Зәбур 119:1—176
119 Йәһваниң Қануни бойичә яшиғанлар,
Кимниң йоли нуқсансиз болса,
Ушбу қишиләр бәхитликтур.
2 Ким Униң нәсиһәтлирини сақлап,
Уни пүткүл вуҗуди билән
Издигәнләр һәқиқәтән бәхитликтур.
3 Улар қанунсизлиқ қилмайду вә
Униң йоллири билән изчил маңиду.
4 Сән бизгә көрсәтмилириңни садиқ
Сақлап орунлашни әмир қилған едиң.
5 Аһ, мениң йоллирим мәккәм кәйпиятим
Билән бирликтә Сениң низамлириңни
Күзитишкә қаритилған болсиди!
6 Шу чағда мән вәсийәтлириңгә чөкүп,
Һәргиз иза тартматтим.
7 Сени қәлбимниң һәқлиғидә һәққаний
Қарарлириңға үгәнгәч, мәдһийиләттим.
8 Сениң тәләп-қаидилириңни тутумән,
Мени һечқачан ташлимиғина.
ב [Бет]
9 Қандақ қилип, пак һаят сүрүш керәк?
Өзигә Сениң Сөзүң бойичә беқип.
10 Сени пүткүл жүригимдин истәймән.
Маңа Қануниңдин чәтнәшкә йол қойма.
11 Көңлүмдә мән сөзлириңни пүктүм,
Сениң алдиңда гуна өткүзмәсликкә.
12 Сени, Йәһва Худа, махтисун!
Мени Өзәңниң тохтамлириңға дайим үгәткинә.
13 Сән җакалиған қарарлириңниң
Барлиғини мәнму җакалаватимән.
14 Сениң нәсиһәт-мәслиһәтлириңгә зор
Бир байлиқтәк хурсән болумән.
15 Сениң пәрманлириң үстидин мулаһизә
Қилип, йоллириңға синчилап қараймән.
16 Сениң қанунлириңни қәдир тутуп,
Тохтамлириңдин тәсәлли алимән.
ג [Гимел]
17 Өз қулуңға меһриңни көрсәткәй, шу
Һаләттә мән яшап, сөзүңгә әмәл қилимән.
18 Көзүмни ачқина, Қануниң сирлирини
Вә карамәтлирини рошән көрүшүм үчүн.
19 Мән бу йәрдә пәқәт мусапирдур, шуңа
Мәндин вәсийәтлириң мәнасини йошурма.
20 Җеним тәлмүрүп, сотлириңни күтиду.
Уларни чүшинишкә интизармән.
21 Сән мәғрурларни әйипләйсән, улар
Сениң вәсийәтлириңни орунлаштин
Қачидиған ләнәт кишиләрдур.
22 Мени мәсхирә билән шәрмәндидин
Сақлиғина, чүнки аянлириңни сақлаватимән.
23 Һәтта бәгләрму бирлишип, маңа қарши
Тил бириктуриватиду, қулуң болса,
Сениң қарарлириң һәққидә ойлаватиду.
24 Нәсиһәтлириң мән үчүн қәдир-қиммәтлик,
Улар һәтта мениң мәслиһәтчилирим.
ד [Далет]
25 Җеним тупраққа ташланди, мени Өз
Вәдәңгә бенаән тирилдүргинә.
26 Мән йоллириң тоғрилиқ ейтип бәрдим.
Вә Сән маңа җавап қайтурдиң.
Мени Өзәңниң қанунлириңға үгәткинә.
27 Буйруқлириң маһийитини чүшәндүргинә.
Мән Сениң һәйран қаларлиқ мөҗүзилириң
Һәққидә чоңқур тәтқиқ қилимән.
28 Хапичилиқтин уйқамдин айрилдим,
Сөзүңгә бенаән мени тиклигинә.
29 Ялғанчилиқ йолини нери қилип,
Илтипатиң түпәйли Қануниңни ачқина.
30 Мән һәқиқәт йолини таллидим.
Сениң йешимлириңни дурус көримән.
31 Сениң вәһийлириңгә мән чаплаштим.
Йәһва Рәббим, үмүтүм бекар чиқмисун.
32 Вәсийәтләр йолиға интилимән,
Чүнки Сән қәлбимни кәңәйттиң.
ה [Хе]
33 Йәһва, қарарлириң йолида яшашни үгәт,
Уларни ахирғичә тутушни халаймән.
34 Сениң Қануниңни чүшинишкә ярдәмләш,
Пүтүн жүригим билән беқинишқа.
35 Мени вәсийәтлириң йолида жүргүзгинә,
Сәвәви, бу маңа хошаллиқ һәдийә қилиду.
36 Қәлбимни тәлимлириңгә җәлип қилғина,
Ғәрәзликтин нери болай.
37 Көзлиримни налайиқ нәрсидин буриғина,
Қуруқ нәрсини рәт қилай.
38 Алдиңда әйминиши үчүн хизмәтчиңгә
Вәдиләнгән сөзүңни орунлиғина.
39 Мән қорқудиған шәрмәндидин қутулдур,
Чүнки Сениң сотлириң адилдур!
40 Қарап баққина, мән Сениң әмирлириңни
Орунлашни халаймән. Җенимни сақлап
Қалғина, чүнки Сән һәққаний Ата!
ו [Вав]
41 Маңа, Йәһва, Өз вапа сөйүмиңни көрсәт,
Мени Өзәңниң вәдиси бойичә қутқуз.
42 Шу чағда үстүмдин күлүватқанға
Җавап қайтуримән, чүнки Сениң
Өзгәрмәс сөзүңгә тайинишқа тиришимән.
43 Еғизимдин һәқ сөзләрни тартивалмиғина,
Мән Сениң адиллиғиңға ишинимән.
44 Қануниңни тохтатмай, дайим сақлаймән.
45 Қәйәргә бармисам, бехәтәрликтә болумән,
Сәвәви, әмирлириңни тиришип орунлаймән.
46 Тәлимлириң тоғрилиқ падишалар алдида
Сөзләймән һәм һечқачан иза тартмаймән.
47 Вәсийәтлириңдин өзәм тәсәлли тапимән.
Һә, мән уларни қәлбимдин сөйүмән.
48 Қоллиримни дуада көтиримән,
Тохтамлириң һәққидә дайим издинимән.
ז [Зайин]
49 Қулуңға болған сөзүңни әскә алғина.
Сән үмүт бағлишимни агаһландурдиң.
50 Ушбу гепиң дәрдимдә мени бәзләйду.
Сениң сөзлириң маңа һаят беғишлайду.
51 Йоғанчилар мени мәсхирә қиливатиду ,
Амма Сениң Қануниңдин чекинмидим.
52 Аһ, Йәһва, Сениң қедимий сотлириңни
Әскә елип, уларда тәсәлли тапимән.
53 Сениң Қануниңни рәт қилғанларни
Ойлисам, қаттиқ нәпрәтлинимән.
54 Сениң қаидилириң мениң мусапир
Маканимда нахшилардәк хуш яқиду.
55 Йәһва Тәңрим, кечиләрдә исмиңни
Хатириләп, Қануниңға садақәт сақлаймән.
56 Бу маңа адәткә айланди, сәвәви,
Сениң Пәрманлириңға әмәл қилишни истәймән.
ט [Хет]
57 Йәһва Тәңрим — мениң қисмитим.
Сениң сөзлириңни орунлашқа вәдә бәрдим.
58 Пүткүл вуҗудумдин илтипат сораймән,
Сөзүң бойичә рәһим көрсәткәйсән.
59 Мән йолумни тәкшүрүп, аяқлиримни
Сениң нәсиһәтлириңгә қаритимән.
60 Кечиктүрмәй, Сениң вәсийәтлирңни
Һәр ян сақлашқа алдираймән.
61 Зулумларниң қармақлири мени қоршиди,
Лекин Қануниңни мән унтумидим.
62 Һәтта түн йеримидә Сени адилдин-адил
Сотлириң үчүн мәдһийиләшкә туримән.
63 Мән Сениңдин әйминидиғанларниң
Вә Сениң әмирлириңни күзитидиғанларниң
Барлиғиға һәм дост, һәм сәпдашмән.
64 Йәһва Худа, пүткүл йәр изгүлүгиңгә
Толғандур. Мени низамлириңға үгәткәй.
ט [Тет]
65 Сән Йәһва, Өз хизмәтчиңгә қәсәм
Ичкиниңдәк, яхшилиқларни қиливатисән.
66 Мени сағлампикирликкә һәм билимгә
Үгәт, чүнки мән вәсийәтлириңгә ишинимән.
67 Дәрдимдин авал адишип жүрүптимән,
Әнди болса, Сениң Сөзүңгә әмәл қилдим.
68 Сән меһриван һәм яхшилиқ Қилғучи,
Мени тохтамлириңға үгәткәйсән.
69 Тәкәббурлар маңа яла йепиватиду,
Амма мән бар жүригим билән Сениң
Буйруқлириңни тутуп яшаймән.
70 Уларниң жүрәклири яғдәк сәмиришип,
Берәһим болушти, лекин мән Сениң
Қануниңда тәсәлли тепип, арамхуда.
71 Мениң азапланғиним яхши, чүнки шундақ
Қилип, ибрәт қанунлириңға үгиниватимән.
72 Еғизиңдин чиққан қаидиләр мениң үчүн
Миңлиған шекәл алтун-күмүчтин артуқтур.
י [Йод]
73 Сениң қоллириң мени яратти. Әнди маңа
Әқил берип, вәсийәтлириңни чүшинишкә
Дайимий ярдәмләшкинә.
74 Сениңдин қорқудиғанлар мени көрүп,
Хошал болушсун, чүнки мән Сениң
Сөзүң-каламиңға үмүт артимән.
75 Йәһва, шуни билимәнки, қарарлириң
Дайим һәқ вә мени җазалап,
Сән маңа пайда әкәлдиң.
76 Өтүнимән, мени Өз вапа көйүмиң
Арқилиқ бәзлигинә. Өз Сөзүңдә қулуңға
Сән ушбуни вәдә қилғандиң.
77 Маңа тирилишим үчүн рәһимдиллиғиңни
Әвәткинә. Қануниң мән үчүн тәсәллидур!
78 Мәғрурлар мәсхирә болсун, чүнки улар
Һеч сәвәпсиз маңа яманлиқ қиливатиду.
Бирақ мән болсам, Сениң пәрманлириң
Һәққидә мулаһизә қилип олтиримән.
79 Сени чоңқур һөрмәтләйдиғанлар һәм
Нәсиһәтлириңни билгәнләр маңа қайтсунчу.
80 Қәлбимдин әмирлириңни камил орунлап,
Изаға дүшмәнләр алдида қалмишим үчүн,
Ярдәм қолуңни маңа созғина.
כ [Каф]
81 Мениң җеним Сениң ниҗатиңни күтүп,
Аҗизланди. Мән сөзлириңгә ишинимән.
82 Сениң сөзүңниң орунлишини күтүп,
Көзлирим һалсизланди: «Қачанму Сән
Маңа тәсәлли берисән?»— дәймән.
83 Мән иста қалған қорулған тулумға
Охшап қалдим, лекин Сениң
Қаидилириңни әстин чиқармидим.
84 Хизмәткариңға йәнә қанчә вақит
Күтүш керәк? Қачан Сән тәқиплигүчиләр
Үстидин қарар чиқирисән?
85 Чоңчи кишиләр, Қануниңға сәл
Қарайдиғанлар маңа ора колаватиду.
86 Сениң вәсийәтлириңниң бари һәқиқәттур.
Мән әйипсиз болсамму, қоғлаватиду.
Ярдәмгә чапсан кәлгинә!
87 Мени бу зиминда өлтүрүветишкә тас
Қалди, лекин мән пәрманиңни ташлимидим.
88 Шәпқитиң түпәйли вапа муһәббәт
Көрситип, җенимни аман еп қалғина
Һәм мән аянлириңни сақлаймән.
ל [Ламед]
89 Йәһва Рәббим, Сениң Сөзүң
Асманларда мәңгү тәстиқләнгән.
90 Сениң һәқиқитиң әвлаттин-әвлатқичә.
Сән йәрни мустәһкәмлидиң, шуңа у туриду.
91 Сениң бәлгүлишиң бойичә һәммә нәрсә
Һеликәм моҗут. Һәммәйлән хизмитиңдә.
92 Әгәр Сениң Қануниңни қәдирлимигән
Болсам, дәрдимдә һалак болаттим.
93 Һечқачан мәслиһәтлириңни унтумаймән,
Чүнки улар арқилиқ мени тирилдүриватисән.
94 Мән Сениңки, мени қутқузғина,
Чүнки мән нийәтлириңни истәймән.
95 Рәзил мени йоқ қилишни издимәктә,
Бирақ мән вәһийлириңгә чөмүватимән.
96 Мән һәммә нәрсиниң чекини көрдүм,
Амма Сениң вәсийитиңниң чеки йоқтур.
מ [Мем]
97 Мән Сениң Қануниңни қанчилик яхши көримән!
Күн бойи у тоғрилиқ ойлаймән.
98 Вәсийитиң мени дүшмәнлиримдин
Дана қиливатиду, у дайим мән биләндур.
99 Мән барлиқ устазлиримдин ешип кәттим,
Чүнки Сениң аянлириң һәққидә
Изчил мулаһизә қилимән.
100 Мән қерилардин данишмән болдум, чүнки
Сениң буйруқлириңни орунлаймән.
101 Һәрқандақ яман йолдин путлиримни
Қачуримән, сөзүңни шундақ сақлаймән.
102 Бәлгүмилириңдин чекинмәймән,
Сәвәви, Сән мени шундақ үгәттиң.
103 Нәқәдәр тилимға Сениң сөзлириң
Тәмлик, улар һәсәлдинму татлиқтур!
104 Пәрманлириңдин мән әқилгә толдум.
Мана, немишкә ялғанчи йолға өчмән.
נ [Нун]
105 Сениң Сөзүң — айиғим үчүн чирақтур
Һәм йолум үчүн йоруқлуқтур.
106 Мән һәқиқитиңниң дурус қарарлириға
Садиқлиқ сақлаймән. Шундақ дәп, қәсәм
Ичтим һәм уни чоқум орунлаймән.
107 Мән қаттиқ бесим астида, Йәһва.
Сөзүң бойичә аман елип қалғина.
108 Йәһва, еғизлиримниң халисанә қурбанлиғи
Саңа ярисунчу вә Өз Қанунлириңни
Тутушни үгәткинә!
109 Җеним дайим хәтәрликтә болуватиду,
Амма Сениң Қануниңни унтумидим.
110 Явузлар маңа тор тартти, лекин мән
Сениң мәслиһәтлириңдин чәтнимидим,
111 Мән тәлимлириңни әбәдий өзләштүрдим,
Улар қәлбимниң шатлиғидур.
112 Мән көңлүмни қарарлириңни орунлаш
Үчүн майил қилдим, ахирғичә, та әбәт.
ס [Самех]
113 Сениң Қануниңни рәт қилғанларға
Нәпрәтлинимән, Қануниңға амрақмән.
114 Сән — мениң панагаһим һәм қалқиним.
Сениң сөзүңни тақәтсизликтә күтимән.
115 Қанун бузғучилар, нери болуңлар!
Мән Худайимниң вәсийитини күзитимән.
116 Өз сөзүңгә бенаән мустәһкәмлигинә,
Мени Өзәң қоллап-қувәтлигинә:
Үмүтүм вәйран болуп кәтмисун.
117 Мени чиңайтип, қутулдурғина, шунда
Рәсим-каидилириңгә чоңқур чөкимән.
118 Сән тохтамлиримдин чекингән барини
Пәсәйттиң. Улар ялғанчи вә алдамчилар.
119 Сән йәр-зиминниң рәзиллирини
Әхләттәк рәт қилдиң. Шуңа мән Сениң
Нәсиһәтлириңни дилкәшлик яхши көрүмән.
120 Сениң қорқунучиңдин теним шүркүниду,
Қарарлириңниң һөкүмлиридин мән чөчимән.
ע [Айин]
121 Мән адил һәм һәққанийлиқни бәҗирдим.
Мени қоғлиғучилар қолиға беривәтмигинә.
122 Қулуңни униң мәнпийитигә бағлиқ
Қоғдавалғина. Маңа ғәмхорлуқ қилғина!
123 Көзлирим Сениң ниҗатиңға қарап,
Һерип кәтти, шундақла Сөзүңгә беқип.
124 Қулуңға шәпқитиңниң вапа көйүмини
Билдүргинә вә қарарлириңға үгәткинә.
125 Мән Сениң хизмәтчиң. Маңа синчилиқ
Берип, нәсиһәтлириңни чүшәндүргинә.
126 Йәһва Илаһим, һәрикәтлиниш вақтиң
Кәлгәнду? Улар Қануниңни бузувәтти.
127 Мән вәсийәтлириңни алтун билән
Қиммәтбаһалиқ ташлардин әвзәл санаймән.
128 Шуңлашқа барлиқ буйруқлириңни
Тоғра, дәп һесаплаймән, һәрқандақ
Хата йолни пүтүнләй рәт қилимән.
פ [Пе]
129 Сениң нәсиһәтлириң нәқәдәр әҗайип!
Шуңлашқа мән уларға әмәл қилимән.
130 Сөзлириңниң маһийитини Сән ачқанда,
Адәмләр билим-тәлим алиду вә
Наданлар әқил-парасәткә үгиниду.
131 Мән вәсийәтлириңни тәшналиқ билән
Күтимән, еғизимни салқин суни издигәндәк.
132 Маңа қариғина вә рәһимлик көрсәткинә,
Сәвәви, Сән исмиңни сөйгәнләр билән
Әсирләр бойи дайим шәпқәтликқу.
133 Өз сөзүңдә тапанлиримни мәккәм
Қилғина вә һечбир қанунсизлиқ үстүмдин
Күчкә егә болалмисун.
134 Мени инсан хорлишидин қутулдурғина.
Пәқәт Сениң әмирлириңни орунлай.
135 Өз қулуңға йүзүңниң нури билән
Парлиғин вә мени низамлириңға үгәткин.
136 Көзлиримдин яш еқинлири ақмақта,
Чүнки кишиләр Қануниңни хорлаватиду.
צ [Цаде]
137 Йәһва Рәббим, Сән һәққаний вә
Сениң сотлириңниң һәммиси адил.
138 Сән һәқиңни нәсиһәтлириңдә көрсәттиң.
Өзгәрмәс һәқиқитиңгә ишәнсәк болиду.
139 Мениңда қизғинлиқ оттәк көймәктә.
Һә, дүшмәнләр Сениң сөзлириңни унтуди.
140 Сөзүң пактур вә қулуң уни сөйиду.
141 Мән әрзимәс һәм көзгә илмас бир киши,
Лекин әскәртмилириң хатирәмдә сақлақлиқ.
142 Сениң һәққанийлиғиң — бақий Һәққанийлиқтур
Вә Қануниң — һәқиқәт.
143 Қайғулар мени бассиму, вәсийәтлириң
Мениң үчүн қәдир-қиммәтликтур.
144 Әскәртмилириңдә мәңгү һәқиқәт, маңа
Тәлим бәргинә һәм мән роһлинай.
ק [Коф]
145 Пүтүн жүригимдин Сени чақиримән:
Йәһвайим, маңа җавап бәргинә!
Мән Сениң қанунлириңни орунлаймән.
146 Мән Саңа мураҗиәт қиливатимән,
Мени қутқузғина! Мән Сениң есил
Әқил-мәслиһәтлириңгә әмәл қилимән.
147 Таң атқичә туруп, Саңа ялвуримән.
Маңа ярдәмгә кәлгинә.
148 Кечилири уйқам қачиду, шу вақитларда
Сениң сөзүңни тәтқиқ қилимән.
149 Йәһва, Өз вапа меһир-муһәббитиң бойичә
Авазимни аңлиғина. Җенимни Өзәңниң адиллиғи
Түпәйли күзәткинә.
150 Маңа жиркиничлик ишларни яхши
Көридиғанлар йеқинлишиватиду, улар
Сениң Қануниңдин жирақлашқанлардур.
151 Сән, Йәһва, маңа йеқинсән вә һәммә
Вәсийәтлириң бүйүк һәқиқәт.
152 Мән нәвақтин Сениң нәсиһәтлириң
Һәққидә билгәнмән. Сән уларни
Мәңгүгә әвлатлар үчүн қойдиң.
ר [Реш]
153 Азаплиримға қарап, мени қутулдурғина,
Чүнки мән Қануниңни унтуғиним йоқ.
154 Һимайә қилип, мениң сот ишимни
Жүргүзгин, сөзүңгә мас өмрүмни сақлиғин.
155 Рәзилләрдин қутқузулуш жирақтур,
Улар қанунлириңни билгүси кәлмәйду.
156 Сениң рәһимдиллиғиң улуқтур, Йәһва!
Адиллиғиңдин һаятимни қутулдурғина.
157 Дүшмәнлирим билән тәқиплигүчилирим
Көп, амма мәслиһәтләрдин жирақлашмидим.
158 Хаинларни көрүп, улардин жиркинимән,
Чүнки улар мәккар кишиләрдур.
159 Қариғина, мән қандақ Сениң
Әмир-пәрманлириңни қәдирләймән!
Йәһва, шәпқитиңдин мени илһамландурғин.
160 Сөзүңниң һули — һәқиқәттур, шуңа
Барчә һәққаний йешимлириң та әбәт.
ש [Шин]
161 Бәгләр мени һеч сәвәпсиз қоғлимақта,
Бирақ жүригим пәқәт Сениң
Тәләп-сөзлириңдинла қорқиду.
162 Мән һәрбир мәслиһитиңгә хуш болумән,
Гоя зор олҗа тапқан кишидәк.
163 Ялғанчилиқтин нәпрәтлинип, униңдин
Жиркинимән. Сениң Қануниңни болса,
Пүткүл җан-дилимдин яхши көримән!
164 Күнигә йәттә қетим Сени махтап,
Адил қарарлириң үчүн мәдһийиләймән.
165 Қануниңни сөйгәнләрниң хатирҗәмлиги
Бүйүктур вә уларға путликашаң йоқ.
166 Йәһва, мән Сениң ниҗатиңни күтимән,
Вәсийәтлириңни орунлиғач, үмүткә толумән.
167 Җеним нәсиһәтлириңгә мәккәм әмәл
Қилиду, мән уларни интайин яритимән.
168 Әмирлириң билән вәһийлириңни
Сақлаймән, йолум Сениң көз алдиңда.
ת [Тав]
169 Йәһва Илаһим! Вақиришимни аңлиғина.
Өз Сөзүң арқилиқ маңа нәсиһәт бәргинә.
170 Илтиҗам йүзүң алдиға йәтсунчу,
Вәдәң түпәйли маңа азатлиқ бәргинә.
171 Еғизимдин апирин сөзләр чиқсун,
Сән мени қаидилириңгә үгәткәнликтин.
172 Тилим сөзүңни җакалисун, чүнки
Вәсийәтлириң пәқәт яхшилиқ әкелиду.
173 Қолуң маңа ярдәмгә кәлсун, мән Сениң
Әмирлириңгә беқинишни қарар қилдим.
174 Йәһва Тәңрим, қутқузушқа тәшнамән
Вә Сениң Қануниңни бәк қәдирләймән.
175 Мән Сени махтап яшишим үчүн,
Маңа тирик қелишқа имканийәт бәргинә.
Сениң һәқ сотлириң маңа ярдәмгә кәлсун.
176 Мән жүтүп кәткән қойдәк адаштим:
Өз хизмәтчиңни издәп тепивалғина.
Чүнки мән вәсийәтлириңни унтумидим.
