Падишалар 1-язма 7:1—51
7 Сулайман өз өйини 13 жил салди. Өйини пүтәргәндә,
2 Либан орманлиғи дәп аталди бу имарәт. Бу өйниң узунлиғи 100 җәйнәк, кәңлиги 50 җәйнәк вә егизлиги 30 җәйнәк болуп, у кедр яғичидин болған төрт қатар түврүкләрдә қариғай лимларни қойди.
3 Бу лимлар қатарларниң һәрқайсисида 15 түврүктин болған 45 түврүкниң үстигә қоюлуп, кедр яғичидин едән билән қапланди.
4 У йәрдә үч қатар деризиләр ясалди, деризә деризигә қарши.
5 Барлиқ ишикләр билән уларниң янлири төртбулуңлуқ болди, деризә деризигә қарши үч қатарда еди.
6 Түврүкләрдин ибарәт айванни у узунлиғи 50 җәйнәк, кәңлиги 30 җәйнәк қилип, униң алдида түврүклүк пешайванни салди.
7 Шундақла Сулайман һөкүм чиқиридиған үчүн тәхт ясап, һакимлиқ ханини қурди. У униң едәнидин башлап торусиғичә кедр яғичи билән қаплиди.
8 Сулайман яшайдиған өй болса башқа һойлида, һакимлиқ ханиси бар бенадин башқа йәрдә болуп, шуниңдәкла селинған еди. Өзигә хотунлуққа алған пирәвнниң қизиниң өйидиму мошундақ айван бар еди.
9 Барлиқ беналар һулидин башлап торусиғичә, сирт тәрипидин башлап йоған һойлиғичә, йонулған йоған есил ташлардин ясалған еди.
10 Өйниң һулиға йоған еғир ташлар қоюлди, уларниң бәзилири 10 җәйнәк, бәзилири 8 җәйнәк көләмдә еди.
11 Беналарниң үсти һәрбир өлчәмдә йонулған қиммәт ташлардин вә кедр лимлиридин еди.
12 Йоған һойла Йәһваниң айвини бар кичик һойлисидәк йонулған үч қатар ташлардин вә бир қатар кедр лимлиридин қоршалған еди.
13 Сулайман падиша кишиләрни әвәтип, Тирдин Хирамни әкәлгүзди.
14 У Нәпталим қәбилисидин болған тул аялниң оғли еди, униң атиси тирлиқ болуп, мисчи еди. Хирам даналиққа вә чүшәнчигә толған, мис билән ишләштә маһир уста еди. У Сулайман падишаға келип, униң һозурида һәрхил тапшурулған ишларни атқурди.
15 У икки мис түврүкни ясиди. Һәрбир түврүк 18 җәйнәк егизликтә болуп, уларниң айлиниши 12 җәйнәк еди.
16 Түврүкләрниң бешиға мистин қуюлған икки таҗини ясиди. Уларниң егизлиги 5 җәйнәк еди.
17 Ушбу таҗилар зәнҗирләрдин ясалған торлар билән орилип безәлди. Шундақла таҗиларда 7дин оралған зәнҗирләр болди.
18 Түврүкләрдики таҗиларни йепиш үчүн, у һәрбир торниң айлинишида икки қур анарларни ясиди. Иккила таҗини шундақ зенәтлиди.
19 Айванниң түврүклириниң бешида болған таҗилар лалә гүлгә охшитилған болуп, өлчимидә 4 җәйнәктин ибарәт еди.
20 Түврүкләрниң кәңәйгән қисмида, уларда торлар болғанди, уларни чөгиләп қатар-қатар 200дин анарлар есиқлиқ еди.
21 Хирам ибадәтханиниң айвини алдида түврүкләрни турғузди. Оң тәрәптә қоюлған түврүккә Яхин (мәнаси: «У тәстиқләйду») дәп нам берилди. Сол тәрәптә қоюлған түврүккә Боаз (мәнаси: «күчидә») дәп нам берилди.
22 Ахирида түврүкләрниң үстигә лаләгүл түридә ясалған таҗиларни орнитип, шундақ қилип мәзкүр ишни түгәтти.
23 Андин у мистин дүгләк қуюлған һавузни ясиди. Униң бир четидин йәнә бирсигичә 10 җәйнәк, егизлиги 5 җәйнәк вә өлчәм жипи билән өлчигәндә айлиними 30 җәйнәк еди.
24 Униң қирлири астида бойлап 2 қатар явайи тавузлар тәсвирләнгән еди. Улар һавуз билән биргә қуюлған еди.
25 Бу көл 12 буқида туратти. Уларниң үчи шималға, үчи ғәрипкә, үчи җәнупқа, үчи шәриқкә қаратти. Һавуз уларниң үстидә туратти һәм уларниң кәйни тәрипи ичидә қалатти.
26 Бу көлниң қелинлиғи бир алқан еди, униң қирлири ечилған лалә гүлниң қирлириға охшатти. Ушбу һавуз 2000 бат суни өзигә алатти.
27 Хирам мистин 10 һарвуни ясиди, һәрқайсиниң узунлиғи 4 җәйнәк, кәңлиги 4 җәйнәк вә егизлиги 3 җәйнәк болғанди.
28 һарвулар мундақ ясалди. Уларниң ян тамлири болуп, бу тамлар пәнҗириләрниң ичигә орунлаштурулған еди.
29 Бу тамларда ширлар, буқилар һәм хурабинлар тәсвирләнгән еди. Шундақла тәсвирләр пәнҗириләрдиму болуп, улар ширлар һәм буқилар асти-үстидә башқа гүлчәмбәрләр билән безәлгән.
30 Һәрбир һарвуниң 4тин мис чақлири вә оқлири бар, уларни төртбүҗгәклик асаслар тутуп туратти. Бу асаслар һавузниң астида болуп, уларни қошуп тутидиған чәмбәрләр билән биллә қуюлған еди.
31 Һарвуниң төпә қисмида төшүк дүгләк болуп, түврүкләрниң астидәк 1,5 җәйнәк еди, лекин униң тамлири дүгләк әмәс, бәлки төртбүҗгәклик болғанди.
32 Һарвуниң астида 4 чақ болуп, уларниң оқлириниң егизлиги 1,5 җәйнәк еди.
33 Бу чақларниң қурулуми җәң һарвулириниң чақлиридәк болуп, уларниң оқлири, қазанлири, қасқанлири вә тирәклири — барлиғи қуйма еди.
34 Һәрбир һарвуниң төрт булуңида төрт асаси бар еди. Бу асаслар һарву билән бирпүтүн еди.
35 Һарвуниң төписидә 1,5 җәйнәк егизликтә дүгләк тирәкчә болатти. Булар һәммиси һарву билән бирпүтүн қуюлған еди.
36 Андин тирәкчиләрниң тахтайчилирида вә ян тамлирида Хирам хурабинлар, ширлар, пальмиларни оюп ясап, шундақла өп-чөрисигә чәмбәрләрни қилди.
37 Мошундақ қилип у 10 һарвуни ясиди. Уларниң барлиғи бир қуюлумдин, бир өлчәмдин һәм бир түрдин болди.
38 Андин у 10 мис дасни ясиди. Уларниң һәрқайси 40 бат суни ичигә елип, һәр дас 4 җәйнәк һәҗимидә болуп, һәрқайси 10 һарвуниң үстидә туратти.
39 Хирам ушбу һарвуларни мундақ орунлаштурди: 5и ибадәтханиниң оң тәрипидә, 5и сол тәрипидә, һавузни болса Худа өйиниң оң тәрипигә, җәнуп-шәрқий тәрәпкә қойди.
40 Пәйдин-пәй Хирам жуюнидиған дасларни, гүҗәкләрни вә қачиларни ясиди.
Шуниң билән Хирам Сулайман падиша тапшурмиси бойичә Йәһваниң өйигә қилған барлиқ ишлирини пүтәрди.
41 Хуласиләп ейтқанда, 2 түврүк, уларниң үстидики чөглимә таҗилар, 2 дүгләк таҗиларни йепишқа 2 тор.
42 Торларда болған 400 анар, һәрбир торда 2 қатар анарлар.
43 Һарвулардин 10и, улардики 10 дас.
44 Бир көл-һавуз вә көлниң астидики 12 буқа.
45 Шундақла даслар, гүҗәкләр вә қачилар – бу затларниң һәммисини Хирам Сулайман падишаниң буйрутмиси билән Йәһва өйигә силиқлитқан мистин ясиди.
46 Падиша буларниң барлиғини лайлиқ йәрдә, Йорданниң әтрапида, Суккот вә Сартанниң арилиғида қуйдурди.
47 Сулайман барлиқ мәзкүр затларни өз орниға қойди. Уларниң интайин көплигидин мисниң салмиғи ениқланмиди.
48 Сулайман шундақла Йәһваниң өйидики барлиқ нәрсиләрни қилғузди: алтун қурбангаһ вә тәғдим нанлирини қойидиған алтун үстәл.
49 Йәнә әң муқәддәс җайниң алдида туридиған оң тәрәптики 5 чирақдан вә сол тәрәптики 5 чирақдан сап алтундин яситилди. Униң гүллири, чирақлири вә қисқучлири алтундин ясалди.
50 Шундақла тавақлар, от өчүридиған қисқучлар, қачилар, пиялиләр вә чоғданлар һәм өйниң ичкиридики әң муқәддәс ханиниң вә ибадәтханиниң ишиклириниң тәгликлири таза алтундин ясалди.
51 Шундақларчә Сулайман падиша Йәһва Худаниң өйи үчүн қилған ишниң барлиғи пүтти. Андин Сулайман күмүч билән алтунни вә атиси Давут тәрипидин беғишланған барлиқ затларни әкелип, Йәһва өйиниң ғәзнисигә өткүзди.
