1. Йәһва билән вақтимизни қандақ өткүзәләймиз?

 ҺӘММӘ адәм өзи көңүл бөлидиған йеқин кишилири билән вақит өткүзүшни яхши көриду. Мәсилән, әр-аял бирликтә вақит өткүзүшни халайду. Яшлар йеқин достлири билән вә биз һәммимиз етиқатчи қериндашлиримиз билән вақит өткүзүшкә амрақ. Амма биз һәммидин көпирәк Яратқучимиз Йәһва билән вақит өткүзүшни халаймиз. Дуа қилиш, Униң Сөзини оқуш, Униң ирадиси вә гөзәл пәзиләтлири һәққидә чоңқур ойлиниш арқилиқ шундақ қилалаймиз. Һәқиқәтән, Йәһва билән вақит өткүзүш әң қәдирләшкә тегишлик иштур! (Зәб. 139:17).

2. Қандақ ишлар көп вақтимизни алиду?

² Гәрчә биз Йәһва Худа билән вақит өткүзүшни яхши көрсәкму, амма бәзидә ундақ қилиш асан әмәс. Турмушимиз интайин алдираш өткәч, биз Худаға ибадәт қилиш үчүн вақтимизни яхши орунлаштурушимиз керәк. Һаят кәчүрүш үчүн ишлишимиз, аилидики мәсъулийитимиз вә башқа зөрүр ишларға көп вақтимизни сәрип қилишимиз мүмкин. Нәтиҗидә, дуа қилиш, тәтқиқ қилип үгиниш вә чоңқур ойлинишқа вақит чиқириш бизгә тәс болиду.

3. Йәнә қандақ ишлар вақтимизни оғрилиши мүмкин?

³ Буниңдин башқа вақтимизни оғрилайдиған йәнә башқа ишлар бар. Мәсилән, һәммимиз арам елиш яки көңүл ечишқа муһтаҗ. Амма диққәт қилмисақ, бундақ иш-паалийәтләр Йәһваға йеқинлишишқа сәрип қилидиған вақтимизни оғрилиши мүмкин. Гәрчә биз таллиған көңүл ечиш түрлири, яхши болсиму, уларға сәрип қилидиған вақтимизға чәк қоюшимиз керәк. Чүнки Йәһва билән болған мунасивитимиз шундақ көңүл ечиш паалийәтлиридинму муһимирақ (Пәнд н. 25:27; Тим. 1-х. 4:8).

4. Бу мақалидә немиләрни муһакимә қилимиз?

 ⁴ Бу мақалидә немә үчүн һаятимизда әң муһим нәрсиниң немә екәнлигини қарар қилишимиз керәклигини муһакимә қилимиз. Йәнә вақтимиздин пайдилинип, Йәһваға йеқинлишиш үчүн немиләрни қилалайдиғанлиғимизни вә бундақ қилишниң биз үчүн қандақ пайдиси барлиғини көрүп чиқимиз.

5. Әфәсликләргә 5:15—17 айәтләр, яшларниң һаятида әң яхши қарар чиқиришиға қандақ ярдәм берәләйду?

⁵ Яхши һаят йолини таллаң. Адәттә яшлар һаятини немигә беғишлашни ойлайду. Бир тәрәптин яшларни мәктәптики оқутқучилири вә охшаш диний етиқатта болмиған аилә әзалири алий мәктәптә жуқури билим елип, бу дунияда көп пул тапидиған бир кәсипни таллашқа дәвәт қилиду. Амма алий мәктәптә оқуш үчүн көп вақит кетиду. Йәнә бир тәрәптин, Йәһва гувачиси болған ата-анилар вә җамаәттики қериндашлар яшларни һаятини Йәһваға хизмәт қилишқа беғишлашқа үндәйду. Йәһвани сөйидиған яшларниң әң тоғра таллашни қилишиға немә ярдәм берәләйду? Әфәсликләргә 5:15—17 айәтләрни оқуш вә улар үстидә чоңқур ойлиниш дана қарар чиқиришқа ярдәм бериду (Оқуң). Бу айәтләрни оқуғандин кейин яшлар өз-өзидин шундақ сориса болиду: Йәһваниң ирадиси немә? Қандақ қарар қилсам, Униң көңли хурсән болиду? Қайси йолни таллисам, мәналиқ һаят кәчүрәләймән. Есиңиздә болсунки, бизниң дәвримиз бәк рәзил. Шәйтан һөкүмранлиқ қиливатқан бу дуния йоқ болушқа аз қалди. Шуңлашқа һаятимизда Йәһваниң көңлини хурсән қилидиған қарарни чиқиришимиз әң даналиқ болиду.

6. Мәрийәм немә қилишни таллиди вә бу немә үчүн дана қарар болған?

⁶ Әң муһимини пәриқләндуруң. Бәзидә қилмақчи болған һәр иккила ишимиз хата әмәс. Амма қайсисиниң муһимирақ екәнлигини пәриқләндурушимиз керәк. Бу муһим нуқтини Әйса Марта билән Мәрийәмниң өйидә меһман болғанда йүз бәргән ишлар яхширақ чүшәндүрүп бериду. Марта Әйсани меһман қилиш пурситигә еришкинидин интайин хошал болған. Шуңа у мол дәстихан тәйярлаш билән алдираш болған. Амма Мәрийәм шу пурсәттин пайдилинип, Әйса билән биллә олтирип, униң тәлимлирини аңлиған еди. Мартаниң қиливатқан ишлири хата әмәс еди. Амма Әйса: «Мәрийәм болса яхширағини таллавалди»,—дегән еди (Луқа 10:38—42). Бәлким, Мәрийәм шу күни немә йегәнлигини унтуп қалған болуши мүмкин, амма шуниңға ишинәләймизки, у Әйсадин аңлиған тәлимләрни һаятиниң ахирғичә унтуп қалмиған. Худди Мәрийәм Әйса билән биллә болған чәклик вақтини қәдирлигәнгә охшаш, бизму Йәһва билән өткүзидиған вақтимизни қәдирләймиз. Ундақта, бу вақиттин яхширақ пайдилиниш үчүн немә қилалаймиз?

7. Немә үчүн дуа, шәхсий тәтқиқ вә чоңқур ойлиниш бәк муһим?

⁷ Дуа, шәхсий тәтқиқ вә чоңқур ойлиниш ибадитимизниң бир қисми. Йәһва бизни бәк яхши көриду вә қәдирләйду. Биз у арқилиқ асмандики Атимиз билән параңлишалаймиз (Зәб. 5:7). Биз Муқәддәс китапни тәтқиқ қилип үгәнсәк, әқил-парасәтниң мәнбәси болған Яратқучи Йәһва тоғрилиқ билимләргә егә болалаймиз (Пәнд н. 2:1—5). Биз чоңқур мулаһизә қилғанда, Йәһваниң кишини җәлип қилидиған гөзәл пәзиләтлири вә пүткүл инсанийәткә болған әҗайип ирадиси һәққидә ойлинимиз. Бу вақтимизни өткүзүшниң әң яхши йолидур. Ундақта, чәклик вақтимиздин үнүмлүк пайдилинишимизға немә ярдәм берәләйду?

8. Әйсаниң чөлдә болғанда, вақтини қандақ өткүзгәнлигидин немиләрни үгинәләймиз?

 ⁸ Мүмкинқәдәр җим-җит бир җайни таллаң. Әйсаниң мисалини көрүп бақайли. У йәр йүзидики вәзиписини башлаштин илгири 40 күн чөлдә ялғуз жүргән (Луқа 4:1, 2). Әшу тинч җайда Әйса Атиси Йәһваға дуа қилған вә Униң өзи үчүн қилған ирадиси һәққидә чоңқур мулаһизә қилған. Шәк-шүбһисизки, бундақ қилиш униңға келәчәктә дуч келидиған синақларға тәйяр болушиға ярдәм бәргән. Биз Әйсаниң мисалидин немә үгинәләймиз? Әгәр биз чоң бир аилидә яшисақ, тинч бир җайни тепиш тәс болуши мүмкин. Шундақ әһвалда биз сиртта тинч җайни тепишимиз мүмкин. Джулия исимлиқ қериндишимиз Йәһваға дуа қилмақчи болғанда, шундақ қилиду. У йолдиши билән Франциядә кичик бир өйдә туриду. Шуңа һечким аварә қилмайдиған тинч қелиш пурситигә еришиш униң үчүн бәк тәс еди. У чүшәндүрүп мундақ дәйду: «Мән һәр күни бағчиға берип, сәйлә қилимән. Шу йәрдә тинчлиқта ялғуз олтирип, пүтүн диққитимни жиғип, Йәһваға дуа қилалаймән».

9. Әйса өзиниң наһайити алдираш болушиға қаримай, Атиси билән болған мунасивитини қәдирләйдиғанлиғини көрситиш үчүн немә қилған?

⁹ Әйсаниң һаяти толиму алдираш өткән. У йәр йүзидә өз вәзиписини орунливатқанда, у қәйәргә бармисун, һемишәм топ-топ кишиләр униңға әгишип жүргән. Улар Әйсаниң өзлири билән вақит өткүзүшини үмүт қилған. Бир қетим Әйсани көрүш үчүн пүтүн шәһәр хәлқи ишик алдиға топлашқан еди. Гәрчә шундақ болсиму, Йәһваға дуа қилиш үчүн Әйса дайим вақит чиқарған. Таң ейтиштин бурун орнидин туруп, шәһәрдики тинч бир җайға берип, Атиси билән вақит өткүзгән (Марк 1:32—35).

10, 11. Мәтта 26:40, 41-айәтләргә асасланғанда, Гетсиманә бағчисида Әйса әлчилиригә немә қилишни буйриған, амма немә иш йүз бәргән?

¹⁰ Әйса йәр йүзидики хизмити ахирлишиш алдида, дуа қилиш вә чоңқур ойлиниш үчүн йәнә бир қетим җим-җит йәрни тапқан. Бу униң өлүштин бурунқи әң ахирқи кечиси болуп, у Гетсиманә бағчисиға барған еди (Мәт. 26:36). Шу вақитта у шагиртлириға дуа қилиш һәққидә муһим нәсиһәтләрни бәргән.

¹¹ Әшу вақитта йүз бәргән ишлар һәққидә ойлинип бақайли. Улар Гетсиманә бағчисиға йетип кәлгәндә, бәк кәч болуп кәткән еди. Бәлким, йерим кечә болған болуши мүмкин. Әлчилиригә һошияр туруңлар дәп, Әйса өзи дуа қилиш үчүн кетип қалған (Мәт. 26:37—39). Лекин у дуа қиливатқанда, әлчиләр ухлап қалған еди. У йәнә бир қетим сәгәк туруп, дуа қилиңлар дәп уларни агаһландурған (Мәтта 26:40, 41ни оқуң). У әлчилириниң көп бесимға дуч кәлгәнлигини вә аллиқачан бәк чарчап кәткәнлигини билгән. Шуңа уларға һисдашлиқ қилип, шундақ дегән: «Роһ һошияр, тән болса аҗиздур». Шуниңдин кейин Әйса икки қетим дуа қилишқа кетип қалған. Амма һәр қетим қайтип кәлгәндә, әлчилириниң дуа  қилишниң орниға ухлаватқанлиғини көргән (Мәт. 26:42—45).

12. Биз еғир бесим яки һарғинлиқ һис қилип, дуа қилиш қийин болса немә қилалаймиз?

¹² Мувапиқ бир вақитни таллаң. Бәзидә биз еғир бесим яки һарғинлиқ һис қилишимиз мүмкин. Нәтиҗидә, һәтта дуа қилалмай қалимиз. Әгәр сиз бундақ әһвалда болсиңиз, үмүтсизләнмәң. Нурғун қериндашларму шуниңға охшаш қийинчилиқларға дуч келиватиду. Бәзиләр кәчтә ухлаштин бурун дуа қилишқа адәтләнгән. Улар бәк чарчап кәтмигән чағда, балдурирақ Йәһваға дуа қилиш яхши дәп қарайду. Йәнә бәзиләр олтирип яки тизлинип дуа қилғанда, өзлириниң диққитини мәркәзләштүрүшигә ярдәм беридиғанлиғини байқиған. Әгәр ғәм-тәшвишиңиз көп болғанлиқтин яки үмүтсизләнгәнликтин дуа қилалмисиңизчу? Һис-туйғулириңизни Йәһваға ейтип бериң. Рәһим-шәпқәтлик Атиңизниң сизни чүшинидиғанлиғиға ишиниң (Зәб. 139:4).

13. Электронлуқ қурулмилар Йәһва билән өткүзидиған вақтимизға қандақ дәхил қилиши мүмкин?

¹³ Тәтқиқ қилип үгәнгәндә, диққитиңиз чечилип кетиштин сақлиниң. Дуа Йәһва билән достлуғимизни күчәйтишниң бирдин-бир йоли әмәс. Муқәддәс китапни тәтқиқ қилиш вә җамаәт учришишлириға қатнишишму Униңға йеқинлишишимизға ярдәм берәләйду. Шәхсий тәтқиқ қилип үгәнгәндә яки җамаәт учришишида вақтимиздин үнүмлүк пайдилиниш үчүн немә қилалаймиз? Өз-өзүңиздин мундақ сорап көрүң: шәхсий тәтқиқ үгиниш яки жиғилишларда, диққитимни немә чечиветиду? Янфон яки башқа нәрсиләрму? Бири қилған телефон, әвәткән электронлуқ хәт яки қисқа учурму? Бүгүнки күндә миллиардлиған кишиләр электронлуқ қурулмиларни ишлитиду. Бәзи тәтқиқатчилар мундақ дәйду: «Биз диққитимизни мәркәзләштүрмәкчи болсақ, әтрапимизда телефон болса, диққитимиз асанла чечилип кетиду». Бир психология профессори: «Бу вақитта ой-хиялиңиз қолуңиздики хизмәттә әмәс, башқа җайда болиду»,—дәйду. Адәттә җамаәт учришишлар яки конгресслар башлиништин бурун, биз башқиларға дәхил қилмаслиқ үчүн телефон яки башқа электронлуқ алақә қураллирини үнсиз һаләткә тәңшәп қоюшқа дәвәт қилинимиз. Cиз ялғуз қалған вақтиңиздиму шундақ қилаламсиз? Шундақ қилсиңиз, улар Йәһва билән өткүзгән вақтиңизға дәхил қилмайду.

14. Филипиликләргә 4:6, 7-айәтләргә асасланғанда, Йәһва диққитимизни мәркәзләштүрүшкә қандақ ярдәм бериду?

 ¹⁴ Йәһвадин диққитиңизни жиғишиңизға ярдәм беришни сораң. Шәхсий тәтқиқ қилғанда яки жиғилишларға қатнашқанда диққитимизниң чечилип кетиватқанлиғини байқисақ, чоқум Йәһвадин ярдәм соришимиз керәк. Әгәр ғәм-әндишә қилсақ, диққитимизни роһий ишларға қаритиш тәскә тохтайду. Амма шу вақитта диққитимизни мәркәзләштүрүш интайин муһим. Шуңа Йәһвадин қәлбимиз вә зеһнимизни қоғдайдиған тинчлиқ беришни сорап, дуа қилишимиз керәк (Филипиликләргә 4:6, 7ни оқуң).

15. Йәһва билән вақит өткүзүшниң қандақ пайдиси бар?

¹⁵ Йәһваға дуа қилип, Униң Сөзигә қулақ салсиңиз вә Униң ишлири һәққидә чоңқур ойлансиңиз, сиз үчүн пайдиси көп. Қандақ пайдиси бар? Биринчи, сиз яхширақ қарарларни чиқиралайсиз. Муқәддәс китапта: «Ким данишмәнләр билән алақида болса, у өзиму данишмән болиду»,—дәп йезилған (Пәнд н. 13:20). Шуңа барлиқ әқил-парасәтниң мәнбәси болған Йәһва билән вақит өткүзсиңиз, техиму дана болисиз. Яратқучиңизни немә хурсән қилидиғанлиғини яхширақ чүшинип, Униң көңлини ағритидиған хата қарарларни чиқириштин сақлинишни үгинәләйсиз.

16. Немә үчүн Йәһва билән көпирәк вақит өткүзсәк, техиму маһир тәлим бәргүчи болалаймиз?

¹⁶ Иккинчи, сиз маһир тәлим бәргүчи болалайсиз. Биз бири билән Муқәддәс китапни тәтқиқ қилсақ, муһим мәхсәтлиримиздин бири —шу кишиниң Йәһваға йеқинлишишиға ярдәм бериш. Биз Йәһва билән вақит өткүзүп, Униң билән йеқин мунасивәт орнатсақ, Униңға болған сөйгү-муһәббитимиз күчийиду. Муқәддәс китапни үгиниватқанларға Яратқучи Йәһваға болған сөйгү-муһәббитини күчәйтишигә ярдәм бериштә техиму маһир болумиз. Әйсаму шундақ қилған. У Йәһва тоғрилиқ сөз қилғанда, униң шагиртлири Йәһваниң меһрибан вә сөйгү-муһәббәткә толған Ата екәнлигини һис қилалиған. Шуңа уларниң Йәһваға болған сөйгү-муһәббити тәбиийла техиму күчәйгән (Йоһ. 17:25, 26).

17. Немә үчүн дуа вә шәхсий тәтқиқ үгиниш иман-етиқадимизни күчәйтишкә ярдәм берәләйду?

¹⁷ Үчинчи, иман-етиқадиңиз техиму күчийиду. Худадин йолбашчилиқ, тәсәлли вә ярдәм сориғиниңизда, Униң сизгә қандақ җавап қайтуридиғанлиғи һәққидә ойлинип көрүң. Һәр қетим Йәһва дуалириңизға җавап қайтурғанда, Униңға болған ишәнчиңиз техиму күчийиду (Йоһ. 1-х. 5:15). Иман-етиқадиңизни мустәһкәмләш үчүн йәнә немә қилалайсиз? Шәхсий тәтқиқ қилиң. Есиңиздә болсунки, ишәнч аңлаштин келиду (Рим. 10:17). Бирақ мустәһкәм иман-етиқатни йетилдүрүш үчүн пәқәт билим елиш йетәрлик әмәс. Ундақта, сиз йәнә немә қилишиңиз керәк?

18. Немә үчүн чоңқур ойлинишимиз керәк? Мисал кәлтуруң.

 ¹⁸ Алған билимлиримиз һәққидә чоңқур ойлинишимиз керәк. Зәбурниң 77-бапниң язғучиси баштин өткүзгән кәчүрмишләр һәққидә муһакимә қилип көрәйли. У қаттиқ азапланған еди. Чүнки у өзи вә Исраил хәлқиниң әнди Йәһваниң қобул қилишиға еришәлмәйдиғанлиғини һис қилған еди. Шундақ ғәм-әндишиләр сәвәплик, униң уйқиси кечип, ухлалмиған (2—8 айәтләр). У немә қилған? У Йәһваға мундақ дегән: «Сениң барлиқ ишлигәнлириң үстидә сеғинип ойлинимән; Сениң қилғанлириң үстидә истиқамәт қилимән» (12-айәт). Гәрчә у Йәһваниң илгири өз хәлқи үчүн немиләрни қилғанлиғини яхши билсиму, амма у йәнила көп ғәм-әндишә қилип, шундақ сориған: «Тәңри меһри-шәпқитини көрситишни үнтудиму? У ғәзәплинип Өз рәһимдиллиғини тохтитивәттиму?» (9-айәт) Зәбур язғучиси Йәһваниң иш-һәрикәтлири вә Униң илгири Өз хәлқигә қандақ рәһим-шәпқәт көрсәткәнлиги һәққидә чоңқур ойланған еди (11-айәт). Нәтиҗидә, у Йәһваниң Өз хәлқини һәргизму ташлимайдиғанлиғиға ишәнгән (15-айәт). Худди шуниңға охшаш, әгәр сиз Йәһваниң Өз хәлқи вә шәхсән сиз үчүн немиләрни қилғанлиғи һәққидә чоңқур ойлансиңиз, иман-етиқадиңиз техиму мустәһкәмлиниду.

19. Йәһва билән вақит өткүзүшниң йәнә қандақ пайдиси бар?

¹⁹ Төртинчи, әң муһими, Йәһваға болған сөйгү-муһәббитиңиз техиму чоңқурлишиду. Башқа пәзиләтләргә қариғанда сөйгү-муһәббәт сизни Йәһваға итаәтчан болушқа, Уни хурсән қилиш үчүн қурбанлиқларни беришкә вә һәрқандақ синақларға бәрдашлиқ беришкә техиму көпирәк үндәйду (Мәт. 22:37—39; Кор. 1-х. 13:4, 7; Йоһ. 1-х. 5:3). Биз үчүн Йәһва Худа билән йеқин дост болуштин қиммәтлик һечнәрсә йоқ (Зәб. 63:1—8).

20. Йәһва билән вақит өткүзүш үчүн вақтиңизни қандақ орунлаштурисиз?

²⁰ Есиңиздә болсунки, дуа, шәхсий тәтқиқ вә чоңқур ойлиниш —ибадәтниң муһим тәркиви қисимлири. Әйсаға охшаш Йәһва билән вақит өткүзүш үчүн җим-җит җайни тепиң. Диққитиңиз чечилип кетишиниң алдини елиң. Диққитиңизни ибадәт паалийәтлиридә мәркәзләштүрүш үчүн ярдәм сорап, Йәһваға дуа қилиң. Әгәр һазир вақтиңизни даналиқ билән ишләтсиңиз, Йәһва сизни җәзмән йеңи дунияда мәңгүлүк һаят билән мукапатлайду (Марк 4:24).