1. Йәһва бизниң Униңға йеқинлишишимизни халайдиғанлиғини қандақ билимиз?

 ЙӘҺВА ХУДА бизни Өзигә йеқинлишишқа тәклип қилиду (Яқуп 4:8). У бизниң Худайимиз, Атимиз вә Достимиз болушини халайду. У дуалиримизға җавап бериду вә қийинчилиққа дуч кәлгән вақтимизда ярдәм қилиду. У Өз тәшкилати арқилиқ бизгә тәлим бериду вә бизни қоғдайду. Ундақта, Йәһваға йеқинлишиш үчүн биз чоқум немә қилишимиз керәк?

2. Йәһваға йеқинлишиш үчүн немә қилалаймиз?

² Биз дуа қилиш, Худа сөзини оқуш вә униң үстидә чоңқур ойлиниш арқилиқ Йәһваға йеқинлишалаймиз. Шундақ қилғинимизда, Униңға болған сөйгү-муһәббитимиз күчийиду вә миннәтдарлиғимиз техиму чоңқурлишиду. Униңға бойсунушқа вә Уни мәдһийиләшкә пүтүн күчимиз билән тиришимиз, чүнки У буниңға лайиқтур (Вәһ. 4:11). Биз Йәһвани қанчә йеқин тонуғансири, Униңға вә бизни ярдәм билән тәминләйдиған Униң тәшкилатиға болған ишәнчимиз шунчә күчийиду.

3. Иблис бизни Йәһвадин айриш үчүн немә қилиду, бирақ Худайимиз вә Униң тәшкилатини ташлап кәтмәслигимизгә немә ярдәм бериду? (Зәбур 31:13, 14)

³ Болупму биз қийинчилиқларға дуч кәлгәндә, Иблис бизни Йәһва Худадин айриветишкә уруниду. У буни қандақ қилиду? У аста-аста бизниң Йәһваға вә Униң тәшкилатиға болған ишәнчимизни аҗизлаштуриду. Бирақ биз униң бундақ һуҗумлиридин өзүмизни қоғдалаймиз. Бизниң ишәнчимиз күчлүк болса, Йәһваға болған ишәнчимиздә тәврәнмисәк, биз Худайимиз вә Униң тәшкилатини ташлимаймиз (Зәбур 31:13, 14ни оқуң).

4. Бу мақалидә немиләрни муһакимә қилимиз?

⁴ Бу мақалидә җамаәтниң сиртидин келидиған үч қийинчилиқни муһакимә қилимиз. Һәрбири бизниң Йәһваға вә Униң тәшкилатиға болған ишәнчимизни аҗизлаштуруши мүмкин.  Қандақ қилип бу қийинчилиқлар бизни Йәһвадин айриветәләйду? Шәйтанниң қаршилиқлириға тәқабил туруш үчүн немә қилалаймиз?

5. Қийинчилиқлар Йәһва вә Униң тәшкилатиға болған ишәнчиңизни қандақ аҗизлаштуралайду?

⁵ Бәзи вақитларда биз аилидикиләрниң қарши туруши яки иш орнимиздин айрилип қелишқа охшаш қийинчилиқларға дуч келимиз. Бундақ қийинчилиқлар қандақ қилип бизниң Йәһваниң тәшкилатиға болған ишәнчимизни аҗизлаштуриду вә бизни униңдин айриветәләйду? Биз узун мәзгил қийинчилиқларни баштин өткүзгинимиздә үмүтсиз һис қилишимиз яки чүшкүнлүккә чүшүп кетишимиз мүмкин. Бундақ пурсәтләрдин пайдилинип, Шәйтан бизни Йәһва Худаниң бизгә болған сөйгү-муһәббитидин гуманландурушқа уруниду. Иблис бизниң учраватқан азап-оқубәтлиримизгә Йәһва вә Униң тәшкилати сәвәпчи дәп ойлишимизни халайду. Қедимдә Мисирдики бәзи исраиллар шуниңға охшаш ишқа дуч кәлгән. Улар дәсләптә Йәһваниң уларни қуллуқтин қутқузуш үчүн Муса билән Һарунни таллиғанлиғиға ишәнгән (Чиқ. 4:29—31). Бирақ кейинәрәк пирәвн исраилларниң турмушини қийинлаштурғанда, улар әшу қийинчилиқларға Муса билән Һарун сәвәпчи дәп әйипләп мундақ дегән: «Силәр бизни пирәвн һәм униң хизмәткарлири үчүн өч қилип, уларниң қолиға бизни өлтүрүш үчүн бәрдиңлар» (Чиқ. 5:19—21). Бәк әпсус, улар Худаниң садиқ хизмәтчилирини әйиплигән. Әгәр сиз узун бир мәзгил қийинчилиқларни баштин кәчүрсиңиз, Йәһва вә Униң тәшкилатиға болған ишәнчиңизни күчлүк сақлаш үчүн немә қилалайсиз?

6. Қийинчилиқларға тәқабил туруш тоғрисида Һабаккук пәйғәмбәрниң мисалидин немини үгинимиз? (Һабаккук 3:17—19)

⁶ Ич бағриңизни дуада Йәһваға төкүп, Униңдин ярдәм сораң. Һабаккук пәйғәмбәр нурғун қийинчилиқларға дуч кәлгән. Бир вақитқа кәлгәндә, у қаримаққа Йәһваниң өзигә ғәмхорлуқ қилидиғанлиғидин гуманланған. Шуңа у өз һис-туйғулирини дуада Йәһваға төкүп бәргән. У шундақ дәйду: «Аһ Пәрвәрдигар, қачанғичә мән Саңа нида қилимән, Сән аңлимайсән?... Немишкә җапа-зулумға қарап турисән?» (Һаб. 1:2, 3, КТ) Йәһва Өз садиқ хизмәтчисиниң чиң қәлбидин қилған дуасиға җавап қайтурған (Һаб. 2:2, 3). Йәһваниң қутқузуш үчүн қилған иш-һәрикәтлири һәққидә чоңқур ойланғандин кейин Һабаккук қайта шат-хорамлиққа чөмгән. У Йәһваниң униңға ғәмхорлуқ қилидиғанлиғиға һәрқандақ синақларға бәрдашлиқ бериш үчүн ярдәм берәләйдиғанлиғиға ишәнгән еди (Һабаккук 3:17—19ни оқуң). Сиз қийинчилиқларға дуч кәлгәндә Йәһваға дуа қилип өзүңизниң немиләрни һис қиливатқанлиғини ейтип бериң вә Униң ярдимигә тайиниң. Шундақ қилғиниңизда, Йәһва сизгә бәрдашлиқ бериш үчүн керәклик күчни беридиғанлиғиға ишинәләйсиз. Униң йәр-йөләк болуватқанлиғини һис қилғиниңизда, Униңға болған иман етиқадиңиз техиму күчийиду.

7. Ширлиниң туққанлири уни немигә қайил қилмақчи болған вә немә уни Йәһваға болған ишәнчисини йоқитиштин қоғдап қалған?

⁷ Давамлиқ Йәһваға йеқин яшишиңизға ярдәм беридиған ишларни қилиң. Папуа-Йеңи Гвинеяда яшайдиған Ширли исимлиқ қериндаш қийинчилиқларға учриғанда шундақ қилған еди. Бу униңға қандақ ярдәм бәргәнлигини көрүп бақайли b. Ширлиниң аилиси намрат болуп, бәзидә йетәрлик йемәк-ичмәккә еришиши қийин еди. Бир туққини униң Йәһваға болған ишәнчисини аҗизлаштурмақчи болған. У қериндашқа мундақ дегән: «Сән Худаниң муқәддәс роһи саңа ярдәм бериду дегән едиң, қени әшу ярдәм?» У йәнә: «Аиләң техиғичә намрат. Сән вақтиңни вәз қилимән дәп исрап қиливатисән»,— дегән. Ширли шуни етирап қилип мундақ дәйду: «Мән өз өзүмдин: “Худа  маңа һәқиқәтән көңүл бөләмду?”— дәп соридим. Шуңа дәрһал Йәһваға дуа қилип, Униңға ойлиғанлиримниң һәммисини ейттим. Давамлиқ Муқәддәс китап вә бизниң нәшрий материаллиримизни оқудум. Вәз қилишни вә җамаәт учришишлириға қатнишишни давамлаштурдум». Узун өтмәй у Йәһваниң өз аилисидикиләргә ғәмхорлуқ қиливатқанлиғини һис қилишқа башлиған. Униң аилиси ач қалмиған, улар хошал-хорам еди. Ширли мундақ дәйду: «Мән Йәһваниң дуалиримға җавап бериватқанлиғини һис қилдим» (Тим. 1-х. 6:6—8). Әгәр давамлиқ Йәһваға йеқин яшишиңизға ярдәм беридиған ишларни қилсиңиз, қийинчилиқниң яки гуманларниң сизни Йәһвадин айриветишигә йол қоймайсиз.

8. Йәһваниң тәшкилатидики җавапкарлиқни өз үстигә алған қериндашларға немә болуши мүмкин?

⁸ Түрлүк таратқулар вә иҗтимаий алақә васитилири арқилиқ дүшмәнлиримиз Йәһваниң тәшкилатидики җавапкарлиқни өз үстигә алған қериндашлар һәққидә ялған яки хата хәвәрләрни тарқитиду (Зәб. 31:13). Бәзи қериндашлар қолға елинип җинайәтчиләр дәп әйипләнмәктә. Әлчи Паул наһәқ әйиплинип қолға елинғанда, биринчи әсирдики Мәсиһ әгәшкүчилириму охшаш вәзийәткә дуч кәлгән. Улар буниңға қандақ инкас қайтурған?

9. Әлчи Павлус түрмигә ташланғанда, бәзи етиқатчилар қандақ инкас қайтурған?

⁹ Әлчи Паул Римда түрмигә ташланғанда, биринчи әсирдики бәзи қериндашлар уни қоллап-қувәтләшни тохтатқан (Тим. 2-х. 1:8, 15). Немә үчүн? Көпчилик уни җинайәтчи дәп қариғачқа, улар Паулдин номус қилғанму яки өзлириниңму зиянкәшликкә учришидин қорққанму? (Тим. 2-х. 2:8, 9) Уларниң сәвәви немә болушидин қәтъийнәзәр, Паулниң шу вәзийәттә өзини қандақ һис қилғанлиғини тәсәввур қилип көрүң. У нурғун җапа-мәшәққәтләргә бәрдашлиқ бәргән (Әлч. 20:18—21; Кор. 2-х. 1:8). У һәтта һаятини улар үчүн хәтәргә тәвәккәл қилған. Биз һәргизму Паул ярдәмгә еһтияҗлиқ вақитта уни ташлавәткән кишиләргә охшап қалмайли. Мәсъулийәтни өз үстигә алған қериндашлар зиянкәшликкә учриғанда, биз чоқум немини әстә сақлишимиз керәк?

10. Җавапкарлиқни үстигә алған бурадәрләр зиянкәшликкә дуч кәлгәндә, биз немини әстә сақлишимиз керәк вә немә үчүн?

 ¹⁰ Зиянкәшликкә немә үчүн учриғанлиғимизни вә униңға ким сәвәпчи екәнлигини есиңиздә сақлаң. Тимотийға 2-хәт 3:12-айәт мундақ дәйду: «Мәсиһ Әйсада вападарлиқ көрситип яшиғанларниң барлиғи тәқипкә учрайду». Шуңа Шәйтан җавапкарлиқни өз үстигә алған бурадәрләрни һуҗум қилиш нишани қилғанлиғидин һәйран қалмаслиғимиз керәк. Униң қара нийити болса, уларниң садақәтмәнлигини бузуш вә бизни қорқутуш (Пет. 1-х. 5:8).

11. Онисифорниң мисалидин немиләрни үгинимиз? (Тимотийға 2-хәт 1:16—18)

¹¹ Қериндашлириңизни қоллап-қувәтләшни давамлаштуруң вә уларға садиқлиқ билән йеқин туруң (Тимотийға 2-хәт 1:16—18ни оқуң). Паул түрмигә ташланғанда, биринчи әсирдики Онисифор исимлиқ бир етиқатчи башқичә инкас қайтурған. У Паулниң кишәнләнгәнлигидин номус қилмиған. Әксинчә Онисифор Паулни издигән вә уни тапқанда, қоллап-қувәтләшниң әмәлий йоллирини издигән. Шундақ қилиш арқилиқ Онисифор өзиниң һаятини хәтәргә тәвәккәл қилған. Биз буниңдин немини үгинәләймиз? Биз инсандин қорқуш бизни вәһимигә селип қоймаслиғи яки зиянкәшликкә учриған қериндашлиримизға ярдәм бериштин тосуп қоюшиға йол бәрмәслигимиз керәк. Әксинчә уларни қоғдап, қолумиздин кәлгәнниң һәммисини қилайли (Пәнд н. 17:17). Улар бизниң сөйгү-муһәббитимизгә вә қоллап-қувәтлишимизгә муһтаҗ.

12. Россиядики қериндашлиримиздин немиләрни үгинимиз?

¹² Россиядики етиқатчилар түрмидики қәдирлик қериндашлиримизға қандақ ярдәм бәргәнлигини ойлап көрәйли. Бәзилири сотқа тартилғанда нурғунлиған қериндашлар сот мәһкимисигә келип уларни қоллап-қувәтлигән. Биз буниңдин немини үгинимиз? Мәсъулийәтни үстигә алған бурадәрләр төһмәткә учриса, қолға елинса яки зиянкәшликкә учриса һәргизму қорқмаң. Улар үчүн дуа қилиң, уларниң аилисидики уруқ-туққанлириға ғәмхорлуқ қилиң вә уларни қоллап-қувәтләйдиған башқа йолларни издәң (Әлч. 12:5; Кор. 2-х. 1:10, 11).

13. Мәсхирә қилиш Йәһва вә Униң тәшкилатиға болған ишәнчимизни қандақ аҗизлаштуралайду?

¹³ Йәһва гувачиси әмәс уруқ-туққанлиримиз, хизмәтдашлиримиз яки савақдашлиримиз бизниң вәз ейтқанлиғимизни яки Йәһваниң жуқури әхлақ өлчәмлири билән яшиғанлиғимизни мәсхирә қилиши мүмкин (Пет. 1-х. 4:4). Бәлким улар сизгә: «Мән сизни яхши көрүмән, бирақ силәрниң диний қаидә-қанунлириңлар һәддидин зиядә еғир. Бу тәләпләргә йетиш қийин»,— дәйду. Бәзиләр бизниң җамаәттин чиқирилғанларға қилидиған муамилимизни тәнқитләп, мундақ дейишиду: «Қандақму силәр өзүңларни меһир-муһәббәтлик адәм дәп ейталайсиләр?» Кишиләрниң мошуниңға охшаш сөзлири, ой-пикиримизгә гуман уруғини чачиду. Биз өзүмиздин шундақ соалларни сорашқа башлишимиз мүмкин: «Йәһва мәндин бәк көп нәрсини тәләп қиламду? Униң тәшкилати чәкләйдиған ишлар шунчә көпму?» Әгәр сиз мошундақ әһвалға дуч кәлсиңиз, Йәһва вә Униң тәшкилатиға йеқин туруш үчүн немә қилалайсиз?

14. Башқилар бизниң Йәһваниң өлчәмлири бойичә яшиғанлиғимизни мәсхирә қилғанда қандақ инкас қайтурушимиз керәк? (Зәбур 119:50—52)

¹⁴ Йәһваниң өлчәмлиригә мас яшаш үчүн қәтъий бәл бағлаң. Аюп мәсхиригә учришиға қаримай, Йәһваниң өлчәмлиригә мас яшиған еди. Өзлирини Аюпниң достлири дәйдиғанларниң бири, һәтта Аюпни мундақ натоғра көзқарашта болушқа қайил қилмақчи болған. Униң ейтишичә, Аюп Худаниң өлчәмлиригә мас яшиса яки яшимиса, бу Худа үчүн муһим әмәс еди (Аюп 4:17, 18; 22:3). Бирақ Аюп шундақ ялғанчилиқларға ишинишни рәт қилған. У Йәһваниң тоғра вә натоғра үчүн бәлгүлигән  өлчәмлириниң тоғра екәнлигини билгән вә уларға мас яшашқа бәл бағлиған. У өзиниң садақәтмәнлигини башқиларниң бузушиға йол қоймиған (Аюп 27:5, 6). Буниңдин немини үгинимиз? Мәсхириниң Худаниң өлчәмлиригә қарита гуманиңизни қозғишиға йол қоймаң. Өзүңизниң һаят кәчүрмишлири һәққидә қайта ойлинип көрүң. Йәһваниң өлчәмлириниң тоғрилиғини вә уларниң сиз үчүн пайдилиқ екәнлигини қайта-қайта көрдиңизму? Әшу өлчәмләр билән иш қилидиған тәшкилатни қоллашқа бәл бағлаң. Шундақ қилғиниңизда, кишиләр мәйли қанчилик мәсхирә қилишидин қәтъийнәзәр, сиз Йәһваға хизмәт қилишни һәргиз тохтатмайсиз (Зәбур 119:50—52ни оқуң).

15. Бриджит немә үчүн мәсхиригә учриған?

¹⁵ Һиндистандики Бриджит исимлиқ қериндашниң кәчүрмишлирини көрүп бақайли. Аилисидикиләр униң иман-етиқадини мәсхирә қилған. 1997-жили суға чөмдүрүлүп узун өтмәй, униң етиқатчи болмиған йолдиши иш орнидин айрилип қалған. Шуниң билән йолдиши аилисидикиләрниң өз ата-аниси билән биллә яшиши үчүн башқа шәһәргә көчүп беришни қарар қилған. Бирақ Бриджит техиму күчлүк синақларға дуч кәлгән. Чүнки униң йолдиши ишсиз қалған. Бриджит аилини тәминләш үчүн толуқ вақит ишләшкә мәҗбур болған. Униңдин башқа, униң үчүн әң йеқин җамаәт 350 километр жирақлиқта еди. Әпсуслинарлиғи, ериниң аилисидикилири униң иман-етиқадиға қарши чиққан. Қаттиқ қаршилиқ қилғачқа, Бриджит аилисидикиләр билән йәнә көчүшкә мәҗбур болған. Кейин йолдиши өлүп кәткән. Униңдин кейин 12 йешидики бир қизи рак кесили билән өлүп кәткән. Бриджитниң уруқ-туққанлири мошу ишлар үчүн уни әйипләп, ярисиниң үстигә туз сәпкән. Улар әгәр у Йәһва гувачиси болмиған болса шу паҗиәләр болматти дейишкән. Шундақтиму Бриджит Йәһваға давамлиқ ишинип, Йәһваниң тәшкилатиға йеқин яшиған.

16. Бриджит Йәһваға вә Униң тәшкилатиға садиқ қалғини үчүн қандақ бәрикәтләргә еришкән?

¹⁶ Бриджит җамаәттин бәк жирақ җайда яшиғачқа, районға җавапкар ақсақал уни өзи яшаватқан җайда вәз ейтишқа вә өйидә жиғилишларни өткүзүшкә илһамландурған. Дәсләптә у буниңдин бесим һис қилған. Амма у берилгән йол-йоруққа бойсунған. У башқиларға хуш хәвәр ейтқан, өйидә жиғилишларни өткүзгән.  Қизлири билән аиләвий ибадәт өткүзүшкә вақит чиқарған. Буниң нәтиҗиси қандақ болған? Бриджит нурғун кишиләр билән Муқәддәс китапни тәтқиқ қилишни башлиған вә нурғунлири чөмдүрүлүштин өткән. У 2005-жили пионер болуп хизмәт қилишни башлиған. Униң Йәһваға вә Униң тәшкилатиға болған ишәнчиси мукапатланған. Униң қизлири Йәһваға садиқлиқ билән хизмәт қиливатиду. Һазир у яшиған әшу районда икки җамаәт бар. Бриджит Йәһваниң униңға җапа-мәшәққәтләргә тәқабил туруш вә аилисидикиләрниң мәсқирисигә бәрдашлиқ бериш үчүн күч бәргәнлигигә ишиниду.

17. Биз немә қилишқа қәтъий бәл бағлишимиз керәк?

¹⁷ Шәйтан бизниң қийинчилиқларға дуч кәлгинимиздә, Йәһва бизгә ярдәм бәрмәйду вә Униң тәшкилатини қоллаш һаятимизни техиму қийинлаштурду дәп ишинишимизни халайду. Җавапкарлиқни үстигә алған бурадәрләр төһмәт вә зиянкәшликкә учриғанда яки түрмигә ташланғанда, Шәйтан бизниң қорқуп кетишимизни халайду. У йәнә мәсхирә қилиш арқилиқ бизниң Йәһваниң өлчәмлиригә вә Униң тәшкилатиға болған ишәнчимизни аҗизлаштурмақчи. Амма биз униң һийлә-микирлирини убдан билимиз вә униңға алданмаймиз (Кор. 2-х. 2:11). Шуңа Шәйтанниң ялғанчилиғини рәт қилип, давамлиқ Йәһваға вә Униң тәшкилатиға садиқ қелишиға қәтъий бәл бағлайли. Есиңиздә болсунки, Йәһва һәргизму сизни ташлимайду (Зәб. 28:7). Һечнәрсә сизни Йәһвадин айримисун! (Рим. 8:35—39)

18. Кейинки мақалидә биз немини муһакимә қилимиз?

¹⁸ Бу мақалидә биз җамаәтниң сиртидин келидиған қийинчилиқлар тоғрисида муһакимә қилдуқ. Амма бизниң Йәһва вә Униң тәшкилатиға болған ишәнчимизни җамаәт ичидин келидиған қийинчилиқларму синайду. Биз шундақ қийинчилиқларға мувәппәқийәтлик һалда тәқабил туруш үчүн немә қилалаймиз? Кейинки мақалидә бу һәққидә муһакимә қилимиз.