Тарихнамә 1-язма 22:1—19
22 Падиша Давут: «Мошу йәрдә Тәңримиз Йәһваниң өйи вә Исраил үчүн көйдүрмиләр қурбангаһи болиду!»— дәп пәрман чиқарди.
2 Давут Исраил зиминида болған мусапирларни жиғип, уларни һәқ Худаниң өйиниң қурулушиға ташларни йонуш үчүн, таш үстидин ишләшкә қойди.
3 Шуңдақла Давут миқлар вә четилмилар үчүн көплигән төмүрни вә санақсиз мисни тәйярлиди.
4 Кедр яғачлири интайин нурғун топланди, чүнки сидонлуқлар һәм тирлиқлар Давутқа нурғун кедр дәрәқлирини йәткүзүп бәрди.
5 Падиша Давут: «Оғлум Сулайман техи яш һәм аҗиз, һә Йәһва үчүн селинидиған өй болса, бәк бүйүктур. У барлиқ хәлиқләр алдида шөһрәтлик һәм зенәтлик болуши лазим: демәк, мән униң үчүн һәммә нәрсини тәйярлап қоюшим керәк»,— дәтти. Шундақ қилип, Давут вапатиғичә көп нәрсини жиғди.
6 У оғли Сулайманни чақирип, униңға Исраилниң Худаси Йәһваға өй қурушни вәсийәт қилди.
7 Давут Сулайманға мундақ сөзләрни ейтти: «Оғлум! Мениң жүригимдә Пәрвәрдигарим Йәһваға атап өй селиш арминим болғанди.
8 Лекин маңа Йәһваниң сөзи болуп, мундақ нәрсә ейтилди: “Сән нурғун қан төктүң һәм чоң җәңләрни өткүздиң. Шуңа Мениң исмимға өй салма, чүнки Мениң йүзүм алдида сән көп қан төккән кишисән.
9 Мана, сениңда бир оғул туғулди, у течлиқниң адими болиду, шуңа Мән униңға әтрапидики дүшмәнлири бузмайдиған арамлиқ беримән. Шуңлашқа униң исми Сулайман болиду. Униң күнлиридә Исраилға Мән течлиқ билән хатирҗәмлик һәдийә қилимән.
10 У Мениң исмимға атап өй қуриду вә у Мениң оғлум болиду, Мән болсам униңға Ата болумән. Мән униң падишалиқ тәхтини Исраилниң үстидин мәңгүгә қойимән!”
11 Ейтмақчи, оғлум, сениң билән Йәһва болсун! Сән муваппәқийәтлик болуп, Худайиң Йәһва үчүн, У сән һәққидә ейтқандәк, өй салғин.
12 Йәһва саңа әқил билән пәм-парасәт бәрсун вә сени хәлқи Исраилни башқурушни һәм Рәббиң Йәһваниң Қанунини сақлашни үгәтсун.
13 Пәқәт Йәһва Мусаға Исраил үчүн вәсийәт қилған тохтамлири билән қаидилирини орунлайдиған болсаң, шу чағдила сән утуқлуқ болалайсән. Мәккәм һәм ғәйрәтлик бол, һечнәрсидин қорқма вә вәһимигә чүшмә!
14 Мана, мән дәрт-һәсрәтлирим ичрә Йәһваниң өйи үчүн алтундин 100 000 талант, күмүчтин 1 000 000 талант, мис билән төмүрниң саниғи йоқ, чүнки улар бәкму көп, мән яғачларни һәм ташларниму тәйярлап қойдум. Сән буниңға йәнә қошсаң болиду.
15 Сениңда ишларни бәҗиридиған яғашчилар, ташни оюп ясиғучилар, орман чапидиған вә һәрқандақ башқа ишларни атқурудиған қабилийәтлик кишиләр көптур.
16 Алтун, күмүч, мис һәм төмүрниң һесави йоқ. Тур, ишни башла вә сениң билән Йәһва болсун!»
17 Шуңдақла падиша Давут Исраил бәглириниң һәммисигә оғли Сулайманға ярдәм беришни җекилиди:
18 «Силәр билән Худайимиз Йәһва биргә әмәсму? У һәммә тәрәптин силәргә тиничлиқ бәрмидиму? Сәвәви, У қоллириңларға йәрдә истиқамәт қиливатқанларниң барлиғини берип, йәр-зимин Йәһваға һәм Униң хәлқигә беқинди.
19 Демәк, қәлбиңлар билән дилиңларни Пәрвәрдигариңлар Йәһвани издәшкә үндәп, һәққаний Худа Йәһваниң муқәддәс маканини қуруңлар! Йәһваниң исмиға атап селинған өйгә Йәһваниң келишим сандуғини вә Егимизниң муқәддәс қачилирини йөткәп орунлаштуруңлар».
