1, 2. Әгәр сиз чөмдүрүлүшкә техи тәйяр болмиған болсиңиз, немә үчүн үмүтсизләнмәслигиңиз керәк? (Муқавидики рәсимгә қараң.)

 ӘГӘР сиз чөмдүрүлүшни халисиңиз, өзүңиз үчүн әң яхши мәхсәт қойған болисиз. Һазир бу қәдәмни бесишқа тәйяр болдиңизму? Әгәр тәйяр болсиңиз вә ақсақалларниң чөмдүрүлүшиңизгә қошулидиғанлиғиға ишәнсиңиз, ундақта иккиләнмәй чөмдүрүлүштин өтүң. Шундила Йәһваға хизмәт қилип, қанаәтлинәрлик һаят кәчүрисиз.

² Униңдин башқа, башқилар сизгә чөмдүрүлүштин илгири техиму көпирәк илгириләш керәклигини ейттиму? Яки буни өзүңиз һис қилдиңизму? Әгәр шундақ болса, үмүтсизләнмәң. Мәйли яш яки яшанған болуң, бу муһим қәдәмни бесиш үчүн алға илгириләләйсиз.

3. Эфиопиялик әмәлдар Филиптин немини сориған вә нәтиҗидә қандақ соал пәйда болған? (Әлчиләр 8:36, 38)

³ Әлчиләр 8:36, 38ни оқуң. Эфиопиялик орда әмәлдари хуш хәвәр йәткүзгүчи Филиптин: «Мениң чөмдүрүлүшүмгә немә тосқунлуқ қилалайду?»— дәп сориған. Эфиопиялик бу киши суға чөмдүрүлүшни арзу қилған, бирақ у растинла чөмдүрүлүшкә тәйяр болғанму?

4. Эфиопиялик киши өзиниң давамлиқ үгинишни қәтъий қарар қилғанлиғини қандақ көрсәткән?

⁴ Әшу эфиопиялик киши Йерусалимға ибадәт қилиш үчүн барған еди (Әлч. 8:27). Демәк, у чоқум йәһудий диниға етиқат қилидиған киши болған. У йәһудий динини қобул қилған чәт әллик киши еди. Шәк-шүбһисизки, у Йәһва Худа һәққидә ибранийчә Муқәддәс Язмилардин үгәнгән. Униң техиму көпирәк нәрсиләрни үгиниш арзу-истиги күчлүк еди. Әмәлийәттә, Филип йолда әшу әмәлдар билән көрүшкәндә, әмәлдарниң немә иш қиливатқанлиғини байқиған. У Йәшая пәйғәмбәрниң Язмилирини  оқуватқан еди (Әлч. 8:28). У оқуватқан бу Язмиларда чоңқур һәқиқәтләр бар еди. Әшу әмәлдар пәқәт азғина асаси билимләрни билиш биләнла қанаәт қилмиған. У давамлиқ көпирәк билим елишни халиған еди.

5. Эфиопиялик киши үгәнгән һәқиқәтләргә мас немә қилған?

⁵ Бу киши эфиопиялик аял падиша Кандасниң қол астидики жуқури дәриҗилик әмәлдар еди (Әлч. 8:27). У ғәзниләрни башқуратти. Шуңа, у чоқум нурғун вәзипиләр билән алдираш өтидиған адәм болған. Шундақтиму, у вақит чиқирип, Йәһва Худаға ибадәт қилған. У пәқәт һәқиқәтни үгиниш биләнла қанаәт тапмиған, әксичә үгәнгәнлири бойичә иш қилған. Шуңа, у Йәһваға ибадәт қилиш үчүн Эфиопиядин Йерусалимдики ибадәтханиға барған. Бу сәпәр үчүн чоқум нурғун вақит вә пул хәшләшкә тоғра келиду. Бирақ бу киши Худаға ибадәт қилиш үчүн һәрқандақ бәдәл төләштин баш тартмиған.

6, 7. Эфиопиялик кишиниң Йәһваға болған муһәббити қандақ күчәйгән?

⁶ Эфиопиялик киши Филиптин ким Мәсиһ екәнлигини өз ичигә алған бәзи муһим йеңи һәқиқәтләрни үгәнгән (Әлч. 8:34, 35). Бу орда әмәлдари Әйсаниң өзи үчүн немиләрни қилғанлиғини билгән. Бу уни немә қилишқа дәвәт қилған? У илгирикидәкла һөрмәткә сазавәр йәһудий диниға етиқат қилидиған киши болуп қалалатти. Әксичә, униң Йәһваға вә Униң Оғлиға болған муһәббити күчийип, Әйса Мәсиһниң әгәшкүчиси сүпитидә чөмдүрүлүшни қобул қилип, һаятини өзгәртиш қарариға кәлгән. Бу кишиниң тәйяр болғанлиғини көргән Филип уни суға чөмдүргән.

⁷ Әгәр сиз Эфиопиялик әмәлдарни үлгә қилсиңиз, чөмдүрүлүшкә тәйярлиқ қилалайсиз. Сизму қәтъий ишәнч билән «Мениң чөмдүрүлүшүмгә немә тосқунлуқ қилалайду?» дейәләйсиз. Эфиопиялик киши басқан қәдәмләрни қандақ басалайдиғанлиғиңизни бирликтә муһакимә қилип бақайли. У билим елишни давамлаштурди, үгәнгәнлиригә мас һәрикәт қилди вә давамлиқ өзиниң Худаға болған муһәббитини күчләндүрди.

8. Йоһан 17:3-айәт сизни немә қилишқа үндәйду?

⁸ Йоһан 17:3ни оқуң. Әйсаниң бу сөзлири Муқәддәс китапни тәтқиқ қилишни қарар қилишиңизға ярдәм қилдиму? Нурғунлиримизға шундақ ярдәм қилған. Амма охшаш сөзләр йәнә бизни давамлиқ билим елишқа үндәмду? Әлвәттә. Биз һәргизму бирдинбир һәқ Худа һәққидә билим елишни тохтатмаймиз (Вәз 3:11). Мәңгү үгинимиз, давамлиқ билим алимиз. Қанчә көп үгәнгәнсири, Йәһваға техиму йеқинлишимиз (Зәб. 73:28).

9. Муқәддәс китаптики асаси тәлимлирини үгәнгәндин кейин чоқум немә иш қилишимиз керәк?

⁹ Чүшинишкә болидуки, Йәһва Худа һәққидә үгиниш Муқәддәс китапниң асаси тәлимлирини үгиништин башлиниду. Әлчи Паул  ибранийларға язған хетидә асасий тәлимләрни башланғуч тәлимләр дәп атап, әшу тәлиматни камситмиған. У уни бовақни озуқландуридиған сүт билән селиштурған еди (Ибр. 5:12; 6:1). У барлиқ Мәсиһ әгәшкүчилирини әшу асасий тәлимләр билән чәклинип қалмай, Худа Сөзидики техиму чоңқур һәқиқәтләрни үгинишкә дәвәт қилған. Сизму ечирқиған қәлбиңизни Муқәддәс китаптики чоңқур һәқиқәтләр билән озуқландурушқа адәтләндиңизму? Сиз давамлиқ өсүп йетилишни, йәни Йәһва вә Униң ирадиси һәққидә давамлиқ билим елишни халамсиз?

10. Немә үчүн бәзиләр тәтқиқ қилип үгинишни қийин һис қилиду?

¹⁰ Бәлким, тәтқиқ қилип үгиниш нурғунлиримиз үчүн қийин бир иш болуши мүмкин. Сизму қийин һис қиламсиз? Мәктәптә чоңқурирақ тәтқиқ қилип үгинишни яки яхширақ оқушни үгәнгәнму? Тәтқиқ қилип үгинишниң кишигә хошаллиқ беғишлап, көңлини қанаәт тапқузидиғанлиғини байқиғанму? Яки китаплардин үгинишкә өзүңизни анчә маһир әмәстәк һис қилғанмидиңиз? Ялғуз сизла әмәс, нурғун кишиләр шундақ һис қилиду. Амма Йәһва сизгә ярдәм берәләйду. У мукәммәл вә каинаттики әң яхши Устаз!

11. Йәһва Өзиниң улуқ Устаз екәнлигини қандақ испатлайду?

¹¹ Йәһва Өзини улуқ Устаз дәп атайду (Йәшая 30:20, 21). У сәвирчан, ақ көңүл, башқиларни чүшинидиған муәллим. У оқуғучиларниң яхшилиқ тәрипини көрүшкә тиришиду (Зәб. 130:3). У биздин қилалмайдиған ишни қилишни тәләп қилмайду. Есиңиздә болсунки, У әҗайип бир соғини, йәни мейимизни Өзи лайиһилигән (Зәб. 139:14). Үгинишкә интилидиған ач тәбиитимиз бар. Яратқучимиз бизниң үгинишни мәңгү давамлаштурушимизни вә Униңдин һузур елишимизни үмүт қилиду. Шуңа, һазирниң өзидә Муқәддәс Язмилардики һәқиқәткә болған тәшналиқни йетилдүрүш әң әқиланә иштур (Пет. 1-х. 2:2). Сиз өзүңиз йетәлигидәк мәхсәтләрни қоюп, һәмдә Муқәддәс китап оқуш вә тәтқиқ қилип үгиниш вақит җәдвилини түзүп, шуниңға қәтъий әмәл қилиң (Йәшуа 1:8). Йәһва Худаниң ярдими билән У һәққидә көпирәк оқуш вә тәтқиқ қилип үгиништин һузур алалайсиз.

12. Немә үчүн шәхсий тәтқиқ үгинишимиздә диққитимизни Әйсаға қаритишимиз керәк?

¹² Һәрдайим Әйсаниң һаяти вә вәз хизмити һәққидә чоңқур ойлиниң. Болупму бүгүнки күндә қийин вәзийәтләрдә Йәһваға хизмәт қилишни халисақ, чоқум Әйсаниң изидин әгишип меңишимиз керәк. Бу бәк муһим! (Пет. 1-х. 2:21) Әйса өз әгәшкүчилиригә қийинчилиқларға дуч келидиғанлиғини очуқ ейтқан еди (Луқа 14:27, 28). Шундақтиму, у өзиниң һәқиқий әгәшкүчилириниң худди өзигә охшаш, Худаға садиқ қалалайдиғанлиғиға ишәнгән (Йоһ. 16:33). Әйсаниң һаят кәчүрмишлири һәққидики тәпсилатларни тәтқиқ қилип үгиниң вә күндилик һаятиңизда уни үлгә қилиш үчүн өзүңизгә мәхсәт қоюң.

13. Йәһваға немә һәққидә дуа қилишиңиз керәк вә немә үчүн?

¹³ Пәқәт билим болсила, йетәрлик әмәс. Билим елиштики асаси мәхсәт — Йәһва һәққидә техиму чоңқурирақ һәқиқәтләрни билиш вә униңға болған муһәббәт вә ишәнч дегәнгә охшаш һәртүрлүк сүпәтләрни йетилдүрүш (Кор. 1-х. 8:1—3). Үгинишни давамлаштурғиниңизда, Йәһва Худадин иман-етиқадиңизни күчәйтиш үчүн ярдәм сораң (Луқа 17:5). У дуаларға сехийлиқ билән җавап бериду. Худайимиз һәққидики тоғра билимгә асасланған һәқиқий етиқат алға илгирилишиңизгә ярдәм бериду (Яқуп 2:26).

14. Әлчи Петрус үгәнгәнлиримизгә мас әмәлий һәрикәт қилишниң муһимлиғини қандақ тәкитлигән? (Рәсимгиму қараң.)

¹⁴ Әлчи Петрус Мәсиһ әгәшкүчилириниң алған билимлиригә мас һәрикәт қилишиниң интайин муһимлиғини тәкитлигән. У Муқәддәс Язмилардин Нуһ пәйғәмбәр тоғрисидики үзүндиләрни тилға алған. Йәһва Худа Нуһ пәйғәмбәргә  топан арқилиқ шу замандики рәзил кишиләрни һалак қилидиғанлиғини ейтқан. Нуһ вә униң аилисидикиләрниң аман қелиши үчүн келәчәктә топан сүйиниң келидиғанлиғини билиш йетәрлик әмәс еди. Буниңға диққәт қилсиңиз, Петрус топандин бурунқи вақитни «кемә ясиливатқан мәзгил» дәп тилға алған (Пет. 1-х. 3:20, КТ). Нуһ вә униң аилисидикилири ғайәт зор кемә ясап, Худадин үгәнгәнлиригә мас әмәлий һәрикәт қилған (Ибр. 11:7). Шуңа, Петрус Нуһниң қилған ишлирини чөмдүрүлүш билән селиштуруп мундақ язған: «Суға чөмдүрүш... қутқузиду» (Пет. 1-х. 3:21). Мәлум мәнада ейтқанда, чөмдүрүлүшкә тәйярлиқ қилиш үчүн һазир қиливатқан ишлиримизни Нуһ вә униң аилисидикилириниң кемә ясаш үчүн нурғун жил қилған хизмәтлири билән селиштурушқа болиду. Ундақта, чөмдүрүлүшкә тәйярлиқ қилиш үчүн немә иш қилишиңиз керәк?

15. Чиң қәлбидин һәқиқий товва қилиш немиләрни өз ичигә алиду?

¹⁵ Чоқум биринчи болуп қилидиған ишимиз — гуналиримизға сәмимий товва қилиш (Әлч. 2:37, 38). Чин қәлбимиздин товва қилсақ, һәқиқий өзгәртишләрни қилимиз. Йәһвани хурсән қилмайдиған һәрқандақ начар қилмишларни, йәни әхлақсиз турмуш кәчүрүш, тамака чекиш, яман сөзләрни яки һақарәтлик сөзләрни қилишни ташлидиңизму? (Кор. 1-х. 6:9, 10; Кор. 2-х. 7:1; Әфәс. 4:29) Әгәр сиз техи шундақ қилмиған болсиңиз, давамлиқ өзүңизни өзгәртиш үчүн тиришиң. Сиз билән Муқәддәс китапни тәтқиқ қилип үгиниватқан Гувачи билән параңлишиң яки җамаәт ақсақаллиридин ярдәм вә көрсәтмә сораң. Әгәр техи яш вә йәнила ата-аниңиз билән яшаватқан болсиңиз, чөмдүрүлүшиңизгә тосқунлуқ қилидиған һәрқандақ начар адәтләрни ташлаш үчүн ата-аниңиздин ярдәм сораң.

16. Роһий ишлар билән мәшғул болушқа адәтлиниш немиләрни өз ичигә алиду?

¹⁶ Роһий ишлардин мәшғул болуш адитини йетилдүрүп, һәрдайим униңға әмәл қилиш наһайити муһим. Бу Мәсиһ әгәшкүчилириниң ибадәт жиғилишлириға қатнишиш вә жиғилишта җавапларни беришни өз ичигә алиду (Ибр. 10:24, 25). Вәз хизмитигә қатнишишқа лайәқәтлик болғандин кейин, дайим вәз хизмитигә чиқиш адитини йетилдүрүң. Сиз бу һаятни қутқузидиған муһим хизмәткә қанчә көпирәк қатнашсиңиз, униңдин шунчә көп хошаллиқ таписиз (Тим. 2-х. 4:5). Әгәр техи яш вә ата-аниңиз билән яшаватқан болсиңиз, өзүңиздин мундақ сорап көрүң: «Ата-анам җамаәт  жиғилишиға қатнишишим яки вәз хизмитигә чиқишим керәклигини әскәртәмду яки өзүм тәшәббускарлиқ билән шундақ қилимәнму?» Роһий иш-паалийәтләргә тәшәббускарлиқ билән қатнишиш арқилиқ иман-етиқадиңизни ипадиләп, Йәһва Худаға болған муһәббитиңиз вә миннәтдарлиғиңизни көрситисиз. Худаға беғишланған шундақ иш-һәрикәтлириңиз Йәһваға тәғдим қилған соғилириңиздур (Пет. 2-х. 3:11; Ибр. 13:15). Мәҗбурий әмәс, өз ихтияриңиз билән сунған һәдийәләрниң һәммиси Худайимизни хурсән қилиду (Коринтлиқларға 2-хәт 9:7ни селиштуруң). Роһий иш-паалийәтләргә пүтүн күчимиз билән қатнишишқа тиришсақ, Йәһва Худа қолумиздин кәлгинини Униңға тәғдим қилғинимиздин мәмнун болиду.

17, 18. Чөмдүрүлүшкә лайиқ болуш үчүн илгирилишиңизгә қандақ муһим пәзиләт ярдәм бериду вә немә үчүн? (Пәнд-нәсиһәтләр 3:3—6)

¹⁷ Чөмдүрүлүшкә лайәқәтлик болуш үчүн давамлиқ тиришиватқиниңизда, қийинчилиқларға учрайсиз. Бәзиләр йеңи иман-етиқадиңиз сәвәплик сизни мәсхирә қилишиду (Тим. 2-х. 3:12). Улар һәтта сизгә қарши чиқиши яки зиянкәшлик қилиши мүмкин. Начар адәтлириңизни ташлаш үчүн тиришиватқанда, анда-санда уни қайта тәкрарлап қоюшиңиз муһим. Бәлким, мәхситиңизгә йетиш техи мүмкин әмәстәк көрүнүп, сәвир-тақәт қилалмай, көңлүңиз йерим болиду. Чидамчан болушиңизға немә ярдәм қилиду? Интайин муһим бир пәзиләт — Йәһваға болған меһир-муһәббәт.

¹⁸ Йәһва Худаға болған муһәббәт әң есил бир пәзиләт. Сиздиму шундақ есил пәзиләт бар (Пәнд-нәсиһәтләр 3:3—6ни оқуң). Худаға болған күчлүк муһәббәт һаяттики қийинчилиқларға оңушлуқ тәқабил турушиңизға ярдәм берәләйду. Муқәддәс китапта һемишә Йәһваниң Өз хизмәтчилиригә болған садиқ меһир-муһәббити тилға елинған. Бу һәргиз йоқалмайдиған вә һәргиз бузулмайдиған күчлүк сөйгү риштиси (Зәб. 100:5). Сиз Худаниң образида яритилған (Ярит. 1:26). Бундақ муһәббәтни өзүңиздә әкс әттүрүш үчүн немә қилалайсиз?

19. Йәһваниң сиз үчүн қилған ишлириға болған миннәтдарлиғиңизни қандақ билдүрәләйсиз? (Галатилиқларға 2:20)

¹⁹ Миннәтдарлиқни ипадиләш билән башлаң (Сал. 1-х. 5:18). Һәр күни өз-өзүңиздин: «Йәһва маңа сөйгү-муһәббитини қандақ көрситип келиватиду?»— дәп сорап беқиң. Кейин У сиз үчүн қилған ишларни дуалириңизда ениқ тилға елип, рәхмәт ейтиң. Худди әлчи Паулға охшаш, Йәһва сизни сөйгәчкә, шу ишларни сиз үчүн қилғанлиғини көрүп йетиң (Галатилиқларға  2:20ни оқуң). Өз-өзүңиздин сорап беқиң: «Униңға җававән өзүмниң сөйгү-муһәббитимни көрситишни халаймәнму?» Йәһваға болған муһәббәт езиқтурушларға қарши турушиңизға вә түрлүк қийинчилиқларға оңушлуқ тәқабил турушиңизға ярдәм бериду. Йәнә роһий иш-паалийәтләр билән мәшғул болуш адитиңизни қәтъий давамлаштурушқа вә һәр күни асмандики Атиңизға болған сөйгүңизни нәмаян қилишқа үндәйду.

20. Өзүңизни Йәһваға беғишлаш немиләрни өз ичигә алиду? Бу қарар қанчилик муһим?

²⁰ Вақти кәлгәндә, Йәһваға болған муһәббитиңиз сизни алаһидә бир дуани қилишқа дәвәт қилиду. Йәни, сиз дуада өзүңизни Худаға беғишлайсиз. Есиңиздә болсунки, өзүңизни Йәһваға беғишлиғандин кейин, әҗайип бир келәчигиңиз болиду. Сиз Униңға мәңгү тәвә болисиз. Һаятиңизни Йәһваға беғишлиғанда, мәйли яхши яки яман күнләрдә униңға хизмәт қилидиғанлиғиңизни вәдә қилисиз. Бу вәдини қайта йеңилашниң һаҗити йоқ. Дәрвәқә, биз өзүмизни беғишлиғанда, бу муһим қәдәмни басимиз. Бирақ бу һәққидә ойлап көрүң: һаятиңизда нурғун қарарларни чиқирисиз. Уларниң бәзилири бәк яхши. Бирақ һаятиңизни Йәһва Худаға беғишлаш әң яхши қарар (Зәб. 50:14). Шәйтан сизниң садақәтмәнлигиңиздин ваз кечишиңизни халиғачқа, Атиңизға болған муһәббитиңизни аҗизлаштурушқа тиришиду. Һәргизму Шәйтанниң ғәлибә қилишиға йол қоймаң (Аюп 27:5). Йәһваға болған күчлүк муһәббитиңиз, өзүңизни беғишлиғанда бәргән вәдиңизгә әмәл қилип яшишиңизға вә асмандики Атиңизға техиму йеқинлишишиңизға ярдәм бериду.

21. Немә үчүн чөмдүрүлүш ахирлишиш әмәс, бәлки башлиниш дәп ейталаймиз?

²¹ Өзүңизни Йәһва Худаға беғишлиғандин кейин, кейинки муһим қәдәмни бесиш тоғрисида җамаәттики ақсақаллар билән параңлишиң. Һәрдайим есиңиздә болсунки, чөмдүрүлүш у ахирлишиш әмәс, бәлки башлиниш. У Йәһваға хизмәт қилишниң түгимәс һаят мусабисини башлайду. Шуңа, һазирниң өзидә асмандики Атиңизға болған муһәббитиңизни күчәйтиң. Мәхсәтләрни қоюң. Шундила униңға болған муһәббитиңиз күндин-күнгә күчийиду. Бу ахирида сизни чөмдүрүлүшкә тәйярлайду. Әшу күн әҗайип гөзәл бир күн болиду. Амма бу пәқәт бир башлиниш. Йәһваға вә Униң Оғлиға болған сөйгү-муһәббитиңиз мәңгү күчәйсун!