1. Биз немигә ишинимиз вә немә үчүн?

 ДУНИЯ вәзийитигә нәзәр салғиниңизда, барлиқ ишларниң яхши болуп кетидиғанлиғиға ишиниш сиз үчүн тәсму? Аилә риштиси бузулмақта. Көплигән кишиләр барғансири зораван, шәхсийәтчи вә қопал болуп кетиватиду. Нурғун адәмләрниң һоқуқдарларға ишиниши қийин болмақта. Амма булар һәммә ишларниң яхши болуп кетидиғанлиғиға сизни ишәндүрәләйду. Немә үчүн? Чүнки Муқәддәс китапта «ахирқи күнләрдә» инсанларниң қандақ болидиғанлиғи һәққидә бәшарәт қилинған (Тим. 2-х. 3:1—5). Бүгүнки күндә кишиләр әйнән бәшарәт қилинғандәк қиливатиду. Һечбир сәмимий адәм бу бәшарәтниң әмәлгә ешип келиватқанлиғини инкар қилалмайду. Бу Әйса Мәсиһниң Худа Падишалиғиниң Падишаси сүпитидә һөкүмранлиқ қилишқа башлиғанлиғини испатлайду. Амма бу Падишалиқ тоғрисидики нурғун бәшарәтләрниң пәқәт бири. Йеқинқи жилларда әмәлгә ашқан башқа бәшарәтләрни көрүп чиқиш иман-етиқадимизни күчәйтиду.

2. Бу мақалидә немиләрни муһакимә қилимиз вә немә үчүн? (Муқавидики рәсимгә изаһ бериң.)

² Бу мақалидә биз 1) Падишалиқниң қачан қурулғанлиғини чүшинишкә ярдәм беридиған бәшарәтни, 2) Әйса Мәсиһниң көзгә көрүнмәс һаләттә асманда Худаниң Падишалиғиниң Падишаси болидиғанлиғини чүшинишимизгә ярдәм беридиған бәшарәтләрни вә 3) Худа Падишалиғи дүшмәнлирини қандақ йоқ қилидиғанлиғини ашкарилайдиған бәшарәтләрни муһакимә қилимиз. Биз бу бәшарәтләрниң худди һәрбир ушшақ парчиларни җайи-җайиға мас кәлтүридиған сүрәтлик тепишмаққа охшайдиғанлиғини көрүмиз. Бу бизгә Йәһваниң вақит җәдвилидә, бизниң қәйәрдә туруватқанлиғимизни ениқ сүрәтләп көрситип бериду.

3. Даниял 7:13, 14-айәтләрдики бәшарәт, Худа Падишалиғиниң Падишаси һәққидә бизни немигә ишәндүриду?

³ Даниял 7:13, 14-айәтләрдики бәшарәт, Әйса Мәсиһниң Худа Падишалиғиниң әң яхши һөкүмрани болидиғанлиғиға бизни ишәндүриду. Һәр милләттин кәлгән кишиләр хошаллиқ билән «униңға хизмәт қилиду», униңдин кейин башқа бир һөкүмран кәлмәйду. Даниял китавидики йәнә бир бәшарәттә, йәттә дәвир вақит ахирлашқанда, Әйса Мәсиһниң Худа Падишалиғиниң Падишаси сүпитидә һөкүмранлиқ қилишни башлайдиғанлиғи тилға елинған. Ундақта, Әйса қачан Падиша болди?

4. Даниял 4:10—17 айәтләр Мәсиһниң қачан Падиша болидиғанлиғини һесаплап чиқишимизға қандақ ярдәм бериду? (Изаһәткә қараң.)

⁴ Даниял 4:10—17-ни оқуң. Йәттә дәвир 2520 жил вақитқа вәкиллик қилиду. Миладидин илгирики 607-жили, бабиллиқлар Йерусалимдики Йәһваниң тәхтидә олтарған әң ахирқи Падишани тәхттин чүшәргәндә, бу вақит башланған. Милади 1914-жили, Йәһва қануний һоқуқлуқ киши Әйсани Худа Падишалиғиниң Падишаси сүпитидә тәхткә олтарғузғанда, шу вақит ахирлашти b (Әзәк. 21:25—27).

5. Йәттә дәвир һәққидики бәшарәтни чүшәнсәк, биз үчүн қандақ пайдиси бар?

⁵ Бу бәшарәтниң биз үчүн қандақ пайдиси бар? «Йәттә дәвир» һәққидики бәшарәтни чүшәнсәк, Йәһваниң Өз вәдисини дәл вақтида орунлайдиғанлиғиға ишинимиз. Йәһва Худа Өзи Мәсиһ Падиша болидиған вақит-саатни бәлгүләп, вақти кәлгәндә уни Падишалиқ тәхтигә олтарғузди. Шуңа башқа барлиқ бәшарәтләрниңму У бәлгүлигән вақитта чоқум әмәлгә ашидиғанлиғини билимиз. Шундақ, Йәһваниң күни һәргиз кечиктүрүлмәйду (Һаб. 2:3).

6. а) Йәр йүзидә йүз бериватқан қайси ишлар Мәсиһниң асманда һөкүмранлиқ қиливатқанлиғини испатлайду? ә) Вәһий 6:2—8 айәтләрдики бәшарәтләр бу испатларни қандақ дәлилләйду?

⁶ Йәр йүзидики хизмити ахирлишишқа аз қалғанда, Әйса өз шагиртлириға муһим бир һәқиқәтни чүшәндүргән. Йәни у өзиниң асманда Падиша болуп, һөкүмранлиқ қилишни башлиғанлиғини көрситидиған бәзи иш-вақиәләрниң йүз беридиғанлиғини бәшарәт қилған еди. У тилға алған ишлар ичидә уруш, ачарчилиқ вә йәр тәврәшләр бар. У йәнә ваба яки жуқумлуқ кесәлликләрниң җай-җайларда болидиғанлиғини бәшарәт қилған. Таҗсиман жуқумлуқ вирус (COVID-19) буниң бир мисали (Мәт. 24:3, 7; Луқа 21:7, 10, 11). У тирилдүрүлүп асманға көтүрүлгәндин 60 жилдин көпирәк вақит өткәндә, Әйса әлчи Йоһанға бу иш-вақиәләрниң йүз беридиғанлиғини йәниму рошән көрсәткән (Вәһий 6:2—8ни оқуң). Шу вақиәләрниң һәммиси, Әйса 1914-жили Падиша болғандин бу ян йүз бәргән.

7. Немә үчүн Әйса Падиша болғандин бу ян йәр йүзидә яман ишлар көпләп йүз бәрди?

⁷ Немә үчүн Әйса Падиша болғанда, дунияниң вәзийәтлири начарлишишқа йүзләнди? Вәһий 6:2-айәттә муһим тәпсилатлар берилгән — йеңила Падишалиқ таҗини кийгән Мәсиһниң биринчи вәзиписи җәң қилиш болған. Кимгә қарши? Иблис вә униң җинлириға қарши. Вәһий 12-бапқа асасланғанда, Шәйтан җәңдә мәғлуп болуп, у вә җинлар йәр йүзигә ташланған. Буниңдин қаттиқ ғәзәпләнгән Шәйтан инсанийәттин аччиғини чиқиришқа башлап, нәтиҗидә йәрниң һалиға вай дегән сөзләр әмәлгә ешишқа башлиди (Вәһ. 12:7—12).

8. Падишалиқ тоғрисидики бәшарәтләрниң әмәлгә ешиватқанлиғини көрүшниң биз үчүн қандақ пайдиси бар?

 ⁸ Бу бәшарәтләрниң биз үчүн қандақ пайдиси бар? Жуқурида сөзләп өткинимиздәк, кишиләрниң позицияси, йәни көзқаришидики рошән өзгириш бизгә Әйсаниң Падиша болғанлиғини тонуп йетишимизгә ярдәм бериду. Шуңа биз кишиләрниң шәхсийәтчилик вә қопаллиқ билән һәрикәт қиливатқанлиғини көргинимиздә көңлүмизни йерим қилмастин, уларниң иш-һәрикәтлириниң Муқәддәс китаптики бәшарәтләрни әмәлгә ашуруватқанлиғини әскә алимиз. Падишалиқ аллиқачан һөкүмранлиғини башлиди! (Зәб. 37:1) Биз Армагедон урушиниң йеқинлишишиға әгишип дунияда азап-оқубәтләрниң көпийип кетидиғанлиғини көримиз (Марк 13:8; Тим. 2-х. 3:13). Биз асмандики көйүмчан Атимизниң немә үчүн дунияда шунчә көп қийинчилиқларниң болуватқанлиғини чүшинишимизгә ярдәм бериватқанлиғиға интайин миннәтдармиз!

9. Мәсиһ Падиша болуп һөкүмранлиқ қилишни башлиғанда, қайси дуниявий күч һөкүмранлиқ жүргүзиватқан болиду? (Даниял 2:28, 31—35)

⁹ Даниял 2:28, 31—35ни оқуң. Биз йәнә бу бәшарәтниң бүгүнки күндә әмәлгә ашқанлиғини көрүватимиз. Нәбукәднәсарниң чүши Мәсиһниң һөкүмранлиғи башланғандин кейин, заманниң ахирқи күнидә қандақ ишларниң йүз беридиғанлиғини көрситип бәргән. Әйсаниң йәр йүзидики дүшмәнлири Муқәддәс китапта бәшарәт қилинған һәйкәлниң төмүр вә сеғиз лай арилашқан пути вәкиллик қилидиған әң ахирқи дуниявий күчни өз ичигә алиду. Бу дуниявий күч аллиқачан пәйда болди. У биринчи дуния уруши мәзгилидә Англия билән Америка алаһидә һәмкарлиқ орнатқанда барлиққа кәлгән. Нәбукәднәсарниң чүшидики һәйкәл йәнә бу дуниявий күчиниң илгирики падишалиқлардин кам дегәндә икки җәһәттин пәриқлиқ екәнлигини бәшарәт қилған.

10. а) Даниялниң бәшарити Англо-Америка иттипақини қандақ тоғра тәсвирләп бәргән? ә) Биз немә қилиштин еһтият қилишимиз керәк? (« Лайдин еһтият қилиң!» дегән рамкиға қараң.)

 ¹⁰ Биринчи, чүштики көрүнүштә тәсвирләнгән илгирики дуния күчлиригә охшимайдиған йери, Англо-Америка иттипақи алтун яки күмүштәк қаттиқ металл әмәс, бәлки төмүр билән сеғиз лайниң арилашмиси билән символ қилинған. Бу сеғиз лай падишалиқниң пухралири, йәни адәттики кишиләргә вәкиллик қилиду (Дан. 2:43). Бүгүн шуни ениқ көрәләймизки, кишиләрниң сайламға тәсир қилиши, пухралар һоқуқлирини тәшвиқ қилиш паалийити, қаршилиқ намайишлири вә ишчилар оюшмилири бу дуния күчи һөкүмранлириниң қилмақчи болған ишлирини қийинлаштуриду.

11. Англо-Америка дуния күчиниң һөкүмранлиқ қилиши ахир заманда яшаватқанлиғимизға болған ишәнчимизни қандақ күчәйтиду?

¹¹ Иккинчи, ғайәт зор һәйкәлниң путиға символ қилинған Англо-Америка Муқәддәс китапта алдин-ала ейтилған әң ахирқи дуния күчи. Униңдин кейин башқа бир инсаний һөкүмәт мәйданға кәлмәйду. Бәлки, Худа Падишалиғи бу ахирқи дуния күчи вә башқа барлиқ инсаний һөкүмәтләрни Армагедон урушида тамамән йоқ қилиду c (Вәһ. 16:13, 14, 16; 19:19, 20).

12. Даниялниң бәшарити заманниң ахирқи күнидә яшаватқанлиғимизни қандақ қошумчә испат билән тәминләйду?

¹² Бу бәшарәтниң биз үчүн қандақ пайдиси бар? Даниялниң бәшарити заманниң ахирқи күнидә яшаватқанлиғимизни қошумчә испат билән тәминләйду. 2500 жилдин көпирәк вақит илгири, Даниял Бабилдин кейин, башқа төрт чоң дуния күчиниң Худа хәлқи үстидин һөкүмранлиқ жүргүзидиғанлиғини бәшарәт қилған еди. Униңдин башқа, Даниял булардин әң ахирқиси болған Англо-Америка дуниявий күчиниң Мәсиһ Падишалиқ қилишқа башлиғанда, бирликтә мәвҗут болуп туридиғанлиғини ашкарилиған. Бу бизгә тәсәлли вә үмүт бериду. Чүнки пат йеқинда, Худа Падишалиғи барлиқ инсаний һөкүмәтләрни йоқ қилип, пүткүл йәр йүзи үстидин һөкүмранлиқ қилиду (Дан. 2:44).

13. Вәһий 17:9—12 айәтләрдә тилға елинған «сәккизинчи падиша» вә «он падиша» немигә символ қилинған? Бу бәшарәт қандақ әмәлгә ашурулған?

¹³ Вәһий 17:9—12ни оқуң. Биринчи дуния уруши шунчә көп вәйранчилиқларға сәвәпчи болуп, ахирқи күнләр тоғрисидики башқа бәшарәтләрни әмәлгә ашурған ишлар йүз бәргән. Дуния рәһбәрлири бу дунияда тинчлиқни орнатмақчи болди. Шуңа 1920-жили, январь ейида улар Дөләтләр Иттипақини қурди. Бу тәшкилатниң орнини 1945-жили октябрьдә Бирләшкән Дөләтләр Тәшкилати алди. Бу тәшкилат «сәккизинчи падиша» дәп атилиду. Амма у дуниявий күч әмәс. Униң күчи вә тәсири уни қоллайдиған һөкүмәтләрдин келиду. Муқәддәс китап символлуқ мәнада бу һөкүмәтләрни «он падиша» дәп атиған.

14, 15. а) Вәһий 17:3—5 айәтләр «Бүйүк Бабил» һәққидә немиләрни ашкарилайду? ә) Ялған динни қоллиғучилар ға немә иш болуватиду?

¹⁴ Вәһий 17:3—5ни оқуң. Худаниң илһамландуруши астида, әлчи Йоһан дунияниң сахта дин империясигә символ қилинған бир паһишә аял «Бүйүк Бабилни» көргән. Бу бәшарәтлик көрүнүш қандақ әмәлгә ашурулди? Сахта диний тәшкилатлар узундин бу ян дунияниң сәясий күчлири билән йеқиндин һәмкарлишип, уларни қоллап-қувәтлиди. Амма узун өтмәй, Йәһва Өз ой-пикирлирини сәясий күчләрниң қәлбигә салиду вә улар Худаниң ой-пикрини әмәлгә ашуриду. Нәтиҗидә немә болиду? Әшу сәясий күчләр, йәни «он падиша» сахта диний тәшкилатларға һуҗум қилип, уларни йоқитиду (Вәһ. 17:1, 2, 16, 17).

¹⁵ Бүйүк Бабилниң вәйран қилиниш вақти йеқинлашқанлиғини қандақ билимиз? Бу  соалға җавап беришкә қедимқи Бабил шәһирини һәйвәтлик Фират дәриясиниң сүйи қисмән қоғдиғанлиғини әскә елиш ярдәм бериду. Вәһий китави Бүйүк Бабилниң миллионлиған қоллиғучилирини қоғдиғучи «сулар» билән селиштурған (Вәһ. 17:15). Амма у йәнә суниң «қуруп кетидиғанлиғини» ашкарилап, бу дунияниң сахта дин империяси нурғун қоллиғучилиридин айрилип қалидиғанлиғини көрсәткән (Вәһ. 16:12). Бүгүнки күндә бу бәшарәт әмәлгә ешиватиду, чүнки хелә көп кишиләр сахта диндин ваз кечип, башқа җайлардин өз қийинчилиқлирини һәл қилишниң йоллирини издәватиду.

16. Бирләшкән Дөләтләр Тәшкилатиниң мәйданға келиши вә Бүйүк Бабилниң йоқ қилиниши тоғрисидики бәшарәтләрни чүшинишниң биз үчүн қандақ пайдиси бар?

¹⁶ Бу бәшарәтләрниң биз үчүн қандақ пайдиси бар? Бирләшкән Дөләтләр Тәшкилатиниң мәйданға келиши вә нурғун кишиләрниң сахта динларни қоллаштин ваз кечиши бизниң заманниң ахирқи күнлиридә яшаватқанлиғимизни испатлап бериду. Гәрчә көплигән кишиләр әнди Бүйүк Бабилни қоллимисиму, бу дегәнлик сахта тәшкилатлар пүтүнләй йоқ қилинғанлиғини билдүрмәйду. Униң вәйран қилиниши башқичә усулда болиду. Жуқурида  көрүп өткинимиздәк, Йәһва Өз ой-пикрини «он падиша», йәни Бирләшкән Дөләтләр Тәшкилатини қоллайдиған сәясий күчләрниң қәлбигә салиду. Улар Йәһваниң мәхситини әмәлгә ашуриду. Әшу дөләтләр туюқсиз сахта динни йоқ қилиду. Буниңға бу дуния һәйран қалиду d (Вәһ. 18:8—10). Бүйүк Бабилниң вәйран болуши пүткүл дунияға күчлүк тәсир қилиду. Амма Худа хәлқиниң шат-хорам болушиниң кам дегәндә икки сәвәви бар. Пат йеқинда узундин бу ян Худа билән дүшмәнлишип келиватқан сахта дин мәңгү йоқ қилиниду вә бу рәзил дуниядин қутулимиз! (Луқа 21:28)

17, 18. а) Давамлиқ иман-етиқадимизни қандақ мустәһкәмләләймиз? ә) Кейинки мақалидә немиләр тоғрисида муһакимә қилимиз?

¹⁷ Даниял тоғра билимниң мол болидиғанлиғини бәшарәт қилған еди. Һәқиқәтән шундақ мол болди! Биз яшаватқан заманимиз тоғрисидики бәшарәтләрни һазир чүшинимиз (Дан. 12:4, 9, 10). Бу бәшарәтләр бәк тоғра болуп, улар бизниң Йәһваға болған һөрмәт-еһтирамимизни ашуриду (Йәшая 46:10; 55:11). Шуңа Муқәддәс китапни әстаидиллиқ билән тәтқиқ қилип үгинип вә башқиларниң Йәһва билән достлуқ мунасивәтни йетилдүрүшигә ярдәм бериш арқилиқ иман-етиқадиңизни давамлиқ мустәһкәмләң. У Өзигә пүтүнләй ишәнч қилғанларниң һәммисини қоғдайду вә уларға үзлүксиз тинчлиқ бериду (Йәшая 26:3).

¹⁸ Кейинки мақалидә, заманниң ахирқи күнлиридики Мәсиһ әгәшкүчилири җамаити тоғрисидики бәшарәтләрни муһакимә қилимиз. Шуни көрүмизки, бу бәшарәтләр заманниң ахирқи күнлиридә яшаватқанлиғимизни көрситидиған башқа барлиқ бәшарәтләргә мас келиду. Биз Падишайимиз Әйса Мәсиһниң һазир өзиниң садиқ әгәшкүчилирини қизғинлиқ билән йетәкләватқанлиғиға аит техиму көп испатларни көримиз.