Даниял 9:1—27
9 Ахашверошниң оғли Дариосниң биринчи жилиниң һөкүмранлиғида, у мидиялиқ болуп, халдийлар шаһлиғиниң үстидин қоюлған еди.
2 Униң һөкүмранлиғиниң дәсләпки жили мән, Даниял, муқәддәс пүтүкләр бойичә — Йәрәмия пәйғәмбәргә болған Йәһваниң сөзлири түпәйли — Йерусалимниң чөлдәритиштә болуш мәзгили 70 жил екәнлигини уқтум.
3 Шуниң билән мән йүзүмни һәқиқий Худа Йәһваға қаритип, дуа-илтиҗада роза тутқач, қапқа кийинип вә бешимға күл чечип, мураҗиәт қилдим.
4 Мән өз Тәңрим Йәһваға дуа қилип, гуналиримни очуқ ейтип, мундақ дедим: «Аһ, Йәһва, һәқ Худа, Сән улуқ һәм һәйвәтлик, Өз келишимиңни күзитидиған вә Сени яхши көргәнләргә һәм әмирлириңни орунлайдиғанларға вапалиқ сақлайсән!
5 Биз көп гуналарни өткүзүп, бузулуп кәттуқ, вәһшиләштуқ һәм Саңа бойсунмай, вәсийәтлириңдин һәм қанунлириңдин чәтнидуқ.
6 Биз Сениң намиңдин әвәтилгән қуллириң, пәйғәмбәрләрни, тиңшимидуқ, гәрчә улар Сениң исмиңдин падишалиримизға, бәглиримизгә, әҗдатлиримизға һәм пүткүл хәлқимизгә мураҗиәт қилсиму.
7 Сениңда, Йәһва, һәқиқәт һәм Сән дайим һәққаний иш тутисән, лекин биз техичә шәрмәндидә болуватимиз. Биз, Йәһудияниң хәлқи, Йерусалимниң турғунлири вә пүткүл Исраил, йеқинда болайли яки бизниң Саңа болған вапасизлиғимиз кесиридин Сән барлиқ зиминларға таритивәткән жирақтикиләрниң бети қизирип, уятта қалмақта.
8 Йәһва! Саңа қарши чиққинимиз үчүн падишалиримиз, бәглиримиз һәм атилиримизниң һалиға вай!
9 Рәббимиз Йәһва, Сән рәһимдиллиқ һәм кәчүрүмчан, һә, биз Саңа беқинмидуқ.
10 Биз Саңа, Йәһва Худайимиз, бойсунмай, Сән Өз хизмәтчилириң пәйғәмбәрләр арқилиқ бәргән әмирлириңгә етивар бәрмидуқ.
11 Пүткүл Исраил Қануниңни дәпсәндә қилип, Сениңдин үз өрди. Шуңа һәқ Худаниң хизмәтчиси Мусаниң қанунида йезилған һәм қәсәм билән тәстиқләнгән ләнәтни Сән бизгә әвәттиң, сәвәви, биз Саңа қарши гуна қилдуқ.
12 Сән Өз сөзүңни орунлап, бизниң һакимлиримиз һәм сотчилиримиз билән вәдә бәргәндәк, иш туттиң. Сән бизгә әҗайип дәһшәтлик балаю-апәтни кәлтүрдиң: һечқачан асман астида Йерусалим билән болған апәттәк яманлиқ болмиди.
13 Муса қанунида йезилғинидәк, барлиқ бу бала-қаза бизгә чүшкәндиму, биз Сени, Йәһва, илтипат һәққидә ялвурмидуқ, биз шундақла өз әйиплиримиздин қайтмидуқ һәм Сениң һәқиқәткә садиқ екәнлигиңни чүшәнмидуқ.
14 Сән болсаң, Йәһва, ойғақ көзүң билән бизгә беқип, ушбу балаю-апәтни төктүң, чүнки Илаһимиз Йәһва барчә ишлирида һәққанийдур. Биз болсақ, Униң авазиға қулақ салмидуқ.
15 Йәһва Пәрвәрдигаримиз, Сән қудрәтлик қолуң билән Өз хәлқиңни Мисир йеридин чиқирип, мошу күнгичә әстә қалған исимни Өзәңгә тиклидиң! Биз болсақ, гунадин қайтмай, яманлиқ қилишни давамлаштурдуқ.
16 Оһ, Йәһва! Сән һәрқачан һәқиқитиң бойичә иш қилисән, шуңлашқа өтүнимәнки, аччиғиңдин қайтқина вә қәһриң Йерусалим шәһиригә, Сениң муқәддәс теғиңға, көйүштин тохтисинчу. Чүнки бизниң гуналиримиз вә атилиримизниң қилмишлири үчүн Йерусалим һәм Сениң хәлқиң әтрапимиздики хошна хәлиқләрниң алдида тамашиға қалди.
17 Әнди болса, бизниң Егимиз, хизмәтчиңниң дуайи билән ялвурушлирини аңлиғина вә Өзәңниң тәнһа қалған муқәддәс җайинға йоруқ йүзүң билән қариғина — Йәһва, Өзәң үчүндур!
18 Худайим, қулақ селип, еңишип тиңшиғина. Қарап баққина, биз қандақ һаләттә вә Сениң исмиң билән аталған шәһәр қандақ әһвалда! Биз Саңа ишлиримиз һәққаний болғанлиқтин мураҗиәт қилмайватимиз, бәлки Сениң бәк улуқ рәһим-шәпқитиңгә үмүт қилимиз.
19 Йәһва, аңлиғина! Йәһва, кәчүргинә! Йәһва, бизгә Өз диққитиңни бөлүп, ярдәм қилғина! Җеним Худайим, Өзәң үчүн кәйнигә созмиғина, чүнки мәзкүр шәһәр һәм Сениң хәлқиң муқәддәс исмиң билән аталғанғу!»
20 Шундақларчә мән дуада өз гуналирим вә хәлқим, Исраилниң, гуналирини етирап қилғач, Тәңрим Йәһвадин Униң илтипатини муқәддәс теғиға соридим.
21 Мән интайин һерип-чарчап дуа қиливатқинимда, маңа мән бурун вәһийдә көргән Җәбраил кәлди. Бу һадисә кәчқурунлуқ қурбанлиқ әкелиш вақтида йүз бәрди.
22 У немә болудиғинини маңа чүшәндүрди.
Җәбраил маңа мундақ сөзләрни ейтти: «Даниял, мана мән саңа пәйғәмбәрлик сөзләргә чоңқурирақ чөкүшни үгитишкә һәм уларни чүшинишкә ярдәм беришкә кәлдим.
23 Сән дуа қилишни башлиғанда, дуайиңға җавап чиқти һәм мән уни саңа йәткүзүп, елан қилишқа әвәтилдим, сәвәви, сән Худа үчүн қиммәтлик кишидур. Демәк, ушбу сөзгә диққәтчан болуп, униң маһийитини чүшинишкә тиришқин.
24 Сениң хәлқиң һәм муқәддәс шәһириң үчүн 70 һәптә бәлгүләнди. Бу қилмишқа ахир қоюш үчүн, гунани йоқитиш үчүн, қанунсизлиқ үчүн төләм беришкә, мәңгү һәққанийлиқни турғузушқа, вәһий билән пәйғәмбәрликни тамғилаш үчүн вә әң муқәддәс җайни майлаш үчүндур.
25 Шуни билгин һәм чүшәнгин: Йерусалимни қуруп, тикләш үчүн пәрман чиққан вақиттин башлап, Мәсиһ-Даһиғичә 7 һәптә вә 62 һәптә өтиду. Йерусалим қайтидин мәйдани һәм айланма қезилған ориси билән турғузулуп қурулиду, лекин қийин вақитларда.
26 Бәлгүләнгән 62 һәптә өткәндин кейин Мәсиһ өлтүрүлиду вә униңда һечнәрсә қалмайду.
Шәһәр вә муқәддәс җай келишкә тегиш даһиниң қошуни билән вәйран қилиниду. Униң ахири кәлкүн судин болғандәк болиду. Әң ахириғичә уруш жүргүзүлиду. Худа чөлдәритишни қарар қилди.
27 Мәсиһ келишимни күчидә нурғунлири үчүн бир һәптә сақлайду, һәптиниң оттурисида у қурбанлиқлар һәм һәдийәләргә ахир қойиду.
Жиркиничликлири билән чөлдәрәткүчи келиду вә қарар қилинғандәк, һәммә нәрсә чөлдәригәнгә пүтүнләй қирилип кәткичә төкүлиду».
