Тарихнамә 2-язма 15:1—19
15 Мәзкүр вақитта Одидниң оғли Азарияға Худаниң роһи чүшти.
2 У Асаниң алдиға чиқип, мундақ деди: «Маңа қулақ селиңлар, Аса һәм пүткүл Йәһуда билән Бениамин! Йәһва силәр биләнки, чүнки силәр Униң билән. Әгәр Уни издәйдиған болсаңлар, У силәргә Өзини тепишқа йол бериду, әгәр силәр Уни қалдурсаңлар, Уму силәрни ташлайду.
3 Нурғунлиған күнләрдә Исраилда йә һәқиқий Худа, йә тәлим бәргүчи роһаний, йә Қанун болмиди.
4 Лекин у өз қистанлиғида Худайи Йәһваға мураҗиәт қилип Уни издигәндә, шу чағда У Өзини тепишқа мүмкинчилик берәтти.
5 Ушбу вақитларда йә киргәнгә, йә чиққанға бехәтәрлик болмиған еди, чүнки йәр-зиминниң һәммә турғунлири ичидә нурғунлиған исиянлар болди.
6 Хәлиқ хәлиқ билән, шәһәр шәһәр билән урушти, чүнки Худа уларни һәртүрлүк апәтләр билән қалаймиқанчилиққа кәлтүрәтти.
7 Амма силәр чиң болуп, қоллириңлар аҗизлашмисун, сәвәви һәрикәтлириңлар үчүн баһа болиду!»
8 Аса мошу сөзләрни, Одид пәйғәмбәрниң мәзкүр бәшаритини аңлап, өзидә күч һис қилди вә Йәһуда, Бениамин йеридә вә Әпрайим теғида алған шәһәрләрдики барлиқ жиркиничликләрни жиғип, нери ташлиди. Шундақла у Йәһваниң дәһлизи алдида турған Йәһва қурбангаһини йеңилиди.
9 У Йәһуда вә Бениаминниң пүткүл қәбилилирини вә Әпрайим, Манассә вә Шимон қәбилилиридин көчүп кәлгән вә улар билән биллә яшаватқанларни жиғди. Сәвәви, Йәһва Пәрвәрдигарниң улар билән болғинини көргән көплигән исраиллиқлар уларға өткән еди.
10 Улар Асаниң падишалиқ қиливатқан 15-жилиниң үчинчи ейида Йерусалимда жиғилди.
11 Улар шу күни һайдап кәлгән олҗидин: қара малдин 700, ушшақ малдин 7000 җаниварни Йәһваға қурбанлиққа сунди.
12 Улар атилириниң Рәбби Йәһваға пүтүн жүригидин һәм пүтүн җан-дилидин мураҗиәт қилиши үчүн, келишимгә кирди.
13 Кимду-ким Исраилниң Худаси Йәһваға мураҗиәт қилмиса, чоң яки кичик, әр яки аяллиғидин қәтъий нәзәр, өлүши лазим еди.
14 Улар Йәһваға жуқури авазда үн селишип, карнәйләр билән мүңгүзләрниң челинишида қәсәм ичти.
15 Барлиқ йәһудийлар мәзкүр қәсәм түпәйлидин хошал болди, чүнки улар пүтүн қәлбидин, җанпидалиқ билән Униңға мураҗиәт қилди вә У уларға Өзини аян қилди. Йәһва уларға һәммә тәрәптин течлиқ бәрди.
16 Аса падиша өз момиси Маахани мәликә мәнсивидин мәһрум қилди, сәвәви у Аштаротни тәсвирләйдиған дәһшәтлик бир бутни ясиған еди. Аса бу бутни чепип, уни парчилап, Кедрон вадисида көйдүрүвәтти.
17 Гәрчә дөңләр Исраилда техи рәт қилинмиған болсиму, амма Аса падишаниң жүриги униң өмриниң барлиқ күнлиридә Худаға пүтүнләй вапа еди.
18 У униң атиси һәққаний Худаға беғишлиған затларни һәм өзи беғишлиған алтун-күмүч, қачиларни вә түрлүк затларни ибадәтханиға әкирди.
19 Шундақ қилип, Аса падишаниң һәтта 35-жилиғичә уруш болмиди.
