1. Немә үчүн нурғун адәмләр қаймуқуп кәткән?

 БҮГҮНКИ күндә өзлирини христиан дәп атайдиған нәччә он миңлиған диний мәзһәпләр бар. Уларниң һәммиси Худа қобул қилидиған ибадәтни қиливатимиз дәйду. Шу сәвәп нурғун адәмләр қаймуқуп кәткән. Улар: «Худа һәммә динларни қобул қиламду яки пәқәт бир тоғра дин барму?»— дәп соришиду. Йәһва гувачилири сүпитидә биз һәқиқәтни үгитидиғанлиғимизға вә Йәһва Худаға ибадәт қилиш усулимиз Уни хурсән қилишниң бирдин-бир йоли екәнлигигә ишинимизму? Буниңға өзүмизни қайил қилалаймизму? Һазир қайил қиларлиқ дәлил-испатларни көрүп бақайли.

2. Салоникилиқларға 1-хәт 1:5-айитигә асасланғанда, әлчи Паул немә үчүн өзиниң һәқиқәтни тапқанлиғиға толуқ ишәнгән?

² Әлчи Паул өзиниң һәқиқәтни тапқанлиғиға толуқ ишәнгән (Салоникилиқларға 1-хәт 1:5ни оқуң). Униң ишәнчиси пәқәт һис-туйғулириға асасланмиған. Әксинчә, Паул Худаниң Сөзини әстаидил тәтқиқ қилип үгәнгән. У пүткүл Язмиларниң Худа тәрипидин роһландурғанлиғиға ишәнгән (Тим. 2-х. 3:16). У немини үгәнгән? Паул Әйсаниң вәдә қилинған Мәсиһ екәнлигини рәт қилғили болмайдиған дәлил-испатларни тапқан. Йәһудий диний йетәкчиләр болса, әшу дәлил-испатларға пәрва қилмиған. Шу сахта диний йетәкчиләр өзлириниң Худа тоғрисида һәқиқәтни үгитиватқанлиғини ейтқан болсиму, әмәлийәттә улар Худа өч көридиған ишларни қилған (Тит. 1:16). Паул уларға охшимиған. У Муқәддәс Язмиларниң қайси қисмиға ишинишни яки қайси қисмиға ишәнмәсликни қарар қилмиған. У Худаниң ирадисигә пүтүнләй мас яшап, тәлим беришкә тәйяр болған (Әлч. 20:27).

3. Һәқиқәтни тапқанлиғимизға ишәнч қилишимиз үчүн барлиқ соалларға җавап тепишимиз керәкму? (« Йәһваниң сан-санақсиз ишлири вә ой-пикирлири» намлиқ рамкиға қараң.)

³ Бәзиләр мундақ дәп ойлиши мүмкин: һәқиқий дин чоқум һәрқандақ соалларға, болупму Муқәддәс китап җавап бәрмигән соалларғиму җавап берәлиши керәк. Шундақ дәп қараш әқилгә уйғунму? Паулниң мисалини көрүп бақайли. У қериндашларни һәммә нәрсигә көз йәткүзүшкә дәвәт қилған. Бирақ өзи нурғун  нәрсиләрни чүшәнмәйдиғанлиғини етирап қилған (Сал. 1-х. 5:21). У билимимиз чәклик вә метал әйнәк арқилиқ сус көримиз дегән сөзләрниму язған (Кор. 1-х. 13:9, 12). Демәк, Паул һәммә нәрсини чүшәнмигән, бизму чүшәнмәймиз. Шундақтиму, у Йәһва Худа тоғрилиқ асасий һәқиқәтләрни чүшинип йетәлигән. У өзини қайил қилидиған йетәрлик дәлил-испатларға егә болғач, һәқиқәтни тапқанлиғиға қәтъий ишәнгән.

4. Өзүмизниң һәқиқәтни тапқанлиғиға ишәнчимизни күчәйтиш үчүн немә қилалаймиз вә һәқиқий Әйсаниң әгәшкүчилири һәққидә немиләрни муһакимә қилимиз?

⁴ Өзүмизниң һәқиқәтни тапқанлиғимизға ишәнчимизни күчәйтишниң бир йоли — Әйсаниң қалдурған тоғра ибадәт қилиш үлгиси билән бүгүнки күндики Йәһва гувачилириниң қилған ибадитини селиштуруш. Бу мақалидә биз Әйсаниң һәқиқий әгәшкүчилири 1) бутпәрәсликни рәт қилидиғанлиғи, 2) Йәһваниң исмини һөрмәтләйдиғанлиғи, 3) һәқиқәтни яхши көридиғанлиғи вә 4) бир-биригә һәқиқий меһир-муһәббәт көрситидиғанлиғи тоғрилиқ муһакимә қилимиз.

5. Әйса қандақ ибадәт қилған? Униңдин немиләрни үгинәләймиз вә униң үгәткәнлирини һаятимизда қандақ қоллиналаймиз?

⁵ Әйса асманда вә йәрдә болғанда, пүтүн қәлби билән Йәһва Худани сөйгәнликтин, пәқәт Униңғила ибадәт қилған (Луқа 4:8). У өз шагиртлириғиму шундақ қилишни үгәткән. Мәйли Әйса яки униң садиқ әгәшкүчилири болсун, Худаға ибадәт қилиш үчүн бутларни ишләтмигән. Худа роһтур, шуңа һечким Уни тәсвирләйдиған нәрсини ясалмайду (Йәшая 46:5). Ундақта әвлия-әнбияләрниң сүрәтлирини ясап, уларға дуа қилишқа боламду? Худа чүшәргән он пәрманниң иккинчисидә шундақ дейилгән еди: «Өзәң үчүн жуқуридики асманда, төвәндики йәрдә, йәрдин төвән суларда болудиған нәрсиләрниң һечбир тәсвирини қилма. Уларға тазим қилма һәм хизмәт қилма» (Чиқ. 20:4, 5). Худани хурсән қилишни халайдиғанлар мошу сөзләрдин  чоқум бутпәрәсликтин жирақ туруш керәклигини ениқ көрәләйду.

6. Әйсаниң әгәшкүчилири бүгүнки күндә қандақ ибадәт қилиду?

⁶ Тарихшунаслар Әйсаниң әлчилири һаят вақтида Әйсаниң шагиртлириниң пәқәт бирла Худаға ибадәт қилғанлиғини дәлиллигән. Бир китапта: «Әйсаниң дәсләпки әгәшкүчилири ибадәттә бутларни ишлитилишини өч көргән»,— дәп йезилған. Бүгүнки күндә Йәһва гувачилири биринчи әсирдики Әйсаниң шагиртлири қалдурған үлгигә әгишиду. Биз әвлия-әнбияләр яки пәриштиләрниң шәклидә ясалған бутларға дуа қилмаймиз. Һәтта Әйсағиму дуа қилмаймиз. Дөләтниң байрақлириғиму чоқунмаймиз. Мәйли башқилар бизни немә қилишқа қистиса қистисун, Әйсаниң: «Пәқәт Йәһва Худаға ибадәт қил һәм пәқәт Униңғила муқәддәс хизмәт қил»— дегән сөзлиригә қәтъий бойсунимиз (Мәт. 4:10).

7. Йәһва гувачилири қайси җәһәтләрдә башқа диндикиләрдин пәриқлиниду?

⁷ Бүгүнки күндә адәмләр чирколардики роһанийларниң сөзлирини аңлашни яхши көриду. Кишиләр уларға шунчилик һәвәс қилидуки, һәтта уларға чоқунушқиму тәйяр. Улар чирколарға берип, уларниң китаплирини сетивалиду вә уларниң тәшкилатлирини қоллап-қувәтләш үчүн нурғун ианиләр беришиду. Бәзиләр һәтта шу диний устазларниң ейтқан һәрбир сөзигә ишиниду. Кишиләр уларни көргәндә, худди Мәсиһ Әйсани көргәндәк хошал болуп кетиду. Бирақ Йәһва Худаға ибадәт қилғучилар инсанларға чоқунмайду. Гәрчә биз йетәкчилик қилидиған кишиләрни һөрмәтлисәкму, амма Әйсаниң: «Силәр барлиғиңлар бир-бириңларға — қериндашлар»,— дегән сөзлирини ениқ билимиз (Мәт. 23:8—10). Мәйли диний устазлар яки сәясий һөкүмранлар болсун, биз уларға чоқунмаймиз вә уларниң диний яки сәясий мәхсәтлирини қоллап-қувәтлимәймиз. Әксинчә, биз бетәрәпликни сақлаймиз вә бу дунияға мәнсүп әмәс. Биз мошу җәһәтләрдә өзлирини Әйсаниң әгәшкүчилири дәп ативалған нурғун диний мәзһәпләрдикиләрдин пәриқлинимиз (Йоһ. 18:36).

8. Худаниң Өз исмини улуқлашни вә барлиқ инсанларниң шу исимни билишини халайдиғанлиғини нәдин билимиз?

⁸ Бир қетим Әйса Мәсиһ: «Атам, Өз исмиңни улуқлиғин!»,— дәп дуа қилған. Худа шу дуаға асмандин гүлдүрлигән аваз билән җавап қайтуруп, Өз исмини улуқлайдиғанлиғини вәдә қилған (Йоһ. 12:28). Әйса вәз хизмитидә Атисиниң исмини дайим улуқлиған еди (Йоһ. 17:26). Демәк, Әйсаниң һәқиқий әгәшкүчилири Худаниң исмини ишлитиштин вә шу исимни башқиларға билдүрүштин пәхирлиниду. Шундақ қилиш улар үчүн чоң шан-шәрәп.

9. Биринчи әсирдики етиқатчилар Худаниң исмини һөрмәтләйдиғанлиғини қандақ көрсәткән?

⁹ Биринчи әсирдә мәсиһийләрниң җамаити қурулуп, узун өтмәй, Худа Өз исми билән атилидиған хәлиқни жиғиш үчүн башқа хәлиқләргә диққәт ағдурғанлиғини көрсәткән (Әлч. 15:14). Биринчи әсирдики Мәсиһ әгәшкүчилири Худаниң исмини ишләткәнлиги вә уни башқиларға билдүргәнлиги үчүн пәхирләнгән еди. Әйсаниң әлчилири вә шагиртлири вәз хизмитидә вә Муқәддәс Язмиларни язғанда, Худаниң исмини ишләткән b. Шундақ қилип, улар инсанларға Худаниң исмини билдүридиған бирдин-бир хәлиқ екәнлигини испатлап көрсәткән (Әлч. 2:14, 21).

10. Бүгүнки күндә Йәһва гувачилири Худаниң хас исмини улуқлаватқан бирдин-бир хәлиқ екәнлигиниң қандақ испатлири бар?

¹⁰ Йәһва гувачилири бүгүнки күндә Худаниң хас исмини улуқлаватқан бирдин-бир хәлиқ екәнлигиниң испатлири бар. Нурғун диний устазлар өз һоқуқидин пайдилинип, Худаниң хас исмини йошуруш үчүн қолидин кәлгән һәммә ишларни қиливатиду. Улар Муқәддәс китапниң  тәрҗимилиридин шу исимни чиқирип ташлиған вә бәзи вәзийәтләрдә өз чирколиридә бу исимни қоллинишни чәклигән c. Йәһва гувачилири Худаниң исмини һөрмәтләп, Униңға шан-шәрәп кәлтүрүватқан кишиләр екәнлигини һечким инкар қилалмайду. Биз Худаниң хас исмини кишиләргә билдүрүш үчүн һәрқандақ башқа динларға қариғанда көп тиришиватимиз. Йәһва гувачилири дегән намимизға мас яшаш үчүн қолумиздин кәлгәнниң һәммисини қиливатимиз (Йәшая 43:10—12). Биз башқа Муқәддәс китап тәрҗиманлири чиқирип ташлиған Худаниң Йәһва дегән исмини өз орниға қоюп, «Муқәддәс китап. Йеңи дуния тәрҗимисини» нәширдин чиқирип, 240 миллиондин көпирәк парчә тарқаттуқ. Йәнә биз Худаниң исмини ишлитип, миңдин артуқ тилда Муқәддәс Язмиларға асасланған нәшир материаллиримизни нәширдин чиқириватимиз.

11. Әйсаниң дәсләпки әгәшкүчилири һәқиқәткә болған сөйгүсини қандақ көрсәткән?

¹¹ Әйса Мәсиһ болса, Худа вә Униң ирадиси һәққидики һәқиқәтни сөйгән. У һаят кәчүрүш тәрзи арқилиқ өзиниң һәқиқәткә ишәнгәнлигини көрсәткән вә башқиларниму шу һәқиқәт тоғрисида үгәткән (Йоһ. 18:37). Әйсаниң һәқиқий әгәшкүчилириму чин қәлбидин һәқиқәтни сөйгән (Йоһ. 4:23, 24). Әлчи Петрусму Әйсаниң әгәшкүчилири маңған йолни һәқиқәт йоли дәп атиған (Пет. 2-х. 2:2). Әйсаниң дәсләпки әгәшкүчилири һәқиқәтни чин қәлбидин сөйгәч, һәқиқәткә қарши диний ой-пикирләрни,  әнъәнивий урп-адәтләрни вә шәхсий көзқарашларни рәт қилған (Кол. 2:8). Худди шуниңдәк, бүгүнки күндә Әйсаниң һәқиқий әгәшкүчилири һәқиқәт йолида меңишқа тиришиватиду. Уларниң тәлимлири Муқәддәс Язмилардики һәқиқәткә асасланған вә улар шуниңға мас һаят кәчүриду (Йоһ. 3-х. 3, 4).

12. Бизгә йетәкчилик қилидиған қериндашлар чүшәнчимизни өзгәртиш керәклигини тонуп йәткәндә немә қилиду? Немә үчүн улар шундақ қилиду?

¹² Йәһва гувачилири: «Биз һәқиқәтни толуқ чүшинимиз»,— дәп җакалимайду. Улар бәзидә Муқәддәс китаптики айәтләрни чүшәндүрүштә яки җамаәтни тәшкилләштә хаталишиду. Бу бизни һәйран қалдурмаслиғи керәк. Муқәддәс китапта шундақ йезилғанки, Худа хәлқи вақитниң өтүшигә әгишип, һәқиқәтни техиму ениғирақ чүшинидиған болиду (Кол. 1:9, 10). Йәһва Худа һәқиқәтни аста-аста ечип бериду. Шуңа биз чоқум сәвирчанлиқ билән һәқиқәт нуриниң йорутушини күтишимиз керәк (Пәнд н. 4:18). Рәһбәрлик кеңәш чүшәнчилиримиз вә бәзи ишларни қилишта өзгәртишләрни қилишниң зөрүрлигини көрүп йәткәндә, дәрһалла өзгәртишләрни қилиду. Өзини Әйсаниң әгәшкүчилири дәп атайдиған нурғунлиған мәзһәпләр бу дуния кишилирини вә өз әгәшкүчилирини хошал қилиш үчүн өзгәртишләрни қилиду. Бирақ Йәһва гувачилири Худаға йеқинлишип, Әйса қалдурған үлгигә әгишип, тоғра ибадәт қилиш үчүн өзгиришләрни қилиду (Яқуп 4:4). Бизниң өзгиришләрни қилишимиз бу дунияниң адәмлириниң көзқарашлири өзгәргәнлиги сәвәплик әмәс, бәлки Муқәддәс китапни яхширақ чүшәнгәнлигимиз үчүндур. Биз һәқиқәтни чин қәлбимиздин сөйүмиз! (Сал. 1-х. 2:3, 4)

13. Әйсаниң һәқиқий әгәшкүчилириниң көзгә көрүнидиған есил пәзилити қайси вә бүгүнки күндә Йәһва гувачилири уни қандақ көрситиватиду?

¹³ Биринчи әсирдә Әйсаниң әгәшкүчилири көплигән есил пәзиләтләрни көрсәткән. Шуларниң арисидики әң көзгә көрүнәрлик болғини меһир-муһәббәт еди. Әйса шундақ дегән: «Бир-бириңларға меһир-муһәббәтлик болсаңлар, силәрниң мениң шагиртлирим екәнлигиңларни һәммиси тонуйду» (Йоһ. 13:34, 35). Бүгүнки күндә дунияниң җай-җайлирида Йәһва гувачилири арисида меһир-муһәббәт вә тинч-иттипақ һөкүм сүриду. Биз башқа барлиқ динлардин пәриқлинимиз. Чүнки биз гәрчә охшимайдиған милләт, ирқ вә мәдәнийәт арқа көрүнүшигә егә болсақму, аримизда бузулмас мәһкәм қериндашчилиқ риштиси бар. Бу һәқиқий меһир-муһәббәтни җамаәт учришишлиримизда вә конгресслиримизда көрәләймиз. Бу дәлил-испатлар Йәһва Худа қобул қилидиған усулда тоғра ибадәт қиливатқанлиғимизға болған ишәнчимизни күчәйтиду.

14. Колосилиқларға 3:12—14 айәтләргә асасланғанда, аримизда чоңқур меһир-муһәббәт барлиғини көрситишниң әң муһим йоли қайси?

¹⁴ Муқәддәс Язмилар: «Бир-бириңларни қизғин сөйүңлар»,— дәйду (Пет. 1-х. 4:8). Шундақ сөйгү-муһәббәтни көрситишниң бирдин-бир йоли — өз ара кәчүрүмчан болуп, бир-биримизниң камчилиқлириға қаримай, бәлки яхши тәрәплиригә қараш. Биз йәнә җамаәттики барлиқ қериндашларға, һәтта көңлүмизни рәнҗиткәнләргиму сехийлиқ вә меһмандостлуқни көрситишниң пурсәтлирини издәймиз (Колосилиқларға 3:12—14ни оқуң). Аримизда шундақ меһир-муһәббәт риштиси болса, өзүмизниң Әйсаниң һәқиқий әгәшкүчилири екәнлигимизни көрситиләймиз.

15. Биринчи әсирдики Әйсаниң әгәшкүчилири ибадәт қилишта қалдурған үлгилиригә әгишишниң йәнә қандақ йоллири бар?

¹⁵ Биринчи әсирдики Әйсаниң әгәшкүчилири Худаға ибадәт қилишта башқа үлгиләрниму қалдурған. Мәсилән, бүгүнки күндә тәшкилатимиз шу вақитлардикигә охшаш тәшкилләнгән. Аримизда худди шу чағлардикигә охшаш  наһийилик назарәтчиләр, ақсақаллар вә хизмәт ярдәмчилири бар (Флп. 1:1; Тит. 1:5). Шундақла биз Йәһва Худаниң җинсий мунасивәт, нека вә қан тоғрисидики буйруқлириға әмәл қилишта, йәнә гунасиға товва қилмиғанларни җамаәттин чиқирип, җамаәтни қоғдашта биринчи әсирдики Мәсиһ әгәшкүчилири қалдурған үлгилиригә әгишимиз (Әлч. 15:28, 29; Кор. 1-х. 5:11—13; 6:9, 10; Ибр. 13:4).

16. Әфәсликләргә 4:4—6 айәтләрдики сөзләрдин биз немини үгинимиз?

¹⁶ Әйса Мәсиһ нурғун кишиләр өзлирини униң шагиртлири дәп ейтсиму, бирақ униң тәлимлиригә әгәшмәйдиғанлиғини ейтқан (Мәт. 7:21—23). Муқәддәс Язмилар йәнә ахирқи күнләрдә нурғун кишиләрниң сиртқи көрүнүштә ихласмән болуп көрүнидиғанлиғини алдин-ала ейтқан (Тим. 2-х. 3:1, 5). Бирақ Муқәддәс китап Худаниң пәқәт бирла етиқатни, йәни бирла дини қобул қилидиғанлиғини ениқ көрсәткән (Әфәсликләргә 4:4—6ни оқуң).

17. Бүгүнки күндә кимләр Әйсани үлгә қиливатиду вә Худаға тоғра усулда ибадәт қиливатиду?

¹⁷ Бу мақалидә Әйсаниң тоғра ибадәт қилиш һәққидә үгәткән тәлимлирини вә биринчи әсирдики етиқатчилар Әйсаниң үлгисигә әгәшкәнлигини үгәндуқ. Йәнә бәзи дәлил-испатларни көрүп чиқтуқ. Хуласилисәк, бүгүнки күндә Худаға кимләр тоғра усулда ибадәт қиливатиду? Буниң җавави пәқәтла бир — Йәһва гувачилири. Йәһваниң хәлқи қатарида болуш вә Йәһва Худа вә Униң ирадиси һәққидә һәқиқәтни билиш биз үчүн нәқәдәр зор шан-шәрәп! Келиңлар, өзүмизниң давамлиқ һәқиқәт йолида меңиватқанлиғимизға көз йәткүзүп, һәқиқәтни чиң тутайли.