Самуилниң 2-язмиси 23:1—39
23 Ушбу сөзләр Давутниң ахирқи сөзлири еди:
«Давут, Йишайниң оғли,
Һәқиқий әр егиз көтирилгән,
Яқуп Худасиниң майланғини,
Исраилниң шеринсөзлүк иҗрачиси.
2 Йәһваниң роһи мәндә сөзлиди
Вә Униң гепи еғизимда болди.
3 Исраилниң Худаси маңа сөз қилди,
Исраилниң мәзмут Ғартеши деди:
“Әгәр инсанлар үстидин
Һөкүмранлиқ қилғучи
Худаниң һәйвитидә
Һәқ һөкүмранлиқ қилса,
4 У күн чиқиватқанда
Сәһәрдики йоруқлуқтәк,
Нурниң чақниғинидин
Булут қаплимиған самадәк,
Ямғур-йешиндин кейин
Йәрдин чиққан көктәк болиду!”
5 Худаниң алдида мениң өйүм
Техи ундақ болғини йоқ,
Лекин У мениң билән
Әбәдий келишим түзди.
Бу әһд мәккәм һәм давамлиқ,
Һәммә нәрсидә ишәшлик.
Мениң қутқузулушим бәрһәқ,
Һәтта У техи йоруқлуғини
Пүтүнләй көрсәтмигән болсиму.
6 Қанунсизларниң барлиғи болса,
Қол билән тутмайдиған,
Жулунуп ташлинидиған
Тикәнлик кокатқа охшайду.
7 Ким уларға тегишни халиса,
Калтәк һәм нәйзини қолиға алиду.
Ярамсизлар җайидила көйдүрүлиду!»
8 Давутта болған күчлүк ләшкәрләрниң исимлири төвәндикичә: Йошиб-Басшәбәт, үчиниң арисидики әң күчлүги, у тахкимонитәнлиқ болуп, бир җәңдә 800 һәрбийни қиривәтти.
9 Андин Ахохиниң оғли, Додониң оғли Елиазар еди. У Давут билән болған үч қудрәтликниң бирси болуп, улар филистиялиқларни мәсхирә қилди. Улар җәңгә жиғилғанда, исраиллиқлар чекингән еди.
10 Бирақ у туруп, филистиялиқларни һерип қалғичә қирди. Һәтта униң қоли қиличқа чаплашти вә Йәһва шу күни зор қутқузулуш бәрди. Хәлиқ Елиазарниң кәйнидин олҗини жиғивалди.
11 Андин гарарлиқ Агениң оғли Шамма еди. Филистиялиқлар йесимуқ терилгән етизлиқта топлишип жиғилғанда, хәлиқ улардин қачти.
12 У шу етизлиқта филистиялиқларни қирип, бу етизлиқни һимайә қилди. Шундақ қилип, Йәһва бүйүк қутулдурушқа имкан бәрди.
13 Мошу үчи 30 әскәрниң арисида әң асасийлири болуп, өз вақтида улар Давутниң қешиға Адуллам өңкүригә кәлгәнләр еди. Шу чағда филистиялиқларниң әскәрлири қараргаһи билән Репайимлар вадисида туратти.
14 Давут ушбу вақитта панагаһта еди, филистиялиқларниң күзәт әскири Бәйтләһәмдә болғанди.
15 Давут уссап: «Ким мени дәрвазиниң йенидики Бәйтләһәм қудуғидин су ичкүзәр?»— деди.
16 Мәзкүр үч киши филистиялиқ қараргаһқа һуҗум қилип, дәрвазилар йенидики Бәйтләһәм қудуғидин су елип, уни Давутқа йәткүзди. Амма у бу суни ичкүси кәлмәй, Йәһва үчүн төкти.
17 Давут: «Һәргиз бу ишни қилмаймән, Йәһва! Мән өз һаятиға хәтәр туғдуруп, бу суни әкәлгән әрләрниң қенини ичимәнму?»— дәп уни ичкүси кәлмиди. Мана, қандақ ишни бу үч күчлүк киши қилди!
18 Зеруяниң оғли, Йоабниң иниси Абишай 30 ләшкәрниң башчиси еди. У нәйзисини 300 дүшмәнгә каритип, уларни қиривәтти. Шуңа 30 ләшкәрниң арисида у шан-шөһрәткә егә еди.
19 У бу 30 әскәрниң башчиси һәм уларниң арисида шәрәплигирәк болсиму, амма әву үчиниң абройиға йетәлмиди.
20 Һәрбий иш-һәрикәтлири билән мәшһур болған батур, Йиһояданиң оғли Беная, Кабзеилдин еди. У Моабниң ширлири, икки интайин күчлүк һәрбийлирини, уҗуқтурди. Шундақла у қар вақтида ориға чүшкән ширни өлтүрди.
21 Беная атақлиқ зор мисирлиқ кишини һалак қилди. Мисирлиқниң қолида нәйзә болғанди, у болса униңға қарши таяқ билән чиқип, мисирлиқниң қолидики нәйзисини жулувелип, у кишиниң қурали билән уни өлтүрди.
22 Мана, мошу шәрәплик ишларни Бенайә, Йиһояданиң оғли, қилип, һелиқи үч күчлүктәк шәрәпләнди.
23 Гәрчә у 30ниң арисида атақлиқ болсиму, үч күчлүкниң мәртивисигә йәтмиди. Амма Давут уни өзиниң пасибани қилди.
24 Булардин ташқири Йоабниң иниси Асаил 30ниң ичидә еди. Шундақла бәйтләһәмлик Додониң оғли Әлханан,
25 хародлуқ Шаммаһ, хародлуқ Әлика,
26 палатлиқ Хелес, текоялиқ Икешниң оғли Һирах,
27 анатотлуқ Абиезер, хушаһлиқ Мебунай,
28 ахохлиқ Залмон, нетофатлиқ Магарай,
29 нетофатлиқ Баананиң оғли Хелеб, Бениамин оғуллириниң Гебасидин болған Рибайниң оғли Иттай,
30 пиратонлуқ Беная, Гааш вадисидин Гидай,
31 арбатитлиқ Абиалбон, бархумилиқ Азмабет,
32 шиалботлиқ Елиахба, Яшенниң оғуллири, Йонатан,
33 герарилиқ Шаммаһ, һарарлиқ Шарарниң оғли Ахиам,
34 маахилиқ Ахазбайниң оғли Елифалет, гилолиқ Ахитофелниң оғли Әлиам,
35 кармәллиқ Хесрий, арбиялиқ Паарай,
36 Зобаһтин болған Натанниң оғли Игал, гадилиқ Баний,
37 аммонлуқ Зәләк, бееротлуқ Нагарай, Зеруяниң оғли Йоабниң қурал көтәргүчилири,
38 йитриялиқ Ира, йитриялиқ Гареб,
39 хетийлиқ Урия — һәммиси болуп 37 адәм батурлар еди.
