Зәбур 136:1—26
136 Йәһваға миннәтдарлиқ билдүрүңлар,
Чүнки У яхшилиқ Қилғучи,
Униң вапа муһәббити әбәдий-әбәт!
2 Илаһлар Илаһини мәдһийиләңлар,
Униң вапа меһир-муһәббити мәңгүгә.
3 Егиләрниң Егисини махтаңлар,
Униң вапа муһәббити бақийға.
4 Пәқәт У ялғуз улуқ мөҗүзиләрни қилиду,
Чүнки Униң вапа сөйүми мәңгү.
5 У асманларни данишмәнлик билән яратти,
Сәвәви, Униң вапа сөйүми әбәдий.
6 У йәр-зиминни сулар үстидә мустәһкәм
Қилди, чүнки Униң вападар
Көйүми әбәттин-әбәт болиду.
7 У бүйүк йоруқлуқларни иҗат қилди,
Сәвәви, Униң вапа сөйүми мәңгүгә.
8 Бири — қуяш, күндүзни башқуруш үчүн,
Чүнки Униң вапа муһәббити та әбәт.
9 Башқилири — ай билән юлтузлар
Кечини башқуруш үчүн, чүнки
Униң вапа көйүми әбәдийдур.
10 У Мисирни тунҗилири арқилиқ җазалиди,
Чүнки Униң вапа меһри мәңгү.
11 Униң арисидин Исраилни чиқарди,
Униң вапа меһир-муһәббити бақий.
12 Күчлүк қоли вә көтирилгән булҗуңи
Билән бу ишни бәҗирди, сәвәви,
Униң шәпқити әсирләр бойи.
13 У Қизил деңизни оттуридин қақ иккигә
Ярди, чүнки Униң рәһими мәңгүгә.
14 Исраилни униң арисидин өткүзди,
Чүнки Униң шәпқити түгимәйду.
15 Пирәвн билән униң чоң әскирини
Қизил деңизға чөкүрди, чүнки
Униң вапа муһәббити әбәдий.
16 У Өз хәлқини чөл-җәзиридин өткүзди,
Униң вапа сөйүми мәңгүлүктур.
17 Қудрәтлик һөкүмранларни мәғлупқа
Учратти, чүнки Униң вапа
Меһир-муһәббити та әбәттур.
18 Униң вапа сөйүми әсирләр давамида,
У мәшһур шаһларни йоқ қиливәтти:
19 Аморий шаһи Сихонни,
Сәвәви, Униң вапа меһри мәңгү,
20 Шундақла Башан шаһи Огни,
Чүнки Униң вапа көйүми әбәдий.
21 У уларниң йерини мирасқа бәрди,
Чүнки Униң вапа шәпқити бақий.
22 Зиминини Өз қули Исраилға тапшурди,
Сәвәви, Униң вапалиғи мәңгүгә.
23 У бизни пәсәйгән вақтимизда есиға
Алғанди, чүнки Униң вапалиғи әбәт.
24 Бизни дүшмәнләрдин қутулдурди,
Униң вапа муһәббити мәңгүгә.
25 У пүткүл тирик мәвҗудатқа тамақ бериду,
Чүнки Униң садиқлиғи мәңгү.
26 Әршләрниң Худайини мәдһийиләңлар
Һәм Униңға миннәтдар болуңлар, Униң
Вапа меһир-муһәббити әсирдин-әсиргә!
