Тарихнамә 1-язма 19:1—19
19 Аммон оғуллириниң шаһи Нахаш өлгәндин кейин һәм униң оғли тәхткә олтарғанда,
2 Давут: «Нахашниң оғли Ханунға яхшилиқ қилай, чүнки униң атиси маңа рәһимлик қилған еди»,— дәп, Давут униңға тәсәлли бериш үчүн әлчиләрни әвәтти. Давутниң қуллири Аммон оғуллириниң зиминиға келип, Ханунға тәсәлли бәрмәкчи болди.
3 Шу чағда Аммон оғуллириниң бәглири Ханунға: «Наһәтки сиз Давут атиңизни һөрмәтләп, сизгә тәсәлли бәрмәкчи үчүн адәмлирини әвәтти, дәп ойлайсиз? Улар келип, сизниң йериңизни қарап чиқип, уни вәйран қилишни пайлашқа кәлмидиму?»— дәп, уни қаймуқтурди.
4 Шуниң билән Ханун Давут хизмәткарлирини елип, уларниң бурут-сақаллирини қирип чүшүрүп, кийимлириниң пешини тизиғичә кесиветип, уларни қоюп бәрди.
5 Улар һәққидә Давутқа сөз йәтти: бу кишиләрни қандақларчә шәрмәндә қилғини тоғрилиқ. Падиша уларниң алдиға адәм әвәтип: «Йерихада сақал-бурутлириңлар өскичә қелиңлар, андин қайтип келиңлар»,— деди.
6 Аммон оғуллири Давутниң көзидә өч болғанлиғини чүшәнгәндә, Ханун вә улар өзлиригә Месопотамия һәм Арам-Маака вә Зобаһтин җәң һарвуларни һәм чавандазларни яллаш үчүн 1000 талант күмүчни әвәтти.
7 Улар 32 000 һарвуни вә Мааха шаһини хәлқи билән яллиди. Булар келип, Медеба алдида қараргаһ болуп орунлашти. Аммон оғуллири шәһәрлиридин чиқишип, урушқа жүрди.
8 Буни аңлап, Давут Йоабни һәм униң қошунини әвәтти.
9 Аммон оғуллири шәһәрниң дәрвазилири алдида җәңгә тәйяр турушти, кәлгән шаһлар далада алайтән турушти.
10 Йоаб өзигә җәң һәм алдида, һәм кәйнидә болидиғинини байқап, исраиллиқлар арисидин әң күчлүкләрни таллап, уларни сирияликләргә қарши тизди.
11 Қалған хәлиқни болса, иниси Абишайға уларни Аммон оғуллириға қарши турғузушни буйриди.
12 У: «Әгәр сирияликләр мени йеңишқа башлиса, сән маңа ярдәмгә келисән, әгәр аммонлуқлар сени күчлисә, мән саңа ярдәмлишимән.
13 Мәккәм бол һәм биз хәлқимиз, Худайимизниң шәһәрлири үчүн қаттиқ туримиз вә Йәһва Униңға лайиқ нәрсини қилсун!»— дәп, мәдәт бәрди.
14 Андин Йоаб вә униңдики хәлиқ сирияликләр билән урушти вә улар униңдин қечишти.
15 Аммон оғуллири сирияликләрниң қачқинини көрүп, өзлириму униң иниси Абишайдин қачти вә шәһәргә кирип кәтти. Йоаб андин Йерусалимға қайтти.
16 Сирияликләр исраиллиқлар тәрипидин мәғлубийәткә учриғинини көрүп, әлчиләрни әвәтип, дәрияниң әву қетида яшаватқан сирияликләргә келишни әмир қилди. Уларниң сәркиси Һадад-Әзәрниң сәрдари Шовах болди.
17 Бу тоғрилиқ Давутқа йәткәндә, у барлиқ исраиллиқларни жиғип, Йордандин өтүп, уларға кәлди. Келип, уларниң қешида җайлишип, җәңгә қатар түзди. Улар униң билән урушти.
18 Ахирида сирияликләр Исраилдин қачти. Давут улардин 7000 һарвуни йоқитип, 40 000 пиядә әскәрни вә сәрдари Шовахни өлтүрүвәтти.
19 Һадад-Әзәрға беқинишлиқ ләшкәрләр Исраилдин йеңилгәнлигини етирап қилип, Давут билән яришип, униңға бойсунди. Һәм башқа сирияликләр Аммон оғуллириға ярдәмгә келишкә халимиди.
