Лавийлар 15:1—33
15 Йәһва Худа Муса билән Һарунға мундақ деди:
2 «Исраил оғуллириға баян қилиңлар: “Әгәр бирсиниң бәдинидин сүюқлуқ ақса, мошу сәвәптин у киши напак.
3 Мана, сүюқлуқтин болудиған напаклиқ һәққидә қанун: әгәр бирсиниң бәдинидин сүюқлуқ ақса яки әзасидин сүюқлуқ чиқса, бу униң напаклиғи.
4 Сүюқлуғи ақидиған киши ятқан һәрқандақ орун напак вә у олтарған һәрқандақ зат напактур.
5 Кимду-ким униң ятқан орниға тәккән болса, өз кийимлирини жуюши вә өзини жуюши һаҗәт. У кәчқурунғичә напак болиду.
6 Кимду-ким сүюқлуғи аққан кишиниң бир затиға олтарса, у өзини вә кийимлирини жуюши керәк. У кәчқурунғичә напак болиду.
7 Кимду-ким сүюқлуғи аққан кишигә тәккән болса, өз кийимлирини вә өзини су билән жуюши лазим. У кәчқурунғичә напак болиду.
8 Әгәр сүюқлуғи аққан киши пак кишигә түкәрсә, пак киши кийимлирини һәм өзини жуюши лазим. У кәчқурунғичә напак болиду.
9 Сүюқлуғи аққан киши олтарған һәрқандақ егәр-тоқум напак болиду.
10 У кишиниң астида болған һәрқандақ затқа тәккән киши кәчқурунғичә напак болиду. Буни көтәргән һәрким кийимлирини вә өзини су билән жуюп, кәчқурунғичә напак болиду.
11 Сүюқлуғи аққан киши қоллирини жуймай, бирсигә тегип кәтсә, шу киши жуюнуп һәм кийимлирини жуюши керәк. У кәчқурунғичә напак болиду.
12 Ақмиси бар киши сапал қачиға тәгсә, у қачини чеқиветиш керәк. Яғач қача болса, уни жуюш керәк.
13 Ақмиси болған киши униңдин қутулғанда, тазилиниши үчүн йәттә күнни санап, андин кийимлирини вә өзини булақ сүйи билән жуюши лазим. Шу чағда у пак болиду.
14 Сәккизинчи күни у өзигә икки пахтәкни яки икки яш кәптәрни елип, учришиш чедириниң киришигә Йәһва алдиға келип, уларни роһанийға тапшуруши лазим.
15 Роһаний болса бу қушлардин бирсини гуна қурбанлиғиға, йәнә бирсини көйдүрмигә әкелип, шундақларчә уни Йәһва алдида сүюқлиғи еқишидин тазилайду.
16 Әгәр әр кишиниң уруғиниң ақмиси болуп қалса, у өзини пүтүнләй жуюши керәк. У кәчқурунғичә напак болиду.
17 Уруқниң ақмиси тәккән һәрқандақ кийим вә терә су билән жуюлуши лазим. Улар кәчқурунғичә напак болиду.
18 Әгәр әр аяли билән йетип, уруғиниң ақмиси болса, улар иккилиси су билән жуюнуши керәк. Улар кәчқурунғичә напак болиду.
19 Әгәр аял кишиниң бәдинидин етәк кири ақса, у тазилиниватқан йәттә күн бойи напак санилиду. Униңға тәккән һәрким кәчқурунғичә напак болиду.
20 Аял киши бу вақитта ятқан яки олтарған һәммә нәрсә напак болиду.
21 Униң орун-йотқиниға тәккән һәрким өз кийимлирини һәм өзини жуюши лазим. У кәчқурунғичә напак болиду.
22 Аял киши олтарған һәрқандақ нәрсигә тәккән һәрким өз кийимлирини жуюп, өзиму жуюниши керәк. У кәчқурунғичә напак болиду.
23 Әгәр бирси униң орун-йотқиниға яки олтарған җайиға тегип кәтсә, у кәчқурунғичә напактур.
24 Әгәр ери аяли билән йеқинлашқанда, аялиниң етәк кири келип қалса, ериму йәттә күн напак болиду. У ятқан һәрқандақ орун-йотқан напак болиду.
25 Әгәр аял кишиниң қан еқиши етәк кири вақтидин ешип кәтсә вә униң нурғунлиған күнләр қан ақмиси болса, у етәк кири вақтидәк напак һесаплиниду.
26 Напак вақтида ишлитилгән һәрқандақ орун-йотқан етәк кири кәлгән вақтидикидәк напак болиду, шундақла у олтарған һәрқандақ затму напактур.
27 Уларға тәккән һәрқандақ адәм напак болуп, кийимлирини вә өзини су билән жуюши шәрт. У кәчқурунғичә напак санилиду.
28 Аял киши қан ақмисидин қутулғандин кейин, өзигә йәттә күнни саниши лазим. Шундин кейин у пак болиду.
29 Сәккизинчи күни у икки пахтәкни яки икки яш кәптәрни елип, уларни учришиш чедириниң киришигә роһанийға апириду.
30 Роһаний болса қушларниң бирсини гуна үчүн, йәнә бирсини көйдүрмигә әкелип, уни Йәһва алдида еқиш напаклиғидин тазилайду.
31 Шундақ қилип, Исраил оғуллирини Мениң уларниң арисидики маканимни паскинлаштуруп, уларниң напаклиғидин өлүп кәтмәслиги үчүн сақлаңлар.
32 Мана, бу сүюқлуқ еқиши вә уруқ ақмиси бар кишиниң напак болуши,
33 шундақла етәк кири вақтидики аял вә ақмиси бар әр яки аял, һәм напак аял билән ятқан әр киши һәққидә қанун”».
