Йәрәмия 33:1—26
33 Йәрәмия техи қамақта күзәтчиләр һойлисида тутулғанда, униңға иккинчи қетим Йәһва мураҗиәт қилди:
2 «Йәрниң Яратқучи Йәһва уни яритип, униңда ейтқанлирини орунлаш үчүн тәстиқлигән. Униң исми — Йәһва. Йәһва мундақ дәйду:
3 “Мени чақирғин һәм Мән саңа җавап беримән — сән билмәйдиған йепиқлиқ вә муһим нәрсини саңа ечип беримән”».
4 «Мана немини Исраилниң Худайи Йәһва ушбу шәһәр өйлири вә Йәһуда падишалириниң сарайлирини бузуп, дүшмәнниң қоршав догилиридин һәм қиличидин сақлиниш үчүн,
5 шундақла халдийлар билән җәң қилишқа маңған кишиләрниң җәсәтлири билән толған өйләр һәққидә дәйду, чүнки Мән шәһәрдин йүзүмни өрүп, уларниң барлиқ әйиплири үчүн ғәзивимдә җазалидим:
6 “Мана, Мән мошу шәһәрни сақайтимән һәм у сағлам болиду. Мән қайтидин хәлиқни давалап, униңға мәртлик билән һәқиқәтни һәм течлиқни тәғдим қилимән.
7 Мән Йәһуданиң һәм Исраилниң сүргүнини йоқитип, уларни авалқидәк мустәһкәмләймән.
8 Уларни алдимда қилған гуналириниң әйивидин тазилап, Маңа қарши қилған қанунсизлиқлирини әпу қилимән.
9 Бу шәһәрниң нами Маңа йеқимлиқ болуп, йәрниң барлиқ хәлиқлири Мән Өз хәлқимгә қилған меһирлигим үчүн Мени махтап мәдһийиләйду. Шундақла улар Мән бу шәһәргә билдүргән илтипатим һәм течлиғим тоғрилиқ аңлап, қорқушуп, титрәп кетиду”».
10 «Йәһва мундақ дәйду: “Силәр чөл дәп атаватқан йәрдә, адәмләр һәм өй җаниварлири йоқ йәрдә, Йәһудияниң шәһәрлиридә вә Йерусалимниң чөлдәригән кочилирида,
11 яңливаштин хошаллиқ һәм шатлиқ авазлири, той жигити һәм қизиниң үнлири аңлиниду: “Қошунлар Сәрдари Йәһваға миннәтдарлиқ билдүриңлар, чүнки Йәһва меһрибан, Униң вапа сөйүми әбәдийдур!”
“Кишиләр Йәһваниң ибадәтханисиға шүкүр қурбанлирини әкелидиған болиду, чүнки Мән ушбу йәрниң тутқунға елинған аһалисини қайтуримән. Һәммә нәрсә әслигә келиду”,— дәйду Йәһва».
12 «Йәһва Сәрдар мону сөзләрни ейтмақта: “Мошу чөллүк йәрдә, йә адәмләр, йә өй җаниварлири йоқ орунда, яңливаштин падичиларниң маканлири болуп, улар яйлақларда қойлирини дәм алғузиду”.
13 “Тағдики шәһәрләрдә вә төвәндики шәһәрләрдә, җәнупта, Бениамин диярида, Йерусалимниң әтрапида вә Йәһудияниң башқа шәһәрлиридә падичилар қайтидин өзлириниң падилирини санайдиған болиду”,— дәйду Йәһва Рәбб».
14 «“Мана, шундақ күнләр келиватидуки,— дәйду Йәһва,— Мән Исраил һәм Йәһуда өйлири һәққидә ейтқан меһрибан вәдәмни әмәлгә ашуримән.
15 Шу вақитта Мән Давутқа һәққаний мирасхорни беримән вә у дурус һөкүм қилип, һәқиқәтни йәрдә тәстиқләйду.
16 Шу күнләрдә Йәһудия қутқузулиду вә Йерусалим ховупсиз яшайду. Мана, уни шу чағда қандақ атайду: Йәһва — бизниң һәққанийлиғимиз”».
17 «Йәһва мундақ дәйду: “Исраилниң тәхтидә олтиридиған Давуттин чиққан әр йоқимайду.
18 Роһанийлар-ләвийләрдин һәрқачан Мениң йүзүм алдида хизмәт қилип, көйдүрмиләрни, нан тәғдимлирини һәм башқа қурбанлиқларни әкелидиған киши дайим болиду”».
19 Йәһва Йәрәмийәгә йәнә мундақ деди:
20 «Мана немини Йәһва дәйду: “Әгәр силәр Мениң күн һәм түн һәққидә тохтамимни күн билән түн өз вақтида кәлмәс қилип өзгәртәләйдиған болсаңлар,
21 у чағда Мениң қулум Давут билән түзгән келишимимни бузалайсиләр. Чоқум униң тәхтидә олтиридиған оғли болиду вә шундақла Мениң роһанийлар-ләвийләр, Мениң хизмәткарлирим, билән келишимимни һәргиз бузалмайсиләр!
22 Асмандики қошун қанчилик сансиз болса вә деңизниң қумини санашқа болмиғандәк, Мән қулум Давутниң һәм хизмәткарлирим, ләвийләрниң, әвладини көпәйтимән!”»
23 Йәһва қайта Йәрәмияға сөзләп, мундақ деди:
24 «Ушбу хәлиқниң: “Йәһва таллиған иккила қәбилини рәт қиливетиду”,— дегинини аңлидиңму? Шундақ қилип, улар Мениң хәлқимниң әтиварини билмәй, уни хәлиқ ретидә һесаплимайду.
25 “Қандақларчә күн һәм түн һәққидә Мениң келишимим өзгәрмәс болса вә асман-йәрниң қаидилири тәврәнмәс болса,— дәйду Йәһва,—
26 шундақла Мениң Яқупниң қәбилисини һәм Давутниң әвладини рәт қилмайдиған вәдәм тәврәнмәстур. Уларниң әвлатлириниң арисида дайим Ибраһимниң, Исһақниң һәм Яқупниң әвлатлирини башқуридиған кишиләр болиду. Чүнки Мән хәлқимни тутқундин қайтуруп, уларға ич ағритимән”».
