БУ соал көп адәмләрни қизиқтуриду. Муқәддәс китап Яратқучи Йәһваниң дуаларға қулақ салидиғанлиғини көрситиду. Лекин Худаниң дуалиримизға қулақ селиш яки салмаслиғи өзүмизгә бағлиқ.

Һәзрити Әйса өз заманидики диний рәһбәрләрни башқиларға көз-көз қилиш үчүн қилған сахта дуалирини әйиплигән еди. Әйса пәйғәмбәр мундақ адәмләр «башқиларниң һөрмитидин башқа һеч қандақ мукапатқа еришәлмәйду» дегәндә, әсли у уларниң муһтаҗ болған нәрсигә еришәлмәйдиғанлиғини, йәни Худа уларниң дуалириға қулақ салмайдиғанлиғини көздә тутқан еди (Мәтта 6:5, ҺЗ). Бүгүнки күндиму көп адәмләр Худаниң ирадиси бойичә әмәс, өзи халиғанчә дуа қилиду. Улар ушбу принципни көзгә илмиғач, Худа уларниң дуалириға қулақ салмайду.

Өзүңиз һәққидә немә дәйсиз? Худа дуалириңизға қулақ саламду вә җавап берәмду? Меһир-шәпқәтлик Алла сизниң ирқ, милләт вә ихтисадий әһвалиңизға қарап, дуалириңизға қулақ салиду дегән гәп тоғриму? Муқәддәс китап бизни «Худаниң һәр қандақ адәмни, мәйли у қайси милләттин болушидин қәтъий нәзәр тәң көридиғанлиғини, садақәтмән вә тоғра иш қилидиған киши болсила, Худаниң уни қобул қилидиғанлиғиға» ишәндүриду (Әлчиләр 10:34, 35, ҺЗ). Бу сөзләрни аңлап, өзүңизни қандақ һис қилдиңиз? Әгәр сиз Худадин әйминидиған киши болсиңиз, Худаға һөрмәт-еһтирам көрситип, Уни рәнҗитишни халимайсиз. Шуниңдәк, тоғра иш қилидиған киши болсиңиз, ундақта өзүңизниң яки башқиларниң дегәнлиригә әмәс, Худаниң көзқаришиға мас иш қилишқа тиришисиз. Растинла, Худаниң дуалириңизға қулақ селишини халамсиз? Худа дуалириңизға қулақ селиши үчүн қандақ дуа қилишиңиз керәклигини Муқәддәс китап сизгә көрситип бериду.

Әлвәттә, көп адәмләр Худа дуалириға мөҗүзилик усулда җавап беришини күтиду. Бирақ һәтта қедимий заманлардиму Алла мөҗүзиләрни көп көрсәтмигән. Бәзидә мөҗүзиләрниң арисида көп әсирләр өтәтти. Буниңдин башқа, Муқәддәс китапта Әйсаниң әлчилириниң һәммиси өлгәндин кейин мөҗүзиниң дәври ахирлашқанлиғи йезилған (Коринтлиқларға 1-хәт 13:8—10). Ундақта, бу Худаниң бүгүнки күндә дуаларға җавап бәрмәйдиғанлиғини билдүрәмду? Әлвәттә, яқ! Келиң, Худа җавап бәргән дуаларни көрүп чиқайли.

Худа даналиқ бериду. Тәңри Йәһва барлиқ һәқиқий даналиқниң мәнбәсидур. У йол-йоруқни издәватқан вә униңға мас һаят кәчүрүватқан кишиләргә даналиқни мәртлик билән бәрмәктә (Яқуп 1:5).

Худа муқәддәс роһни бериду. Муқәддәс роһ Худаниң һәрикәт күчи. Униңдин күчлигирәк һеч нәрсә йоқ. У бизниң қийинчилиқларға бәрдашлиқ беришимизгә ярдәм бериду. Бешимизға еғир күн чүшкәндә, у көңлүмизгә тинч-хатирҗәмликни ата қилалайду. Муқәддәс роһ башқа есил пәзиләтләрниму йетилдүрүшимизгә ярдәм берәләйду (Галатилиқларға 5:22, 23). Һәзрити Әйса әгәшкүчилирини Худа Униңдин муқәддәс роһни сориғанларға мәртлик билән беридиғанлиғиға ишәндүргән (Луқа 11:13).

Уни издәватқанларға һәқиқәтни ечип бериду. (Әлчиләр 17:26, 27). Пүтүн дунияда һәқиқәтни издәватқан ақ көңүл инсанлар интайин көп. Улар Худа һәққидә, йәни Униң исми, йәр-йүзи һәм инсанийәт үчүн қилған ирадиси вә Униңға қандақ йеқинлишалайдиғанлиғини билишни халайду (Яқуп 4:8). Йәһва гувачилири бундақ кишиләрни пат-пат учритип, Муқәддәс китаптин шу соалларға җавап бериду.

Мошу сәвәп, қолуңизда бу журнал бар? Худани тонушушни халамсиз? Бу бәлким Худаниң дуайиңизға қайтурған җавави.