1, 2. Әйса асманға көтирилгәндин кейин, әлчиләр немини билгүси кәлгән?

 ӘЙСАНИҢ әлчилири Зәйтун теғида туруп, устази вә дости, Әйсаниң, асманға көтирилгәнлигини вә булут арисида ғайип болғанлиғини көрди (Әлчиләр 1:9, 10). Тәхминән икки жил бойи Әйса әлчилиригә тәлим берип, илһамландуруп, йетәклигән. Һазир болса, у уларниң йенида әмәс еди. Әлчиләр әнди немә қилмақчи?

² Асманға кәтмәстин авал, Әйса шагиртлириға: «Йерусалимда, пүткүл Йәһудийә вә Самарийәдә һәм йәр-зәминниң чәтлиригичә маңа гувачилар болисиләр»,— деди (Әлчиләр 1:8). Улар бу тапшурмини кандақ орунлалатти? Әйса уларға Худаниң муқәддәс роһи ярдәм беридиғанлиғини вәдә қилған (Әлчиләр 1:5). Лекин уларға ким рәһбәрлик қилиду вә бу дуниявий вәз ишини ким башқуриду? Әлчиләр қедимда Йәһва исраиллиқларни йетәкләш үчүн инсанларни пайдиланғанлиғини билгән. Шуңа уларниң Йәһва йеңи йолбашчини таллайдиған–таллимайдиғанлиғини билгүси кәлгән.

3. а) Әйса асманға көтирилгәндин кейин, садақәтмән әлчиләр қандақ муһим қарарни қилди? ә) Мошу мақалидә қандақ соалларни қараштуримиз?

 ³ Әйса асманға көтирилгәндин кейин бираз вақит өтүп, шагиртлири Муқәддәс Язмиларни тәтқиқ қилип, Худадин дуада ярдәм сорап, Йәһуда Ишқарийотниң орниға Маттияни таллиди (Әлчиләр 1:15—26). Мошу таллаш улар вә Йәһва үчүн немишкә шунчилик муһим еди? Шагиртлар 12 әлчиниң болуши керәклигини чүшәнди a (Изаһәткә қараң.). Әйса әлчиләрни таллап, уларни Худа хәлқиниң арисида муһим бир вәзипини атқуруш үчүн тәйярлиған. Бу қандақ вәзипә болған вә Йәһва билән Әйса уларни буниңға қандақ тәйярлиди? Бүгүн буниңға охшаш орунлаштуруш барму? Биз «рәһбәрликни бойниға алидиғанларни», болупму «садиқ һәм әқил-парасәтлик қулни», қандақларчә есимизда туталаймиз? (Ибранийларға 13:7; Мәтта 24:45).

4. Йерусалимдики әлчиләр вә башқа ақсақаллар қандақ вәзипини атқурған?

⁴ Миладимизниң 33-жилиниң Һосул жиғиш мәйримидин башлап, әлчиләр җамаәттики рәһбәрликни қолға алған. Муқәддәс китапта ейтилғандәк, «Петрус 11 әлчи билән биллә туруп», көпчиликни һаятқа апиридиған һәқиқәтләрни ейтти (Әлчиләр 2:14, 15). Уларниң арисидики көпинчиси мәсиһийләр болди. Андин кейин шу йеңи мәсиһийләр өзлирини «әлчиләрниң тәлимигә» беғишлиди (Әлчиләр 2:42). Әлчиләр җамаәтниң мәбләғлиригә җавапкар еди (Әлчиләр 4:34, 35). Шуниң билән, улар Худа хәлқиниң роһий еһтияҗлирини ойлап: «Биз болсақ өзүмизни дуаға вә тәлим беришкә беғишлаймиз»,— деди (Әлчиләр 6:4). Йәнә улар тәҗрибилик мәсиһийләрни йеңи территорияләрдә вәз қилишқа әвәтти (Әлчиләр 8:14, 15). Кейин башқиму майланған ақсақаллар әлчиләргә қошулуп, җамаәттики рәһбәрликни қолға алди. Рәһбәрлик кеңәш сүпитидә улар һәммә җамаәтләргә көрсәтмиләрни бәргән (Әлчиләр 15:2).

5, 6. а) Рәһбәрлик кеңәшкә муқәддәс роһ қандақларчә күч бәргән? (Мақалиниң бешидики рәсимгә қараң.) ә) Рәһбәрлик кеңәшкә пәриштиләр қандақ ярдәм бәргән? б) Рәһбәрлик кеңәшни Худа Сөзи қандақ йетәклигән?

⁵ Биринчи әсирдики мәсиһийләр Йәһваниң рәһбәрлик кеңәшни Әйса арқилиқ йетәкләватқанлиғини билди. Улар буниңға немишкә ишәнгән? Биринчидин, рәһбәрлик кеңәшкә муқәддәс роһ күч бәргән (Йоһан 16:13). Муқәддәс роһқа майланған мәсиһийләрниң һәммиси чөмгини билән, роһ Йерусалимдики әлчиләр вә ақсақалларға назарәт қилиш вәзиписини атқурушқа ярдәм қилған. Мәсилән, б.м. 49-жили муқәддәс роһ рәһбәрлик кеңәшниң хәтнә қилишқа тегишлик қарарини башқурди. Җамаәттикиләр мошу көрсәтмиләргә қулақ селип, нәтиҗисидә «күндин күнгә көпийип, етиқатта мустәһкәмләнди» (Әлчиләр 16:4, 5). Җамаәтләргә хәтнә қилиш һәққидики әвәтилгән хәттин рәһбәрлик кеңәшниң Худа роһиға егә болғанлиғи вә меһир-муһәббәт билән  ишәнчтәк хисләтләрни көрсәткәнлиги көрүнгән (Әлчиләр 15:11, 25—29; Галатилиқларға 5:22, 23).

⁶ Иккинчидин, рәһбәрлик кеңәшкә пәриштиләр ярдәм қилған. Мәсилән, бир пәриштә Корнилийға әлчи Петрусни чақиришни ейтти. Петрус Корнилий билән униң уруқ-туққанлириға вәз қилғандин кейин, арисидики әр кишиләр хәтнә қилинмиған болсиму, муқәддәс роһқа еришкән. Шундақ қилип, Корнилий хәтнә қилинмиған биринчи йәһудий әмәс мәсиһий болған. Әлчиләр вә башқа бурадәрләр буни аңлиғанда, Худаниң ирадисини қобул қилип, хәтнә қилинмиған ят милләтлик кишиләрни мәсиһий җамаәткә қарши алған (Әлчиләр 11:13—18). Буниңдин пәриштиләрниң рәһбәрлик кеңәш башқурған вәз ишини паал қоллиғанлиғи көрүниду (Әлчиләр 5:19, 20). Үчинчидин, рәһбәрлик кеңәшни Худаниң Сөзи йетәклигән. Шу әр кишиләр мәсиһий тәлиматлар һәққидә муһим қарарларни қилғанда вә җамаәткә рәһбәрлик қилғанда, Язмиларниң ярдимигә таянған (Әлчиләр 1:20—22; 15:15—20).

7. Немишкә дәсләпки мәсиһийләрни Әйса йетәклиди дәп ейтишқа болиду?

⁷ Рәһбәрлик кеңәш әзалириниң җамаәттә бәлгүлүк һоқуқи болсиму, улар өзлириниң Йолбашчиси Әйса Мәсиһ екәнлигини чүшәнгән. Биз буни қәйәрдин билимиз? Әлчи Паул «бәзилирини әлчиләр» сүпитидә Әйсаниң өзи тайинлиғанлиғини ейтқан. Шуниң билән, у Мәсиһниң җамаәтниң «беши», йәни Рәһбири, екәнлигини ейтқан (Әфәсликләргә 4:11, 15). Бирәр әлчиниң нами билән атилишниң орниға, «шагиртлар Худаниң ирадиси бойичә дәсләп қетим мәсиһийләр дәп аталди» (Әлчиләр 11:26). Паул әлчиләрниң вә рәһбәрликни қолға алған башқиму әр кишиләрниң Муқәддәс китапқа асасланған тәлимлиригә риайә қилишниң муһимлиғини чүшәнгән. Шундақ болсиму, у мундақ дегән: «Әр кишигә Мәсиһ башчи... екәнлигини билишиңларни халаймән». Бу рәһбәрлик кеңәшниң һәрбир әзасиғиму тегишлик еди. Андин кейин, Паул: «Мәсиһкә болса Худа — Башчи»,— дәп қошқан (Коринтлиқларға 1-хәт 11:2, 3). Шүбһисизки, Йәһва Худа Әйса Мәсиһни җамаәтниң рәһбири болушқа тайинлиған.

8, 9. Расселл бурадәрниң қандақ муһим роли болған?

⁸ 1870-жилдин тартип Чарлз Тейз Расселл вә униң достлири Худаға Муқәддәс китапқа мас ибадәт қилип, башқиларниму шундақ қилишқа дәвәт қилишни башлиди. Бу башқа тилларда сөзләйдиған адәмләрниму өз ичигә алған. Шуңа 1884-жили «Сион күзитиш мунари вә варақчилар җәмийити» қануний һалда қурулди вә Чарлз Тейз Расселл униң президенти болди b (Изаһәткә қараң.). У Муқәддәс китапни пухта тәтқиқ қилип, башқиларға чирко тәлимлириниң, мәсилән Үчбирлик яки өлмәйдиған җан һәққидики тәлимләрниң, Худа Сөзигә асасланмиғанлиғини ейтишқа қорқмиған. У Мәсиһниң қайтип келиши көзгә көрүнмәйдиғанлиғини вә «хәлиқләргә  бәлгүләнгән вақитлар» 1914-жили пүтидиғанлиғини чүшәнди (Луқа 21:24). Расселл бурадәр башқиларни мошу һәқиқәтләргә үгитиш үчүн һәммә вақти, күчи вә пулини сәрип қилған. Ениқки, Йәһва Худа вә Әйса Мәсиһ Расселл бурадәрни тарихтики муһим бир вақитта рәһбәрлик қилиш үчүн қолланди.

⁹ Расселл бурадәр адәмләрдин атақлиқ болушни издимигән. 1896-жили у өзиниң вә башқа җавапкар бурадәрләрниң алаһидә һөрмәткә еришишни халимайдиғанлиғини язған. Улар мәхсус унванлириниң болушини вә қандақту бир топ уларниң нами билән атилишини халимиған. Расселл бурадәр мундақ дегән: «Бу — адәмниң әмәс, Худаниң иши».

10. а) Әйса «садиқ һәм әқил-парасәтлик қулни» қачан тайинлиған? ә) Рәһбәрлик кеңәшниң Күзитиш мунари җәмийитидин айрим екәнлиги қандақ ениқ болғанлиғини чүшәндүрүп бериң.

¹⁰ 1919-жили, Расселл бурадәрниң өлүмидин үч жил өтүп, Әйса «садиқ һәм әқил-парасәтлик қулни» тайинлиди. Қандақ мәхсәт билән? Әгәшкүчилиригә «озуқни вақти-вақтида» бериш мәхсити билән (Мәтта 24:45). Һәтта шу дәсләпки жиллири Бруклиндики (Нью-Йорк) баш идаридә хизмәт қилған майланған бурадәрләрниң кичик топи Әйсаниң әгәшкүчилирини роһий озуқ билән тәминлигән. «Рәһбәрлик кеңәш» дегән ибарә әдәбиятлиримизда 1940-жили қоллинилишқа башлиди. Шу вақитта, рәһбәрлик кеңәш Күзитиш мунари, Муқәддәс китап вә варақчилар җәмийитиниң директорлирини билдүриду дегән чүшәнчә болған. Лекин 1971-жили Рәһбәрлик кеңәшниң пәқәт қанунға тегишлик мәсилиләргә җавапкар болған Күзитиш мунари җәмийитидин айрим екәнлиги ениқ болди. Шу вақиттин башлап, майланған бурадәрләр Җәмийәтниң директорлири болмисиму, Рәһбәрлик кеңәшниң әзаси болалиған. Ахирқи жилларда болса, Җәмийәтниң вә тәшкилат қоллинидиған башқиму корпорацияләрниң директорлири сүпитидә «башқа қойлардин чиққан» җавапкар бурадәрләр хизмәт қилиду. Шу сәвәптин, Рәһбәрлик кеңәш тәлим бериш вә рәһбәрлик қилишқа диққәт ағдуралайду (Йоһан 10:16; Әлчиләр 6:4). «Күзитиш мунариниң» 2013-жил, 15-июль санида «садиқ һәм әқил-парасәтлик қул» Рәһбәрлик кеңәшни тәшкил қилидиған майланған бурадәрләрниң топи екәнлиги чүшәндүрүлгән.

11. Рәһбәрлик кеңәш қарарларни қандақ қобул қилиду?

¹¹ Рәһбәрлик кеңәшниң әзалири һәрбир һәптә җәм болғанда, муһим қарарларни қилиду. Мундақ учришишлар уларниң зич һәмкарлишишиға вә инақлиқни сақлишиға ярдәм бериду (Пәнд-нәсиһәтләр 20:18). Рәһбәрлик кеңәшниң һечбир әзаси өзини башқилардин муһим дәп һесаплимайду, шуңа бу учришишларда рәис вәзиписини орунлайдиған бурадәр һәр жили новәт билән алмишиду (Петрусниң 1-хети 5:1). Рәһбәрлик кеңәшниң алтә комитетидикиму рәислик хизмәт дәл шундақ алмишип туриду. Рәһбәрлик кеңәшниң әзалириниң һечбири өзини қериндашлириниң башчиси дәп һесаплимайду. Уларниң һәрбири «өйдикиләрниң» бири болуп, садиқ қулдин роһий озуқ алиду вә униң рәһбәрлигигә риайә қилиду.

12. Қандақ соалларға җавап алимиз?

¹² Рәһбәрлик кеңәш әзалири намукәммәл вә уларниң сөзлири Язмилардәк роһландурулмиған. Улар Муқәддәс китапни чүшәндүргәндә яки тәшкилатни башқурғанда, хаталишиши мүмкин. Мәсилән, «Күзитиш мунари әдәбиятлириниң көрсәткүчисидики» (индекс) «Чүшәнчимизниң ениқлиниши» дегән мавзуда 1870-жилдин бу ян Муқәддәс китапни чүшинишкә тегишлик өзгиришләр тизимини көрүшкә болиду. Әлвәттә, Әйса бизгә садиқ қул тәйярлайдиған роһий озуқ мукәммәл болиду дәп ейтмиған. Ундақта, униң «садиқ һәм әқил-парасәтлик қул у ким?» дегән соалиға қандақ җавап беришкә болиду? (Мәтта 24:45). Рәһбәрлик кеңәшниң садиқ қул екәнлигидин қандақ испат бар? Һазир әлчиләрниң заманидики рәһбәрлик кеңәшкә ярдәм бәргән үч амилни қараштурайли.

13. Рәһбәрлик кеңәшкә муқәддәс роһ қандақ ярдәм бәрди?

 ¹³ Муқәддәс роһниң ярдими. Муқәддәс роһ Рәһбәрлик кеңәшкә бурун чүшиниксиз болған Муқәддәс китаптики һәқиқәтләрни чүшинишкә ярдәм бәрди. Мәсилән, алдинқи абзацта тилға елинған тизимдики тәлимлиримиз һәққидә мулаһизә қилип көрәйли. «Худаниң даналиғиниң чоңқурлуқлирини» һечбир адәм өз алдиға чүшәндүрәлмәтти (Коринтлиқларға 1-хәт 2:10ни оқуң). Рәһбәрлик кеңәш әлчи Паулниң келәрки сөзлири билән толуқ келишиду: «Бу меһир-шәпқәт тоғрисида сөзлигинимиздә, дуниядики даналардин үгәнгән сөзләрни әмәс, бәлки муқәддәс роһ арқилиқ үгәнгән сөзләрни ишлитимиз» (Коринтлиқларға 1-хәт 2:13, УМКҖ). Әсирләр давамида сахта тәлиматлар тарқилип, ениқ рәһбәрликниң болмиғанлиғиға қаримастин, немишкә 1919-жилдин башлап, Худаниң хәлқи Муқәддәс китаптики һәқиқәтләрни ениғирақ чүшинишкә башлиди? Униң сәвәви — муқәддәс роһниң ярдими.

14. Вәһий 14:6, 7гә бенаән, пәриштиләр Рәһбәрлик кеңәш билән Худаниң хәлқигә қандақ ярдәм бәрмәктә?

¹⁴ Пәриштиләрниң ярдими. Рәһбәрлик кеңәштә йәр йүзи бойичә 8 миллиондин артуқ җакалиғучи қатнишиватқан вәз ишини башқуруш җавапкарлиғи бар. Бу ишниң утуқлуқ болушиниң сәвәви немә? Сәвәпләрниң бири — бу ишни пәриштиләр қоллайду (Вәһий 14:6, 7ни оқуң). Көп вәзийәтләрдә пәриштиләр җакалиғучиларни Худадин ярдәм сорап дуа қиливатқан адәмгә йетәкләйду c (Изаһәткә қараң.). Һәтта қериндашлиримиз қаттиқ қаршилиққа дуч келиватқан йәрләрдиму, вәз қилиш һәм тәлим бериш иши илгири бесиватиду. Бу пәқәт пәриштиләрниң ярдими билән мүмкин.

15. Рәһбәрлик кеңәш христиан дининиң рәһбәрлиридин қандақ пәриқлиниду? Мисал кәлтүрүң.

¹⁵ Худа Сөзиниң ярдими (Йоһан 17:17ни оқуң). 1973-жили немә йүз бәргәнлигигә диққәт ағдуруң. «Күзитиш мунари» журналиниң 1-июнь санида «тамака чекиш адитини техи ташлимиған адәмләрниң чөмдүрүлүштин өтүшкә лайиқ болған-болмиғанлиғи» һәққидики мәсилә оттуриға қоюлған еди. Лайиқ болмиғанлиғи Муқәддәс китаптики принципларға асасланған еди. Әшу журналда бирнәччә айәт кәлтүрүлүп, тамака чекишни тохтатмиған адәм немә сәвәптин җамаәттин чиқирилиши керәклиги чүшәндүрүлгән (Коринтлиқларға 1-хәт 5:7; Коринтлиқларға 2-хәт 7:1). У йәрдә ейтилғандәк, бу қәтъий тәләп адәмләрдин әмәс, «ирадисини Сөзи арқилиқ билдүридиған Худадин» кәлгән. Худаниң Сөзигә пүтүнләй тайиниш бәзи әзалири үчүн бәк тәс болғиниға қаримастин, ундақ қилған башқа һечбир тәшкилат йоқ! Йеқинда Қошма штатларда нәшир қилинған дин һәққидики бир китапта мундақ йезилған: «Диний рәһбәрләрниң көпинчиси чиркоға кәлгүчиләрниң вә җәмийәтниң қоллишиға еришиш үчүн, тәлимлирини көпчиликниң көзқаришиға мас болғидәк өзгәртип кәлмәктә». Лекин Рәһбәрлик кеңәшниң әзалири көпчиликниң көзқаришиға әгәшмәйду. Уларниң Худа Сөзидики рәһбәрликкә риайә қилиши  хәлқини Йәһваниң өзи йетәкләватқанлиғини испатлайду.

16. Рәһбәрлик кеңәшни есимизда тутушниң бир усули немә?

¹⁶ Ибранийларға 13:7ни оқуң. Муқәддәс китап бизни аримизда «рәһбәрликни бойниға алидиғанларни есимизда тутушқа» үндәйду. Буни қилишниң бир усули — Рәһбәрлик кеңәш тоғрисида дуа қилиш (Әфәсликләргә 6:18). Уларниң нурғун мәсъулийәтлири бар, шу җүмлидин роһий озуқ билән тәминләш, дуниявий вәз ишини вә тәшкилатқа қилинған ианиләрни башқуруш. Һәқиқәтән, улар бизниң дуалиримизға муһтаҗ!

17, 18. а) Биз Рәһбәрлик кеңәшниң йолбашчилиғиға қандақларчә қулақ салалаймиз? ә) Вәзлик ишимиз Әйсани вә Рәһбәрлик кеңәшни қандақ қилип қоллайду?

¹⁷ Рәһбәрлик кеңәшни есимизда тутушниң йәнә бир усули — униң көрсәтмилири вә йолбашчилиғиға қулақ селиш. Рәһбәрлик кеңәш йолбашчилиқни әдәбиятлиримиз, җамаәт учришишлири вә конгресслиримиз арқилиқ бериду. Шуниң билән, бу бурадәрләр ақсақалларни тайинлайдиған наһийилик назарәтчиләрни тайинлайду. Уларға берилгән көрсәтмиләргә риайә қилиш арқилиқ ақсақаллар билән наһийилик назарәтчиләр Рәһбәрлик кеңәшни есида тутидиғанлиғини көрситиду. Һәммимиз Рәһбиримиз Әйса тайинлиған әр кишиләргә бойсунуш арқилиқ уни һөрмәтләйдиғанлиғимизни көрситимиз (Ибранийларға 13:17).

¹⁸ Үчинчи усули — вәз ишиға бар күчимиз билән қатнишиш. Ибранийларға 13:17дә мәсиһийләр рәһбәрликни қолға алидиғанларға тәқлит қилишқа дәвәт қилиниду. Рәһбәрлик кеңәш әзалири қизғин вәз қилиш вә хуш хәвәрни җакалаш арқилиқ зор етиқадини көрситип кәлмәктә. Биз мошу бурадәрләрни бу муһим ишта қоллап-қувәтләймизму? Шундақ қилсақ, Әйсаниң төвәндики сөзлирини аңлиғанда, хошал болимиз: «Мошуниң һәммисини мениң әң кичик қериндашлиримниң бирсигә қилғиниңлар, маңа қилған болиду» (Мәтта 25:34—40).

19. Немә үчүн сиз Әйсаға әгишишкә бәл бағлидиңиз?

¹⁹ Әйса асманға қайтқанда, әгәшкүчилиридин ваз кәчмиди (Мәтта 28:20). У муқәддәс роһниң, пәриштиләрниң вә Худа Сөзиниң униңға рәһбәрлик қилишқа ярдәм бәргәнлигини билгән. Бүгүнки күндиму у садиқ қулға охшаш усулларда ярдәм бериватиду. Рәһбәрлик кеңәш «Қоза нәгә барса, шу яққа меңишни» давамлаштурмақта (Вәһий 14:4). Шуңа биз Рәһбәрлик кеңәшниң йолбашчилиғиға бойсунғанда, Рәһбиримиз Әйсаға әгишимиз. Пат арида у бизни мәңгү һаятқа йетәкләйду (Вәһий 7:14—17). Инсаний рәһбәрләрниң һечбири буни қилалмайду!