Лавийлар 26:1—46
26 Сәҗдә қилиш үчүн өзәңларға бутларни ясимаңлар, йериңларда түврүкләрни вә тәсвир ташларни қоймаңлар, чүнки Мән Йәһва — силәрниң Худайиңлар.
2 Шәнбилиримни сақлаңлар һәм муқәддәс җайимни һөрмәтләңлар. Мән Йәһва.
3 Әгәр силәр Мениң көрсәтмилирим бойичә иш тутсаңлар вә Мениң вәсийәтлиримни сақлап, уларни орунлисаңлар,
4 Мән өз вақтида силәргә ямғурларни яғдуримән вә йәр өз йемишлирини, даладики дәрәқләр өз мевилирини бериду.
5 Дан зираәтлири омисидин кейинла үзүмни жиғисиләр, униңдин кейин терилғу башлиниду вә силәр һосулниң молчилиғидин тойғичә нан йәйсиләр һәм йериңларда бехәтәр яшайсиләр.
6 Зиминиңларға течлиқ әвәтимән, ятисиләр вә һечким силәрни қорқатмайду, йериңлардин жиртқуч һайванларни қоғлап чиқимән һәм қилич униңда жүрмәйду.
7 Дүшмәнлириңларни қоғлаветисиләр вә улар силәрниң қиличиңлардин һалак болиду.
8 Араңлардики бәши 100 вә 100 киши 10 000 кишини қоғлайду, дүшмәнлириңлар көз алдиңларда қиличиңлардин өлиду.
9 Силәргә қарап, бәрикәтләймән вә силәрни көпәйтип, Өз келишимимни қаттиқ сақлаймән.
10 Шундақла силәр кона жилниң һосулини йәп, йеңи һосулни алғанда, конисини ташлаветисиләр.
11 Мән Өзәмниң маканимни араңларда қойимән вә Мениң җеним силәрдин жиркәнмәйду.
12 Шундақ араңларда жүрүп, силәрниң Худайиңлар болумән, силәр болсаңлар Мениң хәлқим болусиләр.
13 Мән силәрни Мисир йеридә қул болмаслиғиңлар үчүн, боюнтуруқуңларни сундуруп, бешиңларни көтирип жүрүшиңлар үчүн, у җайдин ачиққан Худайимиңлар Йәһва.
14 Әгәр Мени тиңшимисаңлар һәм барлиқ мошу вәсийәтләрни орунлимисаңлар,
15 Мениң тохтамлиримни яратмай, җанлириңлар қанунлиримдин жиркинип, барлиқ вәсийәтлиримни орунлимай, келишимимни бузсаңлар,
16 шу чағда Мәнму силәр билән шундақла иш қилимән: силәргә қорқунуч, сил кесили вә һарарәт көтирилишини әвәтимән, улар қөзлириңларни туманлаштуруп, җениңларни қийнайду, бекарға данлириңларни терисиләр вә уларни дүшмәнлириңлар йәйдиған болиду.
17 Йүзүмни силәргә қаратқанда, силәр дүшмәнлириңлардин мәғлуп болусиләр һәм улар үстүңлардин һөкүмранлиқ қилиду. Силәр болсаңлар кәйниңлардин һечким қоғлимисиму қачисиләр.
18 Әгәр мошуларниң һәммиси йүз бәргәндә Мени тиңшимисаңлар, Мән гуналириңлар үчүн җазани йәттә һәссә көпәйтимән.
19 Силәрниң тәкәббур җаһиллиғиңларни сундуримән вә асминиңларни төмүрдәк һәм йериңларни мистәк қилимән.
20 Бекарға күчүңлар кетиду, зиминиңлар өз мәһсулатини бәрмәйду, дәрәқләр өз мевилирини әкәлмәйду.
21 Әгәр мошулардин кейинму Мени тиңшимай қарши чиқсаңлар, у чағда Мән силәрни гуналириңлар үчүн йәттә һәссә артуғирақ соқумән.
22 Силәргә дала һайванлирини әвәтимән, улар силәрни житим қилип, маллириңларни йәветип кемийтиду. Нәтиҗидә йоллириңлар чөлдәрәп кетиду.
23 Әгәр ушбу һалакәтләрдин кейин түзәлмисәңлар вә Маңа қарши маңсаңлар,
24 у вақитта Мәнму аччиғимда силәргә қарши чиқип, гуналириңлар үчүн йәттә һәссә җазалаймән.
25 Келишимимни бузғанлириңлар үчүн силәргә қарши өч алидиған қилични әвәтимән. Әгәр шәһәрлириңларға мөкүвалсаңлар, силәргә кесәлликни әвәтимән вә силәр дүшмәнлириңларниң қолиға чүшисиләр.
26 Адәм балисиға мәдәт беридиған нанни йоқитиветимән, он аял бир тонурда нан пиширидиған болиду вә нанни өлчәп бериду, силәр йәйсиләр, бирақ тоймайсиләр.
27 Әгәр шу әһвалдиму Мени тиңшимай қарши чиқсаңлар,
28 Мәнму ғәзивимдә силәргә қарши чиқип, гунариңлар үчүн йәттә һәссә җазалаймән.
29 Шу чағда оғул-қизлириңларниң гөшини йәйсиләр.
30 Егизликлириңларни вәйран қилип, һәйкәллириңларни чеқиветимән вә силәрниң җәсәтлириңларни бутлириңларниң җәсәтлиригә ташлаймән. Мениң җеним силәрдин жиркиниду.
31 Шәһәрлириңларни чөл-баяванға айландуримән вә ибадәт қилидиған җайлириңларни чөлдәритимән, қурбанлиқлириңларниң хушпуриғини пуримаймән.
32 Йәр-зиминиңларни шундақ чөлдәритиветимәнки, униңға қарап, униңда маканлашқан дүшмәнлириңлар һәйран қалиду.
33 Силәрни болса хәлиқләр арисиға чечиветимән вә кәйниңлардин қилични әвәтимән, йериңлар чөлдәрәп, шәһәрлириңлар вәйран болиду.
34 Шу вақитта, йәр дәм алған дәвридә, өз шәнбилири үчүн қанаәтлиниду, силәр дүшмәнлириңлар маканида болғанда, йәр арам тапиду вә шәнбиликлирини өткүзиду.
35 Йәр ялғуз қалған вақтида арам алиду, у силәр униңда яшиғанда шәнбиликләрдә арам тапалмиған еди.
36 Аман қалғанларниң қәлбигә дүшмәнлириниң җайида қорқунучлуқ әвәтимән, йопурмақларниң шилдирлиши уларни қачтуриду, һечким қоғлимиғанда, қиличтин қачқандәк жүгрәп, жиқилиду.
37 Қиличтин қачқандәк, бир бирсигә путлишип, дүшмәнлиридин өзлиригә орун тапалмайду.
38 Шундақ қилип, хәлиқләр арисида һалак болусиләр һәм дүшмәнлириңлар зимини силәрни жутуветиду.
39 Қалғанлири өзлириниң қанунсизлиғи вә әҗдатлириниң гуналири үчүн, дүшмәнлириниң йеридә полушуп һәм тозуп кетиду.
40 Шу вақитта улар өзлириниң вә атилириниң қанунсизлиғини иқрар қилип, Маңа қаршилиқ көрситип, тәтүрлүк қилғанлиғини етирап қилиду.
41 Шуниң үчүн Мән ғәзивимдә уларға қарши меңип, дүшмәнлириниң маканиға уларни әкирдим.
Шу чағда уларниң хәтнә қилинмиған жүриги бойсунуп, өз қанунсизлиғи үчүн баһа төләйду.
42 Мән Яқуп билән келишимимни, Исһақ билән келишимимни вә Ибраһим билән келишимимни әскә алимән вә йәрниму әсләймән.
43 Шу вақитта йәр уларсиз қелип, өз шәнбилиридин қанаәт тапиду. Улар болса қанунсизлиғиға бенаән Мениң қанунлиримни яратмай, Мениң тохтамлиримни орунлимиғини үчүн баһа төләйду.
44 Улар дүшмининиң йеридә болғанда, Мән уларни яратмай, жиркинип, уларни пүтүнләй қиривәтмәймән, чүнки улар билән түзгән келишимим күчидә қелиши үчүндур. Мән Йәһва, уларниң Тәңри.
45 Өзәмниң уларниң Худаси болушум үчүн, Мисир йеридин хәлиқләрниң көзичә ачиққан әҗдатлири билән түзгән келишимимни әскә чүширимән. Мән Йәһва”».
46 Мана мошулар Пәрвәрдигар Йәһва Өзи Исраил оғуллириға Синай теғида Муса арқилиқ бәргән тохтамлири, бәлгүлимилири вә қанунлири.
