармайли. Биз Әйсаниң қилғанлирини үлгә қилипла қалмай, йәнә униң сөзлиригә қулақ селишимиз керәк. Келәрки мақалидә Әйсаниң өлүштин бурун қилған сөзлиридин немиләрни үгинәләйдиғанлиғимизни көрүп чиқимиз.