Лавийлар 6:1—30
6 Йәһва Худа Мусаға мундақ деди:
2 «Әгәр бирси Йәһваниң алдида қилмиш ясап, өз йенидики кишигә қилған нәрсидин тенип кәтсә яки уни иқрар қилмиса: аманәт қилинған яки у йошурувалған нәрсидә, яки йеқинини алдиса,
3 яки жүтүрүлгән нәрсини тепивелип, уни қайтурмиса, яки инсанлар адәттә гуна қилидиған нәрсиләрдә ялған қәсәм ичсә,
4 бу чағда у гуна қилип, әйиплик болуп қалиду, у оғрилиған нәрсини қайтуруп бериши шәрт, яки тартивалған, яки аманәткә берилгән нәрсини қайтуруши лазим.
5 Әгәр бир нәрсидә у алдап қәсәм қилған болса, әйип қурбанлиғини әкелидиған вақитта азап чәккәнгә уни пүтүнләй қайтуруши керәк, йәнә униңға бәшинчи қисимни қошуп бериши шәрт.
6 Өз әйиви үчүн Йәһваға Униң роһанийи арқилиқ падисидин нуқсансиз қойни сениң баһалишиң бойичә қурбанлиққа бериши керәк.
7 Шундақ қилип роһаний уни Йәһваниң алдида тазилайду вә у немила қилған болса һәм немидила әйипкар болса, у кәчүрүлиду».
8 Йәһва Мусаға сөзини давамлаштуруп:
9 «Һарун билән униң оғуллириға вәсийәт қилғин: “Мана, көйдүрмә қурбанлиғи һәққидә қанун — көйдүрмә қурбангаһта пүтүн түн сәһәргичә көйсун вә қурбангаһ оти униңда өчүрүлмәй янсун.
10 Роһаний зиғир кийим кийсун вә өз тенигә зиғир ичкийим көйнәк кийсун, қурбангаһта отта көйдүрүлгән көйдүрминиң күлини елип, униң йениға қойсун.
11 Андин кийимлирини йешип, башқа кийимләрни кийип, күлни станниң тешиға, бир пакиз җайға ачиқип төксун.
12 Қурбангаһтики от болса көйүп, һечқачан өчмисун. Роһаний униңда һәр әтигәнлиги отунларни көйдүрсун вә көйдүрмә қурбанлиғини уларға қоюп, течлиқ қурбанлиғиниң йеғини көйдүрсун.
13 От қурбангаһта дайим көйүп, өчмисун.
14 Мана, нан һәдийәси һәққидә қанун: Һарунниң оғуллири уни Йәһва алдиға қурбангаһқа әкелиши шәрт.
15 Роһаний очуми билән нан һәдийәсини вә буғдай унидин, майдин вә қурбанлиқтики барлиқ мәстәкни елип, қурбангаһта көйдүрсүн: бу хатирә үчүн Йәһваниң алдида йеқимлиқ хушпурақлиқ.
16 Буниңдин қалғинини Һарун билән оғуллири йесун. Петирни муқәддәс җайда йейиш лазим, уни учришиш чедириниң һойлисида истимал қилиш шәрт.
17 Буниңдин хемиртуручлуқ нәрсини пиширишкә болмайду. Буни Мән силәргә Өзәмниң қурбанлиқлиридин несивиңларға бәргинимдур. Бу гуна һәм әйип қурбанлиқлиридәк улуқ муқәддәслик.
18 Һарунниң әр әвлатлириниң барлиғи уни йейәләйду. Бу Йәһва қурбанлиқлиридин силәрниң әвлатлириңларға берилгән мәңгү несип. Уларға тәккән барлиқ нәрсә муқәддәслиниду”».
19 Йәһва Мусаға сөзини давам қилип:
20 «Мана, Һарун һәм униң оғуллириниң уларни майлиған күни Йәһваға усунудиған һәдийәси: қурбанлиққа әкелидиған буғдай уни ефасиниң онинчи қисми, униң бир бөлиги әтигәнликкә вә иккинчи бөлиги кәчқурунлуққа болсун.
21 Тавида зәйтун мейида у тәйярлиниши керәк, нан һәдийәси парчиларға кесилгинидәк, униму парчилап, майға миләп елип кәл, уни Йәһваға йеқимлиқ хушпурақлиқтәк әкәл.
22 Шундақла Һарунниң орниға униң оғуллиридин болған роһанийму мошуниң һәммисини қилиши лазим: бу Йәһваға әбәдий мәнсүп нәрсә. Онинчи қисимниң һәммиси көйдүрүлиши һаҗәт.
23 Роһанийдин болған һәрқандақ нан һәдийәси көйдүрүлишкә тәәлуқ: уни йейишкә болмайду».
24 Йәһва Муса билән сөзләп:
25 «Һарун билән оғуллириға ейт: “Мана гуна қурбанлиғи һәққидә қанун. Гуна үчүн қурбанлиқ Йәһва алдида көйдүрмә қурбанлиғи боғузлинидиған җайда боғузлиниши керәк. Бу улуқ муқәддәслик.
26 Гуна үчүн қурбанлиқни әкелидиған роһаний уни йейиши керәк, у муқәддәс җайда, учришиш чедириниң һойлисида йейилиши керәк.
27 Униң гөшигә тәккән һәрнәрсә муқәддәслиниду, әгәр униң қени билән кийим булғанса, уни муқәддәс җайда жуюш керәк.
28 У пиширилгән сапал қачини чеқиветиш керәк, әгәр у мис қачида пиширилгән болса, уни тазилап, су билән жуюветиш лазим.
29 Роһаний әвладиниң барлиқ әрлири уни йесә болиду: бу Йәһваниң бүйүк муқәддәслигидур.
30 Муқәддәс җайни тазилаш үчүн, учришиш чедириға қени әкирилгән гуна қурбанлиғини йейишкә болмайду, уни отта көйдүрүветиш һаҗәт.
