Даниял 10:1—21
10 Парс шаһи Корәшниң үчинчи жили Даниял, уни йәнә Бәлтәшасар дәп ататти, ушбу хәвәрни алди. Мәзкүр хәвәр һәқиқий болуп, у улуқ бир уруш һәққидә еди. Униңға көргининиң маһийити чүшәндүрүлүп, у һәммигә чоңқур чөкти.
2 Шу күнлири мән, Даниял, үч һәптә давамида зор қайғурушта болдум.
3 Мошу вақит бойи мән мейизлик таамларни йемидим, гөш билән шарапқа тәгмидим вә өзәмни майлимидим.
4 Дәсләпки айниң 24-күни мән бүйүк дәрия Тигрниң яки Диҗләниң бойида турғинимда,
5 зиғир кийим кийгән вә белидә уфазлиқ алтундин қилинған бәлбеғи бар бир кишини көрдүм.
6 Униң бәдини хризолит тешиға охшатти, үзи чақмақтәк парлатти, көзлири көйүватқан мәшъәлләргә қияс еди, пут-қоллири силиқланған мис кәби вә авази зор бир хәлиқ топиниң авазини әслитәтти.
7 Бу көрүнүшни пәқәт мән, Даниял, көрдүм, йенимда болған кишиләр уни көрмиди. Лекин уларни шунчилик күчлүк қорқунуч чирмавалдики, улар қечип мөкүнди.
8 Мән ялғуз қалдим. Мән улуқ бу карамәтни көргәндә, мениңда мағдир қалмиди, үзүм татирип, мән толиму һалсизландим.
9 Андин мән у кишиниң сөзлириниң авазини аңлидим вә у сөзләватқанда, мән үзүм билән йәрдә ятқан түрүмдә қаттиқ ухлап кәттим.
10 Бирақ кейин маңа қол тегип, охитишқа башлиди. Мән йәргә тайинип, тизимға туралидим.
11 У маңа: «Һәй, Даниял, Тәңри үчүн қиммәтбаһалиқ киши, мән саңа ейтидиған нәрсиләрни диққәтлик тиңша. Путуңға тур, чүнки мән саңа әвәтилдим»,— деди. Мошу гәптин кейин мән титригән һалда турдум.
12 Андин у маңа мундақ деди: «Қорқма, Даниял, сән өзәңни Худайиң алдида мулайимлаштуруп, жүригиңни һәммә нәрсини чүшинишкә бәргән биринчи күндин башлап, сениң сөзлириң тиңшалди, шуңлашқа мән саңа кәлдим.
13 Амма мени торап, алдимда 21 күн Парс шаһлиғиниң бәги турди. Бирақ маңа ярдәмгә Микаил кәлди, у асасий бәгләрниң биридур. Мән Парс шаһлири билән шу йәрдә қалдим.
14 Мән саңа кәлгинимниң сәвәви, сениң хәлқиң билән ахирқи күнләрдә немә болушини ечип беришкә әвәтилдим, чүнки ушбу көрүнүш келәчәккиму мәнсүптур».
15 У маңа мошу сөзләрни ейтиватқанда, мән бешимни саңгилитип, һечбир сөз қилалмидим.
16 Андин адәм балисиға охшайдиған бирси калпуклиримға тәгди һәм шуниң билән мән сөзләлидим. Мән алдимда турғанға: «Тәхсирим, вәһийдә көргәнлиримдин барлиқ әзалирим титрәп, қувәт мени қалдурди.
17 Қандақларчә мән, сизниң қулуңиз, тәхсирим билән сөзлишиду? Чүнки мениңда күч-қувәт қалмиди һәм мән аранла нәпәс еливатимән»,— дедим.
18 Шу чағда адәмгә охшиған бирси қолини тәккүзүп, мени мустәһкәмлиди.
19 Андин у маңа: «Қорқма сән, Худаға қәдирлик киши. Саңа течлиқ дарисун. Ғәйрәтлик бол, мәккәм тур!»— деди. У мошундақ мениң билән сөзләватқанда, маңа күч-қувәт қайтти һәм мән: «Сөзләң, тәхсирим, чүнки сиз мени күчләндүрдиңиз»,— дедим.
20 Андин у маңа мундақ сөзләрни деди: «Биләмсән, немә үчүн мән саңа кәлдим? Һазир Парс беги билән җәң қилишқа атлинимән. Мән кәткәндин кейин Грекияниң беги келиду.
21 Амма мән саңа һәқиқәт китавида немә йезилғини тоғрисида ейтип беримән. Мени силәрниң бегиңлар Микаилдин башқа һечким қоллап-қувәтлимәйду.
