1, 2. а) Йәһва Худа немини көриду? (Муқавидики рәсимгә қараң.) ә) Бу мақалидә қайси соалниң җававини алимиз?

 ЙӘҺВА ХУДА дунияниң җай-җайлирида Хатириләш кечисигә җәм болған миллионлиған адәмләргә қарап турғанлиғини тәсәввур қилиң. У немини көриду? Йәһва пәқәт жиғилған бир топ адәмләрни әмәс, һәрбирини алайтән байқайду. Мәсилән, У Хатириләш кечисигә һәр жили келидиған кишиләрни билиду. Уларниң арисида қаттиқ қаршилиққа қаримай келидиғанларму бар. Йәнә бирлири башқа учришишларға кәлмисиму, Хатириләш кечисини муһим дәп һесаплиғанлиқтин, униңға сөзсиз келиду. Хатириләш кечиси қандақ өтидиғанлиғиға қизиқип биринчи қетим кәлгәнләрму Йәһва Худаниң нәзәридин сирт қалмайду.

² Әлвәттә, Йәһва Хатириләш кечисигә көп адәмләрниң кәлгинигә хошал болиду (Луқа 22:19). Амма Униң үчүн әң муһими адәм сани әмәс, сапаси. Йәһва адәмләрниң немә сәвәптин кәлгәнлигигә яки уларниң нийитигә диққәт ағдуриду. Биз немә үчүн һәр жили өтидиған Хатириләш кечисигила әмәс, Йәһва Уни сөйгәнләр үчүн уюштурған һәптилик учришишларғиму беришимиз керәк? Бу мақалидә мошу муһим соалниң җававини алимиз.

3, 4. а) Биз учришишларға немә үчүн қатнишимиз? ә) Учришишларға қатнашқанлиғимиз бизниң қандақ екәнлигимизни көрситиду? б) Коринтлиқларға 1-хәт 11:23—26гә мас, Хатириләш кечисигә немә үчүн беришимиз керәк?

³ Җамаәт учришишлириға қатнишишимизниң асасий сәвәви — бу ибадитимизниң бир қисми. Йәнә бир сәвәп — шу йәрдә биз Йәһвадин тәлим алимиз. Адәттә тәкәббур кишиләр өзиниң үгиниши керәклигини иқрар қилмайду (Йоһ. 3-х. 9). Биз болсақ, әксичә, Йәһва Худа вә  Униң тәшкилатидин үгинишни халаймиз (Йәшая 30:20; Йоһ. 6:45).

⁴ Учришишларға барғинимиз бизниң кәмтәр, йәни үгинишкә тәйяр, екәнлигимизни көрситиду. Әйсаниң өлүмини хатириләш кечиси наһайити муһим мәрасим, лекин бу униңға қатнишишимизниң ялғуз сәвәви әмәс. Биз Әйсаниң: «Буни мени әсләш үчүн қилиңлар»,— дегән буйруғиға кәмтәрлик билән бойсунимиз (Коринтлиқларға 1-хәт 11:23—26ни оқуң). Бу учришиш келәчәккә болған үмүтимизни күчәйтип, Йәһваниң бизни қанчилик сөйидиғанлиғини әслитиду. Лекин Йәһва бизниң жилиға бирла қетим роһумизни көтиришниң йетәрлик әмәслигини чүшинип, һәр һәптә өткүзилидиған учришишларни уюштурди вә бизни уларға қатнишишқа дәвәт қилиду. Мошу буйруққа бойсунуш үчүнму кәмтәрлик керәк. Биз һәр һәптә шу учришишларға тәйярлиқ қилиш вә қатнишиш үчүн көп вақит чиқиримиз.

5. Кәмтәр адәмләр Йәһваниң тәкливини немә сәвәптин қобул қилиду?

⁵ Йәһва һәммә инсанларни Униңдин тәлим елишқа чақириду вә көплигән кәмтәр кишиләр бу тәклипни қобул қилиду (Йәшая 50:4). Адәттә улар авал Хатириләш кечисигә келип, уни яқтурғанлиқтин, кейин башқиму учришишларға келишни башлайду (Зәк. 8:20—23). Биз улар билән биллә Ярдәмчимиз вә Азат қилғучимиз Йәһвадин тәлим елишқа вә Униң көрсәтмилиригә бойсунушқа хурсән болимиз (Зәб. 40:17). Дәрһәқиқәт, Йәһва Худа вә Униң сөйүмлүк Оғли Әйсадин тәлим елиштин муһимирақ һечбир иш йоқтур! (Мәт. 17:5; 18:20; 28:20).

6. Бир әр кишигә униң кәмтәрлиги Хатириләш кечисигә келишкә қандақ ярдәм бәргән?

⁶ Әйсаниң өлүмини хатириләш кечисигә һәр жили мүмкинқәдәр көпирәк адәмләрни чақиришқа күч чиқиримиз. Бу тәклипни қобул қилған көплигән кәмтәр кишиләр буниң пайдисини көрмәктә. Бир мисални көрүп чиқайли. Бирнәччә жил бурун бурадиримиз бир әр кишини Хатириләш кечисигә чақирған, бирақ шу киши келәлмәймән дәп ейтқан. Бурадиримиз уни Ибадәт өйидә көргәндә, һаң-таң қалған. Һелиқи әр киши җамаәтниң уни қучақ йейип қарши алғанлиғидин тәсирлинип, һәптилик учришишларға келишни башлиған. Буниңдин кейин у бир жилда пәқәт үч қетим учришишқа бармай қалған. Уни һәммә учришишларға қатнишишқа немә дәвәт қилған? Бу киши кәмтәр болғанлиқтин, өзгиришкә тәйяр болған. Уни тәклип қилған бурадәр бу әр киши тоғрисида: «У интайин кәмтәр адәм»,— дегән. Йәһва Худа бу адәмни Өзигә җәлип қилғанлиғи сөзсиз вә һазир шу киши чөмдүрүлүш мәрасимидин өткән бурадиримиз (Сам. 2-яз. 22:28; Йоһ. 6:44).

7. Учришишларда алған билимимиз вә Муқәддәс китаптин оқуғанлиримиз кәмтәр болушимизға қандақ ярдәм бериду?

⁷ Учришишларда алған билимимиз вә Муқәддәс китаптин оқуғанлиримиз кәмтәр болушимизға ярдәм бериду. Хатириләш кечисиниң алдидики җамаәт учришишлирида Әйсаниң үлгисигә вә һаятини төләм сүпитидә бәргәндә көрсәткән кәмтәрлигигә алаһидә диққәт ағдурилиду. Шуниң билән шу вақит арилиғида биз Муқәддәс китаптин Әйсаниң өлүмидин авал вә кейин йүз бәргән вақиәләр тоғрисида оқуймиз. Учришишларда билгинимиз вә Муқәддәс китаптин оқуған айәтләр бизни Әйсаниң төлими үчүн техиму миннәтдар болушқа үндәйду. Биз униң кәмтәрлигидин үлгә елишқа вә қийин болғандиму Йәһваниң  ирадисини орунлашқа интилимиз (Луқа 22:41, 42).

8. Әйса батурлуқни қандақ көрсәткән?

⁸ Биз Әйсаниң батурлуғиниму үлгә қилғумиз келиду. Өлүминиң алдидики күнләрдә көрсәткән батурлуғи һәққидә ойлинип көрүң. Әйса дүшмәнлири уни мәсхирә қилип, қамчилап, ахирида түврүктә өлтүридиғанлиғини билгән (Мәт. 20:17—19). Буниңға қаримастин, у өлүшкә тәйяр болған. Гетсиманә беғида Әйса қешидики әлчилиригә: «Туруңлар, кәттуқ. Мениң сатқунум йеқинда»,— дәп ейтқан (Мәт. 26:36, 46). Қуралланған бир топ кишиләр келип, уни тутмақчи болғанда, Әйса уларниң алдиға чиқип, издигән киши өзи екәнлигини ейтип, әскәрләргә шагиртлирини қоюветишини ейтти (Йоһ. 18:3—8). Бу немә дегән батурлуқ болған! Бүгүнки күндә майланған мәсиһийләр вә башқа қойларму Әйсаниң батурлуғидин үлгә алмақта. Қандақ қилип?

9. а) Учришишларға қатнишиш үчүн немишкә җасарәт керәк? ә) Етиқади үчүн түрмидә олтарған қериндашларға бизниң үлгимиз қандақ тәсир қилиду?

⁹ Қийин әһвалға чүшкәндиму җамаәт учришишлириға бериш үчүн батурлуқ керәк. Бәзи қериндашлар қайғуға патсиму, чүшкүнлүккә чүшсиму яки еғир ағриққа гириптар болсиму, учришишларни қалдурмайду. Башқилири өйидикилири яки һөкүмәт тәрәптин қаттиқ қаршилиққа дуч кәлсиму, учришишларға дайим келип туриду. Бизниң үлгимиз түрмидә олтарған қериндашларға қандақ тәсир қилидиғанлиғини ойлап көрүң (Ибр. 13:3). Қийинчилиқларға қаримастин, Йәһваға садиқ хизмәт қиливатқанлиғимизни аңлиғанда, уларниң етиқади мустәһкәмлинип, улар җасарәт вә вападарлиғини сақлап қалалайду. Әлчи Паулму охшаш вәзийәтни баштин кәчүргән. Римда қамақта болғанда, қериндашларниң Худаға садақәтмәнлик билән хизмәт қиливатқанлиғини аңлиғанда, у бәк хошал болған (Флп. 1:3—5, 12—14). Түрмидин чиқмай туруп яки чиқипла, Паул Ибранийларға хәт язған. Бу хәттә у садиқ мәсиһийләрни бир-биригә «меһир-муһәббәт көрситишкә» вә биллә җәм болушни тохтатмаслиққа үндигән (Ибр. 10:24, 25; 13:1).

10, 11. а) Хатириләш кечисигә кимләрни чақиришимиз керәк? ә) Әфәсликләргә 1:7дә Хатириләш кечисигә чақиришниң қандақ сәвәви йезилған?

¹⁰ Уруқ-туққанлиримизни, хизмәтдашлиримизни вә хошнилиримизни Хатириләш кечисигә чақириш үчүн батурлуқ керәк. Биз уларни немә үчүн тәклип қилимиз? Йәһва Худа билән Әйса Мәсиһниң бизгә қилған яхшилиғи үчүн миннәтдар болғанлиқтин, биз башқиларниму шу муһим кәчкә чақирғумиз келиду. Уларму Йәһваниң төләм қурбанлиғи арқилиқ көрсәткән «мол меһирлиги» тоғрисида билип, униңдин пайда елишини халаймиз (Әфәсликләргә 1:7ни оқуң; Вәһ. 22:17).

 ¹¹ Учришишларға қатнишип, батурлуқ көрситиштин башқа, биз йәнә бир есил пәзиләтни көрситимиз. Бу пәзиләт Худа билән Униң Оғли тәңдашсиз йоллар билән көрситиду.

12. а) Җамаәт учришишлири Йәһва билән Әйсаға болған меһир-муһәббитимизни қандақ күчәйтиду? ә) Коринтлиқларға 2-хәт 5:14, 15 бизни немә қилишқа үндәйду?

¹² Йәһваға вә Әйсаға болған меһир-муһәббәт бизни учришишларға беришқа дәвәт қилиду. Җамаәт учришишида үгәнгәнлиримиз Худа вә Униң Оғлиға болған меһир-муһәббитимизни күчәйтиду. Ибадәт өйидә уларниң бизгә қилған яхшилиқлири тоғрилиқ дайим аңлап туримиз (Рим. 5:8). Йәһва билән Әйсаниң бизни, һәтта төләмниң әһмийитини техи чүшәнмигәнләрни, қанчилик сөйидиғанлиғини болупму Хатириләш кечисидә есимизгә алимиз. Жүригимиз миннәтдарлиққа толуп, һәр күни Әйсадин үлгә елишқа тиришимиз (Коринтлиқларға 2-хәт 5:14, 15ни оқуң). Шуниң билән қәлбимиз бизни Йәһваға төләм үчүн мәдһийиләшкә үндәйду. Буни қилишниң бир усули — учришишларда чин жүрәктин җавап бериш.

13. Йәһва вә Әйсаға болған меһир-муһәббитимизни қандақ көрситәләймиз? Чүшәндүрүп бериң.

¹³ Қурбанлиқ бәрсәк, йәни өз мәнпәитимиздин ваз кәчсәк, Йәһва вә Униң Оғлиға болған чоңқур меһир-муһәббитимизни көрситәләймиз. Бәзидә учришишларға бериш үчүн қандақту бир нәрсини қурбан қилишимизға тоғра келиши мүмкин. Учришишлиримизниң бири һәптә арилиғидики бир кечидә өтиду. Бу вақитта көплиримиз чарчап қалған болимиз. Йәнә бир учришиш дәм елиш күнлири өтиду. Адәттә адәмләр бу күнлири дәм алиду. Һерип қалсақму, учришишларға барғинимизни Йәһва байқамду? Әлвәттә! Учришишларға бериш үчүн қанчилик көп күч чиқарсақ, Йәһва Униңға болған меһир-муһәббитимизни бәк қәдирләйду (Марк 12:41—44).

14. Әйса меһир-муһәббәт көрситишниң қандақ үлгисини көрсәткән?

¹⁴ Әйса меһир-муһәббәтниң әҗайип үлгисини көрсәткән. У шагиртлири үчүн җан пида қилишқа тәйяр болған вә һәтта уларниң мәнпәитини һәрдайим өзиниңкидин жуқури қойған. Мәсилән, у бәк  чарчиған яки көңли азапланған чағдиму, шагиртлириниң йенида болған (Луқа 22:39—46). Әйса бирсидин пайда елишни көзлимәй, башқиларға немә берәләйдиғанлиғи тоғрилиқ ойлиған (Мәт. 20:28). Бизму Йәһва Худани вә етиқатдашлиримизни бәк яхши көрсәк, Хатириләш кечиси билән башқа учришишларға қатнишиш үчүн қолумиздин кәлгининиң һәммисини қилимиз.

15. Биз кимләргә алаһидә ярдәм беришни халаймиз?

¹⁵ Биз Худаниң һәқиқий хизмәтчилири чоң аилисиниң әзалири. Биз имканийәтниң баричә көпирәк вақит чиқирип, башқа сәмимий инсанларни бизгә қошулушқа тәклип қилиштин чәксиз хошал болимиз. Бирақ биз алаһидә ярдәм беришкә тиришидиған бир топ — җамаәткә кәлмәй яки вәз қилмай қалған етиқатдашлиримиз (Гал. 6:10). Уларни җамаәт учришишлириға, болупму Хатириләш кечисигә қатнишишқа дәвәт қилсақ, уларға болған меһир-муһәббитимизни испатлаймиз. Уларниң бири көйүмчан Атимиз вә Падичимизға қайтип кәлсә, Йәһва Худа билән Әйса Мәсиһкә охшаш бизниңму хошаллиғимиз қин-қиниға патмайду (Мәт. 18:14).

16. а) Бир-биримизгә қандақ тәсәлли берәләймиз вә учришишларға бериш немишкә муһим? ә) Немә үчүн һазир Әйсаниң Йоһан 3:16дики сөзлирини әскә елишниң әң муһим пәйти?

¹⁶ Алдимиздики һәптиләрдә 2019-жилниң 19-апрель, җүмә күни өткүзүлидиған Хатириләш кечисигә мүмкинқәдәр көпирәк адәмләрни чақириң (« Уларни чақирамсиз?» намлиқ рамкиға қараң). Йәһва биз үчүн уюштурған һәммә учришишларға берип, бир-биримизгә һәрдайим тәсәлли берәйли. Бу дунияниң ахири йеқинлишиватқанлиқтин, биз кәмтәр, батур вә меһир-муһәббәтлик болуп қелиш үчүн, җамаәт учришишларға ташлимай беришимиз керәк (Сал. 1-х. 5:8—11). Йәһва билән Әйсаниң бизгә көрсәткән меһир-муһәббитини қәдирләйдиғанлиғимизни давамлиқ көрситәйли! (Йоһан 3:16ни оқуң).