Падишалар 2-язма 14:1—29
14 Йәһудия падишаси, Йәһоашниң оғли Амазия Исраил падишаси Йәһоахазниң оғли Йоашниң иккинчи жили һөкүмранлиқ башлиди.
2 У падиша болғанда 25 яш еди вә Йерусалимда 29 жил тәхттә олтарди. Анисиниң исми Йәһоаддан болуп, у Йерусалимдин келип чиққан еди.
3 Амазия Йәһваниң көзидә дурус иш қилатти, лекин әҗдади Давуттәк һәққаний әмәс еди. У һәммә нәрсидә атиси Йәһоаштәк иш тутатти.
4 Егизликләр мәнъий қилинмиған еди вә хәлиқ уларда қурбанлиқларни вә исриқларни әкеләтти.
5 Униң қолида падишалиқ мустәһкәмләнгәндә, у атисини өлтүргән әмәлдарларни қәтл қилди.
6 Лекин қатилларниң пәрзәнтлирини өлтүрмиди, чүнки Йәһва Рәб вәсийәт қилған Муса қануни китавида мундақ йезилған еди: «Атилар балилири үчүн өлүм җазасиға вә пәрзәнтләр атилири үчүн өлүм җазасиға тартилмаслиғи лазим. Һәрким өз қилмиши үчүн өлүм билән җазалиниши шәрт».
7 У Туз вадисида 10 000 едумлиқларни қирип, уруш билән Селани елип, униң намини Йоқтиел дәп атиди. Бүгүнки күнгичә у шундақ атилиду.
8 Шу вақитта Амазия падиша Исраилниң падишаси, Йәһуниң оғли, Йәһоахазниң оғли Йоашқа әлчиләрни әвәтип: «Чиққин, үзму-үз көрүшәйли!»— дегән тәклипни бәрди.
9 Исраилниң падишаси Йоаш Йәһуда падишаси Амазияға җававән: «Ливандики тикән чатқал Ливандики қариғайға: “Қизиңни мениң оғлумға хотунлуққа бәргин”,— дәп әлчи әвәтипту. Лекин Ливандики явайи һайванлар келип, бу тикән чатқални чәйләветипту.
10 Сән едумлиқларни вәйран қилдиң һәм жүригиң тәккабурлишип кәтти. Мәғрур болуп өйүңдә олтиривәр, немигә өз һалакитиң үчүн ушбу тәңтакалишишни қозғаватисәң? Сән жиқилисән һәм сениң билән Йәһудияму»,— деди.
11 Бирақ Амазия бу сөзләрни тиңшимиди.
Шуниң билән Исраилниң падишаси Йоаш алдиға чиқти вә улар үзму-үз Йәһудадики Бәйт-Шәмәштә учрашти.
12 Йәһудийлар исраиллиқлар тәрипидин мәғлубийәткә учрап, өз чедирлириға қечип кәтти.
13 Шуниң билән Бәйт-Шәмәштә Исраилниң падишаси Йоаш Йәһуданиң падишаси Амазияни тутқунға елип, Йерусалимға барди. У Йерусалимниң сепилини 400 җәйнәк мусапида бузувәтти, Әпраийм дәрвазисидин Ташкөмүр дәрвазисиғичә.
14 У Йәһва ибадәтханиси вә падиша өйиниң ғәзнилиридики барлиқ алтун билән күмүчни вә ибадәтханиниң қачилирини һәм тутқунларни елип, Самарийәгә қайтип кәлди.
15 Йоашниң барлиқ қилған җасур паалийәтлири вә униң Йәһуда падишаси Амазия билән болған җеңи һәққидә Исраил падишалириниң тарихнамилиридә хатириләнгән.
16 Ахири Йоаш атилириға қошулуп, Самарийәдә падишалар арисида дәпин қилинди. Униң орниға падиша болуп оғли Йеробоам II турди.
17 Исраилниң падишаси, Йохазниң оғли Йоашниң вапатидин кейин Йәһуданиң падишаси Йәһоашниң оғли Амазия 15 жил һаят кәчүрди.
18 Амазияниң иш-һәрикәтлири тоғрилиқ Йәһуда падишалириниң тарихнамилиридә йезилған.
19 Йерусалимда униңға қарши келишим түзгәндә, у Лакишқа қечип кәтти. Амма униң кәйнидин Лакишқа адәм әвәтип, шу йәрдә уни өлтүрди.
20 Уни атларда әкелип, Йерусалимда, Давутниң шәһиридә, әҗдатлириниң қәбригә ятқузди.
21 Пүткүл Йәһуда хәлқи Азарияни елип, униң атиси Амазияниң орниға падиша қилди. У чағда Азария 16 яшта еди.
22 У атисиниң вапатидин кейин Елатни пүтүнләй ясап, Йәһудаға қайтуруп бәрди.
23 Йәһуданиң падишаси Йәһоашниң оғли Амазияниң 15-жили Самарийәдә Исраилниң падишаси Йәһоашниң оғли Йеробоам II падиша болди. У 41 жил һөкүмранлиқ қилди.
24 У Йәһваниң алдида йеқимсиз ишларни беҗирип, Исраил хәлқини гунаға әкиргән Набатниң оғли Йеробоамниң гуналиридин қачмиди.
25 Йеробоам II Исраилниң чегарилирини қайта тиклиди, Хаматтин башлап түзләңниң деңизиғичә. Шуниң билән Исраилниң Егиси Йәһваниң Гатхефәрдин болған пәйғәмбәр, Амиттайниң оғли Юнус арқилиқ ейтқан сөзлири орунланди.
26 Сәвәви Йәһва Исраилниң бәк аччиқ дәрдини көргән еди, чүнки Исраилда ярдәмгә келидиған аҗиз, бирму киши қалмиған еди.
27 Шуниң билән Йәһва Тәңри Исраилниң исмини асман астидин йоқитишқа қарар чиқармай, әксичә, уларни Йоашниң оғли Йеробоам II арқилиқ қутулдурди.
28 Йеробоам II һәққидики вақиәләр, униң қилған һәрбий сәпәрлири вә Исраилға қайтурған Дәмәшқ һәм Йәһудадин тартивелинған Елат тоғрилиқ Исраил падишалириниң тарихнамилиридә хатириләнгән.
29 Ахири Йеробоам II атилири, Исраил падишалириға қошулуп, вапат болди. Униң орниға тәхткә оғли Зәкәрия олтарди.
