Йәрәмия 40:1—16
40 Күзәт башлиғи Нәбузарадан Йәрәмияни тутқунға елинип, Бабилға әкетиливатқан йерусалимлиқлар һәм йәһудийлар арисидин елип, уни Рамада азатлиққа чиқарған еди. Шу Рама шәһиридә Йәрәмияға Йәһва Илаһтин сөз болди.
2 Күзәт башлиғи Йәрәмияни чәткә чиқирип, униңға: «Сениң Худайиң Йәһва бу җайни апәткә қалдурушни алдин-ала ейтқанди.
3 Мана, Йәһва ейтқинини әмәлгә ашуруватиду, чүнки силәр Йәһваға қарши гуна өткүзүп, Униңға қулақ салмидиңлар. Мана немишкә бу иш йүз бәрди.
4 Мән сениң қолуңдин кишәнләрни еливетимән. Әгәр халисаң, мениң билән Бабилға барғин һәм мән саңа ғәмхорлуқ қилимән. Әгәр халимисаң, у чағда мошу йәрдә қалғин. Мана, алдиңда пүткүл йәр-зимин. Қәйәргә баримән десәң, шу йәргә барғин»,— деди.
5 Йәрәмия техи бу тәклипниң үстидә ойлаватқанда, Нәбузарадан униңға: «Шафанниң оғли, Ахикамниң оғли Гедалияға қайт. Уни Бабилниң шаһи Йәһудия шәһәрлириниң үстидин қойди, униң билән хәлқиңниң арисида қал. Яки халиған җайиңға бар»,— деди.
Андин күзәт башлиғи униңға озуқ-түлүк вә соға бәрди.
6 Йәрәмия Ахикамниң оғли Гедалияға Мизпаға барди вә у йәрдә өз хәлқиниң ичидә маканлашти.
7 Бираз вақит өткәндин кейин шу йәрдә болған әскәр башчилири һәм уларниң адәмлири Бабил шаһиниң шу йәрни Ахикам оғли Гедалияниң һакимдарлиғиға бәргинини аңлиди. Шаһ униң беқинишиға Бабилға көчәрмигән кәмбәғәл инсанларни — әр кишиләрни, аял кишиләрни һәм балиларни бәрди.
8 Улар Гедалияниң йениға Мизпаға кәлди. Булар Нәтанияниң оғли Измаил, Қареаһниң оғуллири Йоханан вә Йонатан, Танхумәтниң оғли Серая, Нәтофаттин болған Етайниң оғуллири, Маахадин болған Йәзания вә уларниң кишилири.
9 Шафанниң оғли, Ахикамниң оғли Гедалия уларға қәсәм қилип: «Қорқмаңлар халдийларға хизмәт қилишни. Ушбу йәргә келип, Бабил шаһиға хизмәт қилиңлар һәм барлиқ нәрсә силәрдә яхши болиду.
10 Мән Мизпада қелип, бизни йоқлашқа келидиған халдийларниң алдида силәр үчүн вакаләтлик қилимән. Силәр болсаңлар шарапни, мевә-чевиләрни вә майни жиғип-қачилап, шәһәрләрдә яшаңлар»,— деди.
11 Шундақла Моабта, Аммонда, Едумда вә башқа йәрләрдә яшаватқан йәһудийлар Бабил шаһиниң Йәһудияда хәлиқниң қалдуғини қоюп, уларниң үстидин Шафан оғли, Ахикамниң оғли Гедалияни бәлгүлигинини аңлиди.
12 Шуниң билән барчә йәһудийлар қечип кәткән йәрләрдин қайтишқа башлиди. Улар Гедалия алдиға Йәһудияға, Мизпаға келишип, көплигән шарап һәм язлиқ мевиләрни топлиди.
13 Қареаһниң оғли Йоханан вә шу йәрдә болған әскәр башчилири Гедалияниң қешиға Мизпаға келип,
14 униңға: «Сән аммонлуқларниң шаһи Баалис Нәтанияниң оғли Измаилни сени өлтүрүшкә әвәткәнлигини билмәмсән?»— деди. Лекин Ахикамниң оғли Гедалия уларға ишәнмиди.
15 Қареаһниң оғли Йоханан Мизпада Гедалияға йошурун мундақ деди: «Мән берип, Нәтанияниң оғли Измаилни өлтүриветимән һәм һечким бу тоғрисида уқмайду. Немә үчүн униң сени өлтүрүветишигә һәм андин саңа жиғиливатқан Йәһудияниң турғунлириниң чечилип кетишигә йол қоюмиз? Немишкә аман қалған Йәһуданиң қалдуғи һалак болуши керәк?»
16 Лекин Ахикамниң оғли Гедалия Қареаһниң оғли Йохананға: «Буни қилма! Сән Измаил тоғрилиқ ялғанни ейтиватисән»,— дәп турувалди.
