Санлар 35:1—34
35 Йәһва Худа Йериханиң қаршилиғида турған Йорданниң йенидики Моаб түзләңликлиридә Мусаға сөз қилип, мундақ деди:
2 «Исраил оғуллириға өз мирасидин ләвийләргә яшаш үчүн шәһәрләрни вә уларниң әтрапидики яйлақларни бәрсун, дегин.
3 Шәһәрләр уларға яшашқа, яйлақлар болса, уларниң мели вә тирикчилиги билән башқа җаниварлири үчүн болиду.
4 Силәр ләвийләргә бөлүп беридиған шәһәрләрниң йенидики отлақлар шәһәр темидин барлиқ тәрәпкә 1000 җәйнәк мусапиға созулуши керәк.
5 Шәһәрниң тешида 2000 җәйнәк узунлуқта: шәриқ тәрәпкә 2000 җәйнәк, җәнуп тәрәпкә 2000 җәйнәк, деңиз тәрәпкә 2000 җәйнәк вә шимал тәрәпкә 2000 җәйнәк йәр бериңлар. Оттурисида уларниң шәһәрлири вә отлақлири җайлишиду.
6 Силәр ләвийләргә бөлүп бәргән шәһәрләрдин алтиси қатилға қечип кетишкә рухсәт қилинидиған панаһ шәһәрлири болиду. Улардин ташқири ләвийләргә йәнә 42 шәһәр берисиләр.
7 Демәк, силәр ләвийләргә бөлүп беридиған яйлақлири бар шәһәрләрниң җәми 48 болиду.
8 Исраил оғуллири ләвийләргә мирасини бөлгәндә, кимдә көп мирас болса, у җиқарақ шәһәрләрни бөлүп бериду, кимниң мираси азирақ болса, у азирақ, мирасиға қарап, шәһәрләрни бөлүп бериду».
9 Йәһва Мусаға сөзини давам қилип:
10 «Исраил оғуллириға монуни җекилигин: “Силәр Йордандин өтүп, Қанан йеригә киргәндә,
11 өзәңларға адәмни хаталишип өлтүргән қатилға қечип кетишкә мүмкин болидиған панаһ шәһәрләрни таллавелиңлар.
12 Бу шәһәрләр силәрдә қан үчүн өч алидиған туққандин қачидиған маканлар болсун. Қатил киши җәмийәтниң алдида сотлиништин авал өч алғучиниң қолидин өлүп кәтмәслиги үчүн, бу шәһәрләр болуши шәрт.
13 Силәр панаһ үчүн бөлүп беридиған шәһәрләрниң сани алтә болуши керәк.
14 Үч шәһәрни Йордан дәриясиниң бу тәрипидә, үч қалған шәһәрни Қанан йеридә бериңлар.
15 Исраил оғуллири үчүн, мусапирлар вә араңларда вақитчә яшаватқанлар үчүн бу алтә панаһ шәһәрләр болиду. У йәргә әттәй адәм өлтүрмигән кишигә қечип кетишкә имкан яритилиду.
16 Әгәр бирси төмүр қурал билән адәмни уруп өлтүрсә, у қатил, уни чоқум өлүмгә тартиш лазим.
17 Әгәр бирси қолидики таш билән бирини өлтүрсә, у қатил. Ундақ кишини чоқум өлүмгә тутуш керәк.
18 Яки қандақту-бир яғач әсвап билән бирини өлтүрсә, уму қатил. Униму өлтүрүш керәк.
19 Қан үчүн өч еливатқан туққан өзи шундақ қатилни өлтүрсә болиду. Уни учраштурғандила өзи җенини алса болиду.
20 Әгәр бирси кишини өчлүгидин яки әттәй униңға бир нәрсини атса, нәтиҗидә у киши өлүп кәтсә,
21 яки дүшмәнләрчә уни қоли билән өлтүрүвәткичә урса, урған адәмни өлүмгә мәһкүм қилиш лазим, у қатилдур. Қан төкүлгини үчүн өч еливатқан туққини уни үчратқандила өлтүриши керәк.
22 Әксичә, әгәр бир киши йәнә бирсини туюқсиз, өчсиз яки һечқандақ ойсиз униңға бир нәрсә атқан болса,
23 яки қандақту-бир ташни уни көрмәй, чүширип қоюп, йенидикини өлтүрүп қойған болса, һәм у униңға дүшмән болмай, бир яманлиқ тилимигән болса,
24 у чағда җәмийәт қатил билән қан үчүн өч алғучи арисида мошу тохтамлар бойичә һөкүм чиқириши лазим.
25 Җәмийәт бундақ қатилни өч алғучи туққанниң қолидин қутқузуши керәк. У уни қечип кәткән панаһ шәһиригә қайтуруши лазим. Қатил у җайда муқәддәс май билән майланған башроһанийниң өлүмигичә яшиши шәрт.
26 Әгәр қатил қечип кәткән шәһәрниң чегарисидин чиқип кәткән болса,
27 вә уни қан үчүн өч алғучи тепивелип өлтүривәтсә, униңда қан төкүш әйиви болмайду.
28 Сәвәви, қатил шу панаһ шәһәрдә башроһанийниң өлүмигичә яшиши керәк еди. Башроһаний өлгәндин кейин у қатил өз егилигиниң йеригә қайтип келиши керәк.
29 Мошу тохтам қанун ретидә силәргә әвлаттин-әвлатқа барлиқ маканлириңларда берилиду.
30 Әгәр бирси кишини өлтүрсә, қатилни гувачиларниң гувалиғи бойичә өлтүрүш керәк. Лекин бир гувачиниң гувалиғи йетәрлик әмәс, униң гувалиғи бойичә өлтүрүш мәнъий қилиниду.
31 Өлүмгә мәһкүм қилинған қатилниң җени үчүн төләм алмаңлар, у чоқум өлтүрүлиши лазим.
32 Шундақла панаһ шәһиригә қечип кәткән қатил үчүн, башроһанийниң өлүмидин бурун өз йеригә қайтип келиши үчүн, төләм алмаңлар.
33 Силәр яшашқа тегиш йәрни булғимаңлар, чүнки қан йәрни булғайду. Йәр пәқәт қан төккәнниң қени биләнла тазилиниду.
34 Мән араңларда яшаватқан йәрни булғашка зади болмайду! Сәвәви, Мән Йәһва Исраил оғуллириниң арисида яшаймәндур”».
