1. Әйса өлүштин сәл авал өз йенидики җинайәтчигә немә дегән? (Луқа 23:39—43)

 ӘЙСА вә униң йенидики икки җинайәтчи қийнилип, аста-аста җан беривататти (Луқа 23:32, 33). Җинайәтчиләрниң һәр иккиси Әйсани заңлиқ қилған. Шуңа наһайити ениқки, улар униң шагирти әмәс (Мәт. 27:44; Марк 15:32). Амма улардин бириниң жүриги юмшап өзгәргән. У: «Әйса, өзәңниң Падишалиғиңға кәлгәндә, мени әскә алғина»,— дегән. Әйса шундақ җавап бәргән: «Саңа һәқни бүгүн ейтимәнки, сән мениң билән биллә җәннәттә болусән» (Луқа 23:39—43ни оқуң). Һәзрити Әйса вәз қилған чағларда бу җинайәтчиниң «асмандики Падишалиқ» һәққидики хәвәрни қобул қилғанлиғи һәққидә һечқандақ бир мәлумат йоқ. Буниңдин башқа Әйса һәргизму уни асман Падишалиғиға кириду демигән (Мәт. 4:17). Әксинчә, Әйса кәлгүси йәр йүзидики җәннәт һәққидә сөз қилған еди. Немә үчүн шундақ дейәләймиз?

2. Товва қилған җинайәтчиниң йәһудий екәнлигини қандақ билимиз?

² Әшу товва қилған җинайәтчи йәһудий болуши мүмкин. У җинайәтчи йәнә биригә: «Наһәтки сән Худадин тамамән қорқмайсән? Чүнки сән өзәңму шундақ җазалаңдинғу!»— дегән еди (Луқа 23:40). Йәһудийлар пәқәт бирла Худаға ибадәт қилған. Амма ят милләтләр көп илаһларға чоқунушқан еди (Чиқ. 20:2, 3; Кор. 1-х. 8:5, 6). Әгәр әшу җинайәтчиләр йәһудийлар болмиған болса, шу җинайәтчи: «Сән илаһлардин қорқмамсән?»— дәп сориши мүмкин еди. Униңдин башқа, Әйса башқа милләтләргә әмәс, бәлки Исраил җамаитиниң адишип қалған қойлириға әвәтилгән еди (Мәт. 15:24). Худа исраилларға өлүкләрни тирилдүргәнлигини билдүргән. Бәлким, пушайман қилған җинайәтчи буни билгән. Ениқки, шу киши өзиниму Худаниң тирилдүрүшини үмүт қилған.

3. Әйса җәннәтни тилға алғанда, товва қилған җинайәтчи немә һәққидә ойлиған болуши мүмкин? Чүшәндүрүп бериң (Яритилиш 2:15).

³ Товва қилған җинайәтчи бир йәһудий болғачқа, Адәм ата билән Һава ана вә уларни Йәһваниң җәннәткә орунлаштурғанлиғи һәққидә билгән. Шуңа шу җинайәтчи бәлким Әйса Мәсиһ тилға алған җәннәтниң йәр йүзидики гөзәл бағ болушиға ишәнгән (Яритилиш 2:15ни оқуң).

4. Әйсаниң җинайәтчиләрниң биригә қилған сөзи бизни немә һәққидә ойлинишқа үндиши керәк?

⁴ Әйсаниң җинайәтчигә қилған сөзи бизни җәннәттики һаятниң қандақ болидиғанлиғи һәққидә ойлинишқа үндәйду. Әмәлийәттә, биз Сулайман падиша һөкүмранлиқ жүргүзгән мәзгилидики тинч-аманлиқтин җәннәт һәққидә бәзи нәрсиләрни үгинивалалаймиз. Биз Сулаймандинму улуқ Әйсаниң вә униң билән бирликтә һөкүмранлиқ қилғучиларниң йәр йүзини әҗайип җәннәт маканға айландуридиғанлиғини үмүт билән күтәләймиз (Мәт. 12:42). Наһайити ениқки, «башқа қойлар» җәннәттә мәңгү яшашқа лайиқ болалиши үчүн өзлириниң немиләрни қилиши керәклигигә қизиқишиду (Йоһ. 10:16).

5. Сизниңчә җәннәттә һаят қандақ болиду?

⁵ Җәннәттики һаятни ойлиғиниңизда, немиләрни хиял қилисиз? Бәлким, сиз Ерәм баққа охшаш гөзәл бағчини тәсәввур қилидиғансиз (Ярит. 2:7—9). Мика пәйғәмбәр язған мону бәшарәтни әскә елишиңиз мүмкин. Худа хәлқи «һәрбири өз үзүм тели вә өз әнҗир дәриғи астида олтириду» (Мика 4:3, 4, КТ). Муқәддәс Язмилардики йемәк-ичмәкләрниң мол болидиғанлиғи тоғрисидики айәтләр есиңизгә келиши мүмкин (Зәб. 72:16; Йәшая 65:21, 22). Шуңа өзүңизни чирайлиқ бағда мәзилик йемәкликләр билән толған дәстиханда олтарғанлиғиңизни көз алдиңизға кәлтүрәләйсиз. Бәлким, гүл-гиялар вә дәл-дәрәқләрниң хушпурақлириға толған сап һавани һәмдә аилиңиздикиләр, достлириңиз вә өлүмдин тирилдүрүлгәнләр биргә җәм болуп, хошаллиқтин көтирилгән шатлиқ күлкә авазлирини аңливатқан шу пәйтләрни тәсәввур қилишиңиз мүмкин. Әслидә уларниң һәммиси һәргизму хам-хиял әмәс. Шәк-шүбһисизки, бундақ көрүнүшләр йәр йүзидә чоқум йүз бериду. Бирақ җәннәттики һаят шат-хорамлиқ ичидә иш-әмгәк қилишниму өз ичигә алиду.

6. Биз җәннәттә немә қилимиз? (Рәсимгә қараң.)

⁶ Йәһва Худа бизни иш-әмгигимиздин һузурлиниш үчүн яратқан (Вәз 2:24). Болупму биз Мәсиһниң миңжиллиқ һөкүмранлиқ мәзгилидә алдираш болуп кетимиз. Дәһшәтлик чоң балаю-апәттин аман қалғанлар, шундақла миллионлиған тирилгән кишиләр, кийим-кечәк, йемәк-ичмәк вә туридиған җайға муһтаҗ болиду. Мошу муһтаҗлиқларни қандуруш үчүн көп иш-әмгәкләрни қилишқа тоғра келиду. Бу иш-әмгәк бизгә хошаллиқ беғишлайду. Худди Адәм ата билән Һава ана өтмүштә йәр йүзини пәрвиш қилишқа буйрулғандәк, бизму йәр йүзини җәннәткә айландуруш хизмитидин  шат-хорамлиқ тапимиз. Йәһва вә Униң мәхсити һәққидә аз-тола билидиған миллионлиған тирилгән инсанларға тәлим бериш вә Һәзрити Әйсадин илгирики заманларда яшиған садақәтмән кишиләрниң техиму көпирәк нәрсиләрни үгинишигә ярдәм бериш нәқәдәр хошаллинарлиқ иш екәнлигини тәсәввур қилип беқиң!

7. Биз немигә ишәнч қилалаймиз вә немә үчүн?

⁷ Биз кәлгүси җәннәттики һаятниң тинч-хатирҗәм, баяшат, тәртиплик тәшкиллинидиғанлиғиға ишәнч қилалаймиз. Немә үчүн? Чүнки Йәһва аллиқачан бизгә Өз Оғлиниң һөкүмранлиғи астидики һаятниң қандақ болидиғанлиғи һәққидә бир үлгини көрситип бәргән. Биз буни Сулайман падишаниң һөкүмранлиқ дәври һәққидә хатириләнгән язмилардин көрәләймиз.

8. Зәбур 37:10, 11, 29-айәттики Давут язған бәшарәтлик сөзләр қедимда қандақ әмәлгә ашқан? (Бу журналдики «Оқурмәнләрниң соаллириға» қараң.)

⁸ Давут падиша Худаниң илһамландуруши билән кәлгүсидә бир дана вә садиқ Падиша тәхткә олтарғанда, һаятниң қандақ болидиғанлиғи һәққидә язған еди (Зәбур 37:10, 11, 29ни оқуң). Адәттә келәчәк җәннәт һәққидә сөһбәтләшкәндә, биз дайим башқиларға Зәбур 37:11-айәтни оқуп беримиз. Шундақ қилишимиз үчүн йетәрлик сәвәплиримиз бар, чүнки Әйса Тағдики вәз-нәсиһәт нутуғида мошу айәтни нәқил кәлтүрүп, униң келәчәктә әмәлгә ашидиғанлиғини көрсәткән (Мәт. 5:5). Давутниң сөзлири йәнә падиша Сулайманниң күнлиридә һаятниң қандақ болидиғанлиғини көрсәткән. Сулайман Исраилға һөкүмранлиқ қилғанда, Худа хәлқи «сүт билән һәсәл ақидиған йәрдә» тинч-хатирҗәмлик вә баяшатчилиқ ичидә хошал-хорам һаят кәчүргән. Худа мундақ дегән еди: «Әгәр силәр Мениң көрсәтмилирим бойичә иш тутсаңлар вә Мениң вәсийәтлиримни сақлап, уларни орунлисаңлар,... зиминиңларға течлиқ әвәтимән, ятисиләр вә һечким силәрни қорқатмайду» (Лав. 20:24; 26:3, 6). Бу вәдиләр Сулайман падишалиқ қилған мәзгилдә әмәлгә ашурулған (Тар. 1-яз. 22:9; 29:26—28). Буниңдин башқа, рәзилләр йоқ болар дегән вәдиму болған (Зәб. 37:10). Шуңлашқа, Зәбур 37:10, 11, 29-айәтләрдики бәшарәтләр қедимда әмәлгә ашқан болуп, кәлгүсидә йәнә әмәлгә ашиду.

9. Сабаниң падиша мәликиси Сулайман падишаниң һөкүмранлиғи һәққидә немә дегән?

 ⁹ Сулайманниң һөкүмранлиғи астида исраиллар бәһримән болған тинчлиқ вә баяшатчилиқ хәвәрлири Сабаниң падиша мәликисиниң қулиғиға йәткән. Бу аял падиша аңлиғанлирини өз көзи билән көрүш үчүн жирақ жуттин Йерусалимға кәлгән (Пад. 1-яз. 10:1). Сулайманниң падишалиғини көздин кәчүргәндин кейин у шундақ дегән: «Маңа һәтта йеримиму ейтилмапту... Сизниң адәмлириңиз нәқәдәр бәхитликтур, сизниң алдиңизда туруп, даналиғиңизни аңлаватқан қуллириңиз нәқәдәр бәһримәндур!» (Пад. 1-яз. 10:6—8). Амма Сулайман һөкүмранлиқ қилған мәзгилидики турмуш шараитлири Йәһва Худаниң Оғли Әйса һөкүмранлиқ қилғанда инсанийәт үчүн немиләрни қилидиғанлиғини алдин хәвәр бәргән.

10. Әйса қайси җәһәтләрдә Сулаймандин үстүн туриду?

¹⁰ Әйса һәр җәһәттин Сулаймандин үстүн турған. Сулайман намукәммәл инсан болған вә еғир хаталиқларни өткүзүп, ахирида Худаниң хәлқини җапа-мәшәққәткә дучар қилған. Әксинчә, Әйса Мәсиһ болса, мукәммәл һөкүмран вә һечқандақ хаталиқ өткүзмәйду (Луқа 1:32; Ибр. 4:14, 15). Шәйтанниң қийин синақлириға қаримай, Әйса Мәсиһ Худаға садиқ қалған. Мәсиһ өзиниң һәргизму гуна өткүзмәйдиғанлиғи яки өз пухралириға зиян йәткүзмәйдиғанлиғини испатлиған. У биз үчүн һәқиқәтән әң яхши Падиша болалайду.

11. Әйсаниң һөкүмранлиқ қилишиға кимләр ярдәм бериду?

¹¹ Әйса инсанийәткә көңүл бөлүш вә Йәһваниң йәр йүзидики мәхситини әмәлгә ашурушта 144000 башқурғучилар билән һәмкарлишиду (Вәһ. 14:1—3). Улар садиқ әрләр вә аяллар болуп, йәр йүзидә яшиғанда бешидин нурғун синақлар вә азап-оқубәтләрни өткүзгән. Шуңа, улар инсанийәткә һисдашлиқ қилалайдиған башқурғучилар болиду. Ениғирақ ейтқанда, бу башқурғучилар немә иш қилиду?

12. Йәһва 144000 талланғанларға қандақ вәзипини тапшуриду?

¹² Әйса вә униң билән биллә башқуридиғанларға тапшурулған вәзипә Сулайманға берилгән вәзипидинму көпирәк ишларни өз ичигә алиду. Исраилниң падишаси пәқәт бир дөләттә нәччә миллион кишигә ғәмхорлуқ қилиши керәк еди. Бирақ Худа Падишалиғида һөкүмранлиқ қилидиғанлар пүткүл йәр йүзидә яшайдиған миллиард инсанларға ғәмхорлуқ қилиду. Йәһва әшу 144000 талланғанларға әҗайип имтиязни бәргән.

13. Әйса билән биллә һөкүмранлиқ қилидиғанларға қандақ өзгичә хизмәт тапшурулған?

¹³ Әйсаға охшаш, әшу 144000 талланғанлар падишалар вә роһанийлар болуп хизмәт қилиду (Вәһ. 5:10). Муса пәйғәмбәргә чүшүрүлгән қанунға асасланғанда роһанийлар асаслиғи хәлиқниң җисманий сағламлиғини қоғдаш билән биргә роһий җәһәттин сағлам болушиға мәсъул кишиләр еди. Бу қанун келәчәктә болидиған ишларниң көләңгиси болған. Шуңа мундақ хуласә чиқириш наһайити орунлуқ, Әйса билән биллә һөкүмранлиқ қилидиғанлар Худа хәлиқниң җисманий вә роһий еһтияҗлирини тәминләш үчүн ярдәм бериду (Ибр. 10:1). Биз бу падишалар вә роһанийларниң йәр йүзидики пухралири билән қандақ алақә қилидиғанлиғини һазирчә билмәймиз. Йәһваниң қандақ орунлаштурушидин қәтъийнәзәр, биз кәлгүси йәр йүзи җәннәттә яшайдиғанлар муһтаҗ болидиған йол-йоруқларға еришәләйдиғанлиғиға ишинәләймиз (Вәһ. 21:3, 4).

14. «Башқа қойлар» билән Мәсиһниң қериндашлири арисида қандақ мунасивәт бар?

¹⁴ Әйса өзи билән бирликтә һөкүмранлиқ қилидиғанларни «кичик пада» дәп атиған еди (Луқа 12:32). У йәнә «башқа қойлар» дәп  атилидиған иккинчи топ кишиләр һәққидә сөз қилған. Бу икки топ кишиләр бир топ падини тәшкил қилиду (Йоһ. 10:16). Бу икки топ аллиқачан һәмкарлишип хизмәт қиливатиду. Йәр йүзи җәннәткә айланғандиму, улар бирликтә хизмәт қилишни давамлаштуриду. Әлвәттә, шу вақитта «кичик пада» асманда болиду. «Башқа қойларниң» йәр йүзидә мәңгү шат-хорам яшаш үмүти болиду. Амма «башқа қойлар» җәннәттә яшашқа лайиқ болуш үчүн һазирниң өзидә қилишқа тегишлик ишлар бар.

15. а) «Башқа қойлар» Мәсиһниң қериндашлири билән қандақ һәмкарлишиду? ә) Дукандики бурадәрни қандақ үлгә қилалайсиз? (Рәсимгә қараң.)

¹⁵ Пушайман қилған җинайәтчи Мәсиһкә болған миннәтдарлиғини толуқ ипадиләш пурситигә еришиштин бурун өлүп кәтти. Униң билән селиштурғанда, «башқа қойларниң» һазир Әйсаға миннәтдарлиғини билдүридиған нурғун пурсәтлири бар. Мәсилән, биз һәзрити Әйсаниң муқәддәс роһ билән майланған қериндашлириға яхши муамилә қилиш арқилиқ, униңға болған сөйгү-муһәббитимизни ипадиләймиз. Әйса буниңға асасән қойларни һөкүм қилидиғанлиғини ейтқан (Мәт. 25:31—40). Вәз ейтиш вә шагирт тәйярлаш хизмитидә Әйсаниң қериндашлириға қизғинлиқ билән ярдәм бериш арқилиқ уларни қоллап-қувәтләләймиз (Мәт. 28:18—20). Буниң үчүн, биз улар тәминлигән Муқәддәс китапни тәтқиқ қилиш қураллиридин, мәсилән, «Мәңгү шат-хорам яшаң!» намлиқ китаптин яхши пайдилинишимиз керәк. Әгәр сиз техи бирәр киши билән Муқәддәс китап тәтқиқ үгинишини өткүзмигән болсиңиз, имканқәдәр көпирәк кишиләрни Муқәддәс китапни үгинишкә тәклип қилиш үчүн мәхсәт қоюң.

16. Худа Падишалиғиниң пухраси болуш үчүн һазир немә қилалаймиз?

¹⁶ Яратқучи Йәһва җәннәттә болушини халайдиған адәм болушимиз үчүн, җәннәтниң келишини күтүшниң һаҗити йоқ. Һазир гәп-сөзлиримиз вә иш-һәрикәтлиримиздә сәмимий болуп, һаятимизда тәңпуңлуқни сақлалаймиз. Униңдин башқа, биз Йәһваға, некада бағланған җүптимизгә вә башқа етиқатчи қериндашларға садиқ болалаймиз. Биз бу рәзил дунияда яшаватқинимизда, Худаниң өлчәм-қаидилиригә бойсунуп яшисақ, кәлгүси җәннәттә Униңға бойсунуп яшаш техиму асанирақ болиду. Биз йәнә түрлүк маһарәтләрни вә есил пәзиләтләрни йетилдүрүш арқилиқ өзүмизниң  җәннәттә яшашқа тәйярлиқ қиливатқанлиғимизни көрситәләймиз. Бу сан журналдики «Йәрни мирас елишқа тәйярмусиз?» намлиқ мақалини оқуң.

17. Илгири өткүзгән гуналиримиз түпәйли чүшкүнлишип кетишимиз керәкму? Чүшәндүрүп бериң.

¹⁷ Өтмүштә өткүзгән еғир гуналиримиз түпәйли өзүмизни гунакар һис қилишимиз мүмкин, амма шундақ һис-туйғудин жирақ болушқа тиришишимиз лазим. Әлвәттә, биз һәргизму «төләм қурбанлиғини» баһанә қилип, қәстән гуна қилмаймиз (Ибр. 10:26—31). Әгәр биз чин қәлбимиздин еғир гунайимиз үчүн һәқиқий товва қилған, Йәһвадин вә ақсақаллардин ярдәм сориған, шуниң билән биргә жүрүш-турушимизни өзгәрткән болсақ, Яратқучимизниң бизни пүтүнләй кәчүргәнлигигә ишәнч қилалаймиз (Йәшая 55:7; Әлч. 3:19). Әйсаниң пәрийсиләргә ейтқан мону сөзини есиңиздә сақлаң: «Мән һәққанийларни әмәс, бәлки гунакарларни чақирғили кәлдим» (Мәт. 9:13). Төләм қурбанлиғи бизниң барлиқ гуналиримизни йепиш күчигә егә.

18. Әйсаниң йенида өлгән җинайәтчи билән немиләр һәққидә параңлишишни халаттиңиз?

¹⁸ Өзүңизниң җәннәттә болуп, Әйса билән сөзләшкән җинайәтчи билән параңлишиватқанлиғини тәсәввур қилаламсиз? Шәк-шүбһисизки, һәр иккиңлар Әйсаниң төләм қурбанлиғиға миннәтдарлиқ билдүрисиләр. Сиз бәлким у кишидин Әйсаниң йәрдики һаятиниң ахирқи бир қанчә саитидә йүз бәргән ишлар вә униң тәливигә Әйса җавап қайтурғандики һис-туйғуси һәққидә техиму көпирәк сөзләп беришни өтүнүшиңиз мүмкин. Әксинчә, у сиздин Шәйтанниң дуниясида ахирқи күнләрдә яшашниң қандақ болғанлиғини сориши мүмкин. У кишигә охшаш кишиләр билән Худа Сөзини тәтқиқ қилип үгиниш нәқәдәр шан-шәрәплик иш-һә! (Әфәс. 4:22—24)

19. Немә үчүн җәннәттики һаят зерикишлик болмайду? (Муқавидики рәсимгә қараң.)

¹⁹ Җәннәттики һаят һәргизму зерикишлик болмайду. Биз дайим қизиқарлиқ ишларни баштин кәчүргән кишиләр билән көрүшимиз вә әһмийәтлик ишларни қилимиз. Әң муһими, биз һәр күни әрштики Атимизни техиму яхши тонуп, У тәминлигән нәрсиләрдин һузурлиналаймиз. У тоғрисида үгинидиған билим һәргиз түгәп қалмайду. Униң яратқанлири тоғрисида үгинидиған йәнә нурғун нәрсиләр бар. Қанчә узун яшисақ, Худаға болған муһәббитимиз шунчә чоңқур болиду. Яратқучи Йәһва вә Мәсиһ Әйса бизниң җәннәттә мәңгү яшалишимиз үчүн вәдә бәргән. Буниң үчүн биз интайин миннәтдармиз!