1. Немә үчүн биз Йәһва Худаниң йетәкчилигигә муһтаҗ? Мисал кәлтүрүң.

 СИЗ орманда адишип қалдиңиз дәйли. Әтрапиңизда явайи һайванатлар, кесәлликләрни жуқтуридиған һашарәтләр, зәһәрлик өсүмлүкләр вә башқа хәвп-хәтәрләр көп. Әгәр қешиңизда қәйәрдә хәвп-хәтәрләр барлиғини вә улардин қандақ жирақ турушни билидиған тәҗрибилик йетәкчи болса, буниңдин интайин миннәтдар болисиз, шундақ әмәсму?! Бу дуния дәл шундақ хәтәрлик орманға охшаш. Әтрапимиз Йәһва билән болған достлуқ мунасивитимизни бузидиған хәвп-хәтәрләргә толған. Амма бизниң мукәммәл Йетәкчимиз Йәһва Худа бар. У бизни бехәтәр йолда йетәкләп, ахирқи мәнзилимиз йеңи дуниядики мәңгү һаятқа йәткүзиду.

2. Йәһва бизни қандақ йетәкләйду?

² Йәһва бизни қандақ йетәкләйду? Биринчи, Өз Сөзи болған Муқәддәс китап арқилиқ. Униңдин башқа, инсанларни ишлитип йетәкчилик қилиду. Мәсилән, У «садиқ һәм әқил-парасәтлик қул» арқилиқ, бизни роһий озуқлуқ билән тәминләп, дана қарарларни чиқиришимизға ярдәм бериду (Мәт. 24:45). Йәһва йәнә башқа қәбилийәтлик кишиләрни қоллинип бизни йетәкләйду. Мәсилән, районға җавапкар ақсақаллар вә җамаәт ақсақаллири арқилиқ илһам мәдәт вә йол-йоруқ берип, қийин күнләрдин өтүшимизгә ярдәм бериду. Мошу қийинчилиқларға толған ахирқи күнләрдә, Йәһваниң ишәнчлик көрсәтмиләр билән бизни йетәкләватқанлиғиға интайин миннәтдармиз! Әшу көрсәтмиләрниң ярдимидә Йәһва билән болған достлуғимизни сақлап, һазирниң өзидә келәчәктә мәңгү шат-хорам һаят кәчүрәләймиз.

3. Бу мақалидә немиләрни көрүп чиқимиз?

³ Бирақ Йәһвадин кәлгән йол-йоруқни, болупму, намукәммәл адәмләр йәткүзгәндә, бәзидә Униңға бойсунуш қийинға тохтитиши мүмкин. Немә үчүн бу қийинға тохтайду? Чүнки улар биз аңлашни халимиған көрсәтмини бәргән болуши яки биз уни дана көрсәтмә әмәстәк Йәһвадин кәлмигәндәк һис қилишимиз мүмкин. Шундақ вақитларда бизниң Йәһваниң Өз хәлқини йетәкләйдиғанлиғиға  вә Униң көрсәтмиләргә әгишиш, бәрикәтләргә елип келидиғанлиғиға ишәнчимиз камил болуши керәк. Бу мақалидә ишәнчимизни күчәйтишкә ярдәм беридиған үч нәрсиләрни көрүп чиқимиз. 1) Йәһва Өз хәлқини қедимий заманларда қандақ йетәклигән? 2) Бүгүнки күндә бизни қандақ йетәкләватиду? 3) Биз Униң йетәкчилигигә әмәл қилсақ, қандақ пайда алалаймиз?

ЙӘҺВА ХУДА ИСРАИЛ ХӘЛҚИНИ ҚАНДАҚ ЙЕТӘКЛИГӘН?

4, 5. Йәһва Худа Муса пәйғәмбәр арқилиқ исраилларни йетәкләватқанлиғини қандақ көрсәткән? (Муқавидики рәсимгә қараң)

⁴ Йәһва Худа Муса пәйғәмбәрни Исраил хәлқини Мисирдин чиқиришқа тәйинлигән. У исраилларни Муса пәйғәмбәр арқилиқ йетәкләватқанлиғиниң ениқ дәлил-испатлирини көрсәткән. Мәсилән, Худа уларни күндизи булут түвриги, кечиси болса, от түвриги арқилиқ йетәклигән (Чиқ. 13:21). Муса пәйғәмбәр вә исраиллар өзлиригә йол башлап кәлгән түврүккә әгишип, Қизил деңиздин өткән. Бирақ кейин мисирлиқлар Исраил хәлқини қоғлап кәлгән. Шуниң билән исраиллар интайин қорқуп кәткән, чүнки мисирлиқлар уларни өлтүрмәкчи еди. Исраиллар Мусаниң уларни Қизил деңизға елип кәлгәнлиги хата дәп ойлиған. Амма бу хата болмиған еди. Муса пәйғәмбәр арқилиқ Йәһва Худа әтәй Өз хәлқини у йәргә башлап кәлгән еди (Чиқ. 14:2). Шу йәрдә У әҗайип һәйран қаларлиқ йол билән уларни қутулдурған (Чиқ. 14:26—28).

⁵ Муса пәйғәмбәр Худаниң Өз хәлқини булут түврүги арқилиқ 40 жил йетәкләп кәлгәнлигигә давамлиқ ишәнгән a. Һәммә исраиллар Йәһва Худаниң әшу түврүкни бир мәзгил Муса пәйғәмбәрниң чедири үстигә чүшәргәнлигини көрәләтти (Чиқ. 33:7, 9, 10). Йәһва Худа түврүк ичидин Мусаға сөзлигән. Муса болса, алған көрсәтмиләрни хәлиқкә йәткүзгән (Зәб. 99:7). Исраиллар Йәһва Худаниң уларни Муса пәйғәмбәр арқилиқ йетәкләватқанлиғини ениқ көрәлигән еди.

6. Исраил хәлқи Йәһва Худаниң йетәкчилигигә қандақ инкас қайтурған? (Санлар 14:2, 10, 11)

⁶ Әпсуски, исраилларниң көпинчиси Йәһва Худаниң Муса пәйғәмбәрни Өзиниң вәкили сүпитидә ишлитиватқанлиғиниң ениқ дәлил испатлирини рәт қилған (Санлар 14:2, 10, 11ни оқуң). Улар Йәһва Худаниң Муса пәйғәмбәрни ишлитип келиватқанлиғини қайта-қайта рәт қилған. Нәтиҗидә, Йәһва Худа исраилларниң Вәдә қилинған зиминға киришигә йол қоймиған (Сан. 14:30).

7. Йәһваниң йетәкчилигигә бойсунған адәмләрниң мисаллирини кәлтүрүң (Санлар 14:24) (Рәсимгиму қараң.).

⁷ Амма бәзи исраиллар Йәһва Худаниң йол-йоруғиға бойсунған. Мәсилән, Йәһва мундақ дегән: «[Халеб] Маңа пүтүнләй беқин[ған]» (Санлар 14:24ни оқуң). Худа Халебни мукапатлиған, һәтта униңға Вәдә қилинған зиминда әң яхши йәрни таллашқа мүмкинчилик бәргән (Йәшуа 14:12—14). Вәдә қилинған зиминға киришкә рухсәт қилинған исраилларму Йәһва Худаниң йол-йоруғиға бойсунушта яхши үлгә қалдурған. Муса пәйғәмбәрниң орниға Йәшуа йетәкчи болуп тәйинләнгәндә, исраиллар Йәшуани өмриниң ахирғичә шундақ чоңқур һөрмәтлигән (Йәшуа 4:14). Нәтиҗидә, Йәһва Худа уларни бәрикәтлигән вә Вәдә қилинған зиминни бәргән (Йәшуа 21:43, 44).

8. Падишаларниң заманида Йәһва Худа Өз хәлқини қандақ йетәклигән? Чүшәндүрүп бериң (Рәсимгиму қараң.).

⁸ Йәһва Худа Өз хәлқини йетәкләш үчүн һакимларни, кейинирәк падишалар заманида, пәйғәмбәрләрни тәйинлигән. Садиқ падишалар мошу пәйғәмбәрләрниң нәсиһәтлиригә қулақ селиши керәк еди. Мәсилән, падиша Давут кәмтәрлик билән Натан пәйғәмбәрниң түзитишини қобул қилған (Сам. 2-яз. 12:7, 13;  Тар. 1-яз. 17:3, 4). Падиша Йәһошафат Яһазийәл пәйғәмбәр бәргән көрсәтмигә бой сунған вә Йәһуда хәлқини Худаниң пәйғәмбәрлиригә ишинишкә дәвәт қилған (Тар. 2-яз. 20:14, 15, 20). Падиша Хизқия қийинчилиққа дуч кәлгәндә, Йәшая пәйғәмбәрдин ярдәм сориған (Йәшая 37:1—6). Падишалар Йәһваниң көрсәтмилиригә бой сунғанда, У уларни бәрикәтлигән вә пүтүн хәлиқ бехәтәр яшиған (Тар. 2-яз. 20:29, 30; 32:22). Ениқки, Йәһва Худа Өз пәйғәмбәрлирини әветип, хәлқигә йетәкчилик қилған. Шундақ болсиму, көпинчә падишалар вә Исраил хәлқи Йәһва Худа әвәткән пәйғәмбәрләрниң сөзлиригә қулақ салмиған (Йәр. 35:12—15).

ЙӘҺВА ДӘСЛӘПКИ МӘСИҺ ӘГӘШКҮЧИЛИРИНИ ҚАНДАҚ ЙЕТӘКЛИГӘН?

9. Йәһва Худа биринчи әсирдики Мәсиһ әгәшкүчилирини йетәкләш үчүн кимни қолланған? (Рәсимгиму қараң.)

⁹ Милади биринчи әсирдә, Йәһва Худа Мәсиһ әгәшкүчилири җамаитини қурған. У Мәсиһ әгәшкүчилирини қандақ йетәклигән? Йәһва Худа Әйса Мәсиһни җамаәтниң беши сүпитидә тәйинлигән (Әфәс. 5:23). Бирақ Әйса һәрбир шагиртиға шәхсән көрсәтмә бәрмигән. У йетәкчилик қилишта Йерусалимдики шагиртлар билән әлчиләрни ишләткән (Әлч. 15:1, 2). Шундақла, җамаәтләргә йетәкчилик қилиш үчүн ақсақаллар тәйинләнгән (Сал. 1-х. 5:12; Тит. 1:5).

10. а) Биринчи әсирдики Мәсиһ әгәшкүчилири көрсәтмиләргә қандақ инкас қайтурған? (Әлчиләр 15:30, 31) ә) Немә үчүн қедимий заманларда бәзи адәмләр Йәһва тәйинлигән адәмләрни рәт қилған? ( «Немә үчүн бәзиләр ениқ дәлил-испатларни рәт қилған?» намлиқ рамкиға қараң.)

¹⁰ Биринчи әсирдики Мәсиһ әгәшкүчилири әлчиләрниң көрсәтмилиригә қандақ инкас қайтурған? Уларниң көпинчилири көрсәтмиләргә хошаллиқ билән бойсунған. «Илһамландуридиған сөзләргә улар хошал болушти» (Әлчиләр 15:30, 31ни оқуң). Ундақта, бүгүнки күндә Йәһва Худа Өз хәлқини қандақ йетәкләватиду?

БҮГҮНКИ КҮНДӘ ЙӘҺВА ХУДА БИЗНИ ҚАНДАҚ ЙЕТӘКЛӘЙДУ?

11. Бүгүнки күндә Йәһва Худа йетәкчиликни қолиға алғанларни қандақ қоллап қувәтләватиду? Мисал кәлтүрүң.

¹¹ Йәһва Худа бүгүнки күндиму Өз хәлқини йетәкләп келиватиду. У буни Муқәддәс китап вә җамаәтниң беши болған Оғли арқилиқ қиливатиду. Худа давамлиқ инсанлар арисидин Өзигә вәкиллик қилидиғанларни таллап, бүгүнки күндә ишлитиватқанлиғиниң дәлил-испатини көрәләймизму? Әлвәттә. Мәсилән, 1800-жилларниң ахирида йүз бәргән ишларни көрүп бақайли.  Чарлз Тейз Расселл вә униң достлири бирликтә 1914-жили Худа Падишалиғи үчүн муһим бир жил болидиғанлиғини чүшәнгән (Дан. 4:25, 26). Улар Муқәддәс Язмилардики бәшарәтләрни тәкшүрүп, тәтқиқ қилиш арқилиқ шу хуласигә кәлгән. Уларниң Муқәддәс Язмиларни тәтқиқ қилишиға Йәһва Худа йетәкчилик қилғанму? Һә-ә, шундақ қилған. 1914-жили йүз бәргән вақиәләр Худа Падишалиғи һөкүмранлиқ қилишни башлиғанлиғини испатлиған. Шу жили Биринчи дуния уруши башланди, кәйни-кәйнидин жуқумлуқ кесәлликләр, йәр тәврәшләр вә ачарчилиқлар йүз бәргән (Луқа 21:10, 11). Йәһва һәқиқәтән бу садиқ хизмәтчилирини ишлитип, Өз хәлқигә ярдәм қилған.

12, 13. Иккинчи дуния урушида йетәкчилик қилған бурадәрләр вәз қилиш ишини җанландуруш үчүн немә қилған?

¹² Иккинчи дуния уруш мәзгилидә болған вақиәләрни көрүп чиқайли. Дуниявий баш идаридики йетәкчилик қилидиған бурадәрләр Вәһий 17:8-айәтни әстаидил тәтқиқ қилған. Улар Иккинчи дуния уруши Армагедон урушиға әмәс, бәлки вәз паалийитини техиму җанландурушқа пурсәт яритидиған нисбәтән теч-аман бир дәвиргә башлап киридиғанлиғини чүшәнгән. Шуңлашқа, улар шу чағдики вәзийәткә мас кәлмәйдиған қарарни чиқарған, йәни Йәһваниң тәшкилати миссионерларни үгитиш вә уларни дунияниң һәрқайси җайлириға әвәтиш үчүн Гилиад мәктивини қурған. Уруш техи давамлишиватқан болсиму, миссионерлар бу мәктәпни пүтүргәндә, башқа дөләтләргә вәз қилишқа әвәтилгән. Униңдин башқа, садиқ қул җамаәттики барлиқ кишиләрни техиму яхши вәз ейтқучи вә тәлим бәргүчи қилип йетиштүрүш үчүн Вәз ейтқучилар тәрбийиләш курсини b орунлаштурушини башлиған еди. Шундақ тәрбийиләш мәктәплири билән Худа хәлқи өзлирини алдида күтүватқан вәз хизмәткә яхши тәйярлиған.

¹³ Арқимизға қарисақ, қийин мәзгилдә Йәһва Худаниң Өз хәлқини йетәкләп кәлгәнлигини ениқ көрәләймиз. Иккинчи дуния урушидин кейин нурғун дөләтләрдә мәлум дәриҗидә тинчлиқ вә әркинлик болғач, Йәһваниң хәлқи техиму кәң көләмдә қизғинлиқ билән вәз қилиш пурситигә еришкән. Әмәлийәттә вәз иши җанлинип ронақ тапқан.

14. Биз немә үчүн Йәһваниң тәшкилати билән ақсақалларниң көрсәтмилиригә ишинишимиз керәк? (Вәһий 2:1) (Рәсимгиму қараң.)

¹⁴ Бүгүнки күндә Рәһбәрлик кеңәшниң әзалири давамлиқ Мәсиһниң йолбашчилиқни  издәватиду. Улар қериндашларға бәргән көрсәтмиләрниң Йәһва Худа вә Әйса Мәсиһниң көз қаришини әкс әттүрүшни халайду. Улар бу көрсәтмиләрни районға җавапкар ақсақаллар вә ақсақаллар арқилиқ җамаәтләргә йәткүзиду c. Майланған ақсақаллар Мәсиһниң «оң қолида» (Вәһий 2:1ни оқуң). Әлвәттә шу ақсақаллар мукәммәл әмәс вә хаталиқ өткүзиду. Муса пәйғәмбәр, Йәшуа вә әлчиләрму бәзидә охшаш хаталиқларни өткүзгән (Сан. 20:12; Йәшуа 9:14, 15; Рим. 3:23). Буниңдин шуни ениқ көрәләймизки, Әйса Мәсиһ еһтиятчанлиқ билән садиқ қул вә барлиқ ақсақалларни йетәкләп келиватиду. У бу ишни «мошу дуния қурулуми аяқлашқичә» давамлаштуриду (Мәт. 28:20). Шуңлашқа, йетәкчилик қилишқа тәйинләнгәнләрниң көрсәтмиләргә ишинишимиз үчүн йетәрлик сәвәпләр бар.

ЙӘҺВАНИҢ ЙОЛ-ЙОРУҒИҒА БОЙСУНУШ БИЗ ҮЧҮН ПАЙДИЛИҚ

15, 16. Йәһваниң йетәкчилигигә бойсунғанларниң тәҗрибилиридин немиләрни үгинимиз?

¹⁵ Биз Йәһваниң көрсәтмисигә бойсунсақ, һазир Униң бәрикәтлиригә еришимиз. Мәсилән, Энди билән Роуз d аддий-саддә турмуш кәчүрүш һәққидики нәсиһәткә қулақ салған. Нәтиҗидә, улар Худаға пак ибадәт қилишта ишлитилидиған беналарниң қурулуш ишлириға пидаий ярдәм беришкә қатнишалиған. Роуз мундақ дәйду: «Бәзидә биз наһайити кичик өйләрдә турдуқ, һәтта ашханиси йоқ еди. Мән өзүмниң қизиқиши болған фотосүрәтчилик үчүн қоллинидиған нурғун нәрсиләрни сетиветишкә тоғра кәлди. Шундақ қилғинимизда, көзлиримдин яшлар төкүлди. Амма Ибраһимниң аяли Сарәгә охшаш мән кәйнигә әмәс, алдиға қарап меңишқа бәл бағлидим» (Ибр. 11:15). Ундақта, бу җүп қандақ бәрикәтләргә еришти? Роуз мундақ дәйду: «Өзүмиздә бариниң һәммисини Йәһваға бериватқанлиғимизни билиш бизни бәк хошал қилиду. Худаниң тәшкилати тапшурған вәзипиләрни орунлиғинимизда, йеңи дунияда һаятниң қандақ болидиғанлиғини тәсәввур қилалаймиз». Эндиму Роузниң сөзигә қошулуп мундақ дәйду: «Биз Худа Падишалиғини қоллаш үчүн өзүмизниң барлиқ вақтимизни вә күчимизни сәрип қилғинимиздин интайин разимиз».

¹⁶ Йәһваниң йол-йоруғиға бойсунушниң қандақ пайдиси бар? Оттура мәктәпни пүтүргәндин кейин, Марсия Йәһва Худаға хизмәт қилиш билән мәшғул болуш үчүн Униң нәсиһәт сөзигә қулақ селишни көңлигә пүккән (Мәт. 6:33;  Рим. 12:11). У мундақ дәйду: «Университет маңа төрт жил һәқсиз оқуш пурситини бәрди, амма мән өзүмгә роһий мәхсәт қойған едим. Шуңлашқа мән университетта оқушниң орниға бир кәспий техника үгиниш үчүн кәспий тәрбийиләш мәктивидә оқушни таллидим. Шундақ болғанда, Йәһваға хизмәт қилғинимда өз турмушимни қамдалаттим. Бу мән чиқарған әң яхши қарарлардин бири. Мән һазир пионер болуп хизмәт қиливатимән. Униңдин башқа, иш орнумда ишләш вақтимни өзүм халиғандәк бәлгүләләймән. Шуңлашқа, мән Бәйтәлгиму пидаий ярдәм берәләймән. Мән йәнә башқа алаһидә шан-шәрәпләрдин бәһримән болдум».

17. Йәһваниң йетәкчилигигә давамлиқ қулақ салсақ, қандақ бәрикәтләргә еришимиз? (Йәшая 48:17, 18)

¹⁷ Бәзи вақитларда Худаниң тәшкилати бизни қоғдаш үчүн нәсиһәтләрни бериду. Мәсилән, пулпәрәсликкә вә Худаниң қанунини бузушқа йетәкләйдиған ишларға берилип кәтмәслик һәққидә агаһландуриду. Йәһваниң көрсәтмилиригә қулақ селиш интайин пайдилиқ. Пак вижданни сақлап, өзүмизни зөрүр болмиған аваричилиқлардин сақлап қалимиз (Тим. 1-х. 6:9, 10). Нәтиҗидә, пүтүн вуҗудимиз билән Йәһваға хизмәт қилалаймиз. Бу бизни хошаллиқ, течлиқ вә қанаәткә ериштүриду (Йәшая 48:17, 18ни оқуң).

18. Немә үчүн давамлиқ Йәһва Худаниң көрсәтмилиригә бойсунушқа қәтъий бәл бағлидиңиз?

¹⁸ Дәһшәтлик чоң балаю апәт вә Мәсиһниң миң жиллиқ һөкүмранлиқ мәзгилидә, Йәһва Худа давамлиқ бәзи инсанларни қоллинип, бизгә йол-йоруқларни бериду (Зәб. 45:16). Шу чағда қәлбимиздики шәхсий майиллиғини чәткә қайрип қоюш тәләп қилинғанда, бу көрсәтмигә әгишимизму? Бу бизниң Йәһва һазир бәргән йол-йоруқларға қандақ инкас қайтурушимизға бағлиқ. Шуңлашқа һәрдайим Йәһваниң йол-йоруғиға, шу җүмлидин бизгә җавапкар болушқа тәйинләнгән кишиләр бәргән көрсәтмиләргә бойсунайли (Йәшая 32:1, 2; Ибр. 13:17). Әгәр шундақ қилсақ, бизни һәрхил роһий хәвп-хәтәрдин қоғдап, ахирқи мәнзил, йәни йеңи дуниядики мәңгүлүк һаятқа йетәкләйдиған Йетәкчимиз Йәһваға пүтүн қәлбимиз билән ишинимиз.