Мөмүнләргә хуш хәвәрни йәткүзүп, рәзиллик қилғучиларға Худаниң қисас күни һәққидә җакалаш үчүн, Муқәддәс китап тәтқиқ қилғучилар җәсур болуши керәк еди.

Канадида яшиған бурадәр Хоскин қаршилиқларға қаримай, җәсурлуқ билән гувалиқ бәргән. 1921-жили баһарда у бир чиркониң роһанийси билән учришип қалған. Бурадәр Хоскин сөһбитини шундақ башлап: «Биз Муқәддәс китап һәққидә хошал-хорам сөһбәт өткүзимиз. Һәтта бәзи нәрсиләрдә ой-пикримиз бир йәрдин чиқмисиму, биз сөһбитимизни тинч достанә ахирлаштуралаймиз»,— дегән. Бирақ ишлар ундақ болмиған еди. Хоскин әсләп шундақ дәйду: «Биз параңлишип бирқанчә минут өтүп, шу роһаний ишикни қаттиқ йепивәтти. Мән ишикниң әйнәклири парчә-парчә болуп кетидиған болди дәп ойлиған едим».

Чиркониң роһанийси: «Сән берип, Худани тонумайдиғанлар билән параңлаш!»— дәп вақириған. Бурадәр Хоскин артуқ гәп-сөз қилмай, кетип қалған. У өз-өзигә: «Мән дәл Худани тонумайдиған бири билән параңлишип қаптимән»,— дегән.

Әтиси роһаний чиркодики адәмләргә мән һәққидә ялған сөзләрни ейтип, шундақ дегән екән: «Бу киши кичик шәһиримиздики учиға чиққан ялғанчи, у өлтүрүлиши керәк». Бирақ бу бурадиримизни тохтитип қоймиған. У давамлиқ вәз қилип, нурғун адәмләр билән сөһбәтләшкән. У йәнә: «Мән у йәрдә вәз қилип, көп хошаллиқ таптим. Һәтта бәзи адәмләр: “Мән билимән, сени Худа әвәткән. Саңа қандақ ярдәм берәләймиз?’’— дәп, маңа еһтияҗлиқ нәрсиләрни бәргән»,— дәйду.

Қизиқиш көрсәткән кишиләрниң роһий җәһәттин өсүшигә ярдәм бериш үчүн, Муқәддәс китапни тәтқиқ қилғучилар «Алтун дәвир» a журналида, Муқәддәс китап тәтқиқ дәрислирини нәшир қилған. Шу йәрдә яшлар үчүн Муқәддәс китапқа мунасивәтлик соаллар болған. Ата-анилар балилиридин әшу соалларни сориған вә уларниң Муқәддәс китаптин җавапларни тепишиға ярдәм бәргән. Бәзи соаллар, мәсилән, «Муқәддәс китап қанчә китапни өз ичигә алиду?» дегәндәк аддий нәрсиләрни үгәткән. «Әйсаниң һәқиқий  әгәшкүчиси сүпитидә қандақ зиянкәшликләргә дуч келишимиз мүмкин?» дегәндәк соаллар болса, яшларни җәсур вәз ейтқучилар болушқа тәйярлиған.

Униңдин башқа, әшу «Алтун дәвир» журналида Муқәддәс китап һәққидә көпирәк билим елишни халайдиғанлар үчүн Муқәддәс китап һәққидики бәзи соаллар вә җаваплар берилгән еди. Соалларниң җаваплирини «Муқәддәс Язмиларни тәтқиқ қилиш» дегән китапниң биринчи қисмидин тепишқа болатти. Миңларчә оқурмәнләр шу сәһипиләрниң пайдисини көргән. Бирақ «Алтун дәвир» журналиниң 1921-жили, 21-декабрь санида әнди бу икки сәһипиниң нәшир қилинмайдиғанлиғини елан қилған еди. Немә үчүн туюқсиз шундақ өзгириш болған?

Йетәкчиликни өз үстигә алған қериндашлар, Муқәддәс китап һәққидә билим елиш үчүн һәр қетимда бир мавзу һәққидә муһакимә қилиш керәклигини чүшинип йәткән. Шу сәвәп, 1921-жили ноябрь ейида «Худаниң чилтари» намлиқ китап нәширдин чиққан. Бу китапни алған адәмләр «Худаниң чилтари» китавини үгиниш дәрисигиму қатнашқан. «Худаниң инсанларға мәңгү һаят кәчүрүшни ирадә қилғанлиғини» адәмләрниң чүшинишигә бу өзлигидин үгинидиған дәрис ярдәм бәргән. Бу дәрисниң үнүми қандақ болған?

Әшу китапни алған кишигә шу баптики қайси бәтни оқуши керәклиги көрситилгән кичик картиму әвәтилгән. Кейинки һәптиси шу оқуған мәзмунға асасланған бирқанчә соаллар йезилған башқа бир карта әвәтиләтти. Картиниң ахирида кейинки һәптиси оқушқа бәлгүләнгән мәзмун көрситилгән.

Бу дәрисләр 12 һәптә давам қилған. Шуңа йеқин әтраптики җамаәт һәр һәптиси йеңи бир картини Муқәддәс китап тәтқиқи өткүзидиған кишигә почта арқилиқ әвәткән. Шу картиларни җамаәттики яшанғанлар яки өйму өй вәз ейтишқа күчи йәтмәйдиғанлар әвәтәтти. Мәсилән, Америка, Пенсильвания штати, Милвали шәһиридин Анна Гарднер әсләп шундақ дегән: «“Худаниң чилтари” намлиқ китап нәширдин чиққанда, паләч сиңлим Тэйлниң көпирәк вәз қилалишиға пурсәт пәйдә болди. У һәр һәптә соаллар йезилған картиларни әвәтәтти». Шу дәрислик тамамланғанда, кишиниң Муқәддәс китап һәққидә көпирәк билим елишиға ярдәм бериш үчүн җамаәттин бири уни йоқлап баратти.

Бурадәр Рутерфорд җамаәтләргә шундақ хәт йезип әвәткән еди: «Бу жил Падишалиқ һәққидә гувалиқ бериш иши һәрқандақ бир жилға қариғанда, шунчә кәң көләмлик вә нәтиҗилик болди. Бирақ алдимизда бизни нурғун ишлар күтүп туриду. Башқиларниму бу әҗайип шан-шәрәплик хизмәткә қатнишишқа үндәйли». Наһайити ениқки, Муқәддәс китап тәтқиқ қилғучилар бу чақириққа қулақ салған. 1922-жили улар илгирикигә қариғанда, көпирәк Падишалиқ хуш-хәвири һәққидә җасарәт билән вәз қилған.