Амос 1:1—15
1 Текоя падичилиридин болған Амосниң сөзлири. У уларни Йәһудия падишаси Уззияниң күнлиридә вә Исраил падишаси Йәһоашниң оғли Йеробоам II-ниң күнлиридә, қаттиқ йәр тәврәшкә икки жил қалғанда Исраил тоғрилиқ берилгән вәһийдә ейтти.
2 Амос пәйғәмбәр мундақ деди:
«Йәһва ширдәк Сиондин ғарилдайду
вә Йерусалимдин авазини аңлитиду.
Яйлақ-отлақлар қуруп кетиду вә
Кармилниң чоққиси солишиду».
3 «Йәһва мундақ дәйду:
“Дәмәшқниң үч қилмиши вә төртинчиси
үчүн Мән Өз қараримни рәт қилмаймән.
Сәвәви, у Гилиатни төмүр чанилар
билән бастурғанди.
4 Шуңа Мән Хазаәлниң өйигә өрт әвәтип,
Бен-Хададниң мустәһкәм
мунарлирини көйдүримән.
5 Дәмәшқниң тақақлирини сундуруп,
Бикат-Авенниң турғунлирини қиримән
һәм Бәйт-Едәндә калтәк тутқучини.
Сүрияниң хәлқи Кирға авдурулиду”,—
дәйду Йәһва Пәрвәрдигар.
6 Йәнә Йәһва мундақ демәктә:
“Газаниң дайимлиқ исиянлири үчүн
Өз буйруғимни өзгәртмәймән.
У Едумға тутқунға чүшкәнләрниң
барлиғини беривәткән еди.
7 Шуңлашқа Мән Газаниң сепиллиригә от
әвәтип, униң чиң сарайлирини өртәветимән.
8 Мән шундақла Ашдотниң аһалисини
һәм Ашкелонда һөкүмранлиқ қилғанни
уҗуқтуримән. Қолумни Әқрон үстидин
көтәргинимдә филистиялиқларниң
қалдуғи һалак болиду”,— дәйду
Әң Алий Һөкүмран Йәһва.
9 Йәһва мундақ дәйду:
“Тирниң тохтимайдиған көтирилишлири
үчүн һөкүмимни еливәтмәймән. У әсиргә
алғанларни Едумға тапшуруп, қериндашлиқ
иттипақни тамамән унтуди.
10 Шуңа Мән Тирниң тамлирини
отқа тутуп, униң мәккәм
мунарлирини уҗуқтуримән”.
11 Йәһва Худа йәнә монуни демәктә:
“Едумниң үч қилмиши һәм төртинчиси
үчүн Өз қараримни өзгәртмәймән.
У қолидики қиличи билән өз қериндишини
қоғлап, униңға рәһимсиз болди. У өз ғәзивидә
шәпқәтсиз, қәһри дайим көйүп, азаймайду.
12 Шуңа Мән Теманға өрт яндуруп,
Бозраниң мустәһкәм мунарлирини
көйдүрүп ташлаймән”.
13 Йәһва йәнә мундақ дәйду:
“Аммон оғуллириниң пүтмәс исиянлири
үчүн Өз қараримни рәт қилмаймән.
Егиликлирини кәңәйтиш нийитидә улар
һәтта һамилдарларниң қосақлирини
Гилиатта йеривәткән еди.
14 Шуниң үчүн Мән Рабба сепиллиридә ялқунни
туташтуруп, мустәһкәмләнгән маканлирини
йоқ қилимән. Буни җәң күнидә һәрбий шиар
астида боран-қуюнтазда әмәлгә ашуримән.
15 Шуниң билән уларниң шаһи бәглири билән
сүргүнгә маңиду”,— дәйду Йәһва.
