Даниял 1:1—21
1 Йәһуда падишаси Йәһоякимниң һөкүмранлиғиниң үчинчи жили Бабил шаһи Нәбуқәднәсәр Йерусалимға келип, уни қоршавға алди.
2 Йәһва униң қолиға Йәһуда падишаси Йәһоякимни вә шундақла һәқ Худаниң ибадәтханисидики қачиларниң бир қисмини беривәтти. Нәбуқәднәсәр уларни Синаар йеригә әвәтип, өз худалириниң бутханисиға, униңдики ғәзниханисиға қойди.
3 Андин шаһ асасий әмәлдари Ашпиназға у Исраил оғуллиридин падиша вә бәгләр әвладидин бәзи өсмүрләрни әкелишни буйриди.
4 Уларда һечбир чирай нуқсани болмаслиғи тәләп қилинатти, қәдди-қамити қамлашқан вә һәрқандақ даналиқни чүшинидиған вә билимгә қизиқиш билдүридиған, әқил-парасәтлик һәм шаһниң алдида хизмәт атқурушқа қәбилийәтлик жигитләрни таллаш тапшурулди. Бу әмәлдарға уларни халдийларниң тилиға һәм хетиға үгитиш әмир қилинди.
5 Шаһ һәр күни уларға таамларни вә шарапни өз дәстихинидин беришни бәлгүлиди. Мәзкүр жигитләрни үч жил давамида тәрбийиләш керәк еди, андин улар шаһниң алдида хизмитини өтүши лазим еди.
6 Уларниң арисида Йәһуда қәбилисидин Даниял, Һанания, Мишаил вә Азария бар еди.
7 Ассасий әмәлдар уларға башқа исимларни қойди. Даниялни у Бәлтәшасар, Һананияни Шадрак, Мишаилни Мешак вә Азарияни Әбәднего дәп атиди.
8 Бирақ Даниял өз жүригидә шаһниң дәстихинидин напаклашмаслиқни қәтъий қарар қилди. Шуңлашқа у асасий әмәлдардин шундақ өтүндики, уни напаклаштуридиған таамни йемәсликни рухсәт қилишини сориди.
9 Һәқ Худа Даниялға ушбу әмәлдарниң көзидә меһрибанлиқ һәм рәһимлик тепишни бәрди.
10 Мәсъул әмәлдар Даниялға мундақ деди: «Мән егәм, шаһтин, қорқумән, чүнки у өзи силәргә немә йәп-ичишни бәлгүлиди. У силәрниң чирайиңлар башқа тәңтушлириңлардин начар болғинини көрүп қалсичу? Шу чағда силәр мени шаһим алдида әйипкар қилисиләр».
11 Җававән Даниял асасий әмәлдар, униң Һанания, Мишаил вә Азарияларниң үстидин қойған баққучиға:
12 «Өтүнимиз, қуллириңиз үстидин он күн давамида бир синақ өткүзиңа. Бизгә пәқәт таамға көктатларни вә услуққа суни бәрсун.
13 Андин сиз бизниң чирайимизни шаһниң дәстихинидин истимал қилған башқа жигитләр билән селиштуруп көрүң. Шуниңдин кейин қуллириңиз билән немә қилишни өзиңиз йешисиз»,— дәп тәклип бәрди.
14 У киши уларни тиңшап, мошу синақни он күн бойи өткүзди.
15 Он күн өткәндин кейин, уларниң чирай-турқи башқа, шаһ дәстихинидин тамақланған өсмүрләрдин, яхши вә сағлам чиқти.
16 Шу вақиттин башлап, баққучи уларға берилгән тамақлар билән шарапни еливетип, көктатни беридиған болди.
17 Һәқиқий Худа ушбу төрт жигиткә даналиқ, билим вә һәрхил йезиқларни чүшиниш қабилийитини һәдийә қилди, Даниялниң болса, буниңдин ташқири, йәнә һәрқандақ вәһийләрни һәм чүшләрни чүшиниш қабилийити болди.
18 Шаһ үгитиш үчүн бәлгүлигән вақит йәткәндә, асасий әмәлдар уларни Нәбуқәднәсәр йүзи алдиға әкәлди.
19 Шаһ улар билән сөһбәтләшти вә һозурида болған һечбир жигит Даниял, Һанания, Мишаил һәм Азарияға тәң болалмиди. Шуниң билән улар шаһқа хизмәт атқурушқа талланди.
20 Даналиқ һәм өткүрлүк тәләп қилинидиған һәрбир ишта шаһ шуни байқидики, улар униң дөлитидики барлиқ каһинлиридин вә сехиргәрлиридин он һәссә әқиллигирәк чиқатти.
21 Даниял шу йәрдә шаһ Корәшниң биринчи жилиғичә болди.
