Падишалар 2-язма 13:1—25
13 Йәһуда падишаси Ахазияниң оғли Йәһоашниң 23-жилида Исраилниң үстидин Самарийәдә Йәһуниң оғли Йәһоахаз падишалиқ қилишқа башлап, 17 жил һөкүмдарлиқ қилди.
2 У Йәһваниң көзидә йеқимсиз ишларни қилип, Исраилни гунаға патурған Набатниң оғли Йеробоамниң әйивидин нери кетәлмиди.
3 Шуниң билән Йәһваниң ғәзиви Исраилға қайнап, У уларни Сирия шаһи Хазаәлниң вә униң оғли Бәнһадатниң колиға барлиқ күнләрдә селип бәрди.
4 Йәһоахаз Йәһваниң йүзини юмшатти һәм униң авазини Йәһва аңлиди, чүнки Исраилниң Сирия қолидин тартқан азавини У көрди.
5 Йәһва Исраилға қутқазғучини тикләп бәрди. Улар сирияликләрниң қол астидин қутулуп, түнүгүн һәм алдиңқи күнләрдәк өз чедирлирида яшиди.
6 Амма улар Исраилни гунаға киргүзгән Йеробоам өйиниң әйивидин қалмай, уларниң кәйнидин жүрди. Һалбуки, Аштаротму Самарийәдә туратти.
7 Йәһоахазниң хәлиқтин пәқәт 50 чавандази, 10 җәң һарвуси вә 10 000 пиядә әскири болған еди, сәвәви Сирия шаһи уларни қийнап, йәрдики топидәк чәйләтти.
8 Йәһоахаз тоғрилиқ һәммә нәрсә, униң қилған батур ишлири һәққидә, Исраил падишалириниң тарихнамилиридә пүтүлгән.
9 Ахири Йәһоахаз вапат болуп, өз атилири билән Самарийәгә дәпин қилинди. Униң орниға оғли Йоаш падиша болди.
10 Йәһоахазниң оғли Йоаш Йәһуда падишаси Йәһоашниң 37-жили Самарийәдә тәхткә олтирип, 16 жил һөкүмран болди.
11 Уму Йәһваниң алдида яман ишларни беҗирип, Набатниң оғли Йеробоамниң гуналириға избасарлиқ қилди.
12 Йоашниң барлиқ ишлири, униң Йәһуда падишаси Амазия билән урушқанда көрсәткән җасарити тоғрисида, Исраил падишалириниң тарихнамилиридә көрситилгән.
13 Йоаш әҗдатлириға қошулғанда, униң тәхтигә Йеробоам II олтарди. Йоаш Самарийәдә падишалар қәбридә дәпин қилинди.
14 Елиша пәйғәмбәр өлүп кетидиған кесәл билән ағривататти. Шу вақитта униң алдиға Исраил падишаси Йоаш келип, униң һалиға қарап жиғлиди: «Атам мениң, атам! Исраилниң җәң һарвуси һәм униң чавандазлири!»
15 Елиша җававән: «Қолуңға оқ-я ал»,— деди. У оқ-яни қолиға алди.
16 Пәйғәмбәр Исраил падишасиға: «Деризини шәриқ тәрәпкә қаритип ач»,— дәп тәклип қилди. У шундақ ачти.
17 Елиша: «Оқ атқин. Бу оқ Йәһва Худаниң қутқузулуши вә Сирия үстидин ғалибийәт оқи. Сән Афекта сирияликләрни йеңивалисән»,— дәп билдурди.
18 Шундақла у: «Оқларни алғин»,— дәп, Исраил падишасиға бәрди. Андин: «Йәргә ур!»— дәп буйриди. Падиша йәргә оқларни үч қетим уруп, тохтиди.
19 Худаниң адими униңға нәпрәтлинип: «Аһ, әгәр сән бәш яки алтә қетим урған болсаң, сирияликләрни ахириғичә йеңәттиң, әнди болса, уларни пәқәт үч қетим урисән!»— деди.
20 Елиша пәйғәмбәр қайтиш болди һәм уни йәрлиди. Жил башланғанда, зиминда Моаб ләшкәрлири жүрди.
21 Шу вақитта бир адәмни дәпин қиливататти, бирақ топни көрүп, җәсәтни көммәй, Елишаниң қәбригә ташлап қачти. Бу киши Елишаниң устиханлириға тәккәндә, тирилип путиға турди.
22 Сирияниң шаһи Хазаәл Йәһоахазниң барлиқ күнлиридә Исраилни қистиди.
23 Лекин Йәһва Пәрвәрдигар рәһимлик қилип, уларни айиди. У Өзиниң Ибраһим, Исһақ вә Яқуп билән түзгән келишими үчүн, уларни шу вақитта қиривәтмиди вә Өз йүзидин рәт қилмиди.
24 Ахири Сирияниң шаһи Хазаәл вапат болуп, униң орниға оғли Бәнһадат турди.
25 Йәһоахазниң оғли Йоаш Хазаәлниң оғли Бәнһадатниң қолидин жулуп, униң атиси Йәһоахазниң қолидин тартивелинған шәһәрләрни Исраилға қайтурди. Үч қетим уни Йоаш мәғлубийәткә учритип, Исраил шәһәрлирини азат қилди.
