15-ДӘРИС
Әйса пәйғәмбәр ким?
Әйса пәйғәмбәр тарихта улуқ кишиләрдин бири болған. Бирақ көплигән адәмләр пәқәт униң исмини билиду. Әйсаниң зади ким екәнлигигә қарита һәрқандақ адәмләр охшимиған ой-пикирдә болуп кәлгән. Ундақта, Муқәддәс китапта у һәққидә немә йезилған?
1. Әйса пәйғәмбәр ким?
Әйса пәйғәмбәр — асманда яшиған бир пәриштә. Йәһва Худа һәммидин авал уни яратқан, шу сәвәптин у барлиқ мәвҗудатларниң тунҗиси дәп аталған (Колосилиқларға 1:15). Йәһва Худа Әйса Мәсиһни Өзи беваситә яратқини үчүн Муқәддәс китап Әйса пәйғәмбәрни Худаниң бирдин-бир йеганә Оғли a дәп атиған (Йоһан 3:16). Әйса асмандики Атиси Йәһваниң йенида туруп, Униң барлиқ мәвҗудатларни яритишиға ярдәм бәргән (Пәнд-нәсиһәтләр 8:30ни оқуң). Уларниң арисида күчлүк меһир-муһәббәт риштиси болған. Униңдин башқа, Худаниң «Сөзи» сүпитидә Әйса пәйғәмбәр Яратқучисидин кәлгән хәвәрләрни вә көрсәтмиләрни садақәтмәнлик билән инсанларға йәткүзгән (Йоһан 1:14).
2. Немә үчүн Әйса йәргә кәлгән?
Тәхминән 2000 жил илгири Йәһва Худа муқәддәс роһини ишлитип, мөҗүзилик йол билән Әйса пәйғәмбәрниң һаятини Мәрийәмниң қосиғиға йөткигән. Шуниң билән, Әйса Мәсиһ инсан болуп туғулған (Луқа 1:34, 35ни оқуң). Йәһва Худа вәдә қилинған Мәсиһ сүпитидә Әйсани пүткүл инсанларни қутқузуш үчүн дунияға әвәткән b. Муқәддәс китаптики Мәсиһкә мунасивәтлик көплигән бәшарәтләр Әйса Мәсиһтә орунланған. Шуңа Мәсиһ Әйсани кишиләр «Мәсиһ, тирик Худаниң Оғли» сүпитидә тонуған (Мәтта 16:16).
3. Һазир Әйса пәйғәмбәр қәйәрдә?
Һәзрити Әйса йәр йүзидә өлгәндин кейин пәриштә сүпитидә тирилдүрүлүп, асманға қайтип кәткән. Асманда Худа уни әң жуқури мәртивә орниға көтәргән (Филипиликләргә 2:9). У һазир асманда күчлүк бир пәриштә. Униң һоқуқи пәқәт Йәһва Худадинла төвән туриду.
ЧОҢҚУРИРАҚ ҚЕЗИҢ
Әйса пәйғәмбәр ким? У тоғрилиқ билим елиш немә үчүн муһим? Мошу соалларниң җававини билиш үчүн тиришип беқиң.
4. Әйса һәммигә Қадир Худа әмәс
Муқәддәс китап Әйса Мәсиһ күчлүк бир пәриштә болсиму, Атиси вә Худаси болған Йәһваға бойсуниду дәп үгитиду. Немә үчүн шундақ дейишкә болиду? ВИДЕОНИ көрүп, Әйса билән Һәммигә Қадир Худаниң арисидики мунасивәт Муқәддәс китапта қандақ тәсвирләнгәнлигини биливелиң.
Төвәндә оқуйдиған айәтләр Яратқучи Йәһва вә Әйса Мәсиһ оттурисидики пәриқни чүшинишимизгә ярдәм бериду. Һәрбир айәтни оқуп, төвәндики соаллар үстидә ойлинип көрүң:
Луқа 1:30—32ни оқуң.
-
Әйса Мәсиһ билән Һәммигә Қадир Худа Йәһваниң бир шәхс әмәслигини пәриштә қандақ тәсвирлигән?
Мәтта 3:16, 17ни оқуң.
-
Әйса Мәсиһ чөмдүрүлгәндә, асмандин кәлгән аваз немә дегән?
-
Сизниңчә, бу кимниң авази болған?
Йоһан 14:28ни оқуң.
-
Ким әң улуқ вә жуқури һоқуққа егә? Атиму яки оғулму?
-
Әйса Мәсиһ Йәһва Худани Ата дәп атиған. Буниңдин немини үгинәләймиз?
Йоһан 12:49ни оқуң.
-
Әйса пәйғәмбәр өзини Атиси билән охшаш бир шәхс дәп ойлиғанму? Сиз қандақ ойлайсиз?
5. Дәлил-испатлар Әйсаниң Мәсиһ екәнлигини көрситиду
Муқәддәс китапта Худаниң Әйсани Мәсиһ сүпитидә таллиғанлиғини тонуп йетишимизгә ярдәм беридиған нурғун бәшарәтләр бар. ВИДЕОНИ көрүң. Қайси бәшарәтләр Әйса пәйғәмбәрдә әмәлгә ашқанлиғини биливелиң.
Муқәддәс китаптики бәшарәтләрни оқуң, кейин төвәндики соаллар үстидә ойлинип көрүң:
Мика 5:2ни оқуп, Әйса Мәсиһниң қәйәрдә туғулғанлиғини биливелиң c.
-
Һәзрити Әйсаниң туғулуши бу бәшарәтни әмәлгә ашурғанму? (Мәтта 2:1)
Зәбур 34:20 вә Зәкәрия 12:10ни оқуп, Муқәддәс китапта Мәсиһниң қандақ өлтүрүлидиғанлиғи һәққидики тәпсилатларни биливелиң.
-
Шу бәшарәтләр әмәлгә ашурулғанму? (Йоһан 19:33—37)
-
Сизниңчә, шу бәшарәтләрниң әмәлгә ешишиға Әйса пәйғәмбәр немә үчүн тәсир қилалмиған?
-
Әйсаниң Мәсиһ екәнлигини немә испатлайду?
6. Һәзрити Әйса һәққидә көпирәк билим елиш биз үчүн пайдилиқ
Муқәддәс китап Әйса Мәсиһ вә униң ролиниң бәк муһимлиғини тәкитләйду. Йоһан 14:6 вә 17:3ни оқуң, кейин төвәндики соалға җавап бериң:
-
Әйса һәққидә билим елиш немә үчүн муһим?
Әйса Мәсиһ Худа билән дост болушниң йолини ачқан. У Йәһва Худа тоғрилиқ һәқиқәтни үгәткән. Әйса пәйғәмбәр арқилиқ биз мәңгүлүк һаятқа еришәләймиз
БӘЗИЛӘР МУНДАҚ ДӘЙДУ: «Йәһва гувачилири Әйса Мәсиһни Худаниң Оғли дейишиду. Худаниң балиси болуши мүмкин әмәс».
-
Сиз қандақ ойлайсиз?
ХУЛАСӘ
Әйса — күчлүк пәриштә. У Худаниң Оғли вә Мәсиһ.
Тәкрарлаш
-
Немә үчүн Муқәддәс китап Әйса Мәсиһни барлиқ мәвҗудатларниң тунҗиси дәп атайду?
-
Әйса пәйғәмбәр йәр йүзигә келиштин авал немә иш қилған?
-
Әйсаниң Мәсиһ екәнлигини қәйәрдин билимиз?
ИЗДИНИП КӨРҮҢ
Әйсаниң Мәсиһ екәнлигини билишимизгә ярдәм беридиған мәлуматларни биливелиң.
«Мәсиһ һәққидики бәшарәтләр Әйсаниң Мәсиһ екәнлигини испатламду?» (Торбәттики мақалә)
Муқәддәс китапта Әйса Мәсиһ Худаниң Оғли дәп тилға елинған. Бу Худа инсанларға охшаш пәрзәнт көргән дегәнни билдүрәмду?
«Әйса немә сәвәптин Худаниң Оғли дәп атилиду?» (Торбәттики мақалә)
Үчбирлик тәлимати Муқәддәс китапқа асасланмиған.
Муқәддәс китаптин Әйса пәйғәмбәр һәққидә ейтилғанларни тәтқиқ қилип үгәнгән аялниң һаяти қандақ өзгәргәнлигини оқуң.
a Муқәддәс китап Худа инсанларға охшаш пәрзәнт көриду дәп үгәтмәйду.
b 26, 27-дәрисләрдә немә үчүн инсанлар қутқузулушқа муһтаҗ вә Әйса пәйғәмбәр бизни қандақ қутқузғанлиғини муһакимә қилимиз.
c Мәсиһниң қачан келиши һәққидики бәшарәтләрниң қандақ тоғра әмәлгә ашқанлиғини чүшиниш үчүн 2-изаһәткә қараң.
Буларғиму қизиқишиңиз мүмкин
КӨПЧИЛИКНИ ҚИЗИҚТУРИДИҒАН СОАЛЛАР
Муқәддәс китаптин билим елиш үчүн Йәһва гувачилири билән тәтқиқ қилиш қандақ өткүзүлиду?
Өзүңизгә тонушлуқ һәрқандақ Муқәддәс китапни ишлитип, Йәһва гувачилири тәминлигән һәқсиз билим елиш дәрислирини тәтқиқ қилип үгәнсиңиз болиду. Тәтқиқ үгинишкә пүтүн аилә әзалириңизни яки достлириңизни чақирсиңиз болиду.
