Лавийлар 13:1—59
13 Йәһва сөзини давамлаштуруп, Муса билән Һарунға мундақ деди:
2 «Бирсиниң терисидә ишшиқ яки тәмрәткә, яки дағ пәйда болуп, мохо ярисиға айланса, у чағда уни Һарунға яки униң оғуллири, роһанийларға, елип келиш керәк.
3 Роһаний ярини көриду, униңда өскән түк ақирип кәтсә вә у теридә чоңқурлашқан болса, бу мохо яриси. Уни көргән роһаний бу кишини напак дәп җакалайду.
4 Әгәр теридики дағ ақ болуп, лекин у теридә чоңқурлашмиғандәк көрүнсә вә униңдики түк ақармиған болса, роһаний уни йәттә күн башқилардин айрим тутиду.
5 Йәттинчи күни роһаний уни көрүп, яриси өз түридә қалған болса вә теридә таримиса, роһаний шу кишини қайта йәттә күнгә айриду.
6 Йәттинчи күни у тәкрар уни қарап чиқиду. Әгәр яра кемийип вә билинмәс болған болса, роһаний у кишини пак дәп җакалайду: бу адәттики тәмрәткә. У киши кийимлирини жуюп, пакизә болиду.
7 Әгәр тәмрәткә роһаний пак дәп җакалиғандин кейин тарап кәтсә, у қайта роһанийға бериши лазим.
8 Роһаний яриниң тарап кәткинини көрүп, уни напак дәп җакалайду: бу мохо.
9 Әгәр кимдә мохо яриси болса, уни чоқум роһанийға әкелиш керәк.
10 Роһаний қарап чиқип, әгәр теридики ишшиқ ақирип вә униңдики түкму ақарса вә ишшиқта әт көрүнсә,
11 бу кона мохо болуп чиқиду. Роһаний уни напак дәп җакалайду, бирақ уни башқилардин айримайду, чүнки бу һәммигә мәлум.
12 Әгәр мохо пүткүл теридә чиқип, баштин аяққичә уни басқанлиғини роһанийниң көзлири көрсә,
13 роһаний бемарни таза дәп җакалайду; һәммә нәрсә ақарди, у пактур.
14 Әгәр униңда әт көрүнсә, у напактур.
15 Роһаний әтни көрүп, у кишини напак дәп җакалайду. Ечиқ яра напак: бу мохо.
16 Әгәр яра сақийип-йепилип ақарса, у киши роһанийға мураҗиәт қилсун.
17 Роһаний сәп селип қарап, әгәр униң мохоси ақарған болса, уни пак дәп җакалайду. У пактур.
18 Әгәр бирсиниң терисидә жириңлиқ яра пәйда болуп, андин сақийип кәтсә,
19 вә яриниң орнида ақ ишшиқ яки ақ-қизил дағ пәйда болса, у роһанийға кәлсун.
20 Роһаний қарап чиқиду вә әгәр яра теридин чоңқурирақ болса, вә униңдики түк аққа айланса, роһаний уни напак дәп җакалайду. Бу мохониң яриси, у жириңниң үстидә пәйда болди.
21 Әгәр роһаний яридики түкниң ақармиғинини вә униң теридин чоңқур әмәслигини, вә у азирақ билинсә, у шу кишини йәттә күнгә қалғанлардин айрийду.
22 Әгәр яра теридә тарқалса, роһаний уни напак дәп җакалайду: бу мохо.
23 Әгәр дағ орнида қелип тарқалмиса, бу жириңниң ишшиғи, шуңа роһаний у кишини пак дәп җакалайду.
24 Яки, әгәр бирсиниң терисидә көйүктин яра болса вә у сақайғанда, униң үстидә ақ-қизил яки ақ дағ пәйда болса,
25 вә роһаний дағдики түкниң ақарғинини вә чоңқурлашқинини көрсә, бу моходур, у көйгән җайда чиқти. Роһаний у кишини напак дәп җакалиши лазим: бу мохо яриси.
26 Әгәр роһаний дағдики түкниң ақармиғинини көрсә вә у чоңқурлашмиған болуп, билинмисә, у чағда роһаний у кишини йәттә күнгә солайду.
27 Йәттинчи күни роһаний уни қарап чиқиду, әгәр дағ теридә тарқалған болса, уни напак дәп елан қилиду: бу мохо ярисидур.
28 Әгәр дағ өз орнида қелип, теридә тарқалмиған болуп билинсә, бу көйдүргиниң ишшиғи. Роһаний уни пак дәп елан қилиду, чүнки бу көйдүргиниң ишшиғи.
29 Әгәр әр кишиниң яки аял кишиниң бешида яки иңигидә яра пәйда болса,
30 роһаний ярини көрүп, униң теригә чоңқурлашқинини вә униңдики түкниң ақ-сериқ екәнлигинини көрүп, роһаний уни напак дәп җакалайду: бу қотур, йәни башниң яки иңәкниң мохоси.
31 Әгәр роһаний қотур ярисини қарап чиқип, униң теригә чоңқурлашмиғинини, лекин униңдики түк қара әмәслигини көрсә, роһаний бу кишини йәттә күнгә солайду.
32 Йәттинчи күни роһаний ярини қарап чиқип, әгәр қотур таралмиған болса, вә униңда сериқ түк болмиса вә қотур теригә чоңқурлашмиса,
33 кесәл кишиниң чачлирини қирип чүшүрүш керәк, лекин қотур йеригә тәгмәслик лазим. Роһаний болса уни йәнә йәттә күнгә солиши шәрт.
34 Йәттинчи күни роһаний қотурни қарап чиқип, әгәр қотур теридә таралмиған вә чоңқурлашмиған болса, у кишини пак дәп елан қилиду. У киши кийимлирини жуюветиду вә таза болиду.
35 Әгәр тазилинип болғандин кейин қотур теридә таралса
36 вә роһаний буни көрсә, у чағда роһанийға сериқ чачни издәшниң һаҗити йоқ: бу киши напак.
37 Әгәр қотур таралмай, униңда қара чач пәйда болса, у чағда қотур сақайди: у киши таза, роһаний уни пак дәп елан қилиду.
38 Әгәр әр кишиниң яки аял кишиниң бәдән терисидә ақ дағлар пәйда болса,
39 вә роһаний уларниң дағлириниң түри ақуч болғинини көрсә, бу ховупсиз дағлардур: у киши пак.
40 Әгәр бирсиниң бешида чачлири чүшүп кәтсә, бу таздур: у пак.
41 Әгәр униң бешиниң пешанә тәрипидин чачлири чүшүп кәткән болса, бу тақир баштур, у пак.
42 Әгәр тақир башниң төпидә яки пешанисидә ақ-қизғуч дағ пәйда болса, бу мохони билдүриду.
43 Роһаний уни көрүп, әгәр яра ишшиғиниң ақ-қизғуч екәнлигини байқиса,
44 у чағда бу киши мохо кесилигә гириптар болди, роһаний уни напак дәп җакалиши керәк.
45 Мохо кесилигә гириптар кишиниң кийими жиртилған болуп, беши очуқ, бурути йепиқлиқ болуши керәк һәм у: “Напак! Напак!”, дәп вақириши шәрт.
46 Ағриған вақитниң давамида у дайим напак, барлиқ вақит напак. У айрим яшиши керәк, униң макани станниң сиртида болуши лазим.
47 Әгәр мохо яриси жуң яки зиғир кийимдә пәйда болса,
48 яки зиғир йә жуң жипидә болса, яки терә буюмда,
49 вә асастики, йәни жиптики яки терә буюмда дағ йешилғуч яки қизғуч болса, бу мохо яриси, уни роһанийға көрситиш керәк.
50 Роһаний бу ярини қарап чиқип, у кийимни яки буюмни йәттә күнгә айрип, бөләк қойиду.
51 Йәттинчи күни роһаний ярини байқайду вә әгәр яра кийимдә яки жипта, яки теридә яки қандақту бир теридин ясалған буюмда тарқалған болса, бу напак яра, интайин жуқумлуқ мохо.
52 Роһаний бу яра бар затни көйдүрүветиши керәк: бу интайин жуқумлуқ мохо яриси, уни отта көйдүрүветиш лазим.
53 Әгәр роһаний яриниң кийимдә, жипта яки қандақла болмисун терә буюмида тарқалмиғанлиғини көрсә,
54 у чағда у яра бар нәрсини жуйғузуп, иккинчи қетим йәттә күнгә бөләк қойиду.
55 Әгәр жуюлғандин кейин яра өз түрини өзгәртмигинини роһаний көрсә, һәтта у тарқалмиған болсиму, уни отта көйдүрүветиш керәк, бу буюмниң ичини яки тешини йегән яридур.
56 Әгәр жуюлғандин кейин яра билинмәс болуп қалған болса, роһаний уни кийимдин, теридин, асастин, йәни жипидин жулуп ташлиши керәк.
57 Әгәр шу кийимдә яки буюмда йәнә яра пәйда болса, бу униң тарқалғинини билдүриду: уни отта көйдүривәт.
58 Әгәр кийимдин, жиптин яки терә буюмидин жуйғандин кейин яра чүшүп кәтсә, уларни иккинчи қетим жуюш керәк вә улар таза болиду.
59 Мана, жуң яки зиғир кийимдики, яки асастики, йәни жиптики, яки терә заттики мохо яриси һәққидә қанун. Униң асасида роһаний буюмларни пак яки напак дәп елан қилиду».
