1. Бүгүнки күндә Йәһваниң ирадиси немә?

 БҮГҮНКИ КҮНДӘ Худаниң ирадиси болса, Падишалиқ хуш хәвириниң пүткүл йәр йүзидә вәз қилиниши (Марк 13:10; Тим. 1-х. 2:3, 4). Бу Йәһваниң хизмити, әң муһими, у Өзиниң сөйүмлүк Оғлини бу хизмәткә йетәкчилик қилишқа таллиған. Биз шуниңға ишинимизки, Әйсаниң йетәкчилиги астида вәз ейтиш хизмити заманниң ахири келиштин илгири Йәһва рази болғидәк тамамлиниду (Мәт. 24:14).

2. Бу мақалидә немиләрни муһакимә қилимиз?

² Бу мақалидә Әйсаниң садиқ вә әқил-парасәтлик қулни ишлитип, роһий озуқлуқни қандақ тәминләйдиғанлиғи вә өз әгәшкүчилирини тарихтики әң зор көләмдә вәз қилиш хизмитигә қандақ тәшкилләйдиғанлиғини көримиз (Мәт. 24:45). Биз йәнә һәрбиримиз Әйсани вә садиқ қулни қоллаш үчүн немиләрни қилалайдиғанлиғини көримиз.

3. Әйсаға қандақ һоқуқ берилгән?

³ Әйса вәз ейтиш хизмитигә йетәкчилик қиливатиду. Буниңға қандақ ишинәләймиз? У асманға чиқип кетиштин сәл авал, һәзрити Әйса Җәлилийәдики бир тағда бәзи садиқ әгәшкүчилири билән көрүшкән. У уларға: «Әрштә вә йәр йүзидә пүтүн һоқуқ маңа берилди» дегән. Диққәт қилсиңиз, у кейин сөзини мундақ давам қилған: «Шу сәвәптин, берип барлиқ хәлиқләрдин... шагиртларни тәйярлаңлар» (Мәт. 28:18, 19). Шуңа башқа ишлар арисида, Әйсаға вәз ейтиш хизмитигә йетәкчилик қилиш һоқуқи берилгән.

4. Немә үчүн Әйсаниң һазирму вәз ейтиш хизмитигә йетәкчилик қиливатқанлиғиға ишинәләймиз?

 ⁴ Әйса вәз ейтиш вә шагирт йетиштүрүш хизмитиниң «барлиқ хәлиқләр» арисида әмәлгә ашидиғанлиғини вә заман ахириғичә һәрдайим әгәшкүчилири билән биллә болидиғанлиғини ейтқан еди (Мәт. 28:20). Әшу сөзләр вәз ейтиш хизмитиниң таки бүгүнгә қәдәр Әйсаниң йетәкчилиги астида давам қилидиғанлиғини ениқ көрситип бериду.

5. Зәбур 110:3-айәттики бәшарәтниң әмәлгә ешишиға қандақ ярдәм беримиз?

⁵ Әйса заманниң ахириғичә хизмәтчиләрниң кам болуп қелишидин әнсиримигән еди. У зәбур язғучисиниң мону пәйғәмбәрлик сөзиниң әмәлгә ашидиғанлиғини биләтти: «Сениң хәлқиң муқәддәс гөзәлликтә җәң күнүңдә тәйярлиқ билән маңиду» (Зәб. 110:3). Әгәр сиз вәз ейтиш хизмитигә қатнишиватқан болсиңиз, Әйса вә садиқ қулни қоллап-қувәтләватисиз вә ушбу бәшарәтниң әмәлгә ешишиға ярдәм бериватисиз. Вәз хизмити давам қиливатиду, амма қийинчилиқларму бар.

6. Падишалиқ хуш хәвирини йәткүзгүчиләр бүгүн дуч келиватқан бир қийинчилиқ немә?

⁶ Падишалиқ хуш хәвирини йәткүзгүчиләр дуч келидиған бир қийинчилиқ — қаршилиққа учраш. Һәқиқәттин йүз өргүчиләр, диний даһийлар вә сәясәтчиләр биз тоғрилиқ нурғун ялған гәп-сөзләрни тарқатти. Әгәр уруқ-туққанлиримиз, тонушлиримиз вә хизмәтдашлиримиз шу ялған сөзләргә ишинип кәтсә, улар бизни Йәһваға ибадәт қилиш вә вәз ейтишни тохтитишқа қистиши мүмкин. Бәзи дөләтләрдә қаршилиқ қилғучилар қорқутуш, тәһдид селиш, қолға елиш, һәтта түрмигә ташлаштәк усулларни қоллиниду. Кишиләр бизгә бундақ муамилә қилғанда, буниңдин һәйран қалмидуқ вә қалмаймиз. Чүнки Әйса өз исми сәвәплик, пүткүл милләтләрниң биздин нәпрәтлинидиғанлиғини бәшарәт қилған (Мәт. 24:9). Бизниң бундақ өчмәнликни баштин кәчүрүватқанлиғимизниң өзи Йәһваниң қобул қилишиға еришкәнлигимизниң ениқ дәлил-испати (Мәт. 5:11, 12). Бу қаршилиқниң арқисида Иблис бар. Амма Әйса Иблис Шәйтандин күчлүгирәк! Әйсаниң қоллап-қувәтлиши билән хуш хәвәр һәр милләт кишилиригә йәткүзүливатиду. Буниң дәлиллирини муһакимә қилип көрәйли.

7. Вәһий 14:6, 7-айәтләрниң әмәлгә ешиватқанлиғини көрситидиған қандақ дәлил-испат бар?

⁷ Падишалиқ хуш хәвирини йәткүзгүчиләр сүпитидә, биз йәнә бир қийинчилиққа дуч келимиз, йәни нурғунлиған пәриқлиқ тилларда сөзләйдиған кишиләргә вәз қилимиз. Әйса әлчи Йоһанға аян қилған вәһийдә, заманимизда бу тосақни хуш хәвәрниң йеңидиғанлиғини ашкарилиған (Вәһий 14:6, 7ни оқуң). Дәрвәқә, биз бүгүнки күндә имканқәдәр көп кишиләрниң Падишалиқ хәвиригә җавап қайтуруши үчүн пурсәт бериватимиз. Дунияниң җай-җайлиридики кишиләр jw.org торбетимиздин Муқәддәс китапқа асасланған нәшрий материаллиримизни оқалайду. Чүнки торбетимиздә 1000дин артуқ тил бар. Рәһбәрлик кеңәш «Мәңгү шат-хорам яшаң!» намлиқ китапни 700дин артуқ тилға тәрҗимә қилишни мақуллиди. Бу китап шунчә нурғун тилда Муқәддәс китап тәтқиқ үгиниши өткүзүшниң асасий қурали. Муқәддәс китапқа асасланған нәшрий материаллар паңлар үчүн фильм шәклидә вә әмалар үчүн әмалар йезиғида нәшир қилинип тәминләнди. Биз Муқәддәс китаптики бәшарәтләрниң әмәлгә ешиватқанлиғини көрүватимиз. Һәрхил тилда сөзләйдиған әлләрдин кәлгән кишиләр Муқәддәс китап һәқиқитиниң сап тилида сөзләшни үгиниватиду (Зәк. 8:23; Зәф. 3:9). Буларниң һәммиси қабилийәтлик йетәкчи Әйса Мәсиһниң йетәкчилигидә әмәлгә ашуруливатиду.

8. Һазирғичә вәз ейтиш ишиниң нәтиҗиси қандақ болуватиду?

⁸ Бүгүнки күндә, 240 дөләттики 8 миллиондин артуқ киши Йәһваниң тәшкилатини қоллап-қувәтләп келиватиду. Һәр жили он  миңлиған киши суға чөмдүрүлүштин өтүватиду! Бирақ сандинму муһим болғини, Худа хизмәтчилири йеңи тәбиәт, йәни миҗәз-хулуқни йетилдүрди (Кол. 3:8—10). Нурғун кишиләр әхлақсизлиқ, зораванлиқ, кәмситиш вә милләтчиликни тохтатти. Йәшая 2:4-айәттики бәшарәт әмәлгә ашурулуватиду. Улар уруш қилишни үгәнмәйду. Биз йеңи миҗәз-хулуқни йетилдүрүш үчүн тиришчанлиқ көрсәткинимиздә, кишиләрни Худаниң тәшкилатиға җәлип қилимиз вә йетәкчимиз Мәсиһ Әйсаға әгишиватқанлиғимизни испатлаймиз (Йоһ. 13:35; Пет. 1-х. 2:12). Буларниң һечқайсиси тәсадипий йүз бәрмәйду. Әйса бизни еһтияҗлиқ ярдәмләр билән тәминләп келиватиду.

9. Мәтта 24:45—47 айәтләргә асасланғанда, Әйса ахир заманда немә иш йүз беридиғанлиғини бәшарәт қилған?

⁹ Мәтта 24:45—47ни оқуң. Әйса ахир заманда роһий озуқлуқ билән тәминләйдиған «садиқ вә әқил-парасәтлик қулни» тәйинләйдиғанлиғини бәшарәт қилған. Шуңа биз у қулниң заманимизда җапалиқ хизмәт қилишини үмүт қилимиз. Бу раст болуп чиқти. Әйса аз сандики кишиләрдин пайдилинип, Худа хәлқи вә қизиқиш көрсәткән кишиләрни вақти-вақтида роһий озуқ-түлүк билән тәминләватиду. Бу әрләр өзлирини башқиларниң етиқади үстидин һөкүмранлиқ қилидиған ғоҗайин дәп қаримайду (Кор. 2-х. 1:24). Әксичә, улар Әйса Мәсиһни өз хәлқигә һөкүмран вә йетәкчи сәрдар дәп тонуп йетиду (Йәшая 55:4).

10. Сүрәтләрдә көрситилгән китаплардин қайсиси сизни мәңгүлүк һаят йолида меңишқа қайил қилған?

¹⁰ 1919-жилдин башлап, садиқ қул һәрхил нәшрий материалларни тәйярлап, йеңидин қизиқиш көрсәткәнләргә Худа сөзлиридин һәқиқәтни үгиниши үчүн әң яхши пурсәтни һазирлап бәргән. 1921-жили, қул қизиқидиғанларниң Муқәддәс китап асасий тәлиматлирини үгинишигә ярдәм бериш үчүн «Худаниң чилтари» намлиқ китапни тәйярлиди. Дәвирниң өзгиришигә әгишип, қошумчә нәшрий  материаллар тәминләп бәрди. Сизниң әрштики Атимизни тонушиңизға вә сөйүшиңизгә қайси китап ярдәм бәргән? «Худа вападар», «Мәңгү һаятқа йетәкләйдиған һәқиқәт», «Йәр йүзи җәннәттә мәңгү яшалайсиз», «Мәңгү һаятқа йетәкләйдиған билим», «Муқәддәс Китапта немә ейтилиду?», «Муқәддәс китап тәлимлири» яки әң йеңи нәшир қилған «Мәңгү шат-хорам яшаң!» намлиқ китапму? Бу китапларниң һәммиси дәл биз еһтияҗ болған вақитларда нәшир қилинған болуп, шагиртларни тәйярлашқа ярдәм бериш үчүн лайиһиләнгән.

11. Немә үчүн Йәһва вә Муқәддәс китап һәққидә чоңқур билим елиш һәммимиз үчүн интайин муһим?

¹¹ Йеңидин қизиқиш көрсәткән кишиләрла әмәс, бәлки һәммимиз Йәһва вә Муқәддәс китап һәққидә чоңқур билим елишқа еһтияҗлиқ. Әлчи Паул: «Қаттиқ тамақ болса, пишип-йетилгәнләр үчүн» дәп язған. Паул йәнә бундақ қаттиқ роһий озуқлуқни, йәни Муқәддәс китаптин алған билимләрни ишлитиш «яхши-яманни пәриқ етишкә» ярдәм беридиғанлиғини ейтқан (Ибр. 5:14). Һазир Йәһваниң өлчәмлиригә бойсунуш һәқиқәтән асан әмәс, чүнки бүгүнки күндә әхлақсиз кишиләр бәк көп. Бирақ Әйса иманимизни күчлүк сақлишимиз үчүн еһтияҗлиқ болған күч-қувәткә еришишимизгә капаләтлик қилиду. Бу роһий озуқлуқларниң мәнбәси болса — Худаниң Сөзи болған Муқәддәс китаптур. Садиқ қул Әйсаниң көрсәтмиси бойичә бу озуқлуқларни тәйярлайду вә тарқитиду.

12. Худди Әйсаға охшаш, биз Худаниң исмини қандақ улуқлаймиз?

¹² Худди Әйсаға охшаш, бизму Худаниң исмини улуқлап келиватимиз (Йоһ. 17:6, 26). Мәсилән, 1931-жили Муқәддәс китапқа асасән, Йәһва гувачилири дегән исим билән аталдуқ. Шу арқилиқ, Худаниң исминиң биз үчүн нәқәдәр муһим екәнлигини көрсәттуқ вә бу исим билән тонулушни халидуқ (Йәшая 43:10—12). Шу жили октябрьдин башлап, шу муқәддәс исим бу журналниң һәрбир саниниң  баш муқависиға чиқти. Униңдин башқа, Муқәддәс китапниң «Йеңи дуния тәрҗимисидә» Худаниң исми қайта тегишлик орниға қоюлған. Христиан дуниясидики чирколар болса буниң дәл әксини қилип, Муқәддәс китапниң нурғун тәрҗимилиридин Худаниң исми болған Йәһва сөзини чиқирип ташлиған.

13. Немә сизни Әйсаниң бүгүнки күндә «садиқ вә әқил-парасәтлик қулни» ишлитиватқанлиғиға қайил қилиду? (Йоһан 6:68)

¹³ Садиқ вә әқил-парасәтлик қулниң васитиси билән, Әйса йәр йүзидә пак ибадәтни илгири сүрүш үчүн әҗайип бир тәшкилатни қурған. Сиз бу тәшкилатқа қандақ қарайсиз? Буниңға җавап бәргиниңиздә, бәлким сиз әлчи Петрусқа охшаш һис-туйғуда болушиңиз мүмкин. У Әйсаға мундақ дегән: «Һакимдаримиз, биз кимгә баримиз? Мәңгүлүк һаят сөзлири сениңдиғу» (Йоһ. 6:68) Әгәр биз Йәһваниң тәшкилати билән алақә қилмиған болсақ, бүгүн қәйәрдә болаттуқ? Мәсиһ бу тәшкилат арқилиқ Худаға садиқ қелишимиз үчүн муһтаҗ болидиған роһий озуқлуқларға еришишимизгә капаләтлик қилиду. У йәнә үнүмлүк вәз хизмәт қилишимиз үчүн бизни тәрбийиләйду. Униңдин башқа, у бизниң йеңи тәбиәт, йәни миҗәз-хулуқни йетилдүрүшимизгә ярдәм бериду, биз шундақ қилип Йәһваниң көңлини хурсән қиливатимиз (Әфәс. 4:24).

14. Йәһваниң тәшкилатиниң әзаси сүпитидә, тарқилишчан жуқумлуқ вирус (COVID-19) мәзгилидә қандақ пайдиға ериштиңиз?

¹⁴ Әйса кризис мәзгилидә дана көрсәтмиләр билән тәминләйду. Униң пайдиси жуқумлуқ вирус (COVID-19) мәзгилидә көзгә көрүнәрлик болди. Дунияниң һәрқайси җайлирида нурғун кишиләр қандақ қилишни биләлмәй турғанда, Әйса бехәтәрлигимизни қоғдаш үчүн ениқ йол-йоруққа еришишимизгә капаләтлик қилди. Сиртқа чиққанда, кишиләр топлашқан җайларда, маска тақаш вә арилиқ  сақлашқа дәвәт қилиндуқ. Ақсақалларға әскәртишләр берилип, дайим җамаәтниң барлиқ әзалири билән алақә қилип, уларниң җисманий вә роһий җәһәттики еһтияҗлириға көңүл бөлүп туруш тәкитләнди (Йәшая 32:1, 2). Униңдин башқа, Рәһбәрлик кеңәш бәргән йеңи мәлуматлар арқилиқ қошумчә йол-йоруқ вә илһам-мәдәтләргә ериштуқ.

15. Жуқумлуқ вирус мәзгилидә, ибадәт жиғилиши вә вәз ейтиш хизмитигә қатнишиш үчүн қандақ көрсәтмиләр берилди вә нәтиҗиси қандақ болди?

¹⁵ Тарқилишчан жуқумлуқ вирус мәзгилидә, җамаәт жиғилишлири вә вәз ейтиш хизмитигә қандақ қатнишиш һәққидә ениқ көрсәтмиләргә ериштуқ. Наһайити тезла, интернет видеолуқ улиниш программа қураллири арқилиқ җамаәт жиғилишлири вә бир күнлүк вә үч күнлүк конгрессларға қатнишишқа башлидуқ. Биз йәнә кәң көләмдә дегидәк хәт йезиш вә телефон қилиш арқилиқ гувалиқ беришкә башлидуқ. Йәһва бизниң тиришчанлиғимизни бәрикәтлиди. Нурғун Бәйтәлдә вәз ейтқучилар саниниң көпләп ашқанлиғини ейтти. Әмәлийәттә, нурғун қериндашлар бу мәзгилдә кишини илһамландуридиған кәчүрмишләрни баштин өткүзди (« Йәһва вәз ишимизни бәрикәтлимәктә» намлиқ рамкиға қараң.).

16. Биз немигә ишинәләймиз?

¹⁶ Бәлким, бәзиләр бу тәшкилат тарқилишчан жуқумлуқ кесәлгә қарита толиму еһтиятчан болуп кәтти дәп һис қилғанду. Амма биз қобул қилған көрсәтмиләрниң дана йол-йоруқ екәнлиги қайта-қайта аян болди (Мәт. 11:19). Һәқиқәтән, Әйсаниң өз хәлқини меһир-муһәббәт билән йетәкләватқанлиғи тоғрилиқ чоңқур ойланғинимизда, әтә немә иш болушидин қәтъийнәзәр, Йәһва вә Униң сөйүмлүк Оғлиниң биз билән биллә болидиғанлиғиға ишинәләймиз (Ибранийларға 13:5, 6ни оқуң).

17. Әйсаниң йетәкчилиги астида болуп, өзүңизни қандақ һис қилисиз?

¹⁷ Әйса бизниң йетәкчимиз. Буниңдин интайин хошалмиз! Биз мәдәнийәт, милләт вә тил җәһәттики тосалғуларни йеңиватқан тәшкилатқа тәвәмиз. Биз роһий озуқлуқларға еришип, вәз хизмитини үнүмлүк қилиш үчүн тәрбийиләшләргә қатнишимиз. Һәрбиримиз шәхсән йеңи тәбиәтни кийиш, йәни миҗәз-хулуқни йетилдүрүш үчүн зөрүр ярдәмгә еришиватимиз. Бир-биримизни сөйүшни үгиниватимиз. Әйсаниң йетәкчимиз болғинидин пәхирлинишкә түрлүк сәвәплиримиз бар!