ҺӘР жили қойлар кәби нурғун қәдир-қиммәтлик қериндашлар җамаәткә қайтип келиватиду. Һәрбири қайтип келимән дегәндә, асманда қанчилик хошаллиқ болидиғанлиғини тәсәввур қилип көрүң (Луқа 15:7, 10). Сиз шуниңға қәтъий ишиниңки, әгәр җамаәткә қайта қобул қилинсиңиз, Әйса, пәриштиләр вә Йәһва Худа сизниң һәқиқәт йолиға қайтип кәлгәнлигиңизни көргәндә, интайин хошал болиду. Бирақ қайта Йәһва Худа билән болған достлуқ мунасивитиңизни тикләш җәриянида бәзи қийинчилиқларға дуч келишиңиз мүмкин. Уларни йеңишиңизға немә ярдәм бериду?

Нурғун қериндашлар җамаәткә қайта кәлгәндин кейин, сәлбий һис-туйғулири билән күрәш қилиду. Бәлким, Давут падишаниң қандақ һис-туйғуда болғанлиғини билисиз. Һәтта униң гунаси кәчүрүмгә еришкәндин кейинму, униң илгири қилған хаталиқлири қәлбигә арам бәрмигән (Зәб. 40:12; 65:3). Бири, Йәһва Худаниң һәқиқәт йолиға қайтип кәлгәндин кейинму, узун жилларғичә виждан азави тартип, номус һис қилиши мүмкин. 20 жилдин көпирәк җамаәттин чиқирилған Изабель a мундақ дәйду: «Йәһваниң мени кәчүридиғанлиғиға ишиниш интайин қийин болған». Әгәр шундақ үмүтсизлиниш һис-туйғусида яшисиңиз, Йәһва билән болған достлуқ мунасивитиңиз йәнә аҗизлишип кетиши мүмкин (Пәнд н. 24:10). Шундақ болушиға қәтъий йол бәрмәң.

Башқилар Йәһва Худа билән йеқин достлуқ мунасивәтни қайта тикләш үчүн, зөрүр болған ишларни қилалмаслиғидин әнсирәйду. Җамаәткә қайта кәлгән Антон: «Мән илгири Йәһва гувачиси сүпитидә қандақ һаят кәчүргәнлигимни унтуп қалғандәк һис-туйғуда болдум»,— дегән. Шундақ һис-туйғулар сәвәплик, бәзиләр өзлириниң Йәһваға көпирәк хизмәт қилалишидин иккилинип қелиши мүмкин.

Мәсилән, бир кишиниң өйи қаттиқ боран-чапқундин өрүлүп чүшти. Уни қайта ясап чиқиш үчүн нурғун вақит вә күч тәләп қилинидиғанлиғини ойлиғанда, киши үстигә еғир жүкни артип қойғандәк,  һис қилиши мүмкин. Худди шуниңға охшаш, еғир гуна өткүзүп, Йәһва Худа билән болған достлуқ мунасивитиңиз бузулған болса, Униң билән достлуқни қайта әслигә кәлтүрүш үчүн көп тиришчанлиқ көрситишиңиз керәклигини һис қилишиңиз мүмкин. Әлвәттә, буни ялғуз қилалмайсиз.

Йәһва Худа бизни чақирип: «Әнди келиңлар, биз муназирә қилишайли»,— дәйду (Йәшая 1:18). Сиз мәсилини һәл қилиш үчүн көп тиришчанлиқ көрсәттиңиз. Сиз Йәһваниң қанити астиға қайтип кәлдиңиз. У сизни бир мисал сүпитидә ишлитип, Шәйтанниң ялғанчи екәнлигини испатлайду (Пәнд н. 27:11).

Йәһва Худаниң һәқиқәт йолиға қайтип келиш арқилиқ сиз аллиқачан Йәһваға йеқинлаштиңиз вә Уму сизгә йеқинлишидиғанлиғини вәдә қилиду (Яқуп 4:8). Сиз җамаәткә қайтип келип, муһим бир қәдәм ташлидиңиз. Бирақ башқиму ишларни қилиш зөрүр. Сиз асмандики Атиңиз вә Достуңиз Йәһваға болған сөйгү-муһәббитиңизни давамлиқ күчәйтишиңиз керәк. Буни қандақ қилалайсиз?

Йетәлигидәк мәхсәтләрни қоюшқа тиришиң. Бәлким, Йәһва Худа вә У вәдә қилған кәлгүси җәннәт һәққидә алған билимлириңиз һелиһәм есиңиздә болуши мүмкин. Бирақ һазир сиз давамлиқ вәз қилиш, җамаәт учришишлириға бериш вә қериндашлар билән арилишип вақит өткүзүш дегәндәк яхши адәтләрни қайта йетилдүрүшиңиз зөрүр. Һазир бирқанчә мәхсәтләрни көрүп чиқайли.

Дайим Йәһва Худаға дуа қилиң. Сиз давамлиқ виждан азави тартсиңиз, Асмандики Атиңиз Униңға дуа қилишиңизниң қийин болидиғанлиғини яхши чүшиниду (Рим. 8:26). Бирақ дуа қилишни тохтатмаң. Йәһва Худаға Униң билән дост болушни қанчилик халайдиғанлиғиңизни ейтиң (Рим. 12:12). Андрей әсләп шундақ дәйду: «Мән виждан азави тартип, номус һис қилған. Бирақ һәр қетим дуа қилғандин кейин, өзүмни яхширақ һис қилип, көңүл хатирҗәмлигигә ериштим. Әгәр қандақ дуа қилишни билмисиңиз, гунасиға товва қилған Давут падишаниң язған Зәбурниң 51 вә 65-баплиридики сөзләр үстидә чоңқур ойлиниң.

Давамлиқ Муқәддәс китапни тәтқиқ қилиң. Шундақ қилиш сизниң роһий озуқлуққа ериштүрүп, Йәһва Худаға болған сөйгү-муһәббитиңизни күчәйтишиңизгә ярдәм бериду (Зәб. 19:7—11). Филип: «Дәсләптә мән роһий ишларни биринчи орунға қоюшни адәткә айландурмиғач, роһий җәһәттин аҗизлишип, Йәһваниң көңлини ағритқан едим. Мән охшаш хаталиқни қайта тәкрарлашни халимидим. Шуңа роһий саламәтлигимни қоғдаш үчүн, шәхсий тәтқиқ қилишни қарар қилдим»,— дәйду. Сизму шундақ қилалайсиз. Әгәр шәхсий тәтқиқ қилиш үчүн қайси мавзуниң сизгә мувапиқ келидиғанлиғини билмисиңиз, роһий җәһәттин йетилгән достуңиздин ярдәм сораң.

Җамаәттики қериндашлар билән болған достлуқ мунасивитиңизни қайта тикләң. Җамаәткә қайтип кәлгән киши қериндашлар униңға аччиқлиниду дәп ойлиши мүмкин. Лариса мундақ дәйду: «Мән бәк номус қилған. Җамаәттики қериндашларниң көңлини ағритип, уларни үмүтсизләндүрдим дәп ойлиған. Узун вақитқичә шундақ һис-туйғуда болдум». Шуниңға ишиниңки, ақсақаллар вә роһий җәһәттин йетилгән қериндашлар Йәһва Худа билән достлуқ мунасивитиңизни қайта тиклишиңизгә ярдәм беришни бәк халайду (« Ақсақаллар немә қилалайду?» дегән рамкиға қараң.). Улар җамаәткә қайтип кәлгиниңиздин бәк хурсән болған вә сизниңму хошал болушиңизни халайду (Пәнд н. 17:17).

Сизни җамаәткә немә йеқинлаштуралайду? Җамаәттики қериндашлар билән барлиқ ибадәт учришишлириға қатнишиң вә улар билән биллә вәз хизмәткә чиқиң. Бу сизгә қандақ ярдәм бериду? Феликс шундақ дәйду: «Җамаәт мениң қайтип келишимни күткән еди. Мән өзүмни яхши көрүлгәндәк һис қилдим. Қериндашларниң һәммиси маңа ярдәм бәрди. Өзүмниң җамаәткә қайта қобул қилинғанлиғимни, Йәһваниң мени кәчүргәнлигини вә давамлиқ Униңға хизмәт қилалайдиғанлиғимни һис қилип йәттим (« Сиз немә қилалайсиз?» дегән рамкиға қараң.).

Йәһва Худа билән достлуқ мунасивитиңизни қайта тикләватқанда, Шәйтан сизни роһий җәһәттин аҗизлаштуруш үчүн, қийинчилиқларни худди ямғурлуқ боран-чапқунға охшаш яғдуруветишни халайду (Луқа 4:13). Һазирниң өзидә роһий өй-маканиңизни, йәни Йәһва билән болған достлуғиңизни мустәһкәмләшкә тәйяр болуң.

Йәһва Худа Өз қойлири һәққидә шундақ вәдә бәргән: «Мән йолдин тенәп кәткәнләрни издәймән, тарқилип кәткәнләрни қайтуримән, зәхмиләнгәнләрни теңип қойимән, аҗизларни күчәйтимән» (Әзәк. 34:16). Йәһва нурғун хизмәтчилириниң Өзи билән болған мунасивитини қайта яхшилишиға ярдәм бәргән. Шуниңға ишиниңки, У сизниң Униң билән болған мунасивитиңизни техиму күчәйтишиңизгә ярдәм беришни халайду.